প্ৰধানমন্ত্ৰী শ্ৰী নৰেন্দ্ৰ মোদীয়ে আজি তামিলনাডুৰ তিৰুচিৰাপল্লীত ভাৰতীদাসন বিশ্ববিদ্যালয়ৰ ৩৮ সংখ্যক দীক্ষান্ত সমাৰোহত ভাষণ দিয়ে। তেওঁ বিশ্ববিদ্যালয়খনৰ মেধাৱী ছাত্ৰ-ছাত্ৰীসকলক বঁটাও প্ৰদান কৰে।

সভাত ভাষণ দি প্ৰধানমন্ত্ৰীয়ে কয় যে ভাৰতীদাসন বিশ্ববিদ্যালয়ৰ ৩৮ সংখ্যক দীক্ষান্ত সমাৰোহ অতি বিশেষ, কাৰণ এয়া ২০২৪ চনৰ নতুন বছৰত তেওঁৰ প্ৰথম ৰাজহুৱা অনুষ্ঠান। তেওঁ সুন্দৰ তামিলনাডু ৰাজ্যৰ লগতে যুৱক-যুৱতীসকলৰ মাজত উপস্থিত থকাত সুখ প্ৰকাশ কৰে। প্ৰধানমন্ত্ৰী শ্ৰী মোদীয়ে ভাৰতীদাসন বিশ্ববিদ্যালয়ত অনুষ্ঠিত দীক্ষান্ত সমাৰোহত অংশগ্ৰহণ কৰা প্ৰথমজন প্ৰধানমন্ত্ৰী হোৱাৰ বাবে সন্তুষ্টি প্ৰকাশ কৰাৰ লগতে এই উপলক্ষে স্নাতক ছাত্ৰ-ছাত্ৰী আৰু তেওঁলোকৰ শিক্ষক-শিক্ষয়িত্ৰী আৰু অভিভাৱকসকলক আন্তৰিক অভিনন্দন জ্ঞাপন কৰে।

প্ৰধানমন্ত্ৰীয়ে কয় যে বিশ্ববিদ্যালয় এখন সৃষ্টি কৰাটো সাধাৰণতে এক বিধায়ী প্ৰক্ৰিয়া আৰু ক্ৰমান্বয়ে নতুন মহাবিদ্যালয়সমূহ সংযুক্ত হয় আৰু বিশ্ববিদ্যালয়খন আগবাঢ়ি গৈ থাকে। অৱশ্যে, ভাৰতীদাসন বিশ্ববিদ্যালয়ৰ সৃষ্টি বেলেগ ধৰণে হৈছিল। এই প্ৰক্ৰিয়াত বিশ্ববিদ্যালয়খন গঠন কৰিবলৈ আৰু এক শক্তিশালী আৰু পৰিপক্ক ভেটি প্ৰদান কৰিবলৈ বৰ্তমানৰ কেইবাখনো প্ৰতিষ্ঠিত মহাবিদ্যালয়ক একত্ৰিত কৰা হৈছিল। এই বিশেষত্বই এই বিশ্ববিদ্যালয়খনক বহু ক্ষেত্ৰত প্ৰভাৱশালী কৰি তুলিছে।

নালন্দা আৰু তক্ষশিলাৰ প্ৰাচীন বিশ্ববিদ্যালয়সমূহৰ ওপৰত আলোকপাত কৰি প্ৰধানমন্ত্ৰীয়ে কয়, “আমাৰ দেশ আৰু ইয়াৰ সভ্যতা সদায় জ্ঞানকেন্দ্ৰিক হৈ আহিছে।” লগতে বিশ্বৰ বিভিন্ন প্ৰান্তৰ পৰা ছাত্ৰ-ছাত্ৰীক আকৰ্ষণ কৰা কাঞ্চিপুৰম, গংগাইকোণ্ডা চোলাপুৰম আৰু মাদুৰাই মহান বিশ্ববিদ্যালয়ৰ কথাও উল্লেখ কৰে।

