কেন্দ্ৰীয় গৃহমন্ত্ৰী তথা সমবায় মন্ত্ৰী শ্ৰী অমিত শ্বাহে আজি হায়দৰাবাদৰ চৰ্দাৰ বল্লভভাই পেটেল ৰাষ্ট্ৰীয় আৰক্ষী একাডেমীত ভাৰতীয় আৰক্ষী সেৱাৰ ৭৫ আৰ আৰ বেচৰ দীক্ষান্ত পেৰেডত ভাষণ দিয়ে। এই উপলক্ষে আয়োজন কৰা অনুষ্ঠানত তেলেংগানাৰ ৰাজ্যপাল, কেন্দ্ৰীয় গৃহ সচিব, ইণ্টেলিজেন্স ব্যুৰ’ৰ সঞ্চালক আৰু চি বি আইৰ সঞ্চালককে ধৰি বহু গণ্যমান্য ব্যক্তি উপস্থিত থাকে।

ভাষণত শ্ৰী অমিত শ্বাহে কয় যে আজি ৭৫ আৰ আৰৰ প্ৰশিক্ষাৰ্থীসকলৰ বাবে অতি গুৰুত্বপূৰ্ণ দিন; কাৰণ তেওঁলোক সেইসকল সৌভাগ্যৱান বিষয়া যিসকলে দেশৰ স্বাধীনতাৰ শতবাৰ্ষিকীত ভাৰতীয় আৰক্ষী ব্যৱস্থাৰ শীৰ্ষ নেতৃত্বত থাকিব আৰু দেশৰ আভ্যন্তৰীণ নিৰাপত্তাৰ দায়িত্ব তেওঁলোকৰ হাতত থাকিব। তেওঁ কয় যে অমৃত মহোৎসৱৰ সৈতে একাডেমীৰ ৭৫ সংখ্যক বেটচৰ ঐতিহাসিক তাৎপৰ্য থাকিব আৰু এইসকল বিষয়াই দেশৰ প্ৰতি থকা কঠোৰ পৰিশ্ৰম, নিষ্ঠা, ত্যাগ আৰু নিষ্ঠাৰ দ্বাৰা এই অনুষ্ঠানটোক অধিক ঐতিহাসিক কৰি তুলিব। শ্ৰী শ্বাহে কয় যে যেতিয়া এই বিষয়াসকলে দেশৰ বিভিন্ন ৰাজ্যৰ আৰক্ষী বাহিনীক নেতৃত্ব দিব, তেতিয়া দেশে ৭৫ নং আৰ আৰৰ প্ৰশিক্ষাৰ্থীসকলৰ ওপৰত গৌৰৱ অনুভৱ কৰিব যে তেওঁলোকে ২৫ বছৰীয়া সেৱাৰ সময়ছোৱাত দেশৰ আভ্যন্তৰীণ নিৰাপত্তা নিশ্চিত কৰাৰ ক্ষেত্ৰত কোনো সুৰুঙাই এৰা নাই। প্ৰধানমন্ত্ৰী শ্ৰী নৰেন্দ্ৰ মোডীৰ অমৃতকালৰ সংকল্প পূৰণৰ দিশত ৭৫টা আৰ আৰ বেচৰ বিষয়া প্ৰশিক্ষাৰ্থীৰ গুৰুত্বপূৰ্ণ ভূমিকা থাকিব। যেতিয়া দেশৰ স্বাধীনতাৰ শতবাৰ্ষিকী উদযাপন হ’ব, তেতিয়া ভাৰতে সকলো ক্ষেত্ৰতে বিশ্বৰ অগ্ৰণী স্থানত থাকিব, আৰু ইয়াত সকলো বিষয়াৰো বৃহৎ অৱদান থাকিব।

