নুংশিরবা ঐগী ইরৈচাশিং,

খুরুমজরি!

৭৫শুবা রিপব্লিক দে মাঙওইননা মীয়ামদা ঐগী য়াইফ-পাউজেল পীজরি। খুদোংথিবা কয়া মায়োকনরসু ঐনা হন্না য়েংবদা অমসুং ঐখোয় কয়া য়াম্না লাপ্না লাকলবগে হায়বা খঙবদা ঐগী থম্মোয় অসি চাউথোকচবনা থল্লে। ৭৫শুবা রিপব্লিক দে অসি হিরম কয়াদা লৈবাক অসিগী খোঙচত্তা তশেংনা পুৱারি ওইরবা মাইপাকপা অমনি। মসি লৈবাক অসিনা নিংতম্বা চহি ৭৫ মপুংফারকপা ঐখোয়গী লৈবাক্কী অজাদি কা অমৃত মহোৎসব মনুংদা ঐখোয়গী তোপ-তোপ্পা অচৌবা অমসুং মখল কয়াগী নাৎ-চৎনবীশিং ঐখোয়না হরাওবা ফোঙদোকপা অখন্নবা থৌরম অমনি।

হয়েং অসি ঐখোয়না ঐখোয়গী সংবিধান চৎনবা হৌখিবা নুমিৎ হরাওবা ফোঙদোকপা নুমিৎনি। সংবিধানগী প্রিয়েম্বলদা “ ঐখোয় ভারতকী মীয়াম’ হায়বা ৱাহৈশিংনা হৌদুনা, লাইরিক অসিগী থিম দেমোক্রেসি মশক তাকখি। ভারত্তা দেমোক্রেসিগী থবক অসি নোংচুপলোমগী দেমোক্রেসিদগী হেন্না লিরে। মরম অদুনা ভারত অসি দেমোক্রেসিগী মমানি হায়নরিবনি।

মতম শাংনা লান্থেংনরবা মতুংদা ওগস্ত ১৫, ১৯৪৭ দা ভারত নিংতম্বা ফংখি। অদুবু লৈবাক অসি ঙাক্নবা অচুম্বা ফিদমশিং শেম্বা অমসুং থৌরাং তৌবা ৱাৎখি অমসুং লৈবাক অসিগী অশেংবা থৌনা ফুদোকনবা থবক হৌজিক পায়খৎলি। লৈবাক ঙাকপগী অকুপ্পা ৱাফমশিং অখন্নবা কন্সতিয়ুয়েন্ত এশেমব্লিনা চহি অহুম মতম লৌখি অমসুং ভারতকী সংবিধান পুথোকখি। ঐখোয়গী সংবিধান শেম্বদা শরুক য়াখিবা লুচিংবশিং অমসুং ওফিসিএলশিং ঙসি লৈবাক অসিনা নিংশিংলি।

নিংতম্বা চহি ১০০ গী ময়া নকশিনলকপগা লোয়ননা লৈবাক অসি অমৃত কালগী অঙনবা চহিদা লৈরি। মতম অসি অচৌবা অওনবা অমা পুরকপা অমনি। লৈবাক অসি অনৌবা থাকশিংদা পুখৎনবা ঐখোয়দা অফবা খুদোংচাবা অমা পীরে। মসিগীদমক, সংবিধান্না পীরিবা ঐখোয়গী থৌদাংশিং পাংথোক্নবা ঐনা ঐগী লৈবাক্কী মীয়ামদা হায়জরি। লৈবাক অসিনা নিংতম্বা চহি ১০০ শুরকপদা ভারত চাউখৎলবা লৈবাক অমা ওইহননবা মীয়াম্না মখোয়গী মথৌশিং পাংথোকপা তঙাইফদে। মহাত্মা গান্ধীনা হায়খিবা “হকশিং ফংনবা খক খল্লিবশিংগী মথক্তা কনা অমতা লৈতে। মথৌ পাংথোক্নবা খল্লিবা মীওইশিং খক্তা লৈগনি”।

