ପ୍ରଧାନମନ୍ତ୍ରୀ ଶ୍ରୀ ନରେନ୍ଦ୍ର ମୋଦୀ ଆଜି ନୂଆଦିଲ୍ଲୀର ଭାରତ ମଣ୍ଡପମଠାରେ 'ବୀର ବାଲ୍‌ ଦିବସ' ପାଳନ କାର୍ଯ୍ୟକ୍ରମକୁ ସମ୍ବୋଧିତ କରିଥିଲେ । ଶ୍ରୀ ମୋଦୀ ପିଲାମାନଙ୍କ ଦ୍ୱାରା ପରିବେଷିତ ଏକ ଆବୃତ୍ତି ଏବଂ ତିନୋଟି ମାର୍ଶାଲ ଆର୍ଟ ପ୍ରଦର୍ଶନ ଦେଖିଥିଲେ । ଏହି ଅବସରରେ ପ୍ରଧାନମନ୍ତ୍ରୀ ଦିଲ୍ଲୀରେ ଯୁବକମାନଙ୍କ ଦ୍ୱାରା ଆୟୋଜିତ ଶୋଭାଯାତ୍ରାକୁ ପତାକା ଦେଖାଇ ଶୁଭାରମ୍ଭ କରିଥିଲେ ।

ସଭାକୁ ସମ୍ବୋଧିତ କରି ପ୍ରଧାନମନ୍ତ୍ରୀ କହିଥିଲେ ଯେ ଆଜାଦୀ କା ଅମୃତ କାଳରେ ବୀର ବାଲ୍‌ ଦିବସର ଏକ ନୂତନ ଅଧ୍ୟାୟ ଭାରତ ପାଇଁ ଉନ୍ମୋଚିତ ହେଉଥିବାବେଳେ ଦେଶ ବୀର ସାହିବଜାଦେଙ୍କ ଅମର ବଳିଦାନକୁ ସ୍ମରଣ କରୁଛି ଏବଂ ସେମାନଙ୍କଠାରୁ ପ୍ରେରଣା ନେଉଛି । ପ୍ରଧାନମନ୍ତ୍ରୀ ଗତବର୍ଷ ପାଳନ କରାଯାଇଥିବା ପ୍ରଥମ ବୀର ବାଲ୍‌ ଦିବସକୁ ମନେ ପକାଇଥିଲେ ଯେତେବେଳେ ବୀର ସାହିବଜାଦେଙ୍କ ବୀରତ୍ୱର କାହାଣୀ ସମଗ୍ର ବିଶ୍ୱକୁ ଆଶ୍ଚର୍ଯ୍ୟ କରିଦେଇଥିଲା । ବୀର ବାଲ୍‌ ଦିବସ ହେଉଛି ଭାରତୀୟତାର ସୁରକ୍ଷା ପାଇଁ କେବେ ନ ମରିବା ମନୋଭାବର ପ୍ରତୀକ ବୋଲି ପ୍ରଧାନମନ୍ତ୍ରୀ ମୋଦୀ କହିଛନ୍ତି, "ଏହି ଦିନ ଆମକୁ ମନେ ପକାଇ ଦିଏ ଯେ ସାହସିକତାର ଶୀର୍ଷରେ ପହଞ୍ଚିବା ସମୟରେ ବୟସ ର କୌଣସି ଗୁରୁତ୍ୱ ନାହିଁ । ଏହା ଶିଖ୍ ଗୁରୁମାନଙ୍କ ଐତିହ୍ୟର ଉତ୍ସବ ବୋଲି କହି ପ୍ରଧାନମନ୍ତ୍ରୀ କହିଥିଲେ ଯେ ଗୁରୁ ଗୋବିନ୍ଦ ସିଂହ ଜୀ ଏବଂ ତାଙ୍କ ଚାରି ବୀର ସାହିବଜାଦାଙ୍କ ସାହସ ଏବଂ ଆଦର୍ଶ ଆଜି ବି ପ୍ରତ୍ୟେକ ଭାରତୀୟଙ୍କୁ ଉତ୍ସାହିତ କରିଛି । ବାବା ମୋତି ରାମ ମେହେରାଙ୍କ ପରିବାର ର ତ୍ୟାଗ ଏବଂ ଦିୱାନ ତୋଡରମାଲଙ୍କ ଭକ୍ତିକୁ ସ୍ମରଣ କରି ପ୍ରଧାନମନ୍ତ୍ରୀ କହିଥିଲେ, "ବୀର ବାଲ୍‌ ଦିବସ ହେଉଛି ଅତୁଳନୀୟ ସାହସର ସହ ବୀର ଯବାନଙ୍କୁ ଜନ୍ମ ଦେଇଥିବା ମା'ମାନଙ୍କ ପ୍ରତି ଏକ ଜାତୀୟ ଶ୍ରଦ୍ଧାଞ୍ଜଳି "। ଗୁରୁମାନଙ୍କ ପ୍ରତି ଏହି ପ୍ରକୃତ ଭକ୍ତି ଦେଶ ପ୍ରତି ଭକ୍ତିର ନିଆଁକୁ ପ୍ରଜ୍ଜ୍ୱଳିତ କରୁଛି ବୋଲି ପ୍ରଧାନମନ୍ତ୍ରୀ କହିଥିଲେ।

