மத்திய அமைச்சரவையின் நண்பர்கள் திரு பியூஷ் கோயல் அவர்களே,  திரு கிரிராஜ் சிங்  அவர்களே,  திரு பசுபதி பராஸ்  அவர்களே,  திரு பர்ஷோத்தம் ரூபாலா  அவர்களே, திரு பிரகலாத் சிங் படேல் அவர்களே  மற்றும் பல்வேறு நாடுகளைச் சேர்ந்த சிறப்பு விருந்தினர்களே, மாநிலங்களைச் சேர்ந்த அமைச்சர்களே, வணிக மற்றும்  புத்தொழில் நிறுவன  உலகின் சகாக்களே, நாடு முழுவதிலும் உள்ள நமது விவசாய சகோதர சகோதரிகளே! உலக உணவு இந்தியா மாநாட்டில் உங்கள் அனைவரையும் அன்புடன் வரவேற்கிறேன்.

இங்குள்ள தொழில்நுட்ப அரங்கைப் பார்த்துவிட்டு இங்கு வந்துள்ளேன்.  தொழில்நுட்ப அரங்கு,  புத்தொழில் அரங்கு மற்றும் உணவு  அரங்கங்கள் தொடர்பான ஏற்பாடுகள் அற்புதமானவை. ரசனை மற்றும் தொழில்நுட்பத்தின் இந்த கலவையானது ஒரு புதிய எதிர்காலத்தை உருவாக்கும், ஒரு புதிய பொருளாதாரத்திற்கு உத்வேகம் அளிக்கும். 21-ஆம் நூற்றாண்டின் மாறிவரும் உலகில் உணவுப் பாதுகாப்பு ஒரு முக்கிய சவாலாகும். எனவே, இந்த உலக உணவு இந்தியா நிகழ்வு இன்னும் முக்கியத்துவம் வாய்ந்ததாக மாறியுள்ளது.

நண்பர்களே,

கடந்த 9 ஆண்டுகளில் பதப்படுத்தப்பட்ட உணவுத் தொழில்துறையில் ரூ.50,000 கோடி முதலீடு செய்யப்பட்டுள்ளது. இது இந்திய அரசின் தொழில்துறை சார்பு மற்றும் விவசாயிகளுக்கு ஆதரவான கொள்கைகளின் விளைவாகும். உணவு பதப்படுத்துதல் துறைக்கான உற்பத்தியுடன் கூடிய ஊக்குவிப்புத் திட்டத்தை நாங்கள் தொடங்கியுள்ளோம், நிறுவப்பட்ட தொழில்கள் மற்றும் புதிய நிறுவனங்களுக்கு சிறப்பு உதவிகளை வழங்குகிறோம்.

தற்போது, இந்தியாவில் வேளாண் உள்கட்டமைப்பு நிதியின் கீழ் அறுவடைக்குப் பிந்தைய உள்கட்டமைப்புக்கான ஆயிரக்கணக்கான திட்டங்களின் பணிகள் நடந்து வருகின்றன. இதற்காக, 50 ஆயிரம் கோடி ரூபாய்க்கு மேல் முதலீடு செய்யப்பட்டுள்ளது. மீன்வளம் மற்றும் கால்நடை பராமரிப்புக்கான பதப்படுத்தும் உள்கட்டமைப்பை ஊக்குவிப்பதற்காக ஆயிரக்கணக்கான கோடி ரூபாய் முதலீடுகள் செய்யப்பட்டு வருகின்றன.

நண்பர்களே,

இன்று இந்தியாவில் அமல்படுத்தப்பட்டுள்ள  முதலீட்டாளருக்கு உகந்த கொள்கைகள், உணவுத் துறையை புதிய உயரங்களுக்குக்  கொண்டு செல்கின்றன. நமது விவசாய ஏற்றுமதியில் பதப்படுத்தப்பட்ட உணவுகளின் பங்கு கடந்த ஒன்பது ஆண்டுகளில் 13% லிருந்து 23% ஆக உயர்ந்துள்ளது. கடந்த ஒன்பது ஆண்டுகளில் பதப்படுத்தப்பட்ட உணவு ஏற்றுமதியில் கிட்டத்தட்ட 150% குறிப்பிடத்தக்க வளர்ச்சி ஏற்பட்டுள்ளது. தற்போது, 50,000 மில்லியன் அமெரிக்க டாலருக்கும் அதிகமான மதிப்புள்ள வேளாண் பொருட்களை ஏற்றுமதி செய்து, உலகளவில் 7 வது இடத்தில் உள்ளோம்.