কেন্দ্ৰীয় গৃহমন্ত্ৰীগৰাকীয়ে কয় যে চৰ্দাৰ পেটেলে এই একাডেমীৰ ভেটি অতি দূৰদৰ্শী চিন্তাৰে দেশখনক আগুৱাই নিয়াৰ বাবে স্থাপন কৰিছিল। আমাৰ দেশেও স্বাধীনতাৰ ৭৫ বছৰ সম্পূৰ্ণ কৰি অমৃতকালৰ যুগত প্ৰৱেশ কৰিছে। তেওঁ কয় যে প্ৰধানমন্ত্ৰী শ্ৰী নৰেন্দ্ৰ মোদীয়ে এইবাৰ দেশৰ ১৩০ কোটি জনসাধাৰণক সংকল্প গ্ৰহণ কৰি কৃতিত্বলৈ ৰূপান্তৰিত কৰিবলৈ আহ্বান জনাইছে। শ্ৰী শ্বাহে কয় যে এই ২৫ বছৰত দেশখনক প্ৰতিটো ক্ষেত্ৰতে বিশ্বৰ ভিতৰতে প্ৰথম স্থান দখল কৰি বিশ্বত নিজৰ উচিত আৰু গৌৰৱময় স্থান প্ৰতিষ্ঠা কৰাৰ সময়। অমৃতকালৰ সময়ত এই বিষয়াসকলে দেশৰ আভ্যন্তৰীণ নিৰাপত্তা, সীমান্ত সুৰক্ষা আৰু আইন-শৃংখলা বজাই ৰখাৰ বাবে গুৰুত্বপূৰ্ণ ভূমিকা পালন কৰিবলগীয়া হয়। তেওঁ কয় যে একাডেমীৰ পৰা উত্তীৰ্ণ হৈ ওলাই যোৱাৰ পিছত এই বিষয়াসকলে সংবিধানখন যাতে দেশত যথাযথভাৱে কাৰ্যকৰী হয় সেয়া নিশ্চিত কৰাৰ লগতে ইয়াৰ দ্বাৰা প্ৰদান কৰা অধিকাৰ সকলো ৰাইজে লাভ কৰাটো নিশ্চিত কৰিব লাগিব।

শ্ৰী অমিত শ্বাহে কয় যে আমি সদায় মনত ৰখা উচিত যে দেশৰ প্ৰথম গৃহমন্ত্ৰী তথা লৌহপুৰুষ চৰ্দাৰ বল্লভভাই পেটেলে এই দেশক একত্ৰিত কৰাই নহয়, ইয়াক একত্ৰিত কৰি ৰাখিবলৈ বহু গুৰুত্বপূৰ্ণ কামো কৰিছিল। তেওঁ কয় যে চৰ্দাৰ পেটেলে দেশৰ ৫৫০ খনতকৈও অধিক ৰাজশাসিত ৰাজ্যক একত্ৰিত কৰি এক সংযুক্ত ভাৰতৰ সৃষ্টি কৰাই নহয়, আই পি এছ কেডাৰ আৰম্ভ কৰি এক শক্তিশালী ব্যৱস্থাও স্থাপন কৰিছিল। শ্ৰী শ্বাহে কয় যে চৰ্দাৰ পেটেলে কৈছিল যে মতামত প্ৰকাশৰ স্বাধীনতা থকা এখন ৰাষ্ট্ৰত যদি এটা ভাল সৰ্বভাৰতীয় সেৱা নাথাকে, তেন্তে ৰাষ্ট্ৰৰ অস্তিত্ব বিনাশ হৈ যাব। এই বাক্যটো আই পি এছ কেডাৰৰ বাবে এক পথ প্ৰদৰ্শক নীতিৰ দৰে। তেওঁ লগতে কয় যে এবাৰ চৰ্দাৰ পেটেলে কৈছিল যে এই প্ৰতিষ্ঠানটোৱে পিছলৈ ঘূৰি চাবলৈ একো নাই, কিন্তু ভৱিষ্যত প্ৰজন্মৰ বাবে পৰম্পৰা স্থাপন কৰিবলৈ বহুখিনি আছে। এই একাডেমী প্ৰতিষ্ঠা হোৱাৰ সময়ত ইয়াৰ কোনো ইতিহাস নাছিল যদিও এই ৭৫ বছৰত ইয়াৰ পৰা সুপ্ৰশিক্ষিত হৈ ওলাই যোৱা আই পি এছ বিষয়াসকলে দেশৰ আভ্যন্তৰীণ আৰু সীমান্ত সুৰক্ষা শক্তিশালী কৰাৰ বাবে এক উজ্জ্বল আৰু গৌৰৱময় ইতিহাসৰ সৃষ্টি কৰিছে। আজি ইয়াৰ পৰা উত্তীৰ্ণ হৈ ওলাই যাবলগীয়া ৭৫ নং বেটচৰ প্ৰশিক্ষাৰ্থীসকলৰ দায়িত্ব হ’ব এই ইতিহাসক আগুৱাই লৈ যোৱা আৰু ইয়াত বহুতো সোণালী অধ্যায় সংযোজন কৰা। তেওঁ কয় যে আজি ভূটান, মালদ্বীপ, মৰিচাছ আৰু নেপালৰ ২০ জন বিদেশী বিষয়াকে ধৰি মৌলিক পাঠ্যক্ৰম সম্পূৰ্ণ কৰি ইয়াৰ পৰা ১৭৫ জন প্ৰশিক্ষাৰ্থীয়ে উত্তীৰ্ণ হৈছে। এই ১৭৫ গৰাকী বিষয়া প্ৰশিক্ষাৰ্থীৰ ভিতৰত ৩৪ গৰাকী মহিলা বিষয়া আছে।

