প্রধান মন্ত্রী শ্রী নরেন্দ্র মোদীনা ঙসি গান্ধীনগরগী মহাত্মা মন্দিরদা ভাইব্রেন্ত গুজরাত গ্লোবেল সম্মিৎকী 10শুবা ইদিসন হৌদোকখ্রে। হন্দক্কী চহিগী সম্মিৎকী থীম্না “গেতৱে তু দি ফ্যুচর” হায়বসিনা ওইখি অমসুং মসিদা পার্ত্নর লৈবাক 34 অমসুং পার্ত্নর ওর্গনাইজেসন 16না শরুক য়াখি। দোনর মন্ত্রালয়না প্লেতফোর্ম অসিবু অৱাং নোংপোক লমদমদা ইনভেস্তমেন্ত তৌবা ফংগদবা কান্নবা কয়া উৎনবা শিজিন্নখি।

ইন্দস্ত্রীগী কেপ্তেন কয়ানা থৌরম অসিদা মশাগী ৱাফম ফোংদোকখি।

আর্সেলর মিত্তলগী চেয়র্মেন, শ্রী লক্ষমী মিত্তলনা মমাংগী চহিগী সেপ্তেম্বরদা পাংথোকখিবা ভাইব্রেন্ত গুজরাতকী 20শুবা কুমওনগী থৌরমদা শরুক য়াখিববু নীংশিংদুনা ভাইব্রেন্ত গুজরাত সম্মিতকুম্বা মালেমগী অচৌবা থৌরম অমগী ইন্সতিত্যুস্নেলাইজ তৌরবা ফ্রেমৱর্ক অমা শেম্নবা লেপ্তনা হোৎনবদা মিৎয়েং চঙবগীদমক্তা থাগৎপা ফোংদোকখি। মহাক্না প্রধান মন্ত্রীনা ৱান আর্থ, ৱান ফেমিলী, ৱান ফ্যুচরগী ৱাখল্লোন্দা থাজবা থম্লিবা অমসুং মালেমগী ফোরম খুদিংদা গ্লোবেল সাউথকী খোঞ্জেলবু হেন্না মপাঙ্গল লৈহল্লিবা অসিগী মতাংদা ফোংদোকখি। লৈবাক অমবু মরোমদোম লেপচবা ঙমহন্নবা হোৎনবদা স্তীলগী মরু ওইবশিংবু মহাক্না অমুক্কা হন্না নীংশিংলদুনা শ্রী মিত্তলনা ইং 2021দা আর্সেলর মিত্তল নিপ্পোন স্তীল ইন্দিয়া হজিরা এক্সপান্সন প্রোজেক্তকী উরেপ উয়ুং তমখিবগী মতাংদা পাউদমখি অমসুং প্রোজেক্ত অসিগী অহানবা ফেজ অসি পান্দম চহি 2026 ফাওবগী মনুংদা লোইশিল্লগনি হায়না মখা তানা পাউদমখি। মহাক্না রিন্যুএবল ইনর্জী অমসুং গ্রীন হাইদ্রোজেনগুম্বা গ্রীন ইনর্জীদা শেল থাবদগী মতাংদসু পনখি।

জাপানগী সুজুকী মোতোর কোর্পোরেসনগী প্রসিদেন্ত, শ্রী তোশিহিরো সুজুকীনা প্রধান মন্ত্রীগী অচেৎপা লুচিং পুরেলবু থাগৎখি অমসুং লৈবাক অসিগী মেন্যুফেকচরিং ইন্দস্ত্রীদা তেংবাং কয়া পীবগীদমক্তসু মখা তানা থাগৎখি। ভারতনা হৌজিক মালেমগী খ্বাইদগী অহুমশুবা চাউবা ওতোমোবিল মার্কেত ওইরে হায়না মহাক্না পল্লদুনা, শ্রী সুজুকীনা প্রধান মন্ত্রীগী চাউখৎপগী মিৎয়েংনা লৈবাক অসিগী শেন্মিৎলোনগী শাহৌদা তেংবাংলিবা অসিবু মীয়ামদা পাউদমখি। কম্পেনী অসিনা শাবা অহানবা EVবু