ঐগী নুংশিরবা ইরৈচাশিং,

রিপব্লিক দে অসি ঐখোয়গী মরুওইবা গুনশিং অমসুং অচুম্বা ফিদমশিং নিংশিংনবা থৌরম অমনি। ঐখোয়না মখোয়গী মনুংদা অমা হেক্তা থবক ওইনা পাংথোকপা মতমদা, ঐখোয় মশা মরোমদোম লমজিংগনি। দেমোক্রেসিদা নাৎ, থাজবশিং অমসুং থবকশিং য়াওরি। অচুম্বনা পুরকপা মান্নবা ঐখোয়না হরাওবা ফোঙদোক্লি। নিংতম্বনা পুম্নমক অসি ওইথোকপনি। হায়রিবা গুনশিং অমসুং অচুম্বা ফিদমশিংনা ঐখোয় ভারতমচাশিং শেম্বনি। দোক্তর বি.আর অম্বেদকারনা লমজিংদুনা, সংবিধান্দা হায়রিবা গুনশিং অমসুং ফিদমশিং য়াওদুনা ঐখোয় খুন্নাইগী অচুম্বা লম্বীদা লমজিংদুনা মখল খুদিংমক্কী তাথি-তাওইনা তৌবা লোইশিনখিবনি।

খুন্নাইগী অচুম্বা পুরক্নবা চোকথবা নাইদনা হোৎনখিবা শ্রী কারপুর থাকুর জিগী মপোক কুমওন থৌরম ঙরাং পাংথোকখিবা অদু ঐনা পনবা পাম্মী। কারপুর জি লায়রবশিংগীদমক য়াইফনবা মহাক্কী পুন্সি কৎথোকখিবা শক্নাইরবা মীওই অমনি। মহাক্কী থবকশিংনা মীয়ামগী পুন্সিগী ফিবমশিং ফগৎহনবগীদমক কারপুর জিগী মফমদা ঐনা ঐগী ইকায়খুম্নবা উৎচরি।

ঐখোয়গী লৈবাক্কী চৎনবীশিংনা ঐখোয় বিল্লিয়ন ১.৪ হেনবা ইমুং অমগুম পুন্না লৈমিননরি। মালেমগী খ্বাইদগী চাউবা ইমুং অসিগীদমক, লম্মিৎ-তুমিৎকী ফিবম্না পুন্না হিংমিন্নবা নত্তে, মসি হরাওবগী হৌরকফম অমনি, মসি ঐখোয়গী রিপব্লিক দেগী থৌরমশিংদা উবা ফংগনি।

চয়োল অসিগী অঙনবদা, মহাক্কী পোক্নফম অযোধ্যাদা নৌনা শাবা লাইশঙদা ভাগবান শ্রী রামগী মীতম লেংশিনবগী পুৱারি ওইরবা থৌরম ঐখোয়না উখ্রে। থৌরম অসি অশানবা মীৎয়েং অমা য়েংবদা, ভারতনা লৈবাক অসিগী সভেত্যাগী হেরিতেচ অমুক হন্না মশক খঙবনি হায়না তুংগী পুৱারি থিজিনবশিংনা নৈনগনি। হৌজিক মসি অচৌবা লাইশঙ অমা ওইনা লৈরে অমসুং মীয়ামগী থাজবা ফজনা ফোঙদোকপা খক নত্তনা জুদিসিয়েলগী থবকশিংদা মীয়াম্না থাজবগী খুদম অমসু ওইরে।

