কেন্দ্রগী গৃহ মন্ত্রী অমদি কোওপরেসন মন্ত্রী শ্রী অমিত সাহনা ঙসি হায়দরবাদকী সর্দার বল্লবভাই পতেল নেস্নেল পুলিস একাদমীদা পাঙথোকপা ইন্দিয়ন পুলিস সর্ভিস (IPS)কী ৭৫ RRগী দিকশন্ত পেরেদ থৌরমদা ৱা ঙাংখ্র‍ে‍। থৌরমদুদা, তেলঙ্গনাগী গভর্নর, কেন্দ্রগী হোম সেক্রেতরী, দাইরেক্তর, ইন্তলিজেন্স ব্যুরো অমদি দাইরেক্তর, CBIসু শরুক য়াখি‍।

মহাক্কী ৱারোলদা, শ্রী অমিত সাহনা, ঙসি অসি ৭৭ RR গী ত্রেনীশিংগীদমক্তা য়াম্না মরুওইবা নুমিৎ অমনি মরমদি মখোয়শিং অসি লৈবাকসিগী নীংতম্বগী চহি চাম্মা ফারকপগী লম্বীদা চঙশিল্লিবা মতমসিদা ইন্দিয়ন পুলিস সিস্তেমগী মকোক থোংবা লুচিংবশিংগী মরক্তা তিল্লগদৌরিবনি অমদি লৈবাকসিগী ইন্তরনেল সিক্যুরিতীগী থৌদাং মখোয়গী মখুত্তা লৈগদৌরিবনি‍ হায়খি‍। একাদমী অসিগী অমৃৎ মহোৎসবকী ৭৫শুবা বেত্চ অসি পুৱারীগী ওইনা মরুওইবা মফম কনগনি অমদি ওফিসরশিং অসিনা লৈবাক্কীদমক মখোয়গী হোৎনবা কনবা, পুক্নিং লুপ্পা, কত্থোকপা অমদি মপুক্নিং চঙবা মতৌনা থৌরম অসিবু হেন্না পুৱারীগা শাগোন্নবা ওইহনগদৌরিবনি‍ হায়না মহাক্না হায়খি‍। ওফিসরশিং অসিনা লৈবাকসিগী তোঙান তোঙানবা স্তেতশিংগী পুলিস ফোর্সশিং লুচিংলকপা মতমদা, লৈবাক অসিনা ৭৫শুবা RR গী ত্রেনীংশিং অসিগীদমক মখোয়না মখোয়গী সর্ভিসকী চহি ২৫দা লৈবাক্কী ইন্তরনেল সিক্যুরিতী ঙাক্তুনা থম্বদা তৌবা য়াবা পুম্নমক তৌখি খঙবদা চাউথোকচবা ফাওগনি হায়না শ্রী সাহনা হায়খি‍। ৭৫ RR বেত্চকী ওফিসর ত্রেনিংশিংগী মফমদা প্রধান মন্ত্রী শ্রী নরেন্দ্র মোদীগী অমৃৎকালকী ফিরেপ ফংহন্নবগী মায়কৈদা মরুওইবা থৌদাং লৈগনি‍। লৈবাক অসিনা নীংতম্বগী চহি ১০০ ফারকপগী থৌরম হরাও তয়াম্না পাঙথোকপা মতমদা, ভারতনা মালেম অসিবু হীরম খুদিংদা লমজিংগদৌরিবনি অমদি ওফিসর পুম্নমক অসিগীসু মদুদা অচৌবা থৌদাং য়াওগনি হায়না মহাক্না হায়খি‍।