ভারত্তা থাদোকপা হৌবগা লোয়ননা য়ুরোপিয়ন য়ুনিয়ন অমসুং জাপান্দা থাদোক্নবা কম্পেনী অসিনা থৌরাং য়াৎলিবা অসিগী মতাংদা মহাক্না পাউদমখিবগা লোয়ননা প্রদক্সন কেপাসিতী হেনগৎনবা হোৎনরিবা অসিগী মতাংদসু পাউদমখি। লুপ অসিনা ইথানোল, গ্রীন হাইদ্রোজেন অমসুং শন্থীদগী বাইও গ্যাস পুথোক্তুনা গ্রীনহাউস ইমিসন হন্থহন্নবা হোৎনরিবা অসিগী মতাংদসু মহাক্না ৱাফম থমখি।

রিলাইএন্স গ্রুপকী শ্রী মুকেশ অম্বানীনা ভাইব্রেন্ত গুজরাতপু ঙসিগী মালেমগী খ্বাইদগী লেমজনীংঙাই ওইরবা ইনভেস্তমেন্ত সম্মিৎ অমনি অমসুং মসিগুম্বা সম্মিৎ অমত্তনা চহি 20 মখা চত্থরক্ত্রি অমসুং সম্মিৎ অসিনা চহি খুদিংগী মপাঙ্গল কনবা হেনগৎলক্লি হায়না ফোংদোকখি। “মসিদি ঐখোয়গী প্রধান মন্ত্রী শ্রী নরেন্দ্র মোদীগী মিৎয়েং অমসুং লেপ্তনা থবক তৌবা ঙম্বগী মতৌদা ইকায় খুম্নবা উৎপনি”, মহাক্না হায়খি। মহাক্না ভাইব্রেন্ত গুজরাতকী ইদিসন খুদিংদা শরুক য়াদুনা লাক্লি হায়না ফোংদোকখি। গুজরাতী ওইনা হৌরকখিবা অসিগী ওইনা চাউথোকচবা ফোংদোকচবগা লোয়ননা, শ্রী অম্বানীনা গুজরাতপু নৌনা শেমদোক্লিবা অসিদি প্রধান মন্ত্রীননি হায়না ফোংদোকখি। মহাক্না হায়খি, “মসিগুম্বা অহোংবা লাক্লিবা অসিগী মরু ওইবা মরমদি ভারতকী পুৱারীগী খ্বাইদগী মায় পাকপা প্রধান মন্ত্রী অমা ওইরিবা অমসুং হৌজিক্কী মতমগী খ্বাইদগী অথোইবা লুচিংবা অমা ওইরক্লিবা ঐখোয়গী লুচিংবা শ্রী নরেন্দ্র মোদীনি। মহাক্না করিগুম্বা অমা হায়বা মতমদা মালেম্না মদুগী মতাংদা ৱারী শান্নৈ অমসুং থাগৎনরিবনি”। ভারতকী প্রধান মন্ত্রীনা ওইথোক্তববু কতৌ করম্না ওইথোকহল্লি – “মোদী হে তো মুমকিন হে” হায়বসিগী মতাংদা শন্দোক্না পাউদমখি অমসুং খোল্লাও অসিমক মালেম্না য়ানবগা লোয়ননা মখোয়নসু হায়নরিবনি হায়না মহাক্না শুগাইনা তাকখি। শ্রী মুকেশ অম্বানীনা মহাক্কী মপাবুং শ্রী ধিরুভাই অম্বানীবু নীংশিংলদুনা, রিলাইএন্স অসিদি গুজরাতী কম্পেনীনি অমসুং মতম পুম্বদসু ওইখিগনি হায়খি। “রিলাইএন্সকী কারবার খুদিংনা ঐখোয়গী গুজরাতী মরুপ করোর 7গী অপাম্বা ফংহন্নবা হোৎনদুনা লাক্লি”, মহাক্না হায়খি। হৌখিবা চহি অসিদা ভারত শিনবা থুংবগী মফমদা মালেমগী থাক্তা লৈবা এসেৎ শেমগৎনবা