কেন্দ্ৰীয় গৃহমন্ত্ৰীয়ে কয় যে অনাগত দিনত আভ্যন্তৰীণ নিৰাপত্তা চম্ভালিবলৈ প্ৰযুক্তিয়ে অতি গুৰুত্বপূৰ্ণ ভূমিকা পালন কৰিব, আৰু সেইবাবেই প্ৰধানমন্ত্ৰী শ্ৰী নৰেন্দ্ৰ মোদীয়ে আৰক্ষী প্ৰযুক্তি অভিযান গঠন কৰিছিল। এই অভিযানৰ উদ্দেশ্য হৈছে ভাৰতীয় আৰক্ষীক প্ৰযুক্তিৰ ক্ষেত্ৰত বিশ্বৰ ভিতৰতে শক্তিমান কৰি তোলা। আমি আভ্যন্তৰীণ নিৰাপত্তাৰ পুলিচিং আৰু নিয়ন্ত্ৰণৰ ক্ষেত্ৰত প্ৰযুক্তিৰ ব্যৱহাৰিক প্ৰয়োগৰ ব্যৱস্থা স্থাপন কৰিব লাগিব আৰু আৰক্ষীক সদায় প্ৰযুক্তিগতভাৱে অপৰাধীতকৈ দুখোজ আগুৱাই ৰাখিব লাগিব। তেওঁ কয় যে ইয়াত প্ৰদান কৰা সকলো অভিজ্ঞতা আৰু প্ৰশিক্ষণৰ সৈতে যেতিয়া এই বিষয়াসকলে ‘গ্ৰাউণ্ড’লৈ গৈ জনসাধাৰণৰ সৈতে মত বিনিময় কৰিব, তেতিয়া এই প্ৰশিক্ষণক ব্যৱহাৰিক অভিজ্ঞতাৰ সৈতে জড়িত কৰি তেওঁলোকে নিজৰ কৰ্তব্য দক্ষতাৰে পালন কৰিবলৈ সক্ষম হ’ব।

