প্রধান মন্ত্রী শ্রী নরেন্দ্র মোদীগী স্কুল মহৈরোয়শিং, ওজাশিং অমদি মমা মপাশিংগী ৱারী ৱাতায় শানবগী থৌরম “পরিক্ষা পে চর্চা ২০২৪”গী ৭শুবা তাঙ্কক্কীদমক, ঙসি ফাওবদা, মাইগোভ পোর্তেলদা মীওই করোর ১ হেনবনা রেজিস্তর তৌরকখ্রে‍। মসিনা লৈবাক শিনবা থুংনা মহৈরোয়শিংগী মরক্তা লৈরিবা মথুম মরাং হৌবা, তোপ তোপ্পা থৌরমসিদা শরুক য়ানিংবা অমদি প্রধান মন্ত্রীগা ৱারী শাননিংবগী লাংতক্নবা মতৌ উৎলি‍।

প্রধান মন্ত্রী শ্রী নরেন্দ্র মোদীনা লৈবাক শিনবা থুংবা অমদি মপান লৈবাকশিংদগীসু য়াওনা মহৈরোয়, মমা মপাশিং, অমদি ওজাশিংগা ৱারী শাদুনা মখোয়না চাংয়েং অমদি স্কুলগী মতুংগী পুন্সিগা মরী লৈননা থেংনরিবা পুক্নিং চরাংনবশিং খন্নবগী তোপ তোপ্পা থৌরম – পরিক্ষা পে চর্চা (পি.পি.সি.) – অসি হৌদোকখিবনি‍। থৌরম অসি হৌখিবা চহি তরুকসিদা মহৈ মশিং মন্ত্রালয়গী দিপার্তমেন্ত ওফ স্কুল এজুকেসন এন্দ লিতরেসীনা মায় পাক্না পাঙথোক্তুনা লাকপনি‍।

চহি অসিগী ওইনা থৌরম অসি ভারত মন্দপম, ITPO, প্রগতী মৈদান, নই দিল্লীদা জনুৱারী ২৯, ২০২৪গী অয়ুক পুং ১১ তাবা মতমদগী হৌরগা তাউন-হোলগী মওংদা পাঙথোক্কনি‍। থৌরম অসিদা মীওই ৪০০ রোম্না প্রধান মন্ত্রীগা ৱারী শাগনি‍। স্তেত অমদি য়ু.তি. খুদিংদগী মহৈরোয় অনি অমদি ওজা অমমম লোয়ননা কালা উতসব অমসুং ভীর গাথা কম্পিতিসনগী অথোয়বশিংবু মপুং ওইবা থৌরম অসিগী অখন্নবা মীথুং ওইনা শরুক য়ানবা পাউকৎ পীরবা য়াই‍।

ওনলাইন MCQ কম্পিতিসন অসিদা ক্লাস ৬ তগী ১২ ফাওবগী মহৈরোয়শিং, ওজাশিং, অমদি মমা মপাশিংনা শরুক য়াবা য়ানবগীদমক মাইগোভ পোর্তেলদা দিসেম্বর ১১, ২০২৩দগী জনুৱারী ১২, ২০২৪ ফাওবা হাংদুনা লৈগনি‍। জনুৱারী ৫, ২০২৪ ফাওবদা, মহৈরোয় লাখ ৯০ হেনবা, ওজা লাখ ৮ হেনবা অমদি মমা মপা লাখ ২ রোম্না রেজিস্তর তৌরক্লে‍।

পরিক্ষা পে চর্চা অসি নহাশিংগীদমক ৱাখল ৱাবা লৈতবা ফীভম অমা শেম্নবগীদমক প্রধান মন্ত্রীনা লুচিংবা হেন্না চাউবা ইহৌ - ‘একজাম ৱারিয়র্স’কী শরুক অমনি‍। মসি অঙাং খুদিংগী তোপ তোপ্পা শক্তমবু শকখঙবিগদবা, পুক্নিং থৌগৎপিগদবা অমদি মপুং ফানা ফোঙদোকচবা ঙমহনবিগদবা ফীভম অমা পুরক্নবগীদমক মহৈরোয়, মমা মপা, ওজা অমদি খুন্নাইবু পুনশিন্ননবা প্রধান মন্ত্রীগী থৌরাংদা থৌদুনা পুবা ইহৌ অমনি‍। ইহৌ অসি প্রধান মন্ত্রী নরেন্দ্র মোদীগী হান্না চৎনরিবা মতৌ হোংদোকহনবা ঙম্বা, মশিং খ্বায়দগী হেন্না য়াম্না য়োনখিবা লাইরিক ‘একজাম ৱারিয়র্স’না পুক্নিং থৌগৎপনি‍।

মসিদা মীৎয়েঙ থম্লগা, মপুং ওইবা থৌরমগী মাঙওইননা পাঙথোকপা থৌরম অমা ওইনা জনুৱারী ১২, ২০২৪, হায়বদি য়ুথ দে নুমিত্তগী হৌরগা জনুৱারী ২৩, ২০২৪ ফাওবা, মরাথোন লমজেল, ঈশৈ চাংদম্নবা, মিম চাংদম্নবা, স্ত্রীত প্লে, মহৈরোয়-এঙ্কর-মহৈরোয়-মীথুং খন্ন-নৈনবা থৌরম্নচিংবা নুংঙাইরবা থবক থৌওংশিং য়াওবা থৌরম কয়া স্কুলগী থাক্তা পাঙথোক্কনি‍। অরোয়বা নুমিৎ, জনুৱারী ২৩, ২০২৪দা, হায়বদি নেতাজী সুভাসচন্দ্র বোসকী মপোক কুমওন নুমিত্তা, লৈবাক শিনবা থুংনা দিস্ত্রিক্ত ৫০০দা লাই য়েকপা চাংদম্নবগী থৌরম পাঙথোক্কনি‍। হীরমশিংগী মনুংদা চন্দ্রয়ান, ভারতকী শান্ন-খোৎনবগী মায় পাকপানচিংবা, চাংয়েংশিং অসি পুন্সিগী কুমহৈগুম্না উৎপা য়াবা হীরমশিং য়াওগনি‍।

মাইগোভ পোর্তেলদা মখোয়না খুম্লকপা ৱাহংশিংগী পাউখুমদা য়ুম্ফম ওসরগা শরুক য়ারিবা মীওস ২৫০ রোম খনগৎকনি অমদি প্রধান মন্ত্রীনা ইবা হিন্দী অমদি ইংলিসকী একজাম ৱারিয়র্স লাইরিক, অমসুং শকখঙচে অমা য়াওবা অখন্নবা পরিক্ষা পে চর্চা কিত লান্থোক্কনি‍।

***