প্ৰধানমন্ত্ৰী শ্ৰী নৰেন্দ্ৰ মোদীয়ে ২৯ ফেব্ৰুৱাৰী, ২০২৪ তাৰিখে আবেলি ৪ বজাত ‘ভিডিঅ' কনফাৰেন্স’-ৰ জৰিয়তে 'বিকশিত ভাৰত বিকশিত মধ্য প্ৰদেশ' কাৰ্যসূচীত ভাষণ প্ৰদান কৰিব।  এই কাৰ্যসূচীৰ সময়ত প্ৰধানমন্ত্ৰীয়ে এলানি প্ৰকল্পৰ আধাৰশিলা স্থাপন কৰিব আৰু সমগ্ৰ মধ্যপ্ৰদেশত প্ৰায় ১৭,০০০ কোটি টকা ব্যয়সাপেক্ষ একাধিক উন্নয়নমূলক প্ৰকল্প ৰাষ্ট্ৰলৈ উৎসৰ্গা কৰিব। এই প্ৰকল্পসমূহে জলসিঞ্চন, বিদ্যুৎ, পথ, ৰে'ল, পানী যোগান, কয়লা, উদ্যোগকে ধৰি কেবাটাও খণ্ডই গুৰুত্বপূৰ্ণ গতি লাভ কৰিব। প্ৰধানমন্ত্ৰীয়ে মধ্যপ্ৰদেশত ‘চাইবাৰ তহচিল প্ৰকল্প’ও আৰম্ভ কৰিব।

প্ৰধানমন্ত্ৰীয়ে মধ্যপ্ৰদেশত ৫৫০০ কোটি টকাৰো অধিক মূল্যৰ জলসিঞ্চন প্ৰকল্পৰ আধাৰশিলা স্থাপন কৰিব। এই প্ৰকল্পসমূহৰ ভিতৰত আছে ‘উজনি নৰ্মদা প্ৰকল্প’, ‘ৰাঘৱপুৰ বহুমুখী প্ৰকল্প’, ‘বাসনিয়া বহুমুখী প্ৰকল্প’। এই প্ৰকল্পসমূহে দিনডোৰী, অনুপপুৰ আৰু মাণ্ডলা জিলাৰ ৭৫,০০০ হেক্টৰৰো অধিক কৃষিভূমিত জলসিঞ্চনৰ দিহা কৰাৰ লগতে অঞ্চলটোত বিদ্যুৎ যোগান আৰু খোৱা পানীৰ প্ৰবহণ বৃদ্ধি কৰিব। প্ৰধানমন্ত্ৰীয়ে ৰাজ্যখনত ৮০০ কোটিতকৈয়ো অধিক বিনিয়োগৰে নিৰ্মাণ কৰা দুটা ক্ষুদ্ৰ জলসিঞ্চন প্ৰকল্পও দেশবাসীলৈ উৎসৰ্গা কৰিব। প্ৰকল্পকেইটা হৈছে ‘পৰশদোহ ক্ষুদ্ৰ জলসিঞ্চন প্ৰকল্প’ আৰু ‘আউলিয়া মাইক্ৰ' জলসিঞ্চন প্ৰকল্প’। এই ক্ষুদ্ৰ জলসিঞ্চন প্ৰকল্পসমূহে বেতুল আৰু খাণ্ডৱা জিলাৰ ২৬,০০০ হেক্টৰৰো অধিক কৃষিভূমিৰ প্ৰয়োজনীয়তা পূৰণ কৰিব।

প্ৰধানমন্ত্ৰীয়ে ২২০০ কোটি টকাতকৈয়ো অধিক ব্যয়েৰে নিৰ্মাণ কৰা তিনিটা ৰে'ল প্ৰকল্প ৰাষ্ট্ৰলৈ উৎসৰ্গা কৰিব। প্ৰকল্পকেইটাৰ ভিতৰত আছে ‘বিৰঙ্গনা লক্ষ্মীবাই ঝান্সি – জাখলাউন আৰু ধৌৰা – আগাচোড় পথৰ তৃতীয় পথ প্ৰকল্প’; ‘নিউ চুমাওলি-জোৰা আলাপুৰ ৰে’লপথত গজ ৰূপান্তৰণ প্ৰকল্প’; আৰু ‘পোৱাৰখেড়া-জুঝাৰপুৰ ৰে'লপথৰ ফ্লাইঅভাৰ নিৰ্মাণ প্ৰকল্প’। এই প্ৰকল্পসমূহে ৰে'লৰ সংযোগ উন্নত কৰিব আৰু অঞ্চলটোৰ আৰ্থ-সামাজিক বিকাশত অৰিহণা যোগাব।