দীক্ষান্ত সমাৰোহৰ ধাৰণাটোৰ প্ৰাচীনতাৰ বিষয়ে উল্লেখ কৰি প্ৰধানমন্ত্ৰীয়ে তামিল সংগমমৰ উদাহৰণ দাঙি ধৰে, য’ত কবি আৰু বুদ্ধিজীৱীসকলে বিশ্লেষণৰ বাবে কবিতা আৰু সাহিত্য উপস্থাপন কৰিছিল যাৰ ফলত এই ৰচনাসমূহ বৃহত্তৰ সমাজত স্বীকৃতি লাভ কৰিছিল। প্ৰধানমন্ত্ৰীয়ে কয় যে এই যুক্তি আজিও শিক্ষা আৰু উচ্চ শিক্ষাৰ ক্ষেত্ৰত ব্যৱহাৰ কৰা হয়। তেওঁ কয়, "যুৱ ছাত্ৰ-ছাত্ৰীসকল জ্ঞানৰ এক মহান ঐতিহাসিক পৰম্পৰাৰ অংশ।"

ৰাষ্ট্ৰ গঢ় দিয়াত বিশ্ববিদ্যালয়ৰ ভূমিকাক আলোকপাত কৰি প্ৰধানমন্ত্ৰীয়ে সোঁৱৰাই দিয়ে যে কেনেকৈ জীৱন্ত বিশ্ববিদ্যালয়ৰ উপস্থিতিৰ বাবে ৰাষ্ট্ৰ আৰু সভ্যতাসমূহ আগতে সজীৱ হৈ আছিল। লগতে তেওঁ কয় যে যেতিয়া দেশৰ ওপৰত আক্ৰমণ হৈছিল তেতিয়া দেশৰ জ্ঞান ব্যৱস্থাক লক্ষ্য কৰি লোৱা হৈছিল। মহাত্মা গান্ধী, পণ্ডিত মদন মোহন মালবিয়া আৰু ছাৰ অন্নামলাই চেট্টিয়াৰৰ কথা উল্লেখ কৰি প্ৰধানমন্ত্ৰীয়ে এই কথাটোৰ ওপৰত আলোকপাত কৰে যে এই দীপ্তিমানসকলে ২০ শতিকাৰ আৰম্ভণিতে বিশ্ববিদ্যালয় আৰম্ভ কৰিছিল যিবোৰ স্বাধীনতা সংগ্ৰামৰ সময়ত জ্ঞান আৰু জাতীয়তাবাদৰ কেন্দ্ৰবিন্দু হৈ পৰিছিল। একেদৰে প্ৰধানমন্ত্ৰীয়ে কয় যে ভাৰতৰ উত্থানৰ অন্যতম কাৰক হ’ল ইয়াৰ বিশ্ববিদ্যালয়সমূহৰ উত্থান। তেওঁ উল্লেখ কৰে যে ভাৰতে অৰ্থনৈতিক বৃদ্ধিৰ ক্ষেত্ৰত অভিলেখ গঢ়িছে, পঞ্চম দ্ৰুতগতিত বৃদ্ধি পোৱা অৰ্থনীতি হিচাপে পৰিগণিত হৈছে আৰু ভাৰতীয় বিশ্ববিদ্যালয়সমূহে অভিলেখ সংখ্যক বিশ্ব ৰেংকিঙত নিজৰ স্থান দখল কৰিছে।