শ্ৰী অমিত শ্বাহে কয় যে আজি এগৰাকী মহিলা বিষয়াই শ্ৰেষ্ঠ বিষয়া প্ৰশিক্ষাৰ্থী বঁটা লাভ কৰিছে আৰু সেয়া আমাৰ দেশৰ বাবে অতি গৌৰৱৰ বিষয়। তেওঁ কয় যে একাডেমীৰ ইতিহাসত প্ৰথমবাৰৰ বাবে এগৰাকী মহিলা বিষয়া প্ৰশিক্ষাৰ্থী শ্ৰীমতী ৰঞ্জিতা শৰ্মাই আই পি এছ এছ’চিয়েশ্যনৰ স্কোয়াড অৱ অনাৰ লাভ কৰাৰ সুযোগ লাভ কৰিছে। তেওঁ কয় যে প্ৰধানমন্ত্ৰী শ্ৰী নৰেন্দ্ৰ মোডীৰ নেতৃত্বত দেশখনে মহিলা নেতৃত্বাধীন উন্নয়নৰ ক্ষেত্ৰত দ্ৰুতগতিত আগবাঢ়িছে। শেহতীয়াকৈ মোডী চৰকাৰে দেশৰ সংসদ আৰু ৰাজ্যিক বিধানসভাত মহিলাসকলৰ অংশগ্ৰহণ নিশ্চিত কৰাৰ বাবে ৩৩% সংৰক্ষণ নিশ্চিত কৰিছে। এতিয়া মহিলা বিষয়াসকলৰ নেতৃত্বত প্ৰধানমন্ত্ৰী মোডীৰ মহিলা নেতৃত্বাধীন উন্নয়নৰ বিষয়বস্তু দেশৰ প্ৰতিখন গাঁৱতে বিয়পি পৰিব।

কেন্দ্ৰীয় গৃহমন্ত্ৰী তথা সমবায় মন্ত্ৰীগৰাকীয়ে লগতে কয় যে আমি অজস্ৰ ত্যাগ আৰু সংগ্ৰামৰ অন্তত স্বাধীনতা লাভ কৰিছো। ১৮৫৭ চনৰ পৰা ১৯৪৭ চনলৈকে ৯০ বছৰীয়া স্বাধীনতা সংগ্ৰামৰ সময়ছোৱাত লাখ লাখ মানুহৰ বলিদানেৰে আজি স্বাধীন দেশ হিচাপে ৭৫ বছৰ সম্পূৰ্ণ কৰাৰ পিছত আমি গৌৰৱেৰে বিশ্বৰ সমূখত থিয় দিছো। তেওঁ কয় যে ৭ দশকৰো অধিক সময় ধৰি চলি থকা এই প্ৰত্যাহ্বানমূলক যাত্ৰাত বহু আৰক্ষীয়ে প্ৰাণাহুতি দিছে। ৩৬,৫০০ ৰো অধিক আৰক্ষী বিষয়া আৰু জোৱানে নিজৰ কৰ্তব্যক সৰ্বোচ্চ কৰি ৰাখি পৰম ত্যাগ স্বীকাৰ কৰিছে, সেইবাবেই আমাৰ দেশ আজি বিশ্বৰ আগত গৌৰৱেৰে থিয় দিছে। শ্ৰী শ্বাহে কয় যে সেই ৩৬,৫০০ আৰক্ষী বিষয়া আৰু জোৱানৰ ত্যাগ আমাৰ বাবে প্ৰেৰণাৰ উৎস হ’ব লাগে।