ଆମେରିକା, ବ୍ରିଟେନ, ଅଷ୍ଟ୍ରେଲିଆ, ନ୍ୟୁଜିଲାଣ୍ଡ, ୟୁଏଇ ଏବଂ ଗ୍ରୀସରେ ବୀର ବାଲ ଦିବସ ସମ୍ବନ୍ଧୀୟ କାର୍ଯ୍ୟକ୍ରମ ଦେଖିବାକୁ ମିଳିଥିବାରୁ ପ୍ରଧାନମନ୍ତ୍ରୀ ଖୁସି ବ୍ୟକ୍ତ କରିଥିଲେ । ଚମକୌର ଏବଂ ସର୍ହିନ୍ଦ ଯୁଦ୍ଧର ଅତୁଳନୀୟ ଇତିହାସକୁ ମନେ ପକାଇ ପ୍ରଧାନମନ୍ତ୍ରୀ କହିଥିଲେ ଯେ ଏହି ଇତିହାସକୁ ଭୁଲିହେବ ନାହିଁ । ସେ ମନେ ପକାଇଲେ ଯେ ଭାରତୀୟମାନେ କିପରି ନିଷ୍ଠୁରତା ଏବଂ ଏକଛତ୍ରବାଦକୁ ସମ୍ମାନର ସହ ସାମ୍ନା କରିଥିଲେ ।

ପ୍ରଧାନମନ୍ତ୍ରୀ ମୋଦୀ ଦର୍ଶାଇଛନ୍ତି ଯେ ଯେତେବେଳେ ଆମେ ଆମ ଐତିହ୍ୟକୁ ଉଚିତ ସମ୍ମାନ ଦେବା ଆରମ୍ଭ କରିଥିଲୁ ସେତେବେଳେ ବିଶ୍ୱ ମଧ୍ୟ ଆମ ଐତିହ୍ୟ ପ୍ରତି ଧ୍ୟାନ ଦେଇଥିଲା । ଆଜି ଯେତେବେଳେ ଆମେ ଆମ ଐତିହ୍ୟ କୁ ନେଇ ଗର୍ବ ଅନୁଭବ କରୁଛୁ, ସେତେବେଳେ ବିଶ୍ୱର ଦୃଷ୍ଟିକୋଣ ମଧ୍ୟ ବଦଳିଯାଇଛି । ଶ୍ରୀ ମୋଦୀ ସନ୍ତୋଷ ବ୍ୟକ୍ତ କରିଥିଲେ ଯେ ଆଜିର ଭାରତ ଦାସତ୍ୱର ମାନସିକତା ଛାଡି ଦେଶର ସାମର୍ଥ୍ୟ, ପ୍ରେରଣା ଏବଂ ଲୋକଙ୍କ ଉପରେ ପୂର୍ଣ୍ଣ ବିଶ୍ୱାସ ରଖିଛି । ଆଜିର ଭାରତ ପାଇଁ ସାହିବଜାଦାଙ୍କ ବଳିଦାନ ଏକ ପ୍ରେରଣାର ବିଷୟ। ସେହିଭଳି ଭଗବାନ ବିର୍ସା ମୁଣ୍ଡା ଓ ଗୋବିନ୍ଦ ଗୁରୁଙ୍କ ବଳିଦାନ ସମଗ୍ର ଦେଶକୁ ପ୍ରେରଣା ଦେଇଛି।