প্ৰধানমন্ত্ৰীয়ে যুৱ পণ্ডিতসকলক শিক্ষাৰ উদ্দেশ্য আৰু সমাজে পণ্ডিতসকলক কেনেদৰে চোৱা-চিতা কৰে সেই বিষয়ে গভীৰভাৱে চিন্তা কৰিবলৈ কয়। গুৰুদেৱ ৰবীন্দ্ৰনাথ ঠাকুৰৰ উদ্ধৃতি দি তেওঁ বুজাই দিলে যে শিক্ষাই আমাক কেনেকৈ সকলো জীৱৰ লগত মিলাপ্ৰীতিৰে জীয়াই থাকিবলৈ শিকায়। ছাত্র-ছাত্রীসকলক এই পর্যায়লৈ অনাত সমগ্র সমাজে ভূমিকা লৈছে বুলিও তেওঁ কয়৷ তেওঁ এখন উন্নত সমাজ আৰু দেশ গঢ়ি তোলাৰ প্ৰক্ৰিয়াত পুনৰ অৰিহণা যোগোৱাৰ গুৰুত্বৰ ওপৰত জোৰ দিয়ে। তেওঁ কয়, "এক প্ৰকাৰে ইয়াৰ প্ৰতিজন স্নাতকে ২০৪৭ চনৰ ভিতৰত এখন বিকশিত ভাৰত গঢ়ি তোলাত অৰিহণা যোগাব পাৰিব।"

প্ৰধানমন্ত্ৰীয়ে যুৱক-যুৱতীসকলে ২০৪৭ চনলৈকে বছৰবোৰক ৰাষ্ট্ৰৰ ইতিহাসত আটাইতকৈ গুৰুত্বপূৰ্ণ বছৰ হিচাপে গঢ়ি তুলিব পৰা ক্ষমতাৰ ওপৰত নিজৰ আস্থা পুনৰবাৰ প্ৰকাশ কৰে। বিশ্ববিদ্যালয়খনৰ মূলমন্ত্ৰ - 'আহক আমি এখন সাহসী নতুন পৃথিৱী গঢ়ি তোলোঁ'ৰ কথা উল্লেখ কৰি প্ৰধানমন্ত্ৰীয়ে কয় যে ভাৰতীয় যুৱক-যুৱতীসকলে ইতিমধ্যে এনে এখন পৃথিৱী গঢ়ি তুলিছে। তেওঁ মহামাৰীৰ সময়ত ভেকচিন প্ৰস্তুত কৰা, চন্দ্ৰযান আৰু ২০১৪ চনত ৪০০০ৰ পৰা বৰ্তমান প্ৰায় ৫০ হাজাৰলৈ বৃদ্ধি পোৱা পেটেণ্টৰ সংখ্যাত ভাৰতীয় যুৱক-যুৱতীসকলৰ অৱদানৰ কথা উল্লেখ কৰে। ভাৰতৰ মানৱীয় পণ্ডিতসকলে ভাৰতৰ কাহিনীক এক অনন্য ৰূপত উপস্থাপন কৰিছে বুলিও তেওঁ কয়। তেওঁ লগতে ক্ৰীড়াবিদ, সংগীতজ্ঞ আৰু শিল্পীৰ সাফল্যৰ ওপৰত আলোকপাত কৰে। তেওঁ কয়, "আপোনালোকে এনেকুৱা সময়ত বিশ্বৰ মঞ্চত ভৰি দিছে যি সময়ত প্ৰতিটো ক্ষেত্ৰতে সকলোৱে আপোনালোকক নতুন আশাৰে চাই আছে।"

