ঙসি নুংথিল পুং ২:৩০ তাবদা ভারতিয়া জনতা পার্তি (বি জে পী)গী প্রসিদেন্ত শ্রী জে.পি নাদ্দনা লুচিংবা নেসনেল দেমোক্রেতিক এল্লাইন্স(এন দি এ)গী মীহুৎ কাংবু অমা রাস্ত্রপতি ভাবন্দা রাস্ত্রপতিগা উনখ্রে অমসুং শ্রী নরেন্দ্র মোদী বি.জে.পি পার্লিয়ামেন্তরি পার্তিগী লুচিংবা ওইনা খল্লে হায়না ফোঙদোকপা চেরোল অমা পীশিনখ্রে। এন.দি.এগী দলশিংনা শৌগৎপগী চেরোলশিংশু রাস্ত্রপতিদা পীশিনখি।

মীহুৎ কাংবু অদুগী অতোপ্পা মেম্বরশিংদি বি.জে.পীগী শ্রী রাজনাথ সিংহ, শ্রী অমিত সাহ, শ্রী অশ্বিনি বৈষ্ণব অমসুং দোক্তর সি.এন মঞ্জুনাথ; তেলুগু দেসাম পার্তিগী শ্রী এন চন্দ্রবাবু নাইদু; জনাতা দল(য়ু)গী শ্রী নিতিস কুমার, শ্রী রজিব রঞ্জন সিংহ(লালান সিংহ) অমসুং শ্রী সঞ্জয় ঝা; সিব সেনাগী শ্রী একনাথ সিন্দে; জনাতা দল(এস)গী শ্রী ঐচ.দি কুমারাশ্বামী; লোক জনশক্তি পার্তি(রাম বিলাস)গী শ্রী চিরাগ পাসৱান; হিন্দুস্থান অৱাম মোর্চা(এস) শ্রী জিতান রাম মানঝি; জনসেনাগী শ্রী পাবন কলয়ান; এন.সি.পিগী শ্রী অজিত পৱার; অপ্না দল(এস)গী শ্রীমতি অনুপ্রিয়া পতেল; রাস্ত্রিয়া লোক দলগী শ্রী জয়ান্ত চৌধুরি; য়ুনাইতেদ পিপলস পার্তি লিবরেলগী শ্রী জোয়ান্তা বাসুমাতারি; অসোম ঘনা পরিসদকী শ্রী অতুল বোরা; সিক্কিম ক্রান্তিকারি মোর্চাগী শ্রী ইন্দ্র হাং সুব্বা; ওল ঝারখন্দ স্তুদেন্তস য়ুনিয়নগী শ্রী চন্দ্র প্রকাস চৌধুরি অমসুং আর.পি.আই(এ)গী শ্রী রামদাস অথাৱালে য়াওখি।

তোঙান তোঙানবা শৌগৎপগী চেরোলশিং ফংবদা রাস্ত্রপতি মশামক অপেনবা ফোঙদোকখি, বি.জে.পীনা লুচিংবা এন.দি.এ অসি মীখল মমাঙদা চুংশিন্নখিবা খ্বাইদগী চাউবা এল্লাইন্সনি অমসুং মসিনা নৌনা শেমগদৌরিবা ১৮শুবা লোক সভাদা মেজোরিতি ওইবগী ফিবমদা লৈরে অমসুং মরা চেৎপা সরকার অমা শেম্লগনি। ভারত সংবিধানগী আর্তিকল ৭৫(১)গী মখাদা পীবা শক্তি শীজিন্নদুনা শ্রী নরেন্দ্র মোদী ভারতকী প্রধান মন্ত্রী ওইনা হাপ্লে।

রাস্ত্রপতি ভাবন্দা পাংথোক্কদবা ৱাশক লৌবগী থৌরমগী তারিখ অমসুং মতম খঙহন্নবা রাস্ত্রপতিনা শ্রী নরেন্দ্র মোদীদা খঙহনখি অমসুং মহাক্কী কেন্দ্রগী মন্ত্রীমন্দলদা শরুক য়াগদবা মেম্বরশিংগী মমিং পীখৎলক্নবশু মহাক্না খঙহনখি।

****