ପ୍ରଧାନମନ୍ତ୍ରୀ ଦର୍ଶାଇଥିଲେ ଯେ ବିଶ୍ୱ ଭାରତକୁ ସୁଯୋଗର ଅଗ୍ରଣୀ ଦେଶ ମଧ୍ୟରେ ରଖିଛି । ଅର୍ଥନୀତି, ବିଜ୍ଞାନ, ଗବେଷଣା, କ୍ରୀଡ଼ା ଓ କୂଟନୀତି ଭଳି ବୈଶ୍ୱିକ ସମସ୍ୟାରେ ଭାରତ ପ୍ରମୁଖ ଭୂମିକା ଗ୍ରହଣ କରୁଛି ବୋଲି ପ୍ରଧାନମନ୍ତ୍ରୀ ମୋଦୀ ଗୁରୁତ୍ୱାରୋପ କରିଥିଲେ। ସେଥିପାଇଁ ପ୍ରଧାନମନ୍ତ୍ରୀ ଲାଲକିଲ୍ଲାରୁ ଦେଇଥିବା ଆହ୍ୱାନକୁ ଦୋହରାଇଥିଲେ "ୟହି ସମୟ ହେ ସହି ସମୟ ହୈ"। ଏହା ହେଉଛି ଭାରତର ସମୟ, ଆଗାମୀ ୨୫ ବର୍ଷ ଭାରତର ସାମର୍ଥ୍ୟ ପ୍ରଦର୍ଶନ କରିବ। ପଞ୍ଚ ପ୍ରଣକୁ ଅନୁସରଣ କରିବା ଏବଂ ଗୋଟିଏ ମୁହୂର୍ତ୍ତ ବି ନଷ୍ଟ ନ କରିବା ଉପରେ ସେ ଗୁରୁତ୍ୱାରୋପ କରିଥିଲେ।

ପ୍ରଧାନମନ୍ତ୍ରୀ ଗୁରୁତ୍ୱାରୋପ କରି କହିଥିଲେ ଯେ ଭାରତ ଏକ ସମୟ ସୀମା ଦେଇ ଗତି କରୁଛି ଯାହା ଯେତେବେଳେ ଆମ ନିକଟରେ ଅନେକ ସମ୍ଭାବନା ରହିଛି । ଆଜାଦିର ଏହି ଅମୃତ କାଳରେ ଶ୍ରୀ ମୋଦୀ କହିଥିଲେ ଯେ ଏକାଧିକ କାରଣ ଏକାଠି ହୋଇଛି ଯାହା ଭାରତ ପାଇଁ ସୁବର୍ଣ୍ଣ ସମୟ ନିର୍ଦ୍ଧାରଣ କରିବ । ସେ ଭାରତର ଯୁବଶକ୍ତି ଉପରେ ଗୁରୁତ୍ୱାରୋପ କରିବା ସହ ସ୍ୱାଧୀନତା ସଂଗ୍ରାମ ତୁଳନାରେ ଆଜି ଦେଶରେ ଯୁବବର୍ଗଙ୍କ ସଂଖ୍ୟା ବହୁତ ଅଧିକ ବୋଲି ସୂଚନା ଦେଇଥିଲେ  ଏବଂ ବର୍ତ୍ତମାନର ଯୁବପିଢ଼ି ଦେଶକୁ ଅକଳ୍ପନୀୟ ଉଚ୍ଚତାରେ ପହଞ୍ଚାଇପାରିବେ ବୋଲି ବିଶ୍ୱାସ ବ୍ୟକ୍ତ କରିଥିଲେ । ଜ୍ଞାନ ସନ୍ଧାନରେ ସବୁ ପ୍ରତିବନ୍ଧକ ଭାଙ୍ଗିଥିବା ନଚିକେତା, କମ୍ ବୟସରେ 'ଚକ୍ରବୂହ', ଧ୍ରୁବ ଓ ତପସ୍ୟା କରିଥିବା ଅଭିମନ୍ୟୁ, ଖୁବ୍ କମ୍ ବୟସରେ ସାମ୍ରାଜ୍ୟ ଗଠନ କରିଥିବା ମୌର୍ଯ୍ୟ ରାଜା ଚନ୍ଦ୍ରଗୁପ୍ତ, ଏକଲବ୍ୟ ଏବଂ ତାଙ୍କ ଗୁରୁ ଦ୍ରୋଣାଚାର୍ଯ୍ୟ, ଖୁଦିରାମ ବୋଷ, ବଟୁକେଶ୍ୱର ଦତ୍ତ, କନକଲତା ବରୁଆ, ରାଣୀ ଗାଇଦିନଲିଉ, ବାଜି ରାଉତ ଏବଂ ଦେଶ ପାଇଁ ଜୀବନ ବଳିଦାନ ଦେଇଥିବା ଅନେକ ଜାତୀୟ ନାୟକଙ୍କ ପ୍ରତି ତାଙ୍କର ସମର୍ପଣ ବିଷୟରେ ସେ ଉଲ୍ଲେଖ କରିଥିଲେ।