ৰাজ্যখনৰ ঔদ্যোগিক বিকাশত গতি প্ৰদান কৰাৰ বাবে প্ৰধানমন্ত্ৰীয়ে সমগ্ৰ মধ্যপ্ৰদেশত প্ৰায় ১০০০ কোটি টকাৰ একাধিক ঔদ্যোগিক প্ৰকল্পৰো আধাৰশিলা স্থাপন কৰিব। প্ৰকল্পসমূহৰ ভিতৰত আছে মোৰেনা জিলাৰ ‘সীতাপুৰত মেগা লেডাৰ, ফুটৱেৰ আৰু আনুষঙ্গিক ক্লাষ্টাৰ’; ইন্দোৰত পোছাক উদ্যোগৰ বাবে ‘প্লাগ এণ্ড প্লে’ পাৰ্ক’; ‘ইণ্ডাষ্ট্ৰিয়েল পাৰ্ক মাণ্ডসৌৰ’ (জগ্গাখেড়ি পৰ্যায়-২); আৰু ধাৰ জিলাৰ ‘ঔদ্যোগিক উদ্যান পিথামপুৰ’ৰ উন্নীতকৰণ।

প্ৰধানমন্ত্ৰীয়ে ‘জয়ন্ত অ'চিপি চিএইচপি চাইলো’, ‘এনচিএল চিংৰাউলি আৰু দুধিচুয়া অচিপি চিএইচপি-চাইলো’কে ধৰি ১০০০ কোটিতকৈয়ো অধিক মূল্যৰ কয়লা খণ্ডৰ প্ৰকল্পসমূহ ৰাষ্ট্ৰৰ নামত উচৰ্গা কৰিব।

মধ্যপ্ৰদেশৰ শক্তিখণ্ডক শক্তিশালী কৰাৰ উদ্দেশ্যে পান্না, ৰাইচেন, ছিন্দৱাৰা আৰু নৰ্মদাপুৰম জিলাত স্থাপন কৰিবলৈ লোৱা ছটা উপকেন্দ্ৰৰ আধাৰশিলা স্থাপন কৰিব প্ৰধানমন্ত্ৰীয়ে। এই উপকেন্দ্ৰসমূহে ৰাজ্যখনৰ এঘাৰখন জিলা যেনে ভূপাল, পান্না, ৰাইচেন, ছিন্দৱাৰা, নৰ্মদাপুৰম, বিদিশা, সাগৰ, দামোহ, ছত্ৰপুৰ, হাৰদা আৰু চেহোৰৰ অঞ্চলটোৰ লোকসকলক উপকৃত কৰিব। উপকেন্দ্ৰসমূহে ‘মাণ্ডিদীপ ঔদ্যোগিক ক্ষেত্ৰ’ৰ উদ্যোগসমূহকো লাভান্বিত কৰিব।

প্ৰধানমন্ত্ৰীয়ে ‘অম্ৰুত ২.০’ৰ অধীনত প্ৰায় ৮৮০ কোটি টকাৰ বিভিন্ন প্ৰকল্প আৰু ৰাজ্যৰ কেবাখনো জিলাত পানী যোগান প্ৰণালী সম্প্ৰসাৰণ আৰু শক্তিশালী কৰাৰ বাবে অন্যান্য আঁচনিৰ আধাৰশিলা স্থাপন কৰিব। প্ৰধানমন্ত্ৰীয়ে খাৰ্গোনত পানীৰ যোগান বৃদ্ধিৰ বাবে নিৰ্মাণ কৰা প্ৰকল্পটো ৰাষ্ট্ৰৰ নামত উচৰ্গা কৰিব।

চৰকাৰী সেৱা প্ৰদানৰ মান উন্নত কৰাৰ দিশত এক পদক্ষেপ হিচাপে, মধ্য প্ৰদেশৰ ‘চাইবাৰ তহচিল প্ৰকল্প’ই কাগজবিহীন, মুখ নেদেখাকৈ কাম সম্পাদন কৰা, সম্পূৰ্ণ খাছৰাৰ বিক্ৰী-ক্ৰয় প্ৰক্ৰিয়া অনলাইনেৰে নিষ্পত্তি কৰা আৰু ৰাজহ অভিলেখত তথ্যৰ সংশোধন নিশ্চিত কৰিব। ৰাজ্যখনৰ ৫৫খন জিলাৰ কেউখনতে ৰূপায়ণ কৰা এই প্ৰকল্পটোৱে সমগ্ৰ মধ্যপ্ৰদেশৰ বাবে একক ৰাজহ আদালতো প্ৰদান কৰিব। ই আবেদনকাৰীলৈ চূড়ান্ত নিৰ্দেশৰ প্ৰমাণিত প্ৰতিলিপি প্ৰেৰণৰ বাবে ইমেইল/ হোৱাটছএপ ব্যৱহাৰ কৰে।

প্ৰধানমন্ত্ৰীয়ে মধ্যপ্ৰদেশৰ কেবাটাও গুৰুত্বপূৰ্ণ পথ প্ৰকল্পৰো আধাৰশিলা স্থাপন কৰিব।

এই প্ৰকল্পসমূহৰ শুভাৰম্ভই মধ্যপ্ৰদেশত আন্তঃগাঁথনি, আৰ্থসামাজিক উন্নয়ন আৰু স্বাচ্ছন্দ্যপূৰ্ণ জীৱনধাৰণৰ ক্ষেত্ৰত এক গুৰুত্বপূৰ্ণ উদগনি প্ৰদান কৰাৰ বাবে প্ৰধানমন্ত্ৰীৰ দৃষ্টিভংগীক প্ৰতীয়মান কৰে।

****

DS/KB