Ka Election Commission of India mynta ka sngi ka la pynlong ia ka jingialang bad baroh ki Jylla / UT ban peit ia ka jinglong jingman jong ka shongsuk shongsain, ka jingtehlakam ia ki kam beain, ka jingkurup bad ka jingpeit bniah ia ki jaka khappud hapdeng ki jylla bad ki jaka khappud jong ka ri ha kine ki elekshon Lok Sabha bad ki elekshon sha ki iing dorbar thaw ain ha ki jylla 2024 khnang ban don ka jingjied nongmihkhmat kaba iaid beit iaid ryntih. Ka jing thmu jong kane ka jingpeit lang ia ki kam ka dei ban wanrah lang ia baroh kiba iadon bynta ha kine ki kam ha kawei ka rynsan ban don ka jingiatreilang kaba iaid beit iaid ryntih hapdeng ki ophisar jong ki jylla / UT ba marjan ha ryngkat ki kynhun Sorkar pdeng kiba iada ia ki jaka khappud. Ka Commission, ka la peit bniah ia ki bynta ba kongsan kiba iadei bad man ka jylla / UT.

Kane ka jingialang ba la ialam da u Chief Election Commissioner, Rajiv Kumar ha ryngkat ki EC, Gyanesh Kumar bad Sukhbir Singh Sandhu ka dei kaba la wan iashim bynta lang da ki ophisar na ki Jylla / UT bad ki kynhun Sorkar Pdeng kiba iada ia ki jaka khappud.

U CEC Rajiv Kumar ha ka jingai jingkren jong u, u la ban jur halor ka jingkut jingmut ka Commission ban don ka jingjied nongmihkhmat kaba hok, kaba ryntih, kaba lait na ki jingkulmar bad ki jingkhring ia ki briew ha ki rukom bym iahap, bad u la kyntu ia baroh kiba iadon bynta ha kane ka kam ba kin iatrei lang ban bat ia ka burom jong ka kam jied nongmihkhmat bad pynthikna ia ka jingiakhun kaba ryntih. U la bthah ia ki Jylla / UT ba kin pynthikna ba man u nongjied nongmihkhmat u ioh ban pyndonkam ia la ka hok khlem ka jingtieng ne ka jingshah byrngem. U CEC Kumar u la kyntu ia baroh ki Jylla / UT bad ki kynhun ban pynkylla ia ka ‘jingkut jingmut’ jong ki sha ki ‘kam’ na ka bynta ka kam jied nongmihkhmat kaba hok, kaba laitluid, kaba lait na ki jingkulmar bad ki jingpyntieng.

Ki bynta ba kongsan ba la iakren ha kane ka jingialang ki kynthup ka jingdonkam ban kyntiew ia ka jingiatreilang hapdeng ki Jylla / UT; ka jingkyrshan na ka bynta ka jingwanrah ia ki CAPF ba la pynbiang na ka bynta baroh ki Jylla / UT; ka jingkyrshan na ka bynta ka leit ka wan ki dkhot CAPF ha ki Jylla / UT ba don ha ki jaka khappud; ka jingithuh bad ka jingpeit ia ki jaka ba don jingma kiba lah ban ktah ia ka kam jied nongmihkhmat; ki sienjam ban peit ia ki jingiathut hapdeng ki jaitbynriew kumba la iohi na ki por ba la leit, bad ka jingpeit bniah ban tehlakam ia ki kam beain na ki jaka khappud. Ka Commission ka la ban jur halor ka jingkongsan jong ka jingpeit bniah ia ka jingtehlakam ia ka jingpynkit ia ki mar beain kum ki jingdih pynbuaid, ki suloi bad ki jingpynbthei na ki jaka khappud jong ka ri. Ka la bthah ban peit ia ki jaka ba rung bad mih ka kyiad bad ka pisa ha ki jaka khappud, ka jingtehlakam ia ka jingthung ia u kynja ha katto katne ki jylla.

Ka Commission ka la peit biang ia ka jingkyrshan na ka Indian Air force bad ka tnat pynher liengsuin ha ki jylla ban pynpoi ia ki kynhun pynlong elekshon sha ki jaka ba jynjar ban poi ha 11 tylli ki jylla kum ka Arunachal Pradesh, Chhattisgarh, Maharashtra. La bthah ban pynbiang ia ki jingpynshngain ban iada ia ki nongtrei seng sain pyrthei bad ki kyrtong katkum ka jingsngewthuh ia ka jingma, khamtam ha ki jylla kum ka Chhattisgarh bad Jammu & Kashmir. La iakren ruh shaphang ki jingkulmar ba dang shen ha Manipur bad ka jingktah jong kane ia ka jingpynlong ia ka jingjied nongmihkhmat kaba iaid beit ha kaba ka Commission ka la bthah ban ai jingiarap ia ki briew kiba la hap phet na la iing bad ban pynthikna ba ki ioh lad ban shim bynta ha ka kam jied nongmihkhmat.