ଆଗାମୀ ୨୫ ବର୍ଷ ଆମ ଯୁବବର୍ଗଙ୍କ ପାଇଁ ବିପୁଳ ସୁଯୋଗ ଆଣିବ ବୋଲି ପ୍ରଧାନମନ୍ତ୍ରୀ କହିଥିଲେ। ଭାରତର ଯୁବପିଢ଼ି, ଯେ କୌଣସି ଅଞ୍ଚଳ କିମ୍ବା ସମାଜରେ ଜନ୍ମ ହୁଅନ୍ତୁ ନା କାହିଁକି, ଅସୀମ ସ୍ୱପ୍ନ ଦେଖନ୍ତି। ଏହି ସ୍ୱପ୍ନକୁ ପୂରଣ କରିବା ପାଇଁ ସରକାରଙ୍କ ପାଖରେ ଏକ ସ୍ପଷ୍ଟ ରୋଡମ୍ୟାପ୍ ଏବଂ ଏକ ସ୍ପଷ୍ଟ ଦୃଷ୍ଟିକୋଣ ରହିଛି। ସକ୍ଷମ ଜାତୀୟ ଶିକ୍ଷା ନୀତି, ୧୦ ହଜାର ଅଟଳ ଟିଙ୍କରିଂ ଲ୍ୟାବ୍ ଏବଂ ଜୀବନ୍ତ ଷ୍ଟାର୍ଟଅପ୍ ସଂସ୍କୃତି ବିଷୟରେ ଉଲ୍ଲେଖ କରି ସେ ଏହା ବିଷୟରେ ବିସ୍ତୃତ ଭାବେ ଉଲ୍ଲେଖ କରିଥିଲେ। ମୁଦ୍ରା ଯୋଜନା ଯୋଗୁଁ ଉଭା ହୋଇଥିବା ଯୁବ, ଏସଏସ/ଏସଟି ଏବଂ ପଛୁଆ ବର୍ଗର ୮ କୋଟି ନୂତନ ଉଦ୍ୟୋଗୀଙ୍କ ବିଷୟରେ ମଧ୍ୟ ସେ ଉଲ୍ଲେଖ କରିଥିଲେ ।

ନିକଟରେ ଅନ୍ତର୍ଜାତୀୟ ପ୍ରତିଯୋଗିତାରେ ଭାରତୀୟ ଆଥଲେଟଙ୍କ ସଫଳତା ଉପରେ ଆଲୋକପାତ କରି ପ୍ରଧାନମନ୍ତ୍ରୀ କହିଥିଲେ ଯେ ଅଧିକାଂଶ ଆଥଲେଟ୍ ଗ୍ରାମାଞ୍ଚଳର ମଧ୍ୟବିତ୍ତ ପରିବାରରୁ ଆସିଛନ୍ତି । ସେମାନଙ୍କ ସଫଳତାର ଶ୍ରେୟ ସେ ଖେଲୋ ଇଣ୍ଡିଆ ଅଭିଯାନକୁ ଦେଇଛନ୍ତି ଯାହା ସେମାନଙ୍କ ଘର ନିକଟରେ ଉନ୍ନତ କ୍ରୀଡ଼ା ଏବଂ ପ୍ରଶିକ୍ଷଣ ସୁବିଧା ପ୍ରଦାନ କରେ ଏବଂ ଏକ ସ୍ୱଚ୍ଛ ଚୟନ ପ୍ରକ୍ରିୟା ସୁନିଶ୍ଚିତ କରେ । ଯୁବବର୍ଗଙ୍କ କଲ୍ୟାଣକୁ ପ୍ରାଥମିକତା ଦେବାର ଏହା ପରିଣାମ ବୋଲି ପ୍ରଧାନମନ୍ତ୍ରୀ କହିଥିଲେ।

