প্রধানমন্ত্রীগী লোইশঙ
প্রধান মন্ত্রীনা উত্তর প্রদেশগী বরানসিদা স্বরবেদ মহামন্দির শঙ্গাখ্রে
“লৈঙাক, খুন্নাই অমদি সন্ত সমাজ পুম্নমক্না কাসিগী মতিক মগুন অমুক নৌনা হিঙ্গৎহন্নবা পুন্না থবক পায়খৎমিন্নরি”
“স্বরবেদ মহামন্দির অসি ভারতকী খুন্নাই অমদি লাইনিংগী পাঙ্গলগী মতমসিগী খুদম অমনি”
“ভারতকী আর্কিতেকচর, সাইন্স, য়োগনা স্পিরিচুএল কন্সত্রক্তশিংগী লমদা খন্নরুদবা পন্দোল লোম্লি”
“মতমগী খোঙলৈনা ঙসি অমুক হল্লক্তুনা ভারতনা মাগী পারী পুরীগী লনদা চাউথোকচবা পোক্লি অমদি মীনাই নাইথাংগী ৱাখল্লোন্দগী নীং তম্লে হায়না লাউথোক্লি”
“হৌজিক্তি বনারসকী ৱাহন্থোক অসি – লাইনিং অমদি তরু তনানবা অমদি অওনবগা লোয়না লোয়ননা চাওখৎপা, মতমগা চুনবা ফেসিলিতীশিংনা ওইরে”
ফিরেপ মাপন ময়ামগী মফমদা থমখি
Posted On:
18 DEC 2023 12:47PM by PIB Imphal
প্রধান মন্ত্রী, শ্রী নরেন্দ্র মোদীনা ঙসি উত্তর প্রদেশকী বরানসিগী উমরাহদা লৈবা স্বরবেদ মহামন্দির শঙ্গাখ্রে। প্রধান মন্ত্রীনা মহারিসী সদাফল দেব জী মহারাজকী মীতমদা লৈ কৎখি অদুগা লাইশঙগী অকোয়বদসু চত্তুনা য়েংখি। তিল্লিবা মীয়ামগী মফমদা ৱা ঙাংলদুনা, প্রধান মন্ত্রীনা ঙসি অসি মহাক্না কাসিদা লাকপগী নিনি শুবা নুমিৎনি অমদি কাসিদা লেনখিবা মীৎকুপ খুদিংমক থাজরুদবা থৌদোকশিংনা থল্লি। চহি অনিগী মমাঙদা পাঙথোকখিবা অখিল ভারতিয় বিহঙ্গম য়োগ সংস্থানগী চহিগী থৌরম পাঙথোকখিববু নীংশিংলদুনা, প্রধান মন্ত্রীনা চহি অসিগী চহি চাম্ম ফারকপগী থৌরমদা শরুক য়ানবা তাঞ্জা ফংবদা তৌবিমল খঙবা ফোঙদোকখি অমদি বিহঙ্গম য়োগ সংস্থান্না চহি চাম্মগী কাউঙম্লরোইদবা খোঙচৎ মপুং ফারে হায়খি। মহাক্না হৌখিবা চহিচাদা ৱাখল লৌশিং অমদি য়োগগী লমদা মহার্সী সদাফল দেব জীনা লৌরম্বা থৌদাংশিংবু শিংথারদুনা মহাক্কী লাইগুম্লবা মঙাল মশেক্না মালেম পুম্বদা লৈরিবা মীওই মিলিয়ন কয়াগী পুন্সিদা অহোংবা পুরকখি হায়না ৱাফম থমখি। য়াইফরবা থৌরমদুদা, প্রধান মন্ত্রীনা কুন্দিয়ে ২৫,০০০গী লূপ ওইরিবা স্বরবেদ জ্ঞান মহায়জ্ঞবুসু শিংথাখি। মহায়জ্ঞ অসিদা কৎলিবা খুদিংমক্না চাওখৎপা ভারতকী ফিরেপ্পু হেন্না চেৎশিনহনগনি হায়না মহাক্না থাজবা ফোঙদোকখি। মহাক্না মহারিসি সদাফল দেব জীগী মফমদা খুরুমখি অমদি মহাক্কী মঙলানবু পুদুনা চৎলিবা লম্বোইবা পুম্নমক্কী মফমদসু ইকায়খুম্নবা উৎখি।