রিলাইএন্সনা US দোল্লর বিলিয়ন 150 (লুপা করোর লাক্ষ 12) হেন্না থাদখ্রে অমসুং মসিগী মনুংদগী শরুক অহুম থোকপগী অমদি গুজরাত্তা খক্তা থাদখিবনি হায়না মহাক্না পাউদমখি। শ্রী অম্বানীনা গুজরাতকীদমক্তা ৱাশক মঙা শকখি। অহানবা, রিলাইএন্সনা গুজরাতকী শাহৌ লৌবগী খোঙচত্তা মরু ওইবা থৌদাং লৌগনি অমসুং মথংগী চহি তরাদা মশক থোক্না শেল থাদগনি, অমসুং অখন্নবা ৱাফম অমনা, গুজরাতপু গ্রীন গ্রোথতা মালেমগী লুচিংবা অমা ওইহনবদা রিলাইএন্সনা অচৌবা থৌদাং য়াগনি। “ঐখোয়না ইং 2030গী মনুংদা গুজরাতনা রিন্যুএবল ইনর্জীগী খুত্থাংদা মখোয়গী ইনর্জীগী তঙাই ফদবশিংগী তংখায় অমা ফংহন্নবা তেংবাংগনি”। একর 5000 পাক-চাউবা ধিরুভাই ইনর্জী গিগা কমপ্লেক্স অমা জাম্নগরদা শাগৎলি অমসুং মসিনা ইং 2024গী অনিশুবা শরুক্তা থবক হৌনবা শেম-শাদুনা লৈরবনি হায়না মহাক্না পাউদমখি। অনিশুবা, 5G খোঙজেল য়াঙনা শন্দোকপনা মরম ওইরগা, গুজরাত অসি ঙসিদি 5G মপুং ফানা ওইরে। মসিনা গুজরাতপু দিজিতেল দেতা প্লেতফোর্ম অমসুং AI শিজিন্নবদা মকোক থোংবা ঙমহনগনি। অহুমশুবা, রিলাইএন্স রিতেলনা মখোয়গী ফুতপ্রিন্ত হেনগৎহন্দুনা মগুন লৈবা পোত্থোক কয়া পুরক্তুনা লৌমী অমসুং অপীকপা কারবার লাক্ষ কয়াদা তেংবাংগনি। মরিশুবা, রিলাইএন্সনা গুজরাতপু ন্যু মেতরিএল অমসুং সর্ক্যুলর ইকোনোমীগী হীরমদা লময়ানবা অমা ওইহনগনি হায়না মহাক্না হায়খি। গ্রুপ অসিনা মালেমগী থাক্তা লৈবা কার্বন ফাইবর ফেসিলিতী অমা হজিরাদা শেমগৎলি। প্রধান মন্ত্রীনা ইং 2036 ওলীম্পিক্সকী বিদ্দিং তৌবা পাম্মি হায়না লাউথোকখিবগা মরী লৈননা, রিলাইএন্স অমসুং রিলাইএন্স ফাউন্দেসন্না তোঙান-তোঙানবা পার্ত্নরশিংগা খুৎশম্নদুনা গুজরাতকী শান্ন-খোৎনবা, মহৈ-মশিং অমসুং স্কিলগী ইনফ্রাস্ত্রকচরশিংবু হেন্না ফগৎহন্নবা হোৎনগদৌরি হায়না মহাক্না হায়খি। শ্রী অম্বানীনা মহাক্কী ৱারোল লোইশিল্লকপদা অসুম্না হায়খি, “গুজরাত চাউখৎপা হায়বসি ভারত চাউখৎপনি হায়না প্রধান মন্ত্রীনা তত্তনা হায়বী। হৌজিক্তি, অদোমগী প্রধান মন্ত্রী অমা ওইবগী পান্দমদি ভারত চাউখৎপা মালেম চাউখৎকনি হায়বা ওইগদবনি। অদোম্না মালেমগী য়াইফ য়ুম্বাল অমসুং ভারতকী মালেমগী গ্রোথ ইঞ্জিন অমা ওইহনবা