நண்பர்களே,

எங்கள் அரசின் ஆட்சிக் காலத்தில்தான் பாரதம் தனது முதல் வேளாண் ஏற்றுமதிக் கொள்கையை உருவாக்கியது. நாங்கள் நாடு தழுவிய தளவாடங்கள் மற்றும் உள்கட்டமைப்பு  வலையமைப்பை நிறுவினோம்.

இன்று, இந்தியாவில் மாவட்ட அளவில் 100 க்கும் மேற்பட்ட ஏற்றுமதி மையங்கள் உள்ளன. அவை மாவட்டங்களை உலக சந்தையுடன் நேரடியாக இணைக்கின்றன. ஆரம்பத்தில், நாட்டில் இரண்டு மெகா உணவுப் பூங்காக்கள் மட்டுமே இருந்தன. தற்போது இந்த எண்ணிக்கை 20ஐ தாண்டியுள்ளது. முன்பு, நம் செயலாக்கத்  திறன் 12 லட்சம் மெட்ரிக் டன்னாக இருந்தது, இப்போது அது 200 லட்சம் மெட்ரிக் டன்களைத் தாண்டியுள்ளது. இது 9 ஆண்டுகளில் 15 மடங்கு அதிகமாகும்.

இமாச்சலப்  பிரதேசத்தில் இருந்து கருப்பு பூண்டு, கட்ச்சில் இருந்து டிராகன் பழம் அல்லது கமலம், மத்திய பிரதேசத்திலிருந்து சோயா பால் பவுடர், லடாக்கில் இருந்து கார்க்கிச்சோ ஆப்பிள், பஞ்சாபிலிருந்து கேவண்டிஷ் வாழைப்பழம், ஜம்முவிலிருந்து குச்சி காளான், கர்நாடகாவிலிருந்து மூல தேன் மற்றும் பல தயாரிப்புகள் முதல் முறையாக வெளிநாட்டு சந்தைகளுக்குள் நுழைகின்றன. இந்த தயாரிப்புகள் பல நாடுகளின் விருப்பமானவையாக மாறியுள்ளன, இது உலகளவில் உங்களுக்கு கணிசமான பெரிய சந்தையை உருவாக்குகிறது.

நண்பர்களே,

இன்று, இந்தியாவில் நகரமயமாக்கல் வேகமாக அதிகரித்து வருகிறது. வாய்ப்புகளை அதிகரிப்பதோடு, வீடுகளுக்கு வெளியே வேலை செய்பவர்களின் எண்ணிக்கையும் அதிகரித்து வருகிறது. இது பாக்கேஜ் செய்யப்படும் உணவுக்கான தேவையை கணிசமாக அதிகரிக்க வழிவகுத்துள்ளது, இது நமது விவசாயிகள்,  புத்தொழில் நிறுவனங்கள் மற்றும் சிறு தொழில்முனைவோருக்கு அறியப்படாத வாய்ப்புகளை உருவாக்கியுள்ளது. எனவே, உங்கள் திட்டங்கள், இந்த சாத்தியங்கள் மற்றும் கொள்கைகளைப் போலவே லட்சியமாக இருக்க வேண்டும்.

நண்பர்களே,

இந்தியாவின் உணவு பதப்படுத்துதல் துறையின் வளர்ச்சியில் மூன்று முக்கிய தூண்கள் தனித்து நிற்கின்றன: சிறு விவசாயிகள், சிறு தொழில்கள் மற்றும் பெண்கள்! சிறு விவசாயிகளின் பங்கேற்பு மற்றும் நன்மைகளை அதிகரிக்க, வேளாண் உற்பத்தி அமைப்புகளை (எஃப்.பி.ஓ) ஒரு தளமாக திறம்பட பயன்படுத்தியுள்ளோம். இந்தியாவில் 10,000 புதிய எஃப்.பி.ஓக்கள் நிறுவப்படுகின்றன, அவற்றில் 7,000 ஏற்கனவே செயல்பாட்டில் உள்ளன. இது சந்தைக்கு விவசாயிகள் சென்றடைவதை அதிகரிக்கிறது மற்றும் பதப்படுத்தும் வசதிகள் கிடைப்பதை மேம்படுத்துகிறது. உணவு பதப்படுத்துதல் துறையில் சுமார் 2 லட்சம் குறுந்தொழில் நிறுவனங்கள் அமைக்கப்பட்டு சிறுதொழில் நிறுவனங்களின் பங்களிப்பை அதிகரிக்க நடவடிக்கை எடுக்கப்பட்டு வருகிறது. ஒரு மாவட்டம் ஒரு தயாரிப்பு (ஓ.டி.ஓ.பி) போன்ற முன்முயற்சிகள் சிறு விவசாயிகள் மற்றும் சிறு தொழில்களுக்கு ஒரு புதிய அடையாளத்தை வழங்கியுள்ளன.