প্রধান মন্ত্রীনা কাসিদা অহোংবা পুরক্নবগীদমক লৈঙাক, খুন্নাই অমদি লম্বোইবা কাঙলুপশিং পুন্না থবক তৌমিন্নরিববু শিংথাখি। প্রধান মন্ত্রীনা স্বরবেদ মহামন্দিরবু অসিগুম্লবা অমত্তা ওইবগী ৱাখল্লোনগী অথোইবা মশক্নি হায়নসু শিংথাখি। প্রধান মন্ত্রীনা লাইশঙ অসি লাইগী মতিক ময়াই চেনবা অমদি চীং-লেম্বগী মীৎফম হোংবা ঙম্লোইদবা খুদম অমনি হায়খি। “স্বরবেদ মহামন্দির অসি ভারতকী খুন্নাই অমদি লাইনিংগী মপাঙ্গলগী মতমসিগী ওইবা খুদম অমনি,”হায়না মহাক্না মখা তাখি। লাইশঙ অসিগী ফজবা অমদি লাইনিংগী ইনাক খুনববু শন্দোক্না তাক্লদুনা, প্রধান মন্ত্রীনা মফমসিবু ‘য়োগ অমদি ৱাখল লৌশিংগী খুভম’ হায়নসু কৌখি।
ভারতকী শেন্মিৎলোনগী মচাক মথুম অমদি লাইনিংগী অথোইবা মতিকপু নৌহৌননা নীংশিংলদুনা, প্রধান মন্ত্রী মোদীনা ভারতনা কৈদৌনুংদসু মচাক মথুম খোমজিন তাশিনববু লম পাকথোক চাউথোক্নবগী নৎত্রগা মীওৎ মীনৈ চত্থনবগী পাম্বৈ ওইনা শীজিন্নখিদে হায়খি। “ঐখোয়না মচাক মথুমগী লমদা খুমাঙ চাওশিন্নবা লাইনিং অমদি মীওইবগী মচৎকী খুদমশিংগী খুত্থাঙদা পায়খৎখি,” হায়না মহাক্না হায়খি। মহাক্না মশক মচু থোকপা কাসি, কোনার্ক লাইশঙ, সর্নাথ, গয়া স্তুপা, অমদি নলন্দ অমসুং তক্সসিলাগুম্বা য়ুনিভর্সিতীশিংবু খুদম ওইনা পীখি। “ভারতকী আর্কিতেকচরনা হায়রিবা লাইনিংগী ওইবা মচৎসিগী অকোয়বদা ৱাখলনা লামশিল্লুদবা পন্দোলশিং লোমখি,” হায়নসু প্রধান মন্ত্রী মোদীনা ফোঙদোকখি।
মপান লৈবাক্কী লম খোপচিনবশিংনা পান্দম থম্লকখিবসি ভারতকী লাইনিংগী খুদমশিং অসিনি হায়রদুনা, নীংতম্লবা মতুংদ মখোয়শিং অসি অমুক হন্না হিঙ্গৎহনবা মথৌ তাই হায়বা ৱাফম প্রধান মন্ত্রীনা থমখি। ইশাগী পারী পুরীগী লনদা চাউথোকচবা পোক্তবগী ৱাখল্লোনগীদমক নুংনাংবা ফোঙদোক্লদুনা, প্রধান মন্ত্রীনা অসিগুম্বা খুদম চাংদমশিংবু অমুক হিঙ্গৎহনবনা লৈবাকসিগী অমত্তা ওইবগী লিংজেলবু মপাঙ্গল কনখৎহনগনি হায়খি অমদি নীংতম্লবা মতুং দেকেদ কয়া মীরাইবিদুনা থম্লম্লবা সোম্নাথ লাইশঙবু খুদম ওইনা মহাক্না পীখি। মসিনা লৈবাক অসিবু হন্থবা থাক অমদা কুমথহনখিবনি হায়না শ্রী মোদীনা ফোঙদোকখি। “মতমগী