হায়বা মন্ত্রা অমদা থবক তৌরি। অদোমগী গুজরাত্তগী মালেমগী ফম্বাক ফাওবগী শুপ্নগী দিকেদ অনিগী খোংচৎ অসিদি মোদর্ন ইপিক অমদগী খক তাবা নত্তে”। “ঙসিগী ভারত অসিদি অনৌবা চারোন শুরোন্না শেন্মিৎলোন্দা শরুক য়াবা, ইন্নোভেসন তৌবা অমসুং মীওই মিলিয়ন চা কয়াগী পুন্সি মহিং নুংঙাইহনবা অমসুং শেন্দান লম্বী পীবা ঙম্বগী খ্বাইদগী চুনবা মতম অমা ওইরিবনি। মথংগী চারোন শুরোনশিংনা প্রধান মন্ত্রীবু লৈবাকখক্তা নত্তনা মালেমগী ওইনসু খনবগীদমক্তা থাগৎনরগনি। অদোম্না বিকশিৎ ভারতকী অকনবা ফম্বাক অমা শেম্বীরে। মালেমগী শক্তি অমত্তনা ভারতপু ইং 2047 ফাওবদা ত্রিলিয়ন দোল্লর 35কী শেন্মিৎলোন ওইবদা থিংবা ঙম্লোই। গুজরাত খক্তনা ত্রিলিয়ন দোল্লর 3গী শেন্মিৎলোন অমা ওইবগী মতৌসু ঐহাক্না উবা ঙম্লে। মোদীগী য়ুগ অসিনা ভারতপু নুংঙাই য়াইফবা, চাউখৎপা অমসুং মায় পাকপগী অনৌবা থাক্তা পুবা ঙমগনি হায়বসি গুজরাতী অমসুং ভারত মচা খুদিংনা থাজবা থম্লি”।

USAগী মাইক্রোন তেক্নোলোজীগী CEO, শ্রী সঞ্জয় মেহরোত্রানা লৈবাক অসিবু সেমিকন্দক্তর মেন্যুফেকচরিংগীদমক্তা থোঙ হাংদোকপগীদমক্তা প্রধান মন্ত্রীবু থাগৎপা ফোংদোকখিবগা লোয়ননা মসিনা তুংগী মতমদা ভারতনা মালেমগী খ্বাইদগী অহুমশুবা চাউবা শেন্মিৎলোন ওইনবগীদমক্তা থাংজিল্লিবা খোঙথাং অসিদা অচৌবা ইকোনোমিক দ্রাইভর অমসু ওইগনি হায়না মখা তাখি। ভাইব্রেন্ত গুজরাত সম্মিৎনা ভারতনা সেমিকন্দক্তরগী হীরমদা অচৌবা শক্তি অমা ওইবদা তঙাই ফদবা মিৎয়েং শানবা ৱাখল্লোন কয়াদা মিৎয়েং চঙলি হায়না মহাক্না হায়খি অমসুং সেক্তর অসিদা লৈরিবা গ্রোথ লৌবগী তোঙানবা খুদোংচাবা কয়াদসু মিৎয়েং চঙখি। মহাক্না রাজ্য অমসুং কেন্দ্র সরকারবু গুজরাত্তা মালেমগী থাক্কী মেমোরী এসেমব্লী অমসুং তেস্ত ফেসিলিতী লিংখৎপদা তেংবাংবগীদমক্তা থাগৎলদুনা ফেসিলিতী অসিগী মরী লৈননা টাটা প্রোজেক্তকা লৈনরিবা ইনফ্রাস্ত্রকচর পার্ত্নরশিপকী মতাংদসু পনখি। স্ক্বার ফীত 500,000 পাক চাউবা অহানবা ফেজ অসিনা ইং 2025কী অঙনবদগী মথৌ তৌবা হৌরগনি, মসিনা থবক 5000 হকথেংননা লৈহনগনি অমসুং লাক্লিবা চহিশিংদা খুন্নাইগী অহেনবা থবক 15000 অমগসু লৈহনগনি হায়না মহাক্না পাউদমখি। “মাইক্রোন অমসুং সরকারনা ফেজ অনিমক্তা পুন্না শেল থাদমিন্নরিবা অসিনা US দোল্লর বিলিয়ন 2.75 ফাওবা য়ৌরকপা য়ারি”, মহাক্না হায়খি। সেমিকন্দক্তর ইন্দস্ত্রীগী লমদা ভারত্তা কম্পেনী অসিনা ইনভেস্তমেন্ত হেনগৎহনবদা পাংগদৌরিবা মরূ ওইবা থৌদাংগী মতাংদা মহাক্না পল্লদুনা মহাক্কী ৱারোল লোইশিনখি।