শ্ৰী অমিত শ্বাহে কয় যে দেশখনে দীৰ্ঘদিন ধৰি সন্ত্ৰাসবাদ, বাওঁপন্থী উগ্ৰবাদ আৰু নক্সালবাদী হিংসাৰ প্ৰত্যাহ্বানৰ সমূখীন হৈছিল যদিও বিগত ১০ বছৰত আমাৰ সাহসী আৰক্ষীসকলৰ প্ৰচেষ্টাৰ বাবে আমি সেইবোৰ ৰোধ কৰাত সফল হৈছো। তেওঁ কয় যে আমাৰ প্ৰত্যাহ্বান এতিয়াও শেষ হোৱা নাই আৰু সংগঠিত অপৰাধ, চাইবাৰ অপৰাধ, আন্তঃৰাজ্যিক আৰু আন্তঃৰাষ্ট্ৰীয় বিত্তীয় অপৰাধ, আন্তঃৰাজ্যিক ‘গেং’ আদি বহু নতুন প্ৰত্যাহ্বান আজি আমাৰ সমূখত থিয় দিছে। তেওঁ কয় যে ড্ৰাগছ সৰবৰাহ, ক্ৰিপ্টো কাৰেন্সিৰ দ্বাৰা দেশৰ অৰ্থনীতি দুৰ্বল কৰা, হাৱালা ব্যৱসায় আৰু নকল টকাৰ ব্যৱসায়ৰ দৰে প্ৰত্যাহ্বানৰ বিৰুদ্ধে আমি একেই দৃঢ়তাৰে যুঁজ অব্যাহত ৰাখিব লাগিব। শ্ৰী শ্বাহে কয় যে আজি এই নতুন বেটচৰ বিষয়াসকলে সেৱাৰ প্ৰথম পদক্ষেপ ল’বলৈ ওলোৱা সময়তেই আমাৰ দেশ এক নতুন যুগৰ দিশে আগবাঢ়িবলৈ আৰম্ভ কৰিছে। তেওঁ কয় যে প্ৰধানমন্ত্ৰী শ্ৰী নৰেন্দ্ৰ মোডীৰ নেতৃত্বত চৰকাৰে ব্ৰিটিছ শাসনৰ তিনিখন আইন ক্ৰমে CrPC, IPC আৰু Evidence Act ত ব্যাপক পৰিৱৰ্তন আনি দেশৰ সংসদৰ সমূখত তিনিখন নতুন অপৰাধমূলক আইন স্থাপন কৰিছে। তেওঁ কয় যে অতি সোনকালে তিনিওখন নতুন আইন গৃহীত হ’ব আৰু এই আইনসমূহৰ আধাৰত আমাৰ নতুন অপৰাধমূলক ন্যায় ব্যৱস্থাও আৰম্ভ হ’ব৷ তেওঁ কয় যে ব্ৰিটিছ যুগত প্ৰণয়ন কৰা আইনৰ যুগ শেষ কৰাৰ পিছত ভাৰতে নতুন বিশ্বাস, আশা আৰু উদ্যমেৰে নতুন যুগত প্ৰৱেশ কৰিছে। পুৰণি আইনসমূহৰ উদ্দেশ্য আছিল চৰকাৰক সুৰক্ষিত কৰা, কিন্তু নতুন আইনসমূহৰ উদ্দেশ্য জনসাধাৰণৰ অধিকাৰ সুৰক্ষিত কৰাৰ লগতে জনসাধাৰণৰ সেই অধিকাৰসমূহ লাভ কৰাত দেখা দিয়া বাধাসমূহ দূৰ কৰা। শ্ৰী শ্বাহে কয় যে এই মৌলিক পৰিৱৰ্তনৰ লগে লগে নতুন বিষয়া প্ৰশিক্ষাৰ্থীসকলে এই তিনিখন আইনৰ জৰিয়তে অপৰাধমূলক ন্যায় ব্যৱস্থাৰ এই পৰিৱৰ্তিত যুগত নেতৃত্ব দিয়াৰ সুযোগ লাভ কৰিছে।

কেন্দ্ৰীয় গৃহমন্ত্ৰীয়ে কয় যে এই নতুন আইনসমূহ তৃণমূল পৰ্যায়ত আখৰে আখৰে আৰু ভাল মনোভাৱেৰে কাৰ্যকৰী কৰাটো প্ৰশিক্ষাৰ্থী বিষয়াসকলৰ দায়িত্ব। এই আইনসমূহৰ গভীৰত কি লুকাই আছে সেয়া আমি বুজিব লাগিব আৰু জনসাধাৰণক সুৰক্ষিত ৰাখিব লাগিব আৰু নিজৰ অধিকাৰো ৰক্ষা কৰিব লাগিব। শ্ৰী শ্বাহে কয় যে নতুন আইনখনত সন্ত্ৰাসবাদ আৰু সংগঠিত অপৰাধৰ পুনৰ ব্যাখ্যা কৰা হৈছে আৰু আন্তঃৰাজ্যিক ‘গেং’ নিৰ্মূল কৰাৰ বাবেও বহু ব্যৱস্থা গ্ৰহণ কৰা হৈছে। ইয়াৰ উপৰিও কাৰিকৰী বিধানসমূহ বৈধ কৰি আৰক্ষীক ক্ষমতা প্ৰদান কৰা হৈছে, তদন্ত প্ৰক্ৰিয়া ডিজিটেলাইজ কৰা হৈছে আৰু তদন্তৰ চাৰ্জ শ্বীটৰ সময়সীমা আৰু ফৰেনছিক বিধানসমূহ মানি চলিবলৈ উপযুক্ত ব্যৱস্থা গ্ৰহণ কৰা হৈছে। তেওঁ লগতে কয় যে নতুন আইনৰ অধীনত দোষী সাব্যস্ত হোৱাৰ হাৰ বৃদ্ধিৰ বাবে সময়সীমাৰ সুপৰিকল্পনা প্ৰস্তুত কৰা হৈছে। শ্ৰী শ্বাহে কয় যে এই আইনসমূহৰ জৰিয়তে ন্যায় ব্যৱস্থাতো বহু পৰিৱৰ্তন কৰা হৈছে। গৃহমন্ত্ৰীয়ে বিষয়া প্ৰশিক্ষাৰ্থীসকলক ‘ৰিএক্টিং এণ্ড ৰেচপণ্ডিং’ পুলিচিঙৰ বাহিৰলৈ গৈ ‘প্ৰিভেণ্টিভ, প্ৰেডিক্টিভ এণ্ড প্ৰ’এক্টিভ’ পুলিচিংলৈ পৰ্যবসিত হ’বলৈ কয় আৰু লগতে পৰিৱৰ্তিত পৰিৱেশত সময়ৰ লগে লগে পুলিচিঙৰ ৰূপান্তৰ ঘটাবলৈ কয়।

