প্রধানমন্ত্রীগী লোইশঙ
পি.এম.না দিল্লীগী লাল কিলাদা পাংথোকপা পরাক্রম দিবস্কী থৌরমদা ৱা ঙাঙখ্রে
ভারত পর্ব হৌদোকখ্রে, মসিনা রিপব্লিক দে তেব্লো অমসুং কলচর একজিবিসনগা লোয়ননা লৈবাক্কী ইনাক খুল্লবা দাইবর্সিতী উৎকনি
“পরাক্রম দিবস অসিদা, ঐখোয়না নেতাজীগী ৱাখল্লোন তুং ইন্দুনা মহাক্কী মঙলানগী ভারত অদু শেম্নবগীদমক্তা খোঙফম চেৎলিবা অসি ঙসিগী নুমিত্তা অমুক্কা হন্না নীংশিংলি”
“নেতাজী সুভাস সিদি লৈবাক্কী মতিক লৈবা অমৃত চারোন শুরোন অসিগী নীংথিনা ফীদম্নীংঙাই ওইবা মীওই অমনি”
নেতাজীগী পুন্সি অসিদি হোৎনবগী কনবগী খ্বাইদগী মতোন ওইবতা নত্তনা থৌনা লৈবগী মতাংদসু ওইরি”
“নেতাজীনা মালেমগী মমাংদা ভারত অসিদি গনতন্ত্রগী মমানি হায়না নম্ফুদা উৎখিবনি”
“নেতাজীনা নহাশিংগী ৱাখল্লোন্দগী মীনাই ওইবগী ৱাখল্লোন মুত্থৎনবা হোৎনখি”
“ঙসি, নহাশিংনা মশাগী চৎনবী, মশাগী ভেল্যু, মখোয়না ভারত মচা অমা ওইবগী চাংদা চাউথোকচবা পোকপগী মতৌ অসিদি মমাংদা অমুক্তা উখিদ্রি”
“ঐখোয়গী নহা অমসুং নুপীশিংখক্তনা লৈবাক্কী রাজনীতিবু শাগৈ-নাতৈদমক য়েংবা অমসুং শেঞ্জা থুমজাগী ফত্তবা অসিদগী কনবা ঙমগনি”
“ঐখোয়গী পান্দমদি শেন্মিৎলোনগী হীরমদা ৱাত্ত-পাদবা, নাৎ চৎনবীদা মপাঙ্গল লৈবা অমসুং মফম মতমগী মতুং ইন্না তৌবা ঙম্বগী মতিক লৈবা ভারত অম
Posted On:
23 JAN 2024 9:01PM by PIB Imphal
প্রধান মন্ত্রী, শ্রী নরেন্দ্র মোদীনা ঙসি দিল্লীগী লাল কিলাদা পাংথোকপা পরাক্রম দিবস্তা শরুক য়াখ্রে। রিপব্লিক দে তেব্লো অমসুং কলচরেল একজিবিসন কয়াগা লোয়ননা ভারতকী ইনাক খুল্লবা দাইবর্সিতী উৎকদবা ভারত পর্ব অসিবুসু মহাক্না হৌদোকখি। তেক্নোলোজীনা তেংবাংদুনা পাংথোকপা নেতাজীগী ফোতো, পেন্তিং, লাইরিক অমসুং মীতম কয়া য়াওবা ইন্তরেক্তিব ওইবা একজিবিসন অমসু মহাক্না চত্তুনা য়েংখিবগা লোয়ননা প্রোজেক্সন মেপ্পিংগা সিঙ্ক তৌদুনা নেস্নেল স্কুল ওফ দ্রামানা নেতাজীগী পুন্সিদা য়ুম্ফম ওইদুনা শান্নবা দ্রামাসু মহাক্না মিৎয়েং তাখি। INAগী অমত্তা ঙাইরবা অমসুং হৌজিক হিংলিবা লেফতেনেন্ত আর মাধবনবু মহাক্না ইকায় খুম্নখি। পরাক্রম দিবস অসি ইং 2021দগী হৌদুনা নেতাজী সুভাস চন্দ্র বোসকী মপোক কুমওন্দা পাংথোকপা হৌরকপনি। থৌরম অসি প্রধান মন্ত্রীনা নিংতম ইহৌদা মশক থোকপা থৌদাগ য়াখিবা শক্নাইরবা মীওই কয়াবু মতিক চানা ইকায় খুম্নবা হায়বা পান্দমগা মরী লৈননা পাংথোকপনি।