অদানী গ্রুপকী চেয়র্মেন, গৌতম অদানীনা হৌজিক ফাওবদা পাংথোকখ্রবা ভাইব্রেন্ত গুজরাত সম্মিৎ খুদিংদা শরুক য়াদুনা লাকখিবদা চাউথোকচবা ফাওজৈ হায়না ফোংদোকখি। প্রধান মন্ত্রীবু মহাক্কী তোপ-তোপ্পা মিৎয়েংগীদমক্তা থাগৎলদুনা, শ্রী অদানীনা প্রধান মন্ত্রীগী মশক নাইবা থৌওং, মিৎয়েং শানবা পান্দম, হৈ-শিংনা লৈঙাকপা অমসুং থবক থৌরম নীংথিনা পাংথোকপগী মতৌবু থাগৎখি। রাজ্যশিংনা মাঙজিল থানা চঙশিন্নদুনা চাংয়েংনদুনা অমসুং তেংবাংনদুনা ভারতকী ইন্দস্ত্রীগী লেন্দস্কেপ অসিবু নৌনা শেমদোক্লিবা অসিবু ওইথোকহল্লিবা প্রধান মন্ত্রীগী ইথিলবু মহাক্না থাগৎখি। ভারতকী GDPনা ইং 2014দগী হৌদুনা 185%কী শাহৌ লৌখি অমসুং পর কেপিতা ইনকম্না 165%কী শাহৌ লৌখিবা অসিবু পল্লদুনা থৌওং অসিদি মালেমগী তংদু লৈতাদবা মতমদা পুরকখিবা অহোংবা ওইবনা মসিদি য়াম্না শীংথানীংঙাই ওইবা মায় পাকপা অমনি হায়না মহাক্না হায়খি। মালেমগী ফম্বাক্তা খোঞ্জেল থীবা লৈবাক অমা ওইরম্বদগী মালেমগী ফম্বাক শেম্বা লৈবাক অমা ওইরকপগী তোঙানবা খোঙচৎ অসিদা মহাক্না মীয়ামগী মিৎয়েং চিংশিনখি। ইন্তর্নেস্নেল সোলর এল্লাইএন্স হৌদোকপা, প্রধান মন্ত্রীনা ভারতকী G20 প্রসিদেন্সীদা লৌখিবা থৌদাং, G20দা গ্লোবেল সাউথপু মনুং চলহনখিবগী ৱাফমশিং পল্লদুনা, শ্রী অদানীনা থৌওংশিং অসিনা হেন্না ইনক্লুসিব ওইবা ৱর্ল্দ ওর্দর অমগী বেঞ্চমার্ক শেম্লি অমসুং ভারতকী পুৱারীগী অনৌবা ৱারী অমসু ইহল্লি হায়খি। “অদোম্না তুংগী মতম অসি মতৌ করম্না তৌগনি হায়দে, অদোম্না মসিবু শেম্লি”, শ্রী অদানীনা হায়খি অমসুং ভারতপু মালেমগী খ্বাইদগী য়াঙনা শাহৌ লৌবা লৈবাক অমা ওইহন্নবা অনৌবা থৌওং কয়া পুরকখিবা, শেমদোকখিবা; লোয়ননা বাসুদৈবা কুতুম্বাকম অমসুং বিশ্ব গুরুগী ৱাখল্লোন্না ইথিল পীদুনা গ্লোবেল সোসিএল চেম্পিয়ন ওইবা লৈবাক অমা ওইহল্লিবসি প্রধান মন্ত্রীগী হোৎনজমন্দগীনি