ঐগী নুংশিরবা ইরৈচাশিং,

ঐখোয়না পুন্না অমতা ওইনা তুংলোমদা অমসুং মাঙলোমদা য়েংবা মতমদা ঐখোয়গী লৈবাক্কী কুহ্মৈশিং অসি অচৌবা থৌরমশিং ঙাক্তনি। করিগুম্বা ঐখোয়না মমাঙগী রিপব্লিক দে য়েংলবদি, অপেনবা ওইগনি। ভারতনা প্রসিদেন্ত ওইদুনা কোনুংদা জি-২০ মীফম মাইপাক্না পাংথোকখিবা অসি মমাঙদা অমুক্তা ওইখিদ্রিবা মাইপাকপনি। হেন্না শিংথানিঙাই ওইরিবদি মীয়াম্না জি-২০গী থৌরমশিং শরুক য়াখিবা মওং অদুনি। অনৌবা ৱাখলশিং অমসুং থবকশিং মথক্তগী মখাদা তাউথরকপা নত্তে, মখোঙদগী হৌরকপা ঙাক্নি। চিংলেমলবা থৌরম অদুনা মীয়াম্না অরুবা অমসুং দিপ্লোমেতিক ওইবা ৱাফমশিং শরুক য়ানবগী পারাশিং তম্বীরে অমসুং অরোইবদা মখোয় মশাগী তুংলমচৎ শেম্বা ঙমহল্লে। জি-২০ মীফম্না গ্লোভেল সাউথকী খোল্লাউ ওইনা ভারতকী ফিবম ফগৎহল্লে অমসুং মালেমগী থবক-থৌরমশিংদা দরকার ওইবা মচাক অমা হাপচিল্লে।

সংসদনা পুৱারি ওইরবা ৱুমেন্স রিজার্বেসন বিল পাস তৌদুনা নুপা-নুপী থোং মাননা লৈনবগী মাইকৈদা ঐখোয় খুমাঙ চাউশিল্লে। নারী শক্তি বন্দন অধিনিয়মনা নুপীশিং শক্তি পীনবা অওনবা খুৎলায় অমা ওইগনি হায়না ঐনা থাজৈ। ঐখোয়গী লৈবাক ঙাকপগী থবকশিং ফগৎহনগদবা য়াম্না ৱাৎলি। অপুনবা মরুওইবা থবকশিংদা নুপীশিং মশিং য়াম্না শরুক য়ারবা মতমদা, ঐখোয়গী লৈবাক ঙাকপগী মরুওইবশিং মীয়ামগী দরকার ওইবশিং হেন্না ফংহনবা ঙমগনি।

ভারতনা থাদা চৎপা মতমদা, থাগী খা-মেরু লমদমদা অহানবা ওইনা খোঙদাবা লৈবাক ওইখি। চন্দ্রয়ান-৩ মতুংদা, ইসরোনা সোলার মিসন অমসু পাংথোক্লে। ইকুই কুইদনা, অদিত্যা  এল-১ মাইপাক্না হালো ওর্বিত্তা থমখ্রে । ব্লেক হোলগুম্বা সুন্দ্রংগী অঙকপশিং থিজিন্নবা ঐখোয়গী অহানবা এক্স-রে পোলিমিতর সেতেল্লাইত এক্সপোসেত ঐখোয়না চহি হৌরকপদা থাগৎখ্রে। চৎলিবা চহি অসিদা অহেনবা স্পেস মিসন কয়া থৌরাং তৌরে। ভারতকী স্পেসকী খোঙচৎ অনৌবা মাইপাকপা কয়া পুরকপদা ঐ হরাওই। ঐখোয়গী অহানবা মীওইবা য়াওবা স্পেসফ্লাইত প্রোগ্রাম, গাগনয়ান মিসনগী শেম-শাবা মপুংফানা চৎথরি। ঐখোয়না মতম খুদিংদা ঐখোয়গী সাইন্তিস্তশিং অমসুং তেক্নোলোজিগী অখঙ-অহৈশিংগীদমক চাউথোকচবা ফাওরি, হৌজিক মখোয়না হান্নগী হেন্না ৱাংনা পানদম থম্লে অমসুং থবক ওইনশু পাংথোকপা ঙম্লে। ভারতকী স্পেসকী থবক থৌরমশিং পাকথোক-চাউথোক্লি অমসুং মীওইবা খুন্নাইগী য়াইফনবা সাইন্স অমসুং তেক্নোলোজিনা অহেনবা থৌদাং লৌরি। ইসরোগী থবকশিংদা হরাওবা ঐখোয়না লৈবাক অসিদা উরিবা অসি অপেনবা ফাওই। হিরম অসিদা অনৌবা মাইপাকপশিং অসিনা নহারোলশিংগী অনৌবা ৱাখল হেন্না ফগৎহল্লে। অঙাং মশিং য়াম্না সাইন্সতা থৱায় য়াওবা হেনগৎলক্কনি অমসুং সাইন্তিফিক ওইবা  ৱাখল্লোন চেনগনি হায়না ঐনা থাজৈ। মসিনা সাইন্স অমসুং তেক্নোলোজি শীনফম অমা ওইনবা নহারোলশিং মরুওইনা নুপীশিং ইথিল পীগনি। 

