U Myntri Rangbah duh, u Narendra Modi u la ai jingkren ha ka Rozgar Mela jong ka ri lyngba ka video conferencing mynta ka sngi bad sam palat 51,000 tylli ki shithi thung kam sha kiba dang rung kam thymmai ha ki tnat bad ki kynhun sorkar bapher bapher. Kiba dang rung kam thymmai, kiba la jied na kylleng ka ri kin rung kam ha ki Tnat bapher bapher  jong ka sorkar kiba kynthup ia ki Tnat Rel, Post, Tnat Kam Pohiing, Tnat Revenue, Higher Education, Tnat School Education and Literacy bad Tnat ka Koit ka Khiah, ha ryngkat kiwei kiwei. La pyniasoh ia 37 tylli ki jaka ha kylleng ka ri bad ka Mela ha ka jingai jingkren jong u Myntri Rangbah duh.

Ha ka jingai jingkren ha ka jingialang, u Myntri Rangbah duh u la ong ba ka jingiaid lynti ki Rozgar Mela ka la poi sha u mawmer ba kongsan ha kaba la sdang ia ki Rozgar Mela ha u bnai Risaw jong u snem ba ladep da kaba sam ia ki shithi thung kam na ka bynta ki kam sorkar sha ki lak ngut ki samla ha ki Rozgar Mela bapher bapher ha ki jylla bad ki union territory ba synshar ka BJP bad NDA. Mynta ka sngi ruh, palat 50,000 ngut ki samla ki la ioh kam sorkar. U Myntri Rangbah duh u la ai khublei ia kiba dang rung kam thymmai bad kiba haiing jong ki.

U Myntri Rangbah duh u la ong ba ki Rozgar Mela ba la pynlong ha ki jylla bad ki Union Territory bapher bapher kilong ki dak jong ka jingkut jingmut ka sorkar na ka bynta ka lawei jong ki samla ha kaba ka kam ka dang iaid shaphrang ha ka rukom mission mode. “Ym tang ba ngi ai kam ai jam hynrei ngi pynthikna ruh ia ka rukom thung kam kaba shai,” la ban jur u Modi ha kaba u la kdew ia ka jingkiew ka jingshaniah jong ki samla ha ki rukom thung kam. U la ong ba ka sorkar ka shim ia ki sienjam ym tang ban pyniaid ryntih ia ki rukom thung kam hynrei pynkylla ruh ia ka rukom leh eksamin. U la ong ba la pynduna da shiteng ia ka jingshim por na ka bynta ka jingpynrung kam hapoh ka staff selection. “Ka por baroh hapdeng ka jingpynbna thung kam haduh ka jingai shithi thung kam ka la duna shibun bha,” la batai u Modi. Haba kren shaphang ki katto katne ki eksamin hapoh ka SSC , u Myntri Rangbah duh u Modi u la pyntip ba ia ki eksam mynta la pynlong ha 13 tylli ki ktien jong ki thain nalor ka ktien Hindi bad ktien phareng khnang ban pynsuk ia ki samla ban lait na ka jingeh ba iadei bad ka ktien.

Haba kren shaphang ka jingsted ka roi ka par kaba la plie ki lad ioh kam bapher bapher, u la kren shaphang ka shnong Dhordo kaba la ioh khusnam best tourism village na ka United Nations, bad ka jingioh jingithuh World Heritage site ka Hoysala temple complex bad Shanti Niketan. Kine baroh ha ryngkat ka jingkiew ki kam jngoh kai kin plie lad ioh kam ba thymmai ia ki samla. Kumjuh ruh, ka jingkiew ki kam ialehkai ka plie ki lad ioh kam ba thymmai, u la ong.

“Ka Sorkar ka dang pynkhlain ia ki kam tynrai da kaba plie ki lad ioh kam katba ka nang kyntiew ruh ia ki kam ba thymmai kum ka bording ba lah ban pynthymmai, ki kam haw haw, ka jingpyndonkam ia ki kor bad ka jingshlan ia ki tiar iada ri,” la ong u Myntri Rangbah duh. U la kren ruh shaphang ka jingplie ki lad ba thymmai ha ka kam drone teknoloji bad u la ai ki nuksa kum ka jinglum jingtip shaphang ki jingthung bad la synreit dawai nutrient da ka jingiarap kane ka teknoloji. Hapoh ka skhim Swamitva, u Myntri Rangbah duh u la pyntip ba la pyndonkam ia ki drone na ka bynta ban shim jingthew ia ka jaka. U la kren ruh shaphang ka jingpynpoi dawai ha ka thain Lahaul Spiti ha Himachal Pradesh da kaba pyndonkam ia ki drone, kaba la pynduna ia ka por ba la antad na ka 2 kynta sha ka 20-30 minit. Ki Startup ki la ioh jingmyntoi ruh na ki drone bad ka la iarap ha ka jingsaindur thymmai bad ki teknoloji.

