Ha ka ''Sngi Kyrpang jog ki Pulit’ u Myntri Sorkar Pdeng ba dei khmih ia ki tnat Kam Pohiing bad Cooperation u Amit Shah u la ai jingsngewnguh ia ki pulit ba la aiti ia la ka jingim ha ka National Police Memorial ha New Delhi mynta ka sngi. Ki kynrem ki lyndan ha ryngkat u Myntri Khynnah ka tnat Kam Pohiing, u Ajay Kumar Mishra bad u Secretary ka tnat Kam Pohiing ki la iadon lang ha kane ka sngi.

Ha ka jingai jingkren jong u ha kane ka sngi, u Shah u la ai jingsngewnguh ia ki 36,250 ngut ki pulit kiba la aiti ia la ka jingim na ka bynta ka jingshngain hapoh ka ri bad ki jaka khappud jong ka ri naduh ba la ioh jinglaitluid. U la ong ia kiba haiing jong kine ki pulit ba ka India ka dang jam shaphrang ha baroh ki kam mynta, ka nongrim jong kane ka dei ka jingaiti jong ki pulit ia la ka jingim bad ka ri kan ym klet ia ki jingnoh synniang jong ki. U Shah u la ong ba ym lah ban don ka jingshngain hapoh ka ri bad ha ki jaka khappud jong kano kano ka ri khlem ka rynsan ki pulit kaba peitngor. Na baroh ki briew kiba trei ha ki kam bapher bapher, u la ong ba ka kam kaba jynjar duh ka dei jong ki pulit kiba trei miet bad sngi, ha ka aiom khriat ne shit, ka por ki tamasa, ki pulit kim ioh por ban rakhe ia ki tamasa bad kiba haiing jong ki. U la ong ba ki pulit ki ai ia ki snem ha ka jingim jong ki ha kaba ki jngai na kiba haiing ha ki jaka khappud jong ka ri bad ki iada ia ka ri lyngba ka jinglenlade bad ka jingshlur. U Shah u la ong ba la ka dei ka jingialeh pyrshah ia ki kynhun pyntriem, ka jingtehlakam ia ki kam beain, ka jingpeit ia ka jingiaid ryntih ka shnong ka thaw, ka jingiada ia ki briew ha ka por ba lynshop ki bor ka mariang bad ki jingjia ba sngewsih, lane ha ki por jong ki jingeh kum ka por jong ka khlam Corona, ki pulit ki la pyni ia la ka jingtrei shitom ha baroh kine ki kam. Ha une u snem ba la dep, naduh ka 1 tarik u Nailur, 2022 haduh ka 31 tarik u Nailar, 2023, 188 ngut ki pulit ki la aiti ia la ka jingim ban pynthikna ia ka jingshngain bad wanrah ia ka jingiaid ryntih ha ka imlang sahlang ha ka ri.

U Myntri ka tnat Kam Pohiing u la ong ba u Myntri Rangbah Duh, u Narendra Modi u la ai jingkyntu na ka bynta ka Amrit Kaal. U la ong ba naduh ka jingkut jong ka jingdap 75 snem ka jingioh jinglaitluid haduh ka jingdap 100 snem ka jingioh jinglaitluid, kine ki 25 snem ki dei na ka bynta ka jingkyntiew ia ka ri ha baroh ki kam. Na ka bynta kane, 130 klur ngut ki briew jong ka ri ki la bam smai na ka bynta kane bad kumta, ym don mano mano ba lah ban pynsangeh ia ngi na ka jingpoi sha ka kyrdan kaba halor tam ha baroh ki kam. U Shah u la ong ba ha kine ki 10 snem ba la dep, ki jingjia kiba iadei bad ki kam pyntriem, ka jingpynkulmar ki lehnoh, ki