U Myntri Sorkar Pdeng ba dei khmih ia ka tnat Information and Broadcasting, Anurag Thakur mynta ka sngi u la plié paidbah ia ka bynta kaba 28 jong ka International Conference and Exhibition on Broadcast and Media Technology ha New Delhi. Ha ka jingai jingkren jong u, u Myntri u la ong ba ka tnat Information and Broadcasting ka dei ka nongiada jong ki kam broadcasting jong ka India kaba ialam lynti ia kane ka kam hapdeng ki jingkylla da ka jingshemphang bad ka jingstad. Ka jingieng skhem jong ka ban kyntiew ia ki jingai jingshakri ki kam broadcasting ia ki paidbah, ka jingthaw bad jingpyntreikam ia ki polisi ba pdiang lang ia baroh, ki sienjam ban ai jinghikai shaphang ki kam media bad ki jingiatreilang bad ki kynhun shimet ha ki kam broadcasting ka la buh ia ka nongrim na ka bynta ka jinglong jingman kaba khlain bad kaba pdiang lang ia baroh ha ki kam broadcasting bad media ha India, kaba long kaba iar, kaba ai jingtip bad kaba don jingbahkhlieh.

U  Myntri u la kyntu ban don ka jingpynkhlain ia ki kam broadcasting na ka bynta ki paidbah khnang ban pynbiang ia ki prokram kiba bha na ka bynta ki jingdonkam ba iar jong ka ri da kaba ong ba ka India ka dei ban prat ka lynti kaba kyrpang ialade, da kaba ithuh ia ka deiriti kaba iar bad kaba riewspah jong ngi. U la ong ruh ba ka Prasar Bharati ka la don ka bynta kaba heh ha ka jingtei ia ka khana shaphang ka ri jong ngi. “Na ki screen black and white jong ka Doordarshan sha ka HD bad mynta ka 4K ka jingkylla ha ki kam digital, na ka analog Medium Wave sha ka DRM bad mynta ka FM jong ka Akashvani, ka programming ba iar jong ka Doordarshan bad All India Radio ka la ai jingtip, jinghikai bad pynbyrnia ia ki pateng ki briew jong ka India. Na ka juk analog sha ka digital kaba iar mynta, ki broadcaster jong ngi ki la iaid ia ka lynti da kaba pyni ia ka jingskhem jingmut, ka jingsaindur thymmai bad ka jingkut jingmut ban ai ka jingshakri kaba biang tam,” u la ong.

U Thakur u la ong ba ki jingiaid shaphrang ha ki kam teknoloji ki wanrah ia ki lad bad ki jingeh bad ka jingdawa ia ki prokram kiba bha bad kiba iahap bad ki briew ha ki rynsan bapher bapher ka la kiew. Namar kane, ka jingpyndonkam ia ki mar broadcasting ba thymmai tam ka long kaba donkam bha. Da kaba ong ba ka long kaba donkam ban pynshlur ia ka jingwad bniah ha ka ri, ka jingkyntiew ia ki sap science bad ka jingtei ia ki jingiatreilang hapdeng ki kompani bad ki nongai jinghikai, u la ong ba ki kam jong ngi mynta kin iarap bha ia ka jingpynurlong ia ka jingthmu jong ngi ban don ka jinglah kyrshan ialade ha ki kam broadcasting.

U Myntri u la ong shuh shuh bad ki teknoloji New Direct to Mobile (D2M) ki wanrah shibun ki lad ban pynmih prokram na ka bynta ka television bad ruh na ka bynta ki - Mobile phone ba lah ban iohi ha kano kano ka por ha kano kano ka jaka, kata ruh khlem da donkam ia ka internet. Ngi dei ban peit ia ki lad ki lynti ba saindur thymmai ha ki kam broadcasting kum ka Next Gen broadcasting ka ban pynthikna ia ka jingpynsaphriang shuh shuh ia ki prokram sha baroh ki bynta jong ka imlang sahlang bad ruh ki jingplie lad ia ka jingshem ba kylla man ka por jong ki nongpeit.