কেন্দ্রগী গৃহ মন্ত্রীনা হায়খিবদা, লৈবাক অসিবু মাঙদা পুখৎনবগীদমক সর্দার পতেলনা একাদমী অসিবু ৱাখল লৈনা উরেপ উয়ুং তম্লম্বনি‍। ঐখোয়গী লৈবাক অসি নীংতম্না হিংলকপা চহি ৭৫ মপুং ফশরে অমদি অমৃৎকালগী মতমদা খোঙ থাংজিল্লি‍। প্রধান মন্ত্রী শ্রী নরেন্দ্র মোদীনা লৈবাক মীয়াম করোর ১৩০গী মফমদা হৌজিক অসি ৱারেপ লৌনবা অমদি মখোয়বু থবক্তা ওন্থোক্নবা হোৎনবা মতম্নি হায়বা খোল্লাউ থমখি‍। লাক্কদৌরিবা চহি ২৫ অসি লৈবাক অসিবু মালেমদা হীরম খুদিংদা মাঙজিল থাহন্নবগী অমদি মালেমসিগী মশাগী ফংফম থোকপা চাউথোকচনিংঙাই ওইবা মফম অমা ফংনবগী লম্বীদা চঙশিনগদবা মতম্নি হায়না শ্রী সাহনা হায়খি‍। অমৃৎকাল মনুংদা, ওফিসরশিং অসিনা লৈবাকসিগী ইন্তরনেল সিক্যুরিতী, ঙমখৈগী সিক্যুরিতী অমদি লো অমসুং ওর্দর ঙাক্তুনা থম্বদা মরুওইবা থৌদাং অমা লৌগদবনি‍। একাদমী অসিদগী পাস তৌখ্রবা মতুংদা, ওফিসরশিং অসিনা লৈবাকসিদা সংবিধান মপুং ফানা চৎনহন্নবা অমদি মী পুম্নমক্তা মসিগী মতুং ইন্না মখোয়গী মঙম ফংহন্নবা হোৎনগদবনি হায়না মহাক্না ফোঙদোকখি‍।

শ্রী অমিত সাহনা হায়খিবদা, লৈবাকসিগী অহানবা গৃহ মন্ত্রী অমদি আইরন মেন সর্দার বল্লবভাই পতেলনা লৈবাক অসিবু পুনশিল্লম্বখক নত্তনা পুন্না থম্নবগীদমক মরুওইবা থবক কয়াসু পায়খৎলম্মি হায়বসি ঐখোয়না মতম পুম্বদা নীংশিংগদবনি‍। সর্দার পতেলনা লৈবাকসিগী নিংথৌ পান্বা লৈবাক ৫৫০ হেন্না পুনশিন্নদুনা অপুনবা ভারত অমা শেমগৎলম্বতা নত্তনা, IPS কেদর হৌদোক্তুনা মপাঙ্গল কল্লবা সিস্তেম অমসু থম্বিরম্মি হায়না মহাক্না হায়খি‍। করিগুম্বা য়ুনিয়ন অসিগী মশাগী ৱাখল্লোন ফোঙদোকচনবগী মনীং তম্বা লৈবা ওল ইন্দিয়া সর্ভিস অমা লৈত্রগদি য়ুনিয়ন অসি লৈরোই হায়না সর্দার পতেলনা হায়বিরম্মি হায়না শ্রী সাহনা ফোঙদোকখি‍। হায়রিবা ৱাহৈ পরেং অসিনা IPS কেদরগী লমজিং পথাপ ওইদুনা লাকখি‍। মতম অমদা সর্দার পতেলনা ইন্সতিত্যুৎ অসিনা হঙ্গৎনা য়েংনিংঙাই করিসু লৈতে তুংগী মীরোলশিংদা চৎনবী কয়া শেম্লমগদবখক্নি হায়রম্মি হায়নসু মহাক্না মখা তাখি‍। একাদমী অসি লিংখৎখিবা মতমদা, মসিগী পুৱারী লৈরমদে, অদুবু চহি ৭৫ লৈরকপসিদা, মফমসিদগী পাস তৌখিবা IPS ওফিসরশিং অসিনা লৈবাকসিগী মনুংগী অমদি ঙমখৈগী সিক্যুরিতী মপাঙ্গল কনখৎহন্নবা তরং তরংবা চাউথোকচনিংঙাই ওইরবা পুৱারী শেমখি‍। ঙসি মফমসিদগী পাস তৌখ্রিবা ৭৫শুবা বেত্চকী ত্রেনীশিং অসিগী থৌদাংদি পুৱারী অসিবু মাঙদা পুখত্তুনা মসিদা সনাগী পন্দুপ কয়া হাপচিল্লম্বা অদুনি‍। ঙসি, ভুতান, মালদিব্স, মৌরিসস অমদি নেপালদগী ফোরেন ওফিসর ২০ য়াওনা ত্রেনী ১৭৫না মফমসিদগী বেসিক কোর্স লোইশিন্দুনা পাস তৌরে‍। হায়রিবা ওফিসর ত্রেনী ১৭৫ অসিগী মনুংদা নুপী ওফিসর ৩৪ য়াওরি হায়না মহাক্না হায়খি‍।