প্ৰধানমন্ত্ৰীয়ে কয়, "যৌৱন মানে শক্তি। ইয়াৰ অৰ্থ হ’ল গতি, দক্ষতা আৰু পৰিমাপৰ সৈতে কাম কৰাৰ ক্ষমতা।” তেওঁ এই কথাটোৰ ওপৰত আলোকপাত কৰে যে যোৱা কেইবছৰমানৰ পৰা চৰকাৰে গতি আৰু পৰিমাপৰ ক্ষেত্ৰত ছাত্ৰ-ছাত্ৰীৰ সৈতে খোজ মিলাই কাম কৰি আহিছে। প্ৰধানমন্ত্ৰীয়ে বিগত দহ বছৰত দেশৰ বিমানবন্দৰৰ সংখ্যা ৭৪ৰ পৰা প্ৰায় ১৫০টালৈ দুগুণ বৃদ্ধি কৰা, সকলো প্ৰধান বন্দৰৰ মাল পৰিবহণ ক্ষমতা দুগুণ কৰা, ঘাইপথ নিৰ্মাণৰ গতি আৰু পৰিসৰ দুগুণ কৰা আৰু ২০১৪ত ১০০ৰো কম হৈ থকা ষ্টাৰ্টআপৰ সংখ্যা প্ৰায় এক লাখলৈ বৃদ্ধি পোৱাৰ কথা উল্লেখ কৰে। তেওঁ লগতে ভাৰতে গুৰুত্বপূৰ্ণ অৰ্থনীতিৰ সৈতে কেইবাখনো বাণিজ্যিক চুক্তি স্বাক্ষৰ কৰাৰ কথাও কয়। ইয়াৰ দ্বাৰা ভাৰতৰ সামগ্ৰী আৰু সেৱাৰ নতুন বজাৰ মুকলি হোৱাই নহয়, যুৱ প্ৰজন্মৰ বাবেও অগণন সুযোগৰ সৃষ্টি হ’ব। জি-২০ৰ দৰে প্ৰতিষ্ঠানক শক্তিশালী কৰা, জলবায়ু পৰিৱৰ্তনৰ সৈতে মোকাবিলা কৰা আৰু বিশ্বৰ যোগান শৃংখলত বৃহৎ ভূমিকা গ্ৰহণ কৰা আদি তথ্যৰ উদ্ধৃতি দি তেওঁ কয় যে ভাৰতক প্ৰতিটো বিশ্বব্যাপী সমাধানৰ অংশ হিচাপে আদৰণি জনোৱা হৈছে। শ্ৰী মোদীয়ে কয়, "বহু দিশত স্থানীয় আৰু গোলকীয় কাৰকৰ বাবে ভাৰতত যুৱক-যুৱতী হোৱাৰ দৃষ্টিৰে এইটোৱেই উত্তম সময়।” এই সময়ৰ সৰ্বোত্তম ব্যৱহাৰ কৰি দেশক নতুন উচ্চতালৈ লৈ যাবলৈ তেওঁ ছাত্ৰ-ছাত্ৰীসকলক আহ্বান জনায়।

বিশ্ববিদ্যালয়ৰ যাত্ৰা আজি সমাপ্ত হোৱাৰ কথা উল্লেখ কৰি, প্ৰধানমন্ত্ৰীয়ে জোৰ দি কয় যে শিকাৰ যাত্ৰাৰ কোনো অন্ত নাই। তেওঁ কয়, “এতিয়া জীৱনটো আপোনাৰ শিক্ষক হৈ পৰিব।" তেওঁ এই কথাটোৰ ওপৰত আলোকপাত কৰে যে নিৰন্তৰ শিকাৰ মনোভাৱেৰে পাহৰা (অশিক্ষণ), পুনৰ দক্ষতা অৰ্জন কৰা (ৰিস্কিলিং) আৰু দক্ষতা বৃদ্ধি (আপস্কিলিং)ৰ দিশত সক্ৰিয়ভাৱে কাম কৰাটো গুৰুত্বপূৰ্ণ। নিজৰ ভাষণৰ সামৰণিত প্ৰধানমন্ত্ৰী মোদীয়ে কয়, “দ্ৰুতগতিত পৰিৱৰ্তিত পৃথিৱীত হয় আপুনি পৰিৱৰ্তনক আগুৱাই লৈ যায় নহয় পৰিৱৰ্তনে আপোনাক পৰিচালিত কৰে।”

এই উপলক্ষে তামিলনাডুৰ ৰাজ্যপাল তথা ভাৰতীদাসন বিশ্ববিদ্যালয়ৰ কুলাধিপতি শ্ৰী আৰ এন ৰবি, তামিলনাডুৰ মুখ্যমন্ত্ৰী শ্ৰী এম কে ষ্টেলিন, কুলপতি ড° এম চেলভাম আৰু প্ৰতি-কুলপতি শ্ৰী আৰ এছ ৰাজকন্নাপ্পান উপস্থিত আছিল।

**********

DS/TS