ତୃତୀୟ ବୃହତ୍ତମ ଅର୍ଥନୀତି ରେ ପରିଣତ ହେବାର ସ୍ୱପ୍ନର ଅର୍ଥ କୁ ପ୍ରଧାନମନ୍ତ୍ରୀ ବିସ୍ତାର କରିଥିଲେ । ଏହା ଦ୍ୱାରା ଯୁବବର୍ଗ ଅଧିକ ଉପକୃତ ହେବେ ଏବଂ ଏହାର ଅର୍ଥ ହେଉଛି ଉନ୍ନତ ସ୍ୱାସ୍ଥ୍ୟ, ଶିକ୍ଷା, ସୁଯୋଗ, ଚାକିରି, ଜୀବନର ଗୁଣବତ୍ତା ଏବଂ ଉତ୍ପାଦର ଗୁଣବତ୍ତା । ପ୍ରଧାନମନ୍ତ୍ରୀ ମୋଦୀ ଯୁବ ଦର୍ଶକମାନଙ୍କୁ ବିକଶିତ ଭାରତର ସ୍ୱପ୍ନ ଏବଂ ସଂକଳ୍ପ ସହିତ ଯୁବକମାନଙ୍କୁ ଯୋଡ଼ିବା ପାଇଁ ଦେଶବ୍ୟାପୀ ଅଭିଯାନ ବିଷୟରେ କହିଥିଲେ । ମାଇଁ-ଭାରତ ପୋର୍ଟାଲରେ ପଞ୍ଜୀକରଣ କରିବାକୁ ସେ ପ୍ରତ୍ୟେକ ଯୁବକଙ୍କୁ ଆମନ୍ତ୍ରଣ କରିଥିଲେ। ଏହି ପ୍ଲାଟଫର୍ମ ଏବେ ଦେଶର ଛୋଟ ଝିଅ ଓ ପୁଅମାନଙ୍କ ପାଇଁ ଏକ ବଡ଼ ଅନୁଷ୍ଠାନରେ ପରିଣତ ହେଉଛି।

ଜୀବନରେ ଆଶାନୁରୂପ ଫଳାଫଳ ହାସଲ କରିବା ଜରୁରୀ ହୋଇଥିବାରୁ ନିଜ ସ୍ୱାସ୍ଥ୍ୟକୁ ସର୍ବୋଚ୍ଚ ପ୍ରାଥମିକତା ଦେବାକୁ ପ୍ରଧାନମନ୍ତ୍ରୀ ଯୁବକମାନଙ୍କୁ ପରାମର୍ଶ ଦେଇଥିଲେ । ଶାରୀରିକ ବ୍ୟାୟାମ, ଡିଜିଟାଲ ଡିଟକ୍ସ, ମାନସିକ ସୁସ୍ଥତା, ପର୍ଯ୍ୟାପ୍ତ ଶୋଇବା ଏବଂ ଶ୍ରୀ ଅନ୍ନ ବା ବାଜରାକୁ ସେମାନଙ୍କ ଖାଦ୍ୟରେ ସାମିଲ କରିବା ର ଆହ୍ୱାନ ବିଷୟରେ ଉଲ୍ଲେଖ କରି ସେ ନିଜ ପାଇଁ କିଛି ମୂଳ ନିୟମ ପ୍ରସ୍ତୁତ କରିବାକୁ ପରାମର୍ଶ ଦେଇଥିଲେ । ପ୍ରଧାନମନ୍ତ୍ରୀ ମୋଦୀ ସମାଜରେ ନିଶା ଦ୍ରବ୍ୟ ର ବିପଦ ଉପରେ ମଧ୍ୟ ସ୍ପର୍ଶ କରିଥିଲେ ଏବଂ ଏକ ରାଷ୍ଟ୍ର ଏବଂ ସମାଜ ଭାବରେ ଏକାଠି ହୋଇ ଏହାର ମୁକାବିଲା ଉପରେ ଗୁରୁତ୍ୱାରୋପ କରିଥିଲେ । ନିଶା ବିରୋଧରେ ଦୃଢ଼ ଅଭିଯାନ ଆରମ୍ଭ କରିବାକୁ ସରକାର ଓ ପରିବାର ସହ ସମସ୍ତ ଧାର୍ମିକ ନେତାଙ୍କୁ ସେ ଅନୁରୋଧ କରିଛନ୍ତି। "ଏକ ଦକ୍ଷ ଏବଂ ଶକ୍ତିଶାଳୀ ଯୁବଶକ୍ତି ପାଇଁ ସଭିଙ୍କ ପ୍ରୟାସ ଜରୁରୀ", ଆମ ଗୁରୁମାନଙ୍କ ଦ୍ୱାରା ଆମକୁ ଦିଆଯାଇଥିବା 'ସବକା ପ୍ରୟାସ'ର ଶିକ୍ଷା ଭାରତକୁ ଏକ ବିକଶିତ ରାଷ୍ଟ୍ରରେ ପରିଣତ କରିବ ବୋଲି ସ୍ମରଣ କରି ପ୍ରଧାନମନ୍ତ୍ରୀ ଶେଷରେ କହିଥିଲେ ।