শ্ৰী অমিত শ্বাহে লগতে কয় যে সংবেদনশীলতাই সংবিধানক মানৱীয় দৃষ্টিভংগী দিয়ে আৰু আমাৰ সংবিধান প্ৰণয়ণকাৰীসকলে সংবিধানত নিৰ্ধাৰণ কৰি ৰখা মনোভাৱক সম্পূৰ্ণ সংবেদনশীলতাৰে কাৰ্যকৰী কৰাটো আমাৰ সকলোৰে দায়িত্ব। তেওঁ আৰক্ষী বিষয়াসকলক দেশৰ দৰিদ্ৰ আৰু দুৰ্বল শ্ৰেণীৰ প্ৰতি সদায় সংবেদনশীল হ’বলৈ আৰু নিজৰ অধিকাৰ ৰক্ষাৰ ক্ষেত্ৰত সদায় সক্ৰিয় হৈ থাকিবলৈ কয়। শ্ৰী শ্বাহে কয় যে আমি আমাৰ কৰ্তব্যত মনোনিৱেশ কৰি খ্যাতিৰ মেৰপেচত নপৰাকৈ আগবাঢ়ি যাব লাগে। তেওঁ আৰক্ষী বিষয়াসকলক কয় যে নিয়োগ লাভ কৰা স্থানৰ স্থানীয় ভাষা, পৰম্পৰা আৰু ইতিহাসক সন্মান জনাই ৰাইজৰ সৈতে সংবেদনশীলতা বজাই ৰাখি আইনৰ মনোভাৱ বুজি আৰু কিতাপৰ পন্থাৰ উৰ্ধ্বলৈ যাব লাগে।

কেন্দ্ৰীয় গৃহমন্ত্ৰীয়ে কয় যে প্ৰধানমন্ত্ৰী শ্ৰী নৰেন্দ্ৰ মোডীৰ নেতৃত্বত যোৱা ৯ বছৰ দেশৰ আভ্যন্তৰীণ নিৰাপত্তাৰ বাবে বেচ গুৰুত্বপূৰ্ণ। দেশৰ তিনিটা হটস্পট এলেকা ক্ৰমে উত্তৰ-পূৱ, বাওঁপন্থী উগ্ৰবাদ অধ্যষিত অঞ্চল আৰু জম্মু-কাশ্মীৰত আইন-শৃংখলাৰ পৰিস্থিতি উন্নত কৰাৰ ক্ষেত্ৰত আমি বিপুল সফলতা লাভ কৰিছো। তেওঁ লগতে কয় যে ২০০৪ চনৰ পৰা ২০১৪ চনলৈ ১০ বছৰৰ ভিতৰত এই তিনিটা হটস্পটত ৩৩,২০০ হিংসাত্মক ঘটনা সংঘটিত হৈছিল, যিটো বিগত ৯ বছৰত ১২ হাজাৰলৈ হ্ৰাস পাইছে। হিংসাত্মক ঘটনা ৬৩% হ্ৰাস আৰু মৃত্যুৰ হাৰ ৭৩% হ্ৰাস হৈছে এই ঠাইবোৰত। শ্ৰী শ্বাহে কয় যে প্ৰধানমন্ত্ৰী শ্ৰী নৰেন্দ্ৰ মোদীৰ নেতৃত্বত ভাৰতে সন্ত্ৰাসবাদৰ বিৰুদ্ধে শূন্য সহনশীলতাৰ নীতি গ্ৰহণ কৰিছে আৰু এতিয়া আমি শূন্য সহনশীলতাৰ নীতিৰ বাহিৰলৈ গৈ শূন্য সহনশীলতা কৌশল আৰু শূন্য সহনশীলতা কাৰ্য্যৰ দিশত আগবাঢ়িব লাগিব।