நண்பர்களே,

பெண்கள் தலைமையிலான வளர்ச்சிப் பாதையை இன்று பாரதம் உலகிற்கு எடுத்துக்காட்டுகிறது. இந்தியாவின் பொருளாதாரத்தில் பெண்களின் பங்களிப்பு தொடர்ந்து அதிகரித்து வருகிறது, மேலும் உணவு பதப்படுத்தும் தொழிலும் இதன் மூலம் பயனடைந்து வருகிறது. தற்போது, இந்தியாவில் 9 கோடிக்கும் அதிகமான பெண்கள் சுய உதவிக் குழுக்களுடன் இணைந்துள்ளனர். இந்தியாவில் உணவு அறிவியல் துறையில் முன்னணி விஞ்ஞானிகள் பல நூற்றாண்டுகளாக பெண்களாக உள்ளனர் என்பதை நீங்கள் அனைவரும் அறிவீர்கள். ஊறுகாய், அப்பளம், சிப்ஸ் மற்றும் பதப்படுத்துதல் போன்ற சந்தையில் உள்ள பல தயாரிப்புகளை பெண்கள் தங்கள் வீடுகளில் இருந்தே நிர்வகிக்கிறார்கள்.

உணவு பதப்படுத்தும் தொழிலில் தலைமை வகிப்பது, இந்தியப் பெண்களுக்கு இயல்பானது. இதை ஊக்குவிக்கும் வகையில், அனைத்து நிலைகளிலும் உள்ள பெண்களால், குடிசைத் தொழில்கள் மற்றும் சுய உதவிக் குழுக்கள் ஊக்குவிக்கப்படுகின்றன.

நண்பர்களே,

உணவு பன்முகத்தன்மையில் இருப்பதைப் போலவே இந்தியாவும் கலாச்சார பன்முகத்தன்மையைக் கொண்டுள்ளது. எங்கள் உணவு பன்முகத்தன்மை உலகெங்கிலும் உள்ள ஒவ்வொரு முதலீட்டாளருக்கும் ஒரு ஈவுத்தொகையாகும். உலக அளவில் பாரதத்தின் மீது அதிகரித்து வரும் ஆர்வம் உங்கள் அனைவருக்கும் ஒரு மிகப்பெரிய வாய்ப்பாகும்.

நாம் உட்கொள்ளும் உணவு நம் உடல் ஆரோக்கியத்தில் குறிப்பிடத்தக்க பங்கு வகிப்பது மட்டுமல்லாமல், நம் மன நல்வாழ்விலும் ஆழமான தாக்கத்தை ஏற்படுத்துகிறது. பாரதத்தின் நிலையான உணவு கலாச்சாரம் ஆயிரக்கணக்கான ஆண்டுகளாக நீடித்த வளர்ச்சிப் பயணத்தின் விளைவாகும். நம் முன்னோர்கள் ஆயுர்வேதத்துடன் உணவுப் பழக்கத்தை ஒருங்கிணைத்தனர். ஆயுர்வேதம், பருவத்திற்கு ஏற்ப சாப்பிடுவது என்று பொருள்படும் 'ரித்புக்', சமச்சீர் உணவு என்று பொருள்படும் 'மிட்புக்', ஆரோக்கியமான உணவுகள் என்று பொருள்படும் 'ஹிட்புக்' ஆகியவற்றை வலியுறுத்துகிறது. இந்தக் கோட்பாடுகள் பாரதத்தின் அறிவியல் புரிதலின் முக்கிய கூறுகளாகும்.

உணவு மற்றும் குறிப்பாக மசாலாப் பொருட்களின் வர்த்தகத்தின் மூலம் பல நூற்றாண்டுகள் பழமையான பாரதம் பற்றிய அறிவிலிருந்து உலகம் பயனடையும். இன்று, நாம் உலகளாவிய உணவுப் பாதுகாப்பைப் பற்றி விவாதிக்கும்போது மற்றும் உலகளாவிய சுகாதாரம் குறித்த கவலைகளை வெளிப்படுத்தும்போது, நிலையான மற்றும் ஆரோக்கியமான உணவுப் பழக்கவழக்கங்கள் குறித்த இந்த பண்டைய அறிவை ஆராய்ந்து, புரிந்துகொள்வது மற்றும் ஏற்றுக்கொள்வது நமது உணவு பதப்படுத்தும் தொழில்துறைக்கு அவசியமாகிவிட்டது.