খোঙলৈনা ঙসি অমুক হন্না পুরক্তুনা, ভারতনা মাগী পারী পুরীগী লনগীদমক চাউথোকচবা পোক্লি অমদি মীনাই নাইথাংগী ৱাখল্লোন্দগী নীংতমবা ফংলে,” হায়না প্রধান মন্ত্রীনা হায়খি। সোম্নাথতগী হৌখিবা থবক অসিনা হৌজিক্তি মপুং ফাবা কেম্পন অমা ওইরক্লে হায়রদুনা মহাক্না কাসি বিস্বানাথ লাইশঙ, মহাকাল মহালোক, কেদরনাৎ ধাম অমদি বুদ্ধ সর্কিৎপু খুদম ওইনা পীখি। প্রধান মন্ত্রী মোদীনা হৌজিক শেমগৎ শাগৎলিবা রাম সর্কিৎ অমদি অথুবা মতমদা শঙ্গাগদৌরবা অয়োধ্যাগী রাম মন্দিরবুসু পনখি।
প্রধান মন্ত্রীনা মপুং ফানা চাওখৎপা হায়বসি লৈবাক অমনা মাগী খুন্নাইগী অশেংবা মশক অমদি নাৎকী শক্তমশিংবু পুদুনা চৎলবা মতমদা ওইথোক্কদৌরিবনি হায়খি। “মরম অদুননি, ঙসি ঐখোয়গী খুভমশিং অমুক নৌহৌননা শেমগৎপগী থবক পায়খৎলিবা অমদি ভারতনা মতমগা চুনবা ইনফ্রাস্ত্রকচর শেমগৎপদা অনৌবা রেকোর্দ থম্লিবা,” হায়না প্রধান মন্ত্রীনা হায়খি। ৱাফম অসি তাক্নবগীদমক মহাক্না কাসিবু খুদম ওইনা শীজিন্নখি। মমাঙগী চয়োলদা চহি অনি মপুং ফাখ্রবা অনৌবা কাসি বিস্বানাথ ধাম্না ময়োল্লম অসিদা শেন্মিৎলোন অমদি থবক্কী অনৌবা খোঙজেল অমা হাপ্লি। “হৌজিক্তি বনারসকী ৱাহন্থোক অসি – লাইনিং অমদি তরু তনানবা অমসুং অহোংবা হায়বসিগা লোয়না লোয়ননা চাওখৎপা, মতমগা চুনবা ফেসিলিতীশিং অসিনা ওইরে,” হায়না প্রধান মন্ত্রীনা ফীভম ফগৎলবা কন্নেক্তিবিতীগী মরমদা মচা খায়না হায়রদুনা ফোঙদোকখি। মহাক্না লম্বী লেন ৪-৬তা পাকথোকহনবা, রিং রোদ, রেলৱে স্তেসনশিং অপগ্রেদ তৌবা, অনৌবা ত্রেনশিং, দেদিকেতেদ ফ্রৈৎ কোরিদোর, গঙ্গা ঘাত নৌনা শেমগৎপা, গঙ্গা ক্রুজ, মতমগা চুনবা লায়েংশঙশিং, অনৌবা অমদি মতমগা চুনবা দেরী, গঙ্গা পরিংগী নেচরেল ফার্মিং, নহাশিংগী ত্রেনিং ইন্সতিত্যুৎশিং অমদি সান্সদ রোজগার মেলাগী খুত্থাঙদা থবক পীবনচিংবা ৱাফমশিংসু পনখি।
লাইনিংগী খোঙচৎশিংবু হেন্না লায়থোকহনবদা মতমগী চাওখৎপনা লৌরিবা শক্লোনগী মতাঙদা ৱাফম কয়া থম্লদুনা, প্রধান মন্ত্রীনা বরানসী ময়োল্লমগী চিদাইদা লৈরিবা স্বরবেদ লাইশঙ ফাওবগী নীংথিনা শেমগৎলবা লম্বী থোংগী মতাঙদা পনখি। মসিনা বনারসতা লাই খুরুম্বা লাক্লিবা লাই নীংবশিংগী অচৌবা মফম অমা ওইরক্তুনা অকোয়বগী খুঙ্গংশিংদা লল্লোন ইতিক অমদি থবক্কী খুদোংচাবশিং হাংদোক্লগনি হায়না মহাক্না হায়খি।