কেন্দ্রগী গৃহ মন্ত্রীনা হায়খিবদা লাক্কদৌরিবা মতমদা লৈবাক মনুংগী সিক্যুরিতী কায়হন্দনা থম্বদা তেক্নোলোজীনা য়াম্না মরুওইবা শক্লোন অমা লৌরক্কনি, অমদি মরম অসিননি প্রধান মন্ত্রী শ্রী নরেন্দ্র মোদীনা পুলিস তেক্নোলোজী মিসন হৌদোকখিবা‍। মিসন অসিগী পান্দমদি ভারতকী পুলিসপু মালেমগী মনুংদা তেক্নোলোজীগী খ্বায়দগী মতিক চানা লৈবা ওইহনবনি‍। পুলিসিং অমদি লৈবাক মনুংগী সিক্যুরিতী কায়হন্দনা থম্বদা তেক্নোলোজীবু থবক ওইনা শীজিন্ননবগী, অমদি তেক্নোলোজীগী লমদা পুলিসপু ক্রিমিনেলশিংদগী মতম চুপ্পদা খোঙকাপ অনি মাঙজিল থানা লৈহন্নবগী সিস্তেম অমা ঐখোয়না শেমগৎপা তাই‍। মফমসিদগী ফংলকপা এক্সপিরিএন্স অমদি ত্রেনিংশিং অসিগা লোয়ননা, ওফিসরশিং অসিনা মফম মফমদা চৎত্তুনা মীয়ামগা লোয়নরকপা মতমদা, ত্রেনিং অসিগা প্রাক্তিকেল এক্সপিরিএন্সকা পুল্লগা মখোয়না মখোয়গী মথৌ মতিং লৈনা তৌবা ঙমগদৌরিবনি হায়না মহাক্না হায়খি‍।

ঙসি নুপী ওফিসর অমনা বেস্ত ওফিসর ত্রেনী এৱার্দ ফংলি অমদি মসি ঐখোয়গী লৈবাকসিগী চাউথোকচনিংঙাইগী ৱাফম্নি হায়না শ্রী অমিত সাহনা হায়খি‍। একাদমী অসিগী পুৱারীদা অহানবা ওইনা, নুপী ওফিসর ত্রেনী মিস রঞ্জিতা শর্মনা IPS এসোসিএসনগী স্ক্বাদ ওফ ওনর ফংনবগী তাঞ্জা ফংলি হায়না মহাক্না হায়খি‍। প্রধান মন্ত্রী শ্রী নরেন্দ্র মোদীগী লুচিং মখাদা, লৈবাক অসিনা নুপীনা মাঙজিল থাদুনা চাওখৎপগী লম্বীদা খোঙজেল য়াঙনা চঙশিল্লি‍। মোদী লৈঙাক্না লৈবাকসিগী পার্লিয়ামেন্ত অমদি স্তেত এসেমব্লীশিংদা নুপীশিং শরুক য়াহন্নবগীদমক হন্দক্তা ৩৩% রিজর্বেসন অয়াবা পীখ্রে‍।  ঙসি পাস তৌরিবা নুপী ওফিসরশিং অসিগী লুচিং মখাদা, প্রধান মন্ত্রী মোদীগী নুপীনা লুচিংদুনা চাওখৎপা হায়বা ৱাফমবু লৈবাকসিগী খুঙ্গং খুদিংদা য়ৌহল্লগনি হায়না মহাক্না মখা তানা ফোঙদোকখি‍।

কেন্দ্রগী গৃহ মন্ত্রী অমদি কোওপরেসন মন্ত্রীনা হায়খিবদা ঐখোয়না মশিং লাকঙমদনা কত্থোকপা অমদি হোৎনবা কয়াগী মতুংদা নীংতম্বা ফংলকখিবনি‍। ১৮৫৭ দগী ১৯ ৪৭ ফাওবগী চহি ৯০গী নীংতম লালহৌদা মীওই মিলিয়ন কয়ানা মপুন্সি কত্থোকখিবদুনা মরম ওইরগা ঙসি, নীংতম্বা লৈবাক অমা ওইনা চহি ৭৫ মপুং ফারকপা মতমসিদা, ঐখোয়না মালেমগী মাঙদা চাউথোক্না লেপ্পা ঙম্লিবনি‍। দেকেদ ৭ হেল্লবা শিংনবনা থল্লবা খোঙচৎ অসিদা পুলিসমেন কয়ানা মপুন্সি কত্থোকখ্রে‍। মখোয়গী মথৌদাংবু মাঙদা থমদুনা পুলিস ওফিসর অমদি জৱান ৩৬,৫০০ হেনবনা মপুন্সি কত্থোকখ্রে, মরম অদুননি লৈবাক অসিনা ঙসি মালেমগী মাঙদা চাউথোকপগা লোয়ননা লেপ্লিবা‍। পুলিস ওফিসর অমদি জৱান ৩৬,৫০০ হেনবনা কত্থোকখিবা ঐখোয়গী পুক্নিং থৌগৎনফম ওইহনগদবনি হায়না শ্রী সাহনা হায়খি‍।