হায়নসু মহাক্না মখা তাখি। প্রধান মন্ত্রীনা ভারতপু ইং 2047 ফাওবগী মনুংদা চাউখৎপা লৈবাক অমা ওইহন্নবা থম্লিবা পান্দম অসিনা মরম ওইরগা, ঙসিগী ভারতনা হয়েংগী মতম লেপ্পা ঙম্বগী থাক্তা লৈরে হায়না মহাক্না হায়খি। রাজ্যসিদা ইং 2025 ফাওবগী মনুংদা লুপা করোর 55,000 ইনভেস্ত তৌগনি, হায়রিবা অসি মমাংদা থম্লম্বা লুপা করোর 50,000গী পান্দমদগী হেল্লিবনি; মসিনা হকথেংনবা অমসুং নাকোইনবা থবক 25000 লৈহনগনি হায়না মহাক্না লাউথোকখি। আত্মানির্ভর ভারত অমগীদমক্তা গ্রীন সপ্লাই চেন চাউথোকহনবা অমসুং সোলর পেনেল, ৱিন্দ তর্বাইন, হাইদ্রো ইলেক্ত্রোলাইজর, গ্রীন এম্মোনিয়া, PVC অমসুং কোপ্পর অমসুং সিমেন্ত প্রোজেক্তশিং পাকথোক চাউথোকহনবা য়াওনা রিন্যুএবল ইনর্জী ইকোসীস্তেমগী খ্বাইদগী চাউবা অপুনবা নেতৱর্ক অমা শেম্বগী মতাংদসু মহাক্না পাউদমখি। অদানী গ্রুপনা মথংগী চহি মঙাগী মনুংদা গুজরাত্তা লুপা করোর লাক্ষ অনি থাদদুনা থবক লাক্ষ অমবু হকথেংননা অমসুং নাকোইননা য়াৎলিবা থৌরাং অসিগী মতাংদসু মহাক্না পাউদমখি।

সাউথ কোরিয়াগী সিমতেক্কী CEO, শ্রী জেফ্রী চুন্না সেমিকন্দক্তর এসেমব্লী অমসুং তেস্ত ফেসিলিতীগী হীরমদা মরু ওইবা সপ্লাই চেন পার্ত্নর অমা ওইদুনা, মখোয়গী মরু ওইবা কস্তমর মাইক্রোন্না গুজরাত্তা খোঙদাখ্রবা মতুংদা ভারতকী প্রোজেক্তশিংনা কো-লোকেসন ইনভেস্তমেন্ত প্রোজেক্ত ওইবসিদা নুংঙাইবা ফাওই হায়না ফোংদোকখি। ভাইব্রেন্ত গুজরাত গ্লোবেল সম্মিৎনা ভারতকুম্বা খোঙজেল য়াঙনা শাহৌ লৌরক্লিবা লৈবাক্তা অনৌবা সপ্লাই চেন নেতৱর্ক শেম্বগী মালেমগী ইহৌ অমা পুরক্লি হায়না মহাক্না হায়খি। মখোয়না মশক থোকপা রাজ্য অমসুং কেন্দ্রগী তেংবাংগা লোয়ননা ভারত্তা কো-লোকেসন ইনভেস্তমেন্তকী অতোপ্পা রাউন্দ অমসু পায়খৎনবা শেম-শারি হায়না মহাক্না হায়খি। মসিনা সেমিকন্দক্তর সপ্লাই চেন নেতৱর্ক্তা ভারতকী ফিদাবু হেন্না মপাঙ্গল লৈহনগনি অমসুং ভারতকী লোকেল প্লেয়রশিংনা মালেমগী সপ্লাই চেন ইকোসীস্তেমগী শরুক ওইবসু ঙমহনগনি হায়না মহাক্না মখা তানা ফোংদোকখি।