প্রধান মন্ত্রীনা ঙসি তিনখিবা মীয়ামদা ৱা ঙাঙবদা, নেতাজী সুভাস চন্দ্র বোসকী মপোক কুমওন্দা পাংথোক্লিবা পরাক্রম দিবস অসিগীদমক্তা মীয়ামদা য়াইফ পাউজেল পীখি। আজাদ হিন্দ ফৌজকী মথৌনাগী মতম অমদা শাখি ওইরম্বা লাল কিলানা ঙসিদি অনৌবা শক্তি কয়াগা লোয়ননা অমুক হন্না ঙাল্লরে হায়না মহাক্না হায়খি। নিংতম্বগী অমৃত কালগী অহৌবা মতমশিংবু ৱারেপ অমগা লোয়ননা ঐখোয়গী মায় পাকপশিংগী নুংঙাইবা ফোংদোকপনি হায়রদুনা, প্রধান মন্ত্রীনা মিৎকুপ অসিদি মমাংদা অমুক্তা থোকখিদ্রিবনি হায়না পাউদম্লদুনা মালেম পুম্বনা ভারতকী কলচরেল কন্সিয়সনেসনা য়াইকাইরকপগী মওং উখিবা ঙরাংগী থৌরমদা মীয়ামগী পুক্নিং চীংশিনখি। “প্রান প্রতিস্থাগী ইনর্জী অমসুং থাজবগী মতৌবু মীওইনা খুন্নাই অপুনবা অমসুং মালেম্না ফাওবা ঙমখি”, নেতাজী সুভাস চন্দ্র বোসকী মপোক কুমওনগী থৌরম পাংথোক্লিঙৈ মনুংদা প্রধান মন্ত্রীনা হায়খি। পরাক্রম দিবস হেক লাউথোকখিবদগী, মসিনা রিপব্লিক দে পাংথোকপগী মতম্বু মহাত্মা গান্ধী লৈখিদবগী কুমওন ওইরিবা জনুৱারী 23দগী হৌদুনা জনুৱারী 30 ফাওবা পাংথোক্তুনা হেন্না পাকথোক চাউথোকহনখি, অদুগা, জনুৱারী 22গে য়াইফরবা থৌরম অসিসু হৌজিক্তি ঐখোয়গী গনতন্ত্রগী চাউরবা কুহ্মৈ অসিগী মনুং চল্লে হায়না মহাক্না হায়খি। “হৌখিবা নুমিত খরনি অসিদি ভারতকী থাজবা, কলচরেল কন্সিয়সনেস, গনতন্ত্র অমসুং লৈবাক নীংবগী মতৌগী ওইনা ইথিল য়াম্না পীনিংঙাই ওইখি”, প্রধান মন্ত্রীনা য়াইফ পাউজেল পীরদুনা হায়খি।
প্রধান মন্ত্রীনা ঙসিগী থৌরম অসিবু শিন লাঙবগী শরুক ওইরিবা মীওই খুদিংবু থাগৎখি। ঙসিগী নুমিৎকী অঙনবদা, রাস্ত্রিয় বাল পুরস্কার পীখ্রবা নহাশিংগা প্রধান মন্ত্রীগা উন্নখি। “ঐহাক্না ভারতকী নহা ওরিবা চারোন শুরোনশিংগা উন্নবা খুদিংদা, ঐহাক্কী বিকশিৎ ভারতকী মঙলানগী মপাঙ্গল অসি হেনগৎলি। নেতাজী সুভাস চন্দ্র বোস অসিদি মখোয়গুম্বা অমৃত চারোন শুরোন অসিগী খ্বাইদগী চাউবা ফীদম্নিংঙাই ওইবা মীশক অমা ওইরে”, পি.এম.না হায়খি।