শ্রী অমিত সাহনা হায়খিবদা লৈবাক অসিনা মতম শাংনা তেরোরিজম, লেফ্ত ৱিং এক্সত্রিমিজম অমদি নক্সলাইতকী হিংসা থেংনদুনা লাকখি, অদুবু হৌখিবা চহি ১০ অসিদা, ঐখোয়গী থৌনা ফরবা পুলিসমেনশিংগী হোৎনজমন্না, মখোয়বু লাকশিনবদা ঐখোয় মায় পাক্লি‍। ঐখোয়গী শিংনবশিং হৌজিকসু লোইদ্রি অমদি ওর্গনাইজ ক্রাইম, সাইবর ক্রাইম, ইন্তরস্তেত অমদি ইন্তরনেস্নেল ফাইনেন্সিএল ক্রাইম, ইন্তরস্তেত গেংনচিংবা অনৌবা শিংনবা কয়ানা ঙসি ঐখোয়গী ইমাঙদা লেপ্লরি‍। ঐখোয়না চপ মান্নবা থৌনা লিংজেলগা লোয়ননা দ্রগ লল্লোনবা, কৃপ্তোকরেন্সীনা লৈবাকসিগী শেন্মিৎলোন মপাঙ্গল শোন্থহল্লিবা, হৱালা বিজিনেস অমদি জালি নোৎ বিজিনেসনচিংবা শিংনবশিংগী মায়োক্তা মখা তানা থেংনখিবা তারি‍। ঙসি অনৌবা বেত্চ অসিগী ওফিসরশিংনা মখোয়গী সর্ভিসকী অহানবা খোঙথাং থাংজিল্লকপা মতমদা ঐখোয়গী লৈবাকসিনা অনৌবা মতম অমদা খোঙ থাংজিনবা হৌরবনি‍। প্রধান মন্ত্রী শ্রী নরেন্দ্র মোদীনা লুচিংবা লৈঙাক অসিনা ব্রিতিস মতমগী আইন অহুম – CrPC, IPC অমদি ইভিদেন্স এক্ত – অসিনা চাউনা অহোংবা পুরক্তুনা, লৈবাকসিগী পার্লিয়ামেন্তকী মাঙদা অনৌবা ক্রিমিনেল লো অহুম পুথোক্লি‍। অথুবা মতমদা অনৌবা লো অহুম্মক পাস তৌরগনি অমদি হায়রিবা লো অহুমসিদা য়ুম্ফম ওইরগা ঐখোয়গী অনৌবা ক্রিমিনেল জস্তিস সিস্তেম হৌরগনি‍। ব্রিতিস মতমদা শেম্লম্বা লোশিংগী মতম লোইশিল্লবা মতুংদা, ভারতনা অনৌবা থাজবা, মঙলান অমদি ইখৌ লাংবগা লোয়ননা অনৌবা মতম অমদা চঙশিল্লক্লি‍। অরিবা লোশিংগী পান্দমদি লৈঙাকপু ঙাকথোক্নবনি অদুগা অনৌবা লোশিং অসিগী পান্দমদি মীয়ামগী মঙম ঙাকথোক্নবনি অমদি মীয়াম্না হায়রিবা মঙমশিং অদুবু ফংনবগী লম্বীদা লৈরম্বা খুরৌশিং মাঙহনখিনবনি‍। অসিগুম্বা মরুদগী হোংলকপা কয়াসিগা লোয়ননা, অনৌবা ওফিসর ত্রেনীশিংনা হায়রিবা অনৌবা লো অহুমসিগী খুত্থাঙদা ক্রিমিনেল জস্তিস সিস্তেমগী হোংলক্লিবা মতম অসিদা লমজিংনবগী তাঞ্জা অমা ফংলি, হায়না শ্রী সাহনা হায়খি‍।