তাতা সন্স লিমিতেদকী চেয়র্মেন, শ্রী এন চন্দ্রসেকরন্না অশুক শাংলবা মতমদা গুজরাতনা শোইদনা অমসুং খল ঙাক্না মশক থোক্না চাউখৎলক্লিবা অসিনা ঐখোয়গী প্রধান মন্ত্রী শ্রী নরেন্দ্র মোদীজীগী মিৎয়েং শানবা লুচিং পুরেল অমসুং ৱাখল্লোন ময়েক শেংনা তাক্লি হায়খি। শেন্মিৎলোন চাউখৎলকপনা গুজরাত্তা সোসিএল দিভেলপমেন্ত কয়াসু পুরকখি অমসুং গুজরাতনা গেতৱে তু দি ফ্যুচর অমা য়েৎননীংঙাই লৈতনা ওইরবনি হায়না মহাক্না হায়খি। তাতা গ্রুপ্পু হৌদোকপীরম্বা জমশেদজী তাতাসু নবসরীদা পোকখি হায়না পল্লদুনা গ্রুপ অসিগী হৌরকফমগী মতাংদা মহাক্না হায়খি। ঙসিদি, তাতা গ্রুপকী কম্পেনী 21 রাজ্যসিদা লৈরি। গ্রুপ অসিনা EV গারী, বেত্তরী পুথোকপা, C295 দিফেন্স এয়রক্রাফ অমসুং সেমিকন্দকত্তর ফেব, এদভান্স মেন্যুফেকচরিং স্কিল বিলদিংগী হীরমদা গুজরাত্তা পাকথোক চাউথোক্নবা থৌরাং য়াৎলিবা হায়না মহাক্না পাউদমখি। “গুজরাত অসিদি তাতা গ্রুপকী খ্বাইদগী মরু ওইবা পন্থুংফম্নি অমসুং মসিগী চাউখৎপগী খোঙচত্তা ঐখোয়না মরু ওইবা থৌদাং য়াগনি”, মহাক্না হায়খি।

দি.পি. ৱর্ল্দগী চেয়র্মেন, শ্রী সুলতান অহমদ বিন সুলায়েমনাগুজরাত সরকারবু সম্মিৎ অসিবু শীনবী লাঙবীবগীদমক্তা থাগৎলদুনা প্রধান মন্ত্রীনা থম্লিবা ভাইব্রেন্ত গুজরাত অমা হায়বা মঙলান অসিনা তসেংবা ওইরকপসিদা নুংঙাইবা ফাওই হায়না ফোংদোকখি। প্রধান মন্ত্রীগী ‘বিকশিৎ ভারত @2047’ হায়বা মঙলান্না লমজিংদুনা ভারতকী প্রিমিয়র কারবারশিংনা মশক থোক্না চাউখৎলক্লি হায়না মহাক্না ফোংদোকখি। গিফ সিতী, ধোলেরা স্পিসিএল ইনভেস্তমেন্ত রিজন অমসুং গুজরাত মেরিতাইম ক্লস্তরগুম্বা ইন্দস্ত্রীগী ক্লস্তর কয়া শেমগৎলিবা অসিদি সরকারগী হোৎনজমন্দগীনি হায়না মহাক্কনা পাউদম্লদুনা মসিনা রাজ্যসিবু গেতৱে তু দি ফ্যুচর ওইহনগনি হায়না মহাক্না হায়খি। ভারত অমসুং UAEগী মরক্তা লৈরিবা বাইলেতরেল ইকোনোমিক মরীদা মিৎয়েং চঙলদুনা, লৈবাক অসিনা ইং 2017দগী হৌদুনা গুজরাত্তা বিলিয়ন দোল্লর 2.4 হেন্না থাদদুনা খ্বাইদগী চাউবা ওভর্সী ইনভেস্তর অমা ওইরি হায়না মহাক্না ফোংদোকখি। মমাংগী চহিদা গুজরাতনা US বিলিয়ন দোল্লর 7 হেনবগী পোত্থোক এক্সপোর্ত তৌখি হায়না মহাক্না হায়খি। ভারতনা মালেমগী খ্বাইদগী খোঙজেল য়াঙনা শাহৌ লৌবা লৈবাক অমা ওইরি হায়না মহাক্না পল্লদুনা, শ্রী সুলায়েম্না