শ্ৰী অমিত শ্বাহে কয় যে বিগত ৯ বছৰত প্ৰধানমন্ত্ৰী শ্ৰী নৰেন্দ্ৰ মোডীৰ নেতৃত্বত চৰকাৰে One Data, One Entry নীতিৰে আভ্যন্তৰীণ সুৰক্ষাৰ প্ৰতিটো ক্ষেত্ৰতে ডাটাবেছ সৃষ্টিৰ কাম কৰি আহিছে। বিভিন্ন তথ্যকোষত একক অনন্য আৰু পাৰস্পৰিক যোগাযোগৰ ব্যৱস্থাও স্থাপন কৰা হৈছে। ইয়াৰ উপৰিও সকলো সংস্থাক বিশ্লেষণাত্মক সঁজুলিৰে সজ্জিত কৰি শক্তি বৃদ্ধিৰ কামো চলি আছে। ICJS ৰ অধীনত ৯৯.৯৩% অৰ্থাৎ ১৬,৭৩৩ খন থানাত CCTNS কাৰ্যকৰী কৰা হৈছে। e-Court ৰ জৰিয়তে ২২ হাজাৰ আদালতক সংযোগ কৰা হৈছে, ই-কাৰাগাৰৰ জৰিয়তে প্ৰায় ২ কোটি কয়দীৰ তথ্য উপলব্ধ কৰোৱা হৈছে, এক কোটিৰো অধিক গোচৰৰ তথ্য ই-প্ৰচিকিউচনৰ জৰিয়তে অনলাইনত উপলব্ধ কৰোৱা হৈছে। তদুপৰি ১৭ লাখৰো অধিক তথ্য ই-ফৰেনছিকৰ যোগেদি উপলব্ধ হৈছে। আনফালে ৯০ লাখৰো অধিক আঙুলিৰ ছাপৰ ৰেকৰ্ড NAFIS ত উপলব্ধ কৰোৱা হৈছে, বহু তথ্য ইন্টিগ্ৰেটেড মনিটৰিং অৱ টেৰৰিজমত উপলব্ধ কৰোৱা হৈছে, গ্ৰেপ্তাৰ হোৱা নাৰ্কো অপৰাধীৰ তথ্য NIDAN ৰ জৰিয়তে উপলব্ধ। তেওঁ লগতে কয় যে আমি ক্ৰাইম মাল্টি এজেন্সী চেণ্টাৰত চাইবাৰ ক্ৰাইম ৰিপৰ্টিং পৰ্টেল আৰু প্ৰিজন ডাটাবেছত বায়’মেট্ৰিক ডাটাও উপলব্ধ কৰিছো। শ্ৰী শ্বাহে আৰক্ষী বিষয়াসকলক এই সকলোবোৰ ডাটাবেছ আৰু বিশ্লেষণাত্মক সঁজুলিৰ জৰিয়তে কাম কৰিবলৈ কয় আৰু আৰক্ষীক সদায় দুখোজ আগুৱাই ৰাখিবলৈ কৃত্ৰিম বুদ্ধিমত্তাৰ ব্যৱহাৰ কৰিবলৈ কয়।

*****

RK/AY/AKS