Ka Department of Personnel and Training (DOPT) jong ka Sorkar India, ha ka jingiatreilang bad ka Tnat kam ialehkai, ka la wanrah ia ki jingpynkylla ha ka jingpynrung kam, jingkyntiew, bad ki rukom ai jingmyntoi na ka bynta ki nongialehkai. Ki kyndon ba thymmai, ba la wanrah ha ka dorkhas ba la pyllait ha ka 4 tarik Lber, ki thmu ban kyntiew ia ki jingmyntoi ba kham biang, ka jinglong shai, bad ka jingkynthuplang ia baroh.

U Myntri Sorkar Pdeng ba dei khmih ia ka Tnat Kam Ialehkai, Anurag Singh Thakur u la pynbna ba ki nongialehkai kiba jop takma ha ka Khelo India mynta ki lah ban ioh kam sorkar.

U la ong “Ha ka jingpynurlong ia ka thong jong u Myntri Rangbah duh jong ngi, Narendra Modi Ji ia ka kam ialehkai kaba khlain, ka jingkyntiew ia ki samla donsap naduh ki jaka nongkyndong bad ban pynkylla ia ka kam ialehkai sha ka lad kaba ioh jingmyntoi, ki nongialehkai ha ka lympung Khelo India mynta ki lah ban ioh kam sorkar.” U la bynrap ruh “Nga sngewkmen ban pynbna ba ka Department of Personnel and Training (DoPT), ha ka jingiamir jingmut bad ka IndiaSports, ka la pynthymmai ia ki bynta kiba iadei ba ki jingai jingmyntoi ia ki nongialehkai kiba kwah kam Sorkar!”

Kane ka sienjam ba kongsan mynta ka pyniar ia ka lad sha ki nongjop takma na ka  K𝗵𝗲𝗹𝗼 𝗜𝗻𝗱𝗶𝗮 𝗚𝗮𝗺𝗲𝘀— 𝗬𝗼𝘂𝘁𝗵, 𝗨𝗻𝗶𝘃𝗲𝗿𝘀𝗶𝘁𝘆, 𝗣𝗮𝗿𝗮, bad 𝗪𝗶𝗻𝘁𝗲𝗿 𝗚𝗮𝗺𝗲𝘀 – ki lah ban ioh kam sorkar. Shuh shuh, ia ki lympung ialehkai bad ki prokram la kdew shai ban pynthikna ka jingkynthup ia baroh ha ki jingialehkai bapher bapher.

U la bynrap ba kine ki ain ba la pynthymmai kilong ka sienjam ba kongsan ha ka jingkyrshan ia ki nongialehkai jong ngi ban pynlong ia ka Bharat kaba khlain ha ki kam ialehkai.

Hapoh ki kyndon ba la pynthymmai, ki briew kiba tbit ha ki lympung ialehkai kum ka Khelo India Youth Games (na ka bynta ki nongiashim bynta kiba 18 snem shaneng), Khelo India Winter Games, Khelo India Para Games, bad ka Khelo India University Games mynta kin ioh kam sorkar. Shuh shuh, ki nongjop ha ka School Games Federation of India ruh kin don ka lad ban ioh ia kine ki kyrdan.

Ka jingkynthup ha ki kyndon ba la pynthymmai kadei ka jingsdang jong ka kyndon kaba shai na ka bynta ki jingiakop chess ha ka ri bad shabar ri, da ka jingpynthikna ia kijuh ki lad ia ki nongialehkai chess. Shuh shuh, ki briew kiba la mihkhmat ia ka ri lane ka jylla ha ki lympung ialehkai shabar ri lane ha ka ri, lane kiba la jop ha ki lympung junior ha ka ri, ki don ka lad ioh kam. Ka jingbuh kyrdan kaba ryntih katkum ki jingjop ha ki kam ialehkai ka dei ka ban bud khnang ban sngewthuh iano ban jied shuwa.

Ban pyniaid beit iaid ryntih ia ka kam na ka bynta ki nongialehkai ban ioh ia ki jingmyntoi, la pynthymmai ia ka thup jong ki bor ba dei peit ia ka jingai certificate ban pynshisha ia ka jingioh lad ki nongialehkai ban ioh kam. Mynta, ki Secretary jong ki National Sports Federations (na ka bynta ki lympung ialehkai shabar ri), ki Secretary jong ki State Association (na ka bynta ki lympung ialehkai hapoh ri), bad ki Dean lane ki Sports Officer jong ki Skul bah (na ka bynta ki inter-University tournament), bad kiwei kiwei, ki don ka bor ban ai ia kum kine ki certificate.

Ha ka sienjam ba kongsan, la ithuh ia ka Khelo India Games kum ka lympung ialehkai ba kongsan jong ka ri, da kaba iasoh bad ki kyrdan jong kiwei kiwei ki jingialehkai bad ki jingiakhun.

****