প্রধান মন্ত্রীগী মথৌনা লৈবা লুচিং মখাদা শাহৌ অসি মখা তানা লৌখিগনি হায়না ফোংদোকখি। ভারত অমসুং গুজরাতপু শেন্মিৎলোনগী পাৱরহাউস অমা ওইহনবা ঙমগদবা গতিশক্তীগুম্বা ইনভেস্তমেন্তকী খোঙথাংবুসু মহাক্না থাগৎখি। DP ৱর্ল্দনা গুজরাতকী কান্দলাদা কন্তেনর মিলিয়ন 2গী কেপাসিতী লৈবা মতমগা চুনবা কন্তেনর তর্মিনেল অমা শানবগীদমক্তা ইনভেস্ত তৌনবা থৌরাং য়াৎলিবা অসিগী মতাংদসু মহাক্না পনখি। লৈবাক অসিগী লোজিস্তিক্স ইনফ্রাস্ত্রকচর পাকথোক চাউথোকহন্নবা ভারতকী সরকারগী খোঙলোয় ওইমিন্নবা অসিদা মহাক্না মহাক্না চাউথোকচবা ফাওই অমসুং ভাইব্রেন্ত গুজরাত গ্লোবেল সম্মিৎকী শরুক অমা ওইবগী খুদোংচাবা পীবগীদমক্তা গুজরাত সরকারবুসু মহাক্না থাগৎখি।

নিভিদিয়াগী সেনিয়র VP, শ্রী শঙ্কর ত্রিবেদীনা জেনেরেতিব AIগী মরু ওইবা হেনগৎলক্লিবা অসিগী মতাংদা পল্লদুনা পি.এম. মোদীনা ভারত সরকারগী সেনিয়র মেম্বরশিংগী মফমদা ৱারোল কয়া তাক্নবগীদমক্তা নিভিদিয়াগী CEO, শ্রী জেন্সেন হুৱাংবু কৌখিবগী মতাংদা পনখি অমসুং অসুম্না হায়খি, “মালেমগী লুচিংবা অমনা AIগী মতাংদা তসেংনা করিগুম্বা অমা ফোংদোকপসি মসিনা অহানবনি। প্রধান মন্ত্রী মোদীজীগী লুচিং পুরেলনা মরম ওইরগা ভারত্তা AI শিজিন্নবগী চাং হেনগৎলক্লি, গুজরাত্তসু হেনগৎলক্লি”। জেনেরেতিব AIগী মতাংদা নিভিদিয়ানা স্কিল দিভেলপমেন্তকী হীরমদা খোঙদারিবা অসিগী মতাংদা শন্দোক্না তাক্লদুনা, মহাক্না ভারত্তা তেলেন্ত, স্কেল, নীংথিরবা দেতা অমসুং তোপ-তোপ্পা চৎনবী অমা লৈ হায়খি। মহাক্না নিনিদিয়ানা মেক ফোর ইন্দিয়াবু শৌৎলিবা অসিগী মতাংদসু পনখি।

জেরোধাগী ফাউন্দর অমসুং CEO, নিখিল কামতনা মহাক্না ওন্তোপ্রিনর অমা ওইরকপগী খোঙচত্তা খুদম ওইনা পীরদুনা লৈবাক অসিনা মমাংগী দিকেদ অনিদা পুরকখিবা অপুনবা চাউখৎ থৌরাংশিংগী মতাংদা কুপা পাউদমখি। চহি তরাগী মমাংদা উবা ফংলমদবা ভারতকী স্তার্তঅপ ইকোসীস্তেম অমসুং অপীকপা ওন্তোপ্রিনর কয়ানা মায় পাকপা ফংখিবা অসিবু থাগৎলদুনা মহাক্না হৌখিবা চহি তরা অসিদি মশক থোকপা মতম অমনি হায়খি। স্তার্তঅপশিংবু মায় পাকহনবা ঙম্লিবা তংদু লৈতাবা ইকোসীস্তেম অমা শেম্বীবগীদমক্তা মহাক্না প্রধান মন্ত্রীবু থাগৎখি।

***