প্রধান মন্ত্রীনা মহাক্না ঙসি হৌদোকখিবা ভারত পর্বগী মতাংদা পল্লদুনা, মথংগী নুমিৎ 9নিদা পাংথোক্কদৌরিবা ইভেন্ত অমসুং দিস্প্লে কয়াগী মতাংদা পাউদমখি। “ভারত পর্ব অসিদি নেতাজী সুভাস চন্দ্র বোসকী ৱাখল্লোনগী শক্তম অমনি। মসিদি ‘ভোকেল ফোর লোকেল’, তুরিজম খুমাং চাউশিলহনবা, দাইবর্সিতীবু ইকায় খুম্নবা অমসুং ‘এক ভারত শ্রেস্থ ভারত’পু অনৌবা অৱাংবা থাক্তা থাংগৎপগী ‘পর্ব’ অমনি”, মহাক্না হায়খি।
চপ মান্নবা লাল কিলাগী ফম্বাক অসিদগী মহাক্না INAগী চহি 75 মপুং ফাবগী থৌরমদা মচু অহুমগী ফিরাল চিংখৎখিবগী মতাংদা নীংশিংলদুনা, পি.এম. মোদীনা অসুম্না হায়খি, “নেতাজীগী পুন্সি অসিদি হোৎনবা কনবা অমসুং থৌনা লৈবগী খ্বাইদগী ৱাংবা থাক্নি”। নেতাজীনা কত্থোকখিবশিংবু নীংশিংলদুনা, প্রধান মন্ত্রীনা মহাক্না ব্রিতিশকী মাইয়োক্তা লেপ্পা খক্তা নত্তনা মহাক্না ভারতকী সিভিলাইজেসনগী মাইয়োক্তা ৱা ঙাঙখিবা মীপুম খুদিংগী মফমদা মতিক চাবা পাউখুম পীখি হায়খি। নেতাজীনা মালেমগী মমাংদা ভারতপু গনতন্ত্রগী মমানি হায়না থমখিবনি হায়না শ্রী মোদীনা মখা তাখি।
মীখা পোনবগী ৱাখল্লোন লৈবগী মাইয়োক্তা নেতাজীনা লান্থেংনবগী মতৌশিং পল্লদুনা, প্রধান মন্ত্রীনা নেতাজীনা ঙসিগী ভারতকী নহারোলগী চারোন শুরোনশিংগী মরক্তা লাক্লিবা অনৌবা কন্সিয়সনেস অমসুং চাউথোকচবা অসিদা নেতাজীনা শোইদনা চাউথোকচরমগনি হায়খি। মসিগী অনৌবা কন্সিয়সনেস অসিনা বিকশিৎ ভারত অমা শেম্বগী পাঙ্গল ওইরে। ঙসিগী নহাশিংনা পাঞ্চ প্রনবু শাগোন্নরি অমসুং মীখা পোনবগী ৱাখল্লোন্দগী মপান থোক্লক্লে হায়না মহাক্না হায়খি। “নেতাজীগী পুন্সি অমসুং মহাক্কী থবকশিংনা ভারতকী নহাশিংগী ইথিল ওইরি”, পি.এম. মোদীনা হায়খি অমসুং ইথিল অসি মখা তানা অদুমক লৈখিগনি হায়বগী থাজবসু ফোংদোকখি। থাজবা অসিগা লোয়ননা, পি.এম. মোদীনা সরকার অসিনা মমাংগী চহি 10দা হোৎনখিবশিংদা মীয়ামগী পুক্নিং চীংশিনখি অমসুং মশাগী থৌদাংদা খোঙফম চেৎকদবনি হায়না লৈবাক মীয়ামদা নীংশিংহনবা কর্তব্যা পথতা লৈরিবা নেতাজীগী মীতম অসিদা চুনবা ইকায় খুম্নবা উৎখিবগী ৱাফমসু মহাক্না থমখি। আজাদ হিন্দ ফৌজনা মচু অহুমগী ফিরাল হায়হনখিবা অহানবা মফম, অন্দমান অমসুং নিকোবরগী ইথৎ কয়াগী