Kine hapoh ki long ki jingbthah:

1. Kiba iadei bad ka Ain bad ka Shongsuk Shongsain
2. 1. Ki jaka talasi ha ki jaka khappud hapdeng ki jylla bad ki jaka khappud jong ka ri ban don ka jingpeitngor kaba bniah
3. 2. Ka jingiasam jingtip hapdeng ki distrik ba marjan shaphang ki runar bad ki nongpynkulmar
4. 3. Ka jingkhang ia ki jaka khappud hapdeng ki jylla ban iada na ka jingthep vote beain ha ki 48 kynta shuwa ka jingthep vote
5. 4. Ki jingialang ba man ka por hapdeng ki bor distrik kiba hap hapoh ki jaka khappud
6. 5. Ka jingpynkhlain ia ki jingiaid pahara da ki pulit ha ki distrik ba don ha ki jaka khappud.
7. 6. Ki jingbuh shuh shuh ia ki jaka talasi ha ki jaka ba biang ha ka jingiatreilang bad ki jylla ba don ha ki jaka khappud.
8. 7. Ka jingkhang ia u pud u sam jong ki jylla ha ka sngi thep vote
9. 8. Ki Excise Commissioner jong ki Jylla / UT khappud ki hap ban pynthikna ia ka jingshisha jong ki permit, bad pynlong ia ki talasi ia ki dukan die kyiad khamtam ha ki distrik khappud.
10. 9. Ka jingwan buh ha ka por kaba biang ia ki atiar bad ka jingpyntreikam ia ki Non- Bailable Warrant
11. 10. Ka jingpynshitom ia ki runar, kiba donkti ha ki kam pynkulmar ha ki por jied nongmihkhmat
12. 11. Ka jingpynbiang ia ka jingshngain jong ki nongtrei seng sain pyrthei / kyrtong katkum ka jingsngewthuh ia ki jingma

Ka jingpeit ia ka rukom pynlut pisa:

1. Ka jingtehlakam ia ka jingiaid ka kyiad, ka pisa, ki drok lyngba ki jaka khappud hapdeng ki jylla bad ki jaka khappud jong ka ri.
2. Ka jingpynkhlain jong ka jingpeit ia ki jaka talasi ha kaba la pynbiang ruh ia ki CCTV Camera
3. Ka jingtalasi lang da ki bor pulit, excise, transport, GST bad Tnat forest
4. Ka jingpeitngor ha ki jaka pynher helicopter, ki kad liengsuin, ki steshon bus bad ki steshon rel
5. Ka jingpynshitom ia kito kiba pyniaid beain ia ka kyiad bad ki drok; tehlakam ia ka jingpyniaid ia ka kyiad lieh
6. Ka jingpeit ia ki jaka ba pyniaid bha ka kyiad, ka pisa, ki drok bad ki mar ba ai ei

Ki jingbthah ia ki Kynhun Sorkar Pdeng

1. Ka jingpeit bniah ia ka jaka khappud hapdeng ka India bad Myanmar da ka Assam Rifles; khappud India Nepal da ka SSB khamtam ha ki jaka ba suk ka rung ka mih sha Nepal; ka khappud India bad Bangladesh bad ka khappud ha ka thain sepngi da ka BSF; ka khappud India bad China da ka ITBP, bad ki jylla ba khappud ia ka duriaw da ka Indian Coast Guard.
2. Ka Assam Rifles kan pynlong ia ki jingiakynduh na ka bynta ka jingiatreilang bad ki pulit jylla, CAPF, bad kiwei kiwei.
3. Ka SSB kan peitngor ia ka jaka khappud bad ka Nepal bad Bangladesh ban tehlakam ia kano kano ka kam beain, khamtam ha ki 72 kynta shuwa ka por ba la buh ban thep vote.
4. Pynthikna ka jingsngewthuh ki CAPF ia ki jinglong jingman ha ka jingiatreilang bad ki bor pyniaid shnong.
5. Ka jingpynbiang ia ki jaka talasi ha ka jingiatreilang bad ki pulit jylla

Ki Chief Secretary, DGP, Principal Secretary (Home), Pr Secretary (Excise), Chief Electoral officer bad State Police Nodal Officer jong baroh ki Jylla / UT, ki khliehduh jong ki Kynhun Sorkar Pdeng kiba trei ha ki kam iada ia ki jaka khappud kum ka Border Security Force, Assam Rifles, Sashastra Seema Bal, Indo Tibetan Border Police bad Coast Guard ha ryngkat ki khliehduh jong ka CRPF, Central CAPF nodal officer, Additional Secretary MHA bad ki nongmihkhmat na ka Tnat Iada Ri bad Tnat Rel ki la iashim bynta ha kane ka jingialang.

******