কেন্দ্র মন্ত্রীনা হায়রিবা লো অহুমসিবু লৈমায়দা মওং চুম্না চৎনহনবা হায়বসি ত্রেনী ওফিসরশিং অসিগী থৌদাংনি‍ হায়খি‍। মখোয়না লোশিং অসিগী নুংগী ওইবা মশক খঙগদবনি অমদি মীয়ামবু শাফন থমগদবনি অমসুং মখোয়গী মঙমবুসু ঙাক্তুনা থমগদবনি‍। তেরোরিজম অমদি ওর্গনাইজ ক্রাইম অনৌবা লো অসিদা অমুক হন্না মশক তাক্লি অমদি ইন্তর-স্তেজ গেংশিং মুত্থৎনবা ৱাফম কয়াসু শেম্লে‍। মসিগী মথক্তা, পুলিসপু তেক্নিকেল প্রোভিজন লিগেলাইজ তৌদুনা মপাঙ্গল হাপ্লে, ইনভেস্তিগেসন প্রোসেস তিজিতাইজ তৌরে অমদি থিজিন হুমজিনবগী চার্জ সীতকী মতম পরিং অমসুং ফোরেন্সিক প্রোভিজনশিং ইন্ননবগীদমক মওং মরিল নাইবা সিস্তেম শেমদুনা থম্লে‍ হায়না মহাক্না হায়খি‍। অনৌবা লোশিং অসিগী মখাদা কনভিক্সন রেত হেনগৎহন্নবগীদমক অকক্নবা মতম লৈবা থৌরাং অমসু শেম্লে‍। হায়রিবা লোশিং অসিগী খুত্থাঙদা জস্তিস সিস্তেমদা অহোংবা কয়া পুরক্লে হায়না শ্রী সাহনা মখা তাখি‍। গৃহ মন্ত্রীনা ওফিসর ত্রেনীশিংদা ‘রিএক্তিং এন্দ রেস্পোন্দিং’ পুলিসিংগী ৱাংমদা চত্তুনা ‘প্রিভেন্তিব, প্রিদিক্তিব এন্দ প্রোএক্তিব’ পুলিসিংদা চঙশিন্নবা অমদি হোংলক্লিবা মফম অমদি মতমগী মতুং ইন্না পুলিসিংগী থবক্তসু অওনবা পুরক্নবা ৱাফম থমখি‍।

শ্রী অমিত সাহনা, ইহুল খঙবনা সংবিধানবু মীওইবগী ওইবা মচৎ অমগী শক্তম পীরি অমদি ঐখোয়গী সংবিধান শেম্বিরম্বশিংনা সংবিধান্দা থম্লম্লিবা ৱাফমশিংবু ইহুল খঙনা থবক ওইনা পায়খৎপা হায়বসি ঐখোয় পুম্নমক্কী থৌদাংনি হায়খি‍। মহাক্না পুলিস ওফিসরশিংগী মফমদা মতম পুম্নমক্তা লৈবাকসিগী লায়রবা অমদি তুশোন্নবা কাঙলুপশিংগী ইহুল খঙনা চৎননবা অমদি মখোয়গী মঙমশিং ঙাকথোকপিবদা মতম পুম্বদা ইচঙ থৌনবা ৱাফম থমখি‍। ঐখোয়না ঐখোয়গী থৌদাংদা পুক্নিং চঙগদবনি অমদি মীংচৎ তানবগী লাংদা থুহন্দনা মাঙদা চঙশিনগদবনি হায়না শ্রী সাহনা হায়খি‍। মহাক্না পুলিস ওফিসরশিংগী মফমদা মখোয়না পোস্তিং তারুরিবা লমগী লোল, চৎনবী অমদি পুৱারী ইকায়খুম্নবগা লোয়ননা, মখোয়না মফমদুগী মীয়ামগী ইহুল খঙনা চৎকদবনি অমদি লোগী নুংগী ওইবা মশক খঙনা লাইরিক্তখক্তা য়াওবা মওং মতৌগী ৱাংমদা থবক তৌগদবনি হায়না হায়খি‍।