নৌনা মিংথোনখিবা, নেতাজীগীদমক্তা শারিবা মেমোরিএল, নেতাজী অমসুং আজাদ হিন্দ ফৌজতা কত্থোকপা ম্যুজিয়ম অমা লাল কিলাদা লৈরিবা, অমসুং নেস্নেল দিজাজতর রিলীফ এৱার্দ অমবু নেতাজীগী মিংদা খ্বাইদগী অহানবা ওইনা লাউথোকপগী ৱাফম কয়া মহাক্না পনবদা য়াওখি। “নিংতম্বা ভারত্তা পাল্লম্বা সরকারশিংগা চাংদম্নবদা, হৌজিক্কী সরকার অসিনা আজাদ হিন্দ ফৌজতা কত্থোকপা থবক মশিং খ্বাইদগী হেন্না পাংথোক্লি অমসুং মসিদি ঐহাক্না ঐখোয়গী থৌজালনি হায়না খল্লি”, শ্রী মোদীনা মখা তাখি।
নেতাজীনা ভারতকী শিংনবশিংবু মমুৎ তানা খঙলম্বগী মতাংদা পল্লদুনা, প্রধান মন্ত্রীনা নেতাজীনা গনতন্ত্রা চৎপা খুন্নাইগী ফম্বাক্তা য়ুম্বী ওইদুনা ভারতকী রাজনীতিগী গনতন্ত্রগী মপাঙ্গল কনখৎহনবা ঙমগনি থাজবা থমখিবগী মতাংদা পনখি। অদুবু, নিংতম্লবা মতুংদা নেতাজীগী ৱাখল্লোনগী মাইয়োক্তা লান্দাখিববু পেন্দবা ফোংদোক্লদুনা প্রধান মন্ত্রীনা নেপোতিজমগী ফত্তবশিংনা ভারতকী গনতন্ত্রগী মনুংদা খোঙদাখিবদগী লৈবাক্কী চাউখৎ থৌরাংদা থিন্থহনখিবনি হায়না ফোংদোকখি। খুন্নাইগী চাউরবা কাঙলুপ খরদা মখোয়গী চাউখৎ থৌরাংগীদমক্তা ফংহনখিবা খুদোংচাবা কয়া ফংদনা লাকখি, মসিগী মরক অসিদা, খনগৎলবা ইমুং খরগী মীওইশিংনা খুদোংচাবা পুম্নমক লৌখি, অমসুং মসিনা মরম ওইরগা লৈবাক অমসুং লৈবাক্কী নহাশিংনা য়াম্না চাউনা মাঙজখ্রিবনি হায়না মহাক্না মখা তাখি। মতমদুগী নহা অমসুং নুপীশিংনা মাইয়োক্নখিবা খুদোংচাবা কয়া প্রধান মন্ত্রীনা অমুক হন্না নীংশিংখি অমসুং হৌজিক লৈরিবা সরকার অসিবু ইং 2014দা হেক খনখিবদগী লাকখিবা ‘সবকা সাথ সবকা বিকাস’কী ইথিলদা মীয়ামগী পুক্নিং চীংশিনখি। “হৌখিবা চহি 10গী মহৈদি মীয়াম্না উবা ফংলে”, শ্রী মোদীনা হায়খি অমসুং হৌজিক মতমগী লাইরবা ইমুংশিংগী মচানুপা অমসুং মচানুপীশিংনা মতিক চাবা খুদোংচাবা পুম্নমক ফংলগনি হায়না মখা তাখি। লৈবাক্কী নুপীশিংগী অপাম্বা খুদিংদা সরকারনা মিৎয়েং চঙবীবদগী মখোয়গী মশাদা লাক্লিবা থাজবগী চাং অসিদা প্রধান মন্ত্রীনা মীয়ামগী পুক্নিং চীংশিনখিবগা লোয়ননা মতম কয়াগী মতুংদা নারি শক্তি অধিনিয়ম শেমখিবগী মতাংদসু পনখি। “নহাশিংগী পাঙ্গল অমসুং নারি শক্তিনা বিকশিৎ ভারতকী রাজনীতিদা অহোংবা পুরকপদা অচৌবা থৌদাং য়াগনি অমসুং লৈবাকপু নেপোতিজম অমসুং শেঞ্জা থুমজাগী ফত্তবশিংদগী কনবা ঙমগনি”, প্রধান মন্ত্রীনা হায়রিবা ফত্তবশিং অসিবু মুত্থৎনবা থৌনা ফবগী মথৌ তাই হায়না ফোংদোক্লদুনা হায়খি।