ঐগী নুংশিরবা ইরৈচাশিং,

থাজবা অমগা লোয়ননা ভারত মাঙলোমদা চঙশিল্লি অমসুং মসি অফবা শেন-থুমগী ফিবমদা মমি তারে। চহি খর অসিদা ঐখোয়গী জি.দি.পি হেনগৎলকপগী চাং অচৌবা ইকোনোমিশিংগী মরক্তা খ্বাইদগী ৱাংলে অমসুং মসিগী ফিবম অসি চৎলিবা চহি ২০২৪ অমসুং মসিগী মতুংদা মখা তানা লৈগনি হায়বগী থাজবা য়াবা মরম কয়া ঐখোয়গী লৈরি। শেন-থুমগী ফিবম ফগৎহনবা মীৎয়েং শানবা থৌশিলশিংনা কাংলুপ খুদিংমক কোনশিনবা য়াইফ-থৌরাংগী থবকশিংদা ইনোৎ অমা পীরে হায়বা ঐনা খঙলিবা অসি থাগৎনিঙাইনি। লাইচৎ মনুংদা খুন্নাইগী লায়রবা কাংলুপশিংদা লেম্না চেঙ পীবগী স্কিমশিং সরকারনা পাকথোক-চাউথোকহল্লে। মসিগী খুদোংচাবশিং অসি খুদোংথিনিঙাই ওইরবা কাংলুপকী মীওইশিংদা মখা তানা মতেং পাংলে। থবক অসি পাকথোক-চাউথোকহন্দুনা চহি মঙাগী ওইনা মীওই করোর ৮১ হেনবদা লেম্না চেঙ পীনবা সরকারনা ৱারেপ লৌরে। মসি পুৱারিদা খ্বাইদগী চাউবা য়াইফ-থৌরাংগী থবক ওইগনি।

মীয়াম হিংবদা লাইবা হেনগৎহননবা মিসন-মোদকী স্কিম কয়া লৈরে। য়ুমদা অফবা থক্নবা ঈশিং ফংহনবদগী হৌরগা কনাগুম্বা অমগী য়ুমগী সেকুরিতি ফাওবা, হায়রিবা তঙাইফদবা দরকার ওইবশিং অসি খুদোংচাবা অমা ওইহন্দ্রে। হায়রিবা থবকশিং অসি রাজনিতি নত্ত্রগা শেন্মিৎলোনগী ৱাখল্লোনগী ৱাংমদনি অমসুং মসি মীওইবা খুন্নাইগী য়াইফনবা মীৎয়েং অমদা উগদবনি। সরকারনা য়াইফ-থৌরাংগী স্কিমশিং পাকথোক-চাউথোকহনবা খক নত্তনা, মসি য়াইফ-থৌরাং মশামক্কী ৱাখল্লোন নৌনা মশক তাক্লে। য়ুম লৈতবা মীওই মশিং য়াম্না লীক্না লৈবা লৈবাক খরগী মনুংদা ভারত লৈবাক অমা ওইরকপা অসি ঐখোয় খুদিংমক চাউথোকচনবগী নুমিৎ অমা ওইরগনি। দিজিতেলগী খেন্নবশিং লৈহন্দনবা অমসুং লায়রবা মহৈরোয়শিং লাইরিক-লাইশু তম্বগী মান্নবা খুদোংচাবশিং ফংহন্নবা নেসনেল ইজুকেসন পোলিসিনা অকনবা থবক পায়খৎলে। অয়ুস্মান ভারত স্কিম্না ইন্সুরেন্স পাক-চাউনা কোনশিন্দুনা বেনিফিসরি খুদিংমক কোনশিননবা অমসুং লায়রবা অমসুং তোললবশিং অচৌবা থাজবা পীনবা পানদম থম্লি। 