কেন্দ্রগী গৃহ মন্ত্রীনা প্রধান মন্ত্রী শ্রী নরেন্দ্র মোদীগী লুচিং মখাদা হৌখিবা চহি ৯ অসি ঐখোয়গী লৈবাক মনুংগী ওইবা সিক্যুরিতীগী য়াম্না মরুওইবা মতম ওইখি হায়খি‍। ঐখোয়না – অৱাং-নোংপোক, লেফ্ত ৱিং এক্সত্রিমিজমগী মফম অমদি জম্মু অমসুং কাস্মির হায়রিবা মফম অহুমসিদা লো অমসুং ওর্দরগী ফীভম ফগৎহনবদা চাউনা মায় পাকপা ঙমখ্রে‍ হায়না মহাক্না হায়খি‍। ২০০৪ দগী ২০১৪ ফাওবগী চহি ১০গী মতমসিদা, হায়রিবা মফম অহুমসিদা হিংসাগী থৌদোক ৩৩,২০০ থোকখি, মসি হৌখিবা চহি ৯ অসিদা ১২,০০০দা হন্থরে‍। ঐখোয়না হিংসাগী থৌদোক থোকপগী চাং ৬৩% অমি মীশি মীনাগী চাং ৭৩% হন্থহন্দুনা মাঙদা চঙশিল্লক্লি‍ হায়না মহাক্না হায়খি‍। প্রধান মন্ত্রী শ্রী নরেন্দ্র মোদীগী লুচিং মখাদা, ভারতনা তেরোরিজমগী মায়োক্তা জিরো তোলেরেন্সকী থৌরাং পায়খৎলে অমদি হৌজিক্তি ঐখোয়না জিরো তোলেরেন্সকী খুজিল থৌরাংদগী জিরো তোলেরেন্সকী লাল্লং অমদি জিরো তোলেরেন্সকী থবক্তা খোঙ থাংজিল্লক্লি হায়না শ্রী সাহনা মখা তাখি‍।

হৌখিবা চহি ৯ সিদা, প্রধান মন্ত্রী শ্রী নরেন্দ্র মোদীনা লুচিংবা লৈঙাক অসিনা ৱন দেতা, ৱ এন্ত্রীগী পরিংদা ইন্তর্নেল সিক্যুরিতীগী হীরম খুদিংদা দেতাবেজ শেম্নবগী থবক পায়খৎলি‍ হায়না শ্রী অমিত সাহনা হায়খি‍। তোঙান তোঙানবা দেতাবেজশিং পুনশিন্নবা অমদি অমগা অমগা পাউ ফাওদোক্ননবগী থৌরাংশিংসু পায়খৎলে‍। মসিগী মথক্তা, এজেন্সী পুম্নমক্তা এনালাইতিকেল তুলশিং লৈহন্দুনা মখোয়গী মপাঙ্গল হেনগৎহন্নবা থবকসু পায়খৎলি‍। ICJS কী মখাদা CCTNS ৯৯.৯৩%দা পায়খৎলে, হায়বদি পুলিস স্তেসন ১৬,৭৩৩, কোর্ত ২২০০ ই-কোর্তকী খুত্থাঙদা শম্নরে, ফাদোক করোর ২রোমগর দেতা ই-প্রিজনগী খুত্থাঙদা ফংলে, প্রোজিক্যুসন করোর অমা হেনবগী দেতা ই-প্রিজনগী খুত্থাঙদা ফংলে, লাখ ১৭ হেনবা দেতাসু ই-ফোরেন্সিক্কী খুত্থাঙদা ফংলে‍। খুৎশা মমি লাখ ৯০ হেনবগী রেকোর্দ NAFIS তা ফংলে, ইন্তিগ্রেতেদ মোনিতরিং ওফ তেরোরিজমদসু দেতা ময়াম অমা ফংলি, ফারুরবা নার্কো ওফেন্দরশিংগী দেতাসু NIDAN গী খুত্থাঙদা ফংলে‍। ঐখোয়না ক্রাইম মল্তি এজেন্সী সেন্তরদা সাইবর ক্রাইম রিপোর্তিং পোর্তেল অমদি প্রিজন দেতাবেজতা বাইওমেত্রিক দেতাসু ফংহল্লে হায়না মহাক্না মখা তাখি‍। শ্রী সাহনা পুলিস ওফিসরশিংদা হায়রিবা দেতাবেজশিং অমদি এনালাইতিকেল তুলশিং অসিগী খুত্থাঙদা থবক তৌনবা অমদি পুলিসপু মতম পুম্বদা খোঙকাপ অনি মাঙজিল থানা চৎহন্নবগীদমক আর্তিফিসিএল ইন্তলিজেন্স শীজিন্ননবা ৱাফমসু থমখি‍।

*****