হৌজিক্কী মতমসিদি ইশাবু রামগী থবক্তগী লৈবাক্কী থবক্তা খোঙফম চেৎপগী মতম্নি হায়না প্রান প্রতিস্থাদা হায়খিবা অদুবু নীংশিংলদুনা, প্রধান মন্ত্রীনা মালেম্না ভারত্তা থম্লিবা থাজবশিংগী মতাংদা পাউদমখি। “ঐখোয়গী পান্দমদি ভারতপু ইং 2047 ফাওবদা চাউখৎপা লৈবাক অমা ওইহনবনি। ঐখোয়গী পান্দমদি ভারতপু শেন্মিৎলোন্দা মপাঙ্গল কনবা, নাৎ লিংবা অমসুং স্ত্রেতজিক ওইনা কেপেবল ওইহনবনি। মসিগীদমক্তা, ঐখোয়না মথংগী চহি 5তা ভারতপু মালেমগী খ্বাইদগী অহুমশুবা চাউবা শেন্মিৎলোন অমা ওইহনবগী মথৌ তাই। মসিগী পান্দম অসি য়াম্না থাপ্পদি নত্ত্রে। হৌখিবা চহি 10দা, লৈবাক মীয়াম্না হোৎনবা অমসুং পুক্নিং থৌগৎপীবদগী, ভারত মচা করোর 25না লাইরবগী খয়াত্তগী মপান থোক্লকখি। মমাংদা ফংবা ঙমগনি থাজরমদবা পান্দম কয়া ভারতনা ঙসি ফংলি”, প্রধান মন্ত্রীনা মখা তাখি।
লৈবাক অসিনা মরোমদোম লেপচবা ঙমহন্নবগীদমক্তা মমাংগী চহি 10দা পায়খৎখিবা খোঙথাং কয়াবু প্রধান মন্ত্রীনা পাউদমখি। এম্যুনিসন অমসুং ইক্বিপমেন্ত চাম্মা-চাম্মদা অথিংবা থমখিবা অমসুং মতিক লৈবা দোমেস্তিক দিফেন্স ইন্দস্ত্রী অমা শেমখিবগী মতাংদা পল্লদুনা, প্রধান মন্ত্রীনা হায়খি, “মালেমগী খ্বাইদগী চাউবা দিফেন্স ইম্পোর্তর ওইরম্বা ভারত অসিনা ঙসিদি মালেমগী খ্বাইদগী চাউবা দিফেন্স এক্সপোর্তরশিংগী মরক্তা চল্লে”।
প্রধান মন্ত্রীনা ঙসিগী ভারতনা ‘বিশ্বা মিত্র’ অমা ওইনা মালেম পুম্ববু অমত্তা ওইহনবদা থবক য়াম্না চিল্লু অমসুং মালেমগী শিংনবা কয়াগী ৱারোইশিন পুরক্নবা কন্না হোৎনরি হায়খি। ভারতনা নাকল অমদা মালেম্বু লান্দগী লাপ্না পুথোক্তুনা শান্তিগী লম্বীদা চৎনবা হোৎনরি, অদুগা অতোপ্পা নাকল অমদনা, লৈবাক্কী অপাম্বা ঙাক্নবা শেম-শাবগী থবকসু চত্থরি হায়না মহাক্না অমুক্কা হন্না পনখি।