କେନ୍ଦ୍ର ମହିଳା ଓ ଶିଶୁ ବିକାଶ ମନ୍ତ୍ରୀ ଶ୍ରୀମତୀ ସ୍ମୃତି ଜୁବିନ ଇରାନୀ, କେନ୍ଦ୍ର ଶିକ୍ଷା ମନ୍ତ୍ରୀ ଧର୍ମେନ୍ଦ୍ର ପ୍ରଧାନ, କେନ୍ଦ୍ର ସୂଚନା ଓ ପ୍ରସାରଣ ମନ୍ତ୍ରୀ ଅନୁରାଗ ସିଂ ଠାକୁର ଏହି ଅବସରରେ ଉପସ୍ଥିତ ରହିଥିଲେ।

ପୃଷ୍ଠଭୂମି

ବାଲ୍‌ ଦିବସ ଉପଲକ୍ଷେ ସରକାର ସାହିବଜାଦାଙ୍କ ଦୃଷ୍ଟାନ୍ତମୂଳକ ସାହସର କାହାଣୀ ବିଷୟରେ ନାଗରିକମାନଙ୍କୁ, ବିଶେଷ କରି ଛୋଟ ପିଲାମାନଙ୍କୁ ସଚେତନ କରିବା ପାଇଁ ସମଗ୍ର ଦେଶରେ ଅଂଶଗ୍ରହଣକାରୀ କାର୍ଯ୍ୟକ୍ରମ ଆୟୋଜନ କରୁଛନ୍ତି। ସାହିବଜାଦାଙ୍କ ଜୀବନ କାହାଣୀ ଏବଂ ବଳିଦାନକୁ ନେଇ ଏକ ଡିଜିଟାଲ ପ୍ରଦର୍ଶନୀ ସାରା ଦେଶର ବିଦ୍ୟାଳୟ ଏବଂ ଶିଶୁ ଯତ୍ନ ଅନୁଷ୍ଠାନରେ ପ୍ରଦର୍ଶିତ ହେବ । 'ବୀର ବାଲ ଦିବସ'ରେ ଏକ ଚଳଚ୍ଚିତ୍ର ମଧ୍ୟ ଦେଶବ୍ୟାପୀ ପ୍ରଦର୍ଶିତ ହେବ। ଏଥିସହିତ ମାଇଁ ଭାରତ ଓ ମାଇଗଭ ପୋର୍ଟାଲ ଜରିଆରେ ଇଣ୍ଟରଆକ୍ଟିଭ୍ କ୍ୱିଜ୍ ଭଳି ବିଭିନ୍ନ ଅନଲାଇନ୍ ପ୍ରତିଯୋଗିତା ଆୟୋଜନ କରାଯିବ।

୨୦୨୨ ଜାନୁଆରି ୯ ତାରିଖରେ ଶ୍ରୀ ଗୁରୁ ଗୋବିନ୍ଦ ସିଂହଜୀଙ୍କ ପ୍ରକାଶ ପୁରବ ଦିନ ପ୍ରଧାନମନ୍ତ୍ରୀ ଘୋଷଣା କରିଥିଲେ ଯେ ଡିସେମ୍ବର ୨୬ ତାରିଖକୁ 'ବୀର ବାଲ ଦିବସ' ଭାବେ ପାଳନ କରାଯିବ। ଏହାକୁ ଶ୍ରୀ ଗୁରୁ ଗୋବିନ୍ଦ ସିଂହଙ୍କ ପୁତ୍ର ସାହିବଜାଦା ବାବା ଜୋରାୱର ସିଂ ଜୀ ଏବଂ ବାବା ଫତେହ ସିଂଜୀଙ୍କ ସହିଦ ଦିବସ ସ୍ମରଣରେ ପାଳନ କରାଯାଉଛି।

BS