இந்த ஆண்டு, உலகம் முழுவதும் சர்வதேச சிறுதானிய ஆண்டு கொண்டாடப்படுகிறது. சிறுதானியங்களுக்கு  பாரதத்தில் "ஸ்ரீ அன்னா" என்ற அங்கீகாரத்தை நாம் கொடுத்துள்ளோம். பல நூற்றாண்டுகளாக, பெரும்பாலான நாகரிகங்களில் சிறுதானியங்களுக்கு முன்னுரிமை அளிக்கப்பட்டது. இருப்பினும், சமீபத்திய தசாப்தங்களில், இந்தியா மற்றும் பல நாடுகளில் உணவுப் பழக்கத்தில் சிறுதானியங்கள் நடைமுறையில் இல்லை. இது உலகளாவிய சுகாதாரம், நிலையான விவசாயம் மற்றும் நிலையான பொருளாதாரத்தில் குறிப்பிடத்தக்க விளைவுகளை ஏற்படுத்தியது.

உலக அளவில் சிறுதானியங்கள் குறித்த விழிப்புணர்வை ஏற்படுத்துவதில் பாரதம் முன்னிலை வகிக்கிறது. சர்வதேச யோகா தினம் எப்படி உலகின் ஒவ்வொரு மூலைக்கும் யோகாவை கொண்டு சென்றதோ, அதே போல் இனி சிறுதானியங்களும் உலகின் ஒவ்வொரு மூலையையும்  சென்றடையும் என்று நான் உறுதியாக நம்புகிறேன். சமீபத்தில், ஜி20 உச்சிமாநாட்டின் போது உலகத் தலைவர்களுக்கு விருந்தளித்தபோது, அவர்கள் சிறுதானியங்களால் செய்யப்பட்ட உணவுகளைப் பாராட்டினர்.

இன்று, இந்தியாவின் பல பெரிய நிறுவனங்கள் சிறுதானியங்களிலிருந்து தயாரிக்கப்பட்ட பதப்படுத்தப்பட்ட உணவுப் பொருட்களை சந்தையில் அறிமுகப்படுத்துகின்றன. இந்த திசையில் அதிக வாய்ப்புகளை எவ்வாறு உருவாக்குவது, உணவு சந்தையில் ஸ்ரீ அன்னாவின் சந்தை பங்கை எவ்வாறு அதிகரிப்பது என்பது குறித்து விவாதித்து, தொழில்துறை மற்றும் விவசாயிகள் இருவரின் நலனுக்காக ஒரு கூட்டு செயல்திட்டத்தை தயாரிக்குமாறு நான் உங்கள் அனைவரையும் கேட்டுக்கொள்கிறேன்.

நம் நாட்டில் 100 மில்லியனுக்கும் அதிகமான குழந்தைகள், சிறுமிகள் மற்றும் கர்ப்பிணிப் பெண்களுக்கு சத்தான உணவை வழங்குகிறோம். நமது உணவு விநியோகத் திட்டங்களை பன்முகப்படுத்தப்பட்டதாக மாற்றுவதற்கான நேரம் இது. இதேபோல், அறுவடைக்குப் பிந்தைய இழப்புகளைக் குறைப்பதற்கும், பேக்கேஜிங்கில் சிறந்த தொழில்நுட்பத்தை அறிமுகப்படுத்துவதற்கும், நிலையான வாழ்க்கைமுறைக்காக உணவு வீணாவதற்கான சவாலை நிவர்த்தி செய்வதற்கும் நாம் பணியாற்ற வேண்டும்.

உங்கள் அனைவருக்கும் மீண்டும் ஒரு முறை எனது வாழ்த்துக்களை தெரிவித்துக் கொள்கிறேன். தில்லி மற்றும் அதைச் சுற்றியுள்ள பகுதிகளில் உள்ள வேளாண் பல்கலைக்கழகங்களின் மாணவர்கள், புத்தொழில்  உலகில் உள்ள நபர்கள் அல்லது விவசாய அமைப்புகளின் தலைவர்கள் என இந்த துறையில் ஆர்வமுள்ளவர்கள், மூன்று நாள் திருவிழாவில் பங்கேற்குமாறு கேட்டுக்கொள்கிறேன். அனைவருக்கும் எனது மனமார்ந்த வாழ்த்துகளைத்  தெரிவித்துக் கொள்கிறேன்.

மிகவும் நன்றி!

பொறுப்புத்துறப்பு: இது பிரதமர்  உரையின் தோராயமான மொழிபெயர்ப்பு. பிரதமர் தமது உரையை இந்தியில் வழங்கியிருந்தார்.

*****

ANU/PKV/RB/DL