প্রধান মন্ত্রীনা মহাক্কী ৱারোল লোইশিনবা ওইনা, ভারতকী ওইনা মথংগী চহি 25কী মরু ওইবদা মীয়ামগী পুক্নিং চীংশিনখি অমসুং অমৃত কালগী মিৎকুপ খুদিংবু লৈবাক্কী য়াইফবগীদমক্তা কত্থোকফম থোকই হায়না ফোংদোকখি। “ঐখোয়না হোৎনবা কনবা তাবনি অমসুং ঐখোয়না থৌনা ফবা তাবনি। মসিদি বিকশিৎ ভারত অমা শেম্বদা য়াম্না মরু ওইবা থবক ওইগনি। পরাক্রম দিবসনা ঐখোয়দা ৱারেপ অসিবু চহি খুদিংগী নীংশিংহনগনি”, প্রধান মন্ত্রীনা মসিগা লোয়ননা মহাক্কী ৱারোল লোইশিনখি।
কলচর অমসুং তুরিজমগী কেন্দ্র মন্ত্রী, শ্রী জি. কিশন রেদ্দী; কলচরগী কেন্দ্রগী রাজ্য মন্ত্রী, শ্রী অর্জুন রাম মেঘ্বাল অমসুং শ্রীমতি মীনাক্ষি লেখি অমসুং দিফেন্স অমসুং তুরিজমগী কেন্দ্রগী রাজ্য মন্ত্রী, শ্রী অজয় ভত অমসুং নেতাজী সুভাস চন্দ্র বোস INA ত্রস্তকী চেয়রমেন, ব্রিগেদিয়র (থবক্তগী পোত্থারবা) আর.এস. চিকারাসু ঙসিগী থৌরম অসিদা শরুক য়াখি।
বেকগ্রাউন্দ
নিংতম ইহৌদা মরুওইবা থৌদাং অমা লৌখিবা শক্নাইরবা মীওইশিং ইকায়খুম্নবা উৎনবা প্রধান মন্ত্রীনা পায়খৎলকপা থবকশিংগী শরুক অমা ওইনা, নেতাজি সুভাস চন্দ্র বোসকী মপোক নুমিৎ অসি 2021দগী হৌনা পারাক্রম দিবস হায়না থৌরম পাংথোকপা হৌরকখিবনি। চহি অসিগী ওইনা লাল কিলাদা পাংথোক্কদৌরিবা থৌরম অসি পুৱারিগী থৌদোকশিংগী মমিশিং অমসুং নাৎকী ফজরবা শক্তমশিংগী অপুনবা অমা উবা ফংগনি। থৌরমশিংদা নেতাজি সুভাস চন্দ্র বোস অমসুং অজাদ হিন্দ ফৌজগী অকুপ্পশিং উৎকনি। অয়েংবশিংনা আর্কাইবশিং, অতাংবা ফোতোশিং অমসুং চে-চাংশিংগী খুৎথাংদা নেতাজি অমসুং অজাদ হিন্দ ফৌজগী শিংথানিঙাই ওইরবা খোঙচৎ মশক খঙনবা খুদোংচাবা অমা ফংলগনি। থৌরমশিং অসি জনুৱারি 31, 2024 ফাওবা পাংথোক্কনি।
থৌরম মনুংদা, প্রধান মন্ত্রীনা জনুৱারি 23 দগী জনুৱারি 31 ফাওবা পাংথোক্কদবা ভারত পর্ব হৌদোকখ্রে। মসিদা মিনিস্ত্রি অমসুং দিপার্তমেন্ত 26কী রিপব্লিক দে তেব্লো অমসুং নাৎকী থৌরমশিং, মীয়ামগী য়াইফনবা পায়খৎলিবা থবকশিং, ভোকেল ফোর লোকেল, লমকোয়বশিংনা পাম্বা মখল কয়া উৎকনি। থৌরম অসি লাল কিলা মমাঙদা লৈবা রাম লিলা মৈদান অমসুং মাধব দাস পার্কতা পাংথোক্কনি।
***
(Release ID: 1999355)
Visitor Counter : 46
Read this release in:
Kannada
,
English
,
Urdu
,
Marathi
,
Hindi
,
Bengali
,
Punjabi
,
Gujarati
,
Odia
,
Tamil
,
Telugu
,
Malayalam