U Myntri Rangbah duh Narendra Modi mynta ka sngi u la buh ka jingkyrpad na ka bynta ban pynlong ia ka kam jied nongmihkhmat kaba kham bun ki nongiashim bynta bad kyntu ia ki briew baroh ban pynsaphriang jingtip shaphang ka campaign “Mera Pehla Vote Desh Ke Liye” ha la ka jong ka rukom hapdeng ki nongthep vote ha ka sien ba nyngkong. U Myntri Rangbah duh u la iasam ia ka khubor jong u lyngba ka post ha ka X.

Hashuwa kane mynta ka sngi, u Myntri Sorkar Pdeng Anurag Thakur u la pyllait paidbah ia ka jingrwai kyrpang #MeraPehlaVoteDeshKeLiye ha ka X. Ka campaign ka thmu ban pynshlur ia ki samla nongthep vote ban pyndep ia ka hok jied nongmihkhmat jong ki.

Ia ka jingrwai kyrpang lah ban peit ha ka link harum:

https://youtu.be/JuUkj5VVGZo

Ha ka jingpynbna ia ka jingpyllait ia ka jingrwai kyrpang ha ka X u Myntri u la ong:

“U Myntri Rangbah duh jong ngi @narendramodi ji u la buh ka jingkyrpad ha ka jingai jingkren ba dang shen jong u ha ka Mann Ki Baat & katba ka ri ka dang pynkhreh na ka bynta ka kam ba heh tam jong ka synshar paidbah jong ka, Nga kyntu ia phi baroh ban iasoh bad ka campaign #MeraPehlaVoteDeshKeLiye bad pynshlur ia ki samla nongthep vote ban pyndep ia ka hok jied nongmihkhmat jong ki.

Kane kadei ka jingrwai ba kyrpang #MeraPehlaVoteDeshKeLiye sngap ia ka hangne bad iasam ruh sha baroh.

To ngin rah shakhmat ia ka campaign ha la ki jong ki rukom.

To ngin shim ia kane ka jingkitkhlieh bad rakhe ia ka bor kaba ngi don lyngba ki lad online

@mygovindia bad ha ki kolej!”

Ka jingrwai kyrpang kadei ka sienjam ban nohsynniang sha ka campaign ba la sdang da ka Election Commission of India na ka bynta ka jingai jingtip ia ki nongthep vote. Haba kren shaphang ka campaign ha ka jingai jingkren jong u ha ka Mann Ki Baat, u Myntri Rangbah duh Narendra Modi u la ong ba ka campaign ka phaikhmat ban pynshlur ia ki nongthep vote ha ka sien ba nyngkong ban iamih paidbah ban iashim bynta ha ka kam jied nongmihkhmat. U la bynrap ba ka Bharat ka sngewsarong ia ka bor jong ki samla jong ka kaba dap da ka jingthrang bad ka bor bad katba nang bun ki samla ba iashim bynta katta ka nang bha ia ka ri.

U Myntri Rangbah duh u la ong shuh shuh ba ka Lok Sabha kaba 18 kan long ka dak jong ki jingangnud jong ki samla bad kane ka la kyntiew bun shah ia ka bor jong ka vote jong ki samla. U Myntri Rangbah duh u la kyrpad ruh ia ki influencer jong ka ri ha ka Instagram bad YouTube, na ki kam shna phlim, naduh ki jingthoh bad ki briew kiba trei ha kiwei kiwei ki kam ban iashim bynta shithrem ha kane ka campaign bad ban ai mynsiem ia ki nongthep vote ha ka sien ba nyngkong.

*****