ঐখোয়গী শান্নরোয়শিং মালেমগী ফম্বাক্তা ভারতকী মিংচৎ ফগৎহল্লে। হৌখিবা চহিদা পাংথোকখিবা এসিয়ান গেমসতা , ঐখোয়না পুৱারি ওইনা রেকোর্দ থুগায়দুনা মেদল ১০৭ ফংখি অমসুং এসিয়ান পেরা গেমসতা ঐখোয়না মেদল ১১১ ফংখি। ঐখোয়গী মেদল মশিংদা নুপীশিংনা য়াম্না চাউনা মতেং পাংবা উবদা ঐখোয় হরাওই। মখল কয়াগী মশান্নশিং অমসুং গেমসশিং শান্নবা অমসুং মখা মশানা মশা থাজবা হেনগৎহনবদা মতেং পাংনবা ঐখোয়গী স্পোর্তস স্তারশিংনা অঙাংশিংদা ইথিল পীরে। অনৌবা থাজবনা থল্লবা ঐখোয়গী শান্নরোয়শিংনা লাক্লিবা পেরিস ওলেম্পিক্তা ফজনা শান্নগনি হায়না ঐ থাজৈ।  

ঐগী নুংশিরবা ইরৈচাশিং,

হন্দক মালেম শীনবা থুংনা লাল কয়া থোক্লে অমসুং মালেমগী তোঙান-তোঙানবা মফমশিং হিংশাগী চৈথেং ফংলি। মুক্নরিবা নাকল অনিমক্না মখোয়না চুম্মী অমসুং অতোপ্পা নাকল অদুনা লাল্লি হায়না থাজনরি। মরম চানা মসি কোক্নবা পাম্বৈ পুথোক্কদনি। লাইবক থিবদি, মরমশিং থিদোকপগী মহুত্তা, অকিবশিং অমসুং লান্না লৌনবনা লেপ্পা নাইদনা হিংশা থোকহল্লে। পাক-শান্না মীওই কয়া অৱা-অনা নংলে অমসুং মীওইবগী অৱাবশিং উবদা ঐখোয় থম্মোয় কায়রে। অসিগুম্বা মতম অসিদা, ঐখোয়গী ভাগবান বুদ্ধগী ৱাহৈশিং নিংশিংলি:

न हि वेरेन वेरानि, सम्मन्तीध कुदाचनम्

अवेरेन च सम्मन्ति, एस धम्मो सनन्तनो

মসিনা হায়রি:

        “মতম পুম্নমক্তা য়েংথিনবদা অফবা পুরক্তে অদুবু য়েক্নবা থমদবনা নুংশিনবা পুরকই। মসি মুৎপা নাইদ্রবা আইন্নি”।

ভরধমান মহাবির অমসুং নিংথৌরেল অশোক অমসুং জাতিগী মপা মহাত্মা গান্ধী ফাওবনা, অহিংশা অসি ফংবদা ৱাবা ফিদম অমা নত্তে, মসি মীওই কয়াগী অশেংবা পুন্সি অমনি হায়না হঞ্জিন-হঞ্জিন উৎখি। মুক্নবনা থল্লবা লৈবাকশিং মুক্নবা লোইশিন্নবা অমসুং শান্তি পুরক্নবা শান্তি ওইবা পাম্বৈ অমা ফংগনি হায়না ঐখোয় থাজবা থম্লসি।