U la kren ruh shaphang ka jingkongsan jong ka jingshngain ha ka data bad u la ong ba ha kane ka pyrthei kaba dang pyniasoh shuh shuh, ka jingiada ia ka data ka long kaba kongsan tam. Ki sienjam jong ka India ban wanrah ia ki jingpynbeit na ka ri ha kaba iadei bad ka cyber-security ka dei ka dak jong ka jingkut jingmut jong ngi na ka bynta ka jingshngain ha ka data kaba iahap bad ki kyndon Data Protection ha kylleng ka pyrthei. Katba ngi pyndonkam ia ka bor jong ka teknoloji ban wanrah ia ka jingsaindur thymmai ha ki kam broadcasting, to ngin pynthikna ba ngi niewkor ia ka jingiada ia ki jingtip ba kongsan bad ngin ym klet ia ki sienjam ba donkam na ka bynta ka jingshngain jong ki jingdon jingem digital jong ngi.

U Myntri u la pynkynmaw ia kiba wan iashim bynta ha kane ka sngi shaphang ka jingbahkhlieh na ka bynta ka mariang bad u la ong ba ka jingpdiang ia ki rukom treikam ba iaineh ha ki kam broadcasting kam dei tang ka jingbahkhlieh kaba donkam hynrei ka long ruh ka jingdonkam na ka bynta ka lawei. Da kaba pynduna ia ka jingpynmih ia ka carbon bad ki jaboh jabain, ngi lah ban ialam lynti ha ki sienjam jong ka pyrthei kum ka "Green Broadcasting" project jong ka ABU. Ka jingwad bniah bad ka jingkyntiew ka India ia ki mar broadcast ba iaid da ka bording solar bad ki studio ba tyngkai ia ka bording ki buh ia ngi ha ka kyrdan jong ki nongialam ha ki kam bording ba iaineh kaba pyni ia ka jingieng skhem jong ngi na ka bynta ka mariang, u la ong.

Da kaba kdew sha ki jingkylla ha ki kam media ha kaba ki briew ki la phaikhmat sha ki rynsan OTT bad ha kaba ki dawa ia ki prokram ba ki sngew iahap, u Thakur u la ong ba ngi dei ban pdiang ia kane ka jingkylla bad pyniahap ialade bad kane. Ka jingpynkhreh kam jong ngi ban pynmih prokram, ka jingpdiang ia ki teknoloji ba thymmai tam bad ki kyndon ki donkam ban kylla stet ban iahap bad kane ka jinglong jingman ba kylla man ka por.

Ha kajuh ka por, u Myntri u la ong ruh ba ki kyndon kiba iadei bad ki prokram ki donkam ia ka jingpeit bniah. Ka jingwanrah ia ka jingryntih hapdeng ka hok ban kren kylluid mynsiem ha ryngkat ka jingbat ia ki jingngeit tynrai ha ka imlang sahlang ka long kaba kongsan. Ngi dei ban wanrah ia ka jinglong jingman ha kaba ka jingsaindur ka iaid hapoh ki pud ba iahap da kaba pynthikna ia ka jingbahkhlieh.

Ha ka jingkren shaphang kane ka bynta jong ka Expo, u Thakur u la ong ba ka BES Expo ka dei ka rynsan kaba biang bha na ka bynta kane ka jingiatreilang kaba kongsan bha jong ka jingiasam ia ki jingnang jingstad, ka jingiasam ia ki jingmut jingpyrkhat, bad ka jingtei ia ki jingiatreilang ki ban tei ia ka lawei jong ki kam broadcasting.

U Sanjay Jaju, Secretary, ka tnat I&B ha ka jingai jingkren jong u, u la ong ba ka Tnat ka sngewthuh ia ka jingdonkam ban iada ia ka bha ka miat jong ki nongpeit bad ruh ka jingshai ha ki kam media bad kumta ka la wanrah ia ka draft broadcast services (Regulation) Bill 2023 na ka bynta ka jingiamir jingmut.

U Chairman, TRAI, Anil Kumar Lahoti u la ban jur bha ba ki kam broadcasting ki don shibun ki lad ki lynti ban kiew shaphrang.

U Gaurav Dwivedi, CEO, Prasar Bharati u la ai jingkren ha kane ka sngi ha kaba u la ong ba ki don ki jingkylla ba stet ha ki kam media khamtam ha ka rukom peit ki briew ia ki prokram. U la ong ba kane ka la wanrah ia ka jingdonkam ia ki prokram ba bha namar ki nongpeit mynta ki lah ban jied napdeng ki prokram kiba bun. U la ban jur ruh halor ka jingdonkam ban buh kyrpang ia ka spectrum na ka bynta ka jingai jingtip ia ki paidbah. Ha ka jingai jingkren pdiang sngewbha, u Sunil, President, BES u la kren shaphang ki jingeh ba ki media ki iakynduh namar ki jingkylla ha ki teknoloji ba thymmai kum ka D2M.