“ভিহঙ্গম য়োগ সংস্থান অসি খুন্নাইগী থৌগলদা কত্থোকপদা নত্তনা লাইনিং য়োকখৎপদসু পুক্নিং লুপ্লি,” হায়না প্রধান মন্ত্রীনা হায়রদুনা, মহার্সী সদাফল দেব জী অসি য়োগবু চেৎনা থাগোন্নরম্বা লাইনিংবা অমা ওইরম্বতা নত্তনা নীংতম্বগী লান্থেংনরম্বা নীংতম লান্মী অমসু ওইরম্মি হায়না মহাক্না মখা তাখি। মহাক্না অজাদী কা অমৃৎ মহোতসবকী ফিরেপ্পু মাঙদা পুখৎপগী মথৌ তাবা ৱাফমসু থমখি। প্রধান মন্ত্রীনা ফিরেপ ৯ ময়ামগী মফমদা থমখি অমদি মখোয়শিংদুবু ঙাক্না চৎনবা ৱাফমসু থমখি। অহানবদা, প্রধান মন্ত্রীনা ঈশিং য়োকশিনবা অমদি ঈশিং য়োকশিনবগী মরমদা মীয়ামদা খঙহন্নবা ৱাফম থমখি, অনিসুবদা – দিজিতেল ত্রাঞ্জেক্সনগী মরমদা পাক শন্না খঙহনবা, অহুমশুবদা – খুঙ্গং, লৈকায় অমদি ময়োল্লমশিংদা লু-নানবা হেনগৎহনবা, মঙাশুবদা – ভারতকী মফম মফমদা কোয়দুনা য়েংবা, তরুকশুবদা – লৌমীশিংদা মহৌশাগী লৌউ-পথাপকী মরমদা পাক শন্না খঙহনবা, তরেৎশুবদা –চনান নৎত্রগা শ্রী অন্নবু মীয়ামগী নুংতিগী পুন্সিগী শরুক ওইহনবা, নিপানশুবদা – শান্ন-খোৎনবা, মশা মউ ফনা লৈবা অমদি য়োগবু পুন্সিগী থাদোক্নবা য়াদ্রবা শরুক ওইহনবা, অমদি অরোইবদা – ভারত্তগী লায়রবা মুত্থৎনবা য়ামদ্রবদা লায়রবা ইমুং অমবু শৌগৎপিবা অসিনি।
ঙরাং নুমিদাংৱাইরম অমদি ঙসি অথেঙবদা প্রধান মন্ত্রীনা শরুক য়াখিবা বিক্সিত ভারত সংকল্প য়াত্রাগী মরমদা ৱাফম কয়া থম্লদুনা, প্রধান মন্ত্রীনা লাইনিংগী লুচিংবা খুদিংমক্কী মফমদা খোঙচৎ অসিগী মরমদা মীয়ামদা পাক শন্না খঙহন্নবা ৱাফম থমখি। “মসিনা ঐখোয়গী ইশাগী ফিরেপ ওইহনসি,” হায়বা ৱাফম থম্লদুনা প্রধান মন্ত্রীনা ৱারোল লোইশিনখি।
উত্তর প্রদেশকী মুখ্য মন্ত্রী, শ্রী য়োগী অদিত্যনাথ, কেন্দ্র মন্ত্রী, শ্রী নরেন্দ্র নাথ পান্দে, সাদগুরু অচার্য়্য শ্রী স্বতন্ত্রদেও অমদি সন্ত প্রভার শ্রী বিঞ্জানদেও জী মহারাজসু থৌরমদুদা শরুক য়াখি।
************
(Release ID: 1987801)
Visitor Counter : 103
Read this release in:
English
,
Urdu
,
Marathi
,
Hindi
,
Bengali
,
Assamese
,
Punjabi
,
Gujarati
,
Odia
,
Tamil
,
Telugu
,
Kannada
,
Malayalam