মালেমগী মহৌশাগী অৱাবশিং কোকহনবদা ভারতকী অরিবা লৌশিংনা মালেমগী মতেং পাংগনি। রিনিউএবল ইনর্জি ফংফম শেমগৎপদা ভারতনা মাঙজিল থাবা উবদা মালেমগী ক্লাইমেত এক্সনগী মাংজিল থাবদা ঐ হরাওই। মহৌশাগী অকোয়বগী ফিবমগা চুনবা পুন্সি মহিং লৈহননবা ভারতনা ‘লাইফ মিসন’ হৌদোক্লে। অইং-অশাগী খল হোংলকপা থেংননবা লনাই মীওই অমগী লমচৎ-শাজৎ অহোংবা পুরক্নবা ঐখোয়গী লৈবাক্না তকশিল্লিবা অসিদা মালেমগী মীয়াম্না থাগৎনরে। মখোয়গী পুন্সি মহিং মহৌশা লাইরেম্বীগা চুননা হিংনবা মফম খুদিংমক্তা লৈরবা মীয়াম্না মতেং পাংগদবনি। মসিনা তুংগী মীরোলশিংগীদমক মালেম অসি কনবা খক নত্তনা পুন্সিগী মগুন হেনগৎহনগনি।

ঐগী নুংশিরবা ইরৈচাশিং,

অমৃত কালগী মতম অসি মমাঙদা অমুক্তা ওইখিদ্রিবা তেক্নোলোজিগী অহোংবশিং পুরকপা মতম অমসু ওইহনগদবনি। আর্তিফিসিএল ইন্তিলিজেন্স অমসুং মেছিন লার্নিংগুম্বা তেক্নোলোজিগী খুমাঙ চাউশিনবশিং খোঙজেল য়াংনা হেদলাইনশিংদগী ঐখোয়গী নুমিৎ খুদিংগী পুন্সিদা চঙশিল্লক্লি। তুংদা খুদোংথিনিঙাই  ওইরকপা য়াবা কয়াশু লৈরে, অদুবু নহারোলশিংগী ওইনা অঙকপা খুদোচাবা কয়াশু লৈরে। মখোয়না অনৌবা হিরম কয়া থিরি। মখোয়গী লম্বীদা লৈরিবা অপনবশিং ঐখোয়না লৌথোক্কদবনি অমসুং মখোয়গী থৌনা ফুদোকহনগদবনি। মখোয়না পাম্লিবদি খুদোংচাবা চপ মাননা ফংবনি। মখোয়গী থাজবনা হয়েংগী ভারত শেমগৎলিবনি। অদুবু, নহারোলগী ৱাখল অসি লৈবাক অসিগী তুংগী অশেংবা আর্কিতেকশিং ওজাশিংনা শেম্বনি। তুমিন্না থবক কন্না শুরিবা লৈবাক অসি তুংদা হেন্না ফনবা অচৌবা থৌদাং অমা লৌরিবা ঐখোয়গী লৌমীশিং অমসুং শিন্মীশিং ঐনা থাগৎপা পাম্মী। শেংলবা থৌরম অসি মাংওইননা, ঐখোয়গী আর্মদ ফোর্সশিং, পুলিস অমসুং পেরা-মিলিতরি ফোর্সশিংগী মীওইশিং ভারতনা ইকায়খুম্নবা উৎচরি। মখোয়গী থৌনা অমসুং মিকুপ-নাহুম শিংবা য়াওদনা ঐখোয়না ফংলিবা চাউখৎপগী অচৌবা ফিবমশিং অসি য়ৌবা ঙম্লোই।

ঐগী ৱারোল লোইশিন্দ্রিঙৈ মমাঙদা, জুদিসিয়ারি অমসুং সিবিল সর্বিসেসকী মীওইশিং ঐনা য়াইফ-পাউজেল পীজরি। মপান লৈবাকশিংদা লৈরিবা ভারতকী মিসনশিংগী ওফিসিএলশিং অমসুং মপান লৈবাকশিংদা লৈরিবা ভারতমচাশিংদা ঐগী রিপব্লিক দে য়াইফ-পাউজেল পীজরি। ঐখোয়না ঙমজবা মওংদা লৈবাক অমসুং মীয়ামগী সেবা তৌনবা ঐখোয় পুম্নমক কৎথোক্লসি। মীয়াম পুম্নমক ঐগী য়াইফ-পাউজল পীজরি।

অদোম থাগৎচরি।

জয় হিন্দ!

জয় ভারত!

*****