U Myntri Rangbah duh u la kren shaphang ka Khadi kaba la don ka jingdie haduh palat 1.25 lak klur haba ianujor bad tang 30 hajar jlur ha ki 10 snem ba la leit. Kane ka la plie shibun ki lad ioh kam ha ka Khadi bad village industry, khamtam ka la long ka jingmyntoi shibun ia ki longkmie.

U Myntri Rangbah duh u Modi u la ong ba kano kano ka jingkhlain jong kano kano ka ri ka donkam ban sngewthuh pura ia ka bor jong ki samla. U la ong ba ki sienjam jong ka jingpyntbit ha ki sap treikam bad ka pule puthi kadei kaba la pynkhreh ia ki samla ban shim kabu pura ia ki lad ba thymmai. La sdang ia ka National Education Policy ba thymmai, ki medical college ba thymmai, IIT, IIM bad IIIT bad da ki klur ngut ki samla ki la ioh jinghikai pyntbit hapoh ka PM Kaushal Vikas Yojana. La plie ia ka PM Vishwakarma Yojana na ka bynta ki paralok Vishwakarma. Namar ka jingpyntbit biang ha ki sap treikam bad ka jinghikai ia ki sap kiba thymmai, la pyntip u Myntri Rangbah duh ba ka PM Vishwakarma Yojana ka pyniasoh ia ki Vishwakarma bad ka teknoloji bad ki tiar kiba mynta.

Haba kren shaphang ka jingplie ki lad ioh kam na ka bynta ki samla kadei ka bynta ba kongsan jong ka kam ban tei ia ka ri ka ban plie lynti ia ka India ban long ka ri kaba la kiew, u Myntri Rangbah duh u la ban jur ba kidei ki samla ba dang rung ha ka kam ki ban rah shakhmat ia ki skhim jong ka sorkar bad ban pyntreikam ia ki naduh ki shnong.  “Mynta, baroh phi long ki nongiatreilang ba kongsan ha ka jingiaid lynti jong ngi ha ka jingtei ia ka ri,” la ong u Myntri Rangbah duh da kaba kyntu ia ki ban nohsynniang da ka bor baroh ban pynurlong ia ka thong jong ka ri. U la kyntu ruh ia ki ban bteng ia ka rukom ioh jinghikai  jong ki bad pyndonkam ia ka rynsan iGOT Karmayogi. “Man ka sienjam jong phi kan iarap ban rah shakhmat ia ka ri ha ka lynti jong ka roi ka par,” u la ong. Haba pynkut ia ka jingkren, u Myntri Rangbah duh u la kren shaphang ka jinglehkmen ba kyrpang jong ka Sharad Purnima bad kyntu ia kiba dang rung kam ban pynsaphriang ia ka khubor jong ka Vocal for Local kaba long ruh ka rynsan kaba plie ki lad ioh kam ioh jam hapoh ka ri.

Ka Nongrim

Ia ka Rozgar Mela la pynlong ha 37 tylli ki jaka ha kylleng ka ri. Ki jingpynrung kam ki long ha ki Tnat sorkar pdeng bapher bapher bad ki Sorkar Jylla/ UT ki kyrshan ia kane ka sienjam. Kiba dang rung kam thymmai, kiba la jied na kylleng ka ri kin rung kam ha ki Tnat bapher bapher  jong ka sorkar kiba kynthup ia ki Tnat Rel, Post, Tnat Kam Pohiing, Tnat Revenue, Higher Education, Tnat School Education and Literacy bad Tnat ka Koit ka Khiah, ha ryngkat kiwei kiwei.

Ka Rozgar Mela kalong ka sienjam na ka bynta ban pynurlong ia ka jingkut jingmut jong u Myntri Rangbah duh ban peit bniah tam ia ka jingpynmih lad ioh kam. Ka Rozgar Mela kan long kum ka jingplie lad ia ka jingioh kam bad ka jingplie lad ba bit ba biang ia ki samla na ka bynta ka jingpynkup bor ia ki bad ka jingiashim bynta ha ka roi ka par jong ka ri.

Kiba dang rung kam thymmai ki ioh lad ruh ban hikai pyntbit ialade lyngba ka Karmayogi Prarambh, ka online module ha ka rynsan iGOT Karmayogi, ha kaba la pynbiang palat 750 ki lad ioh jinghikai e-learning ha “kano kano ka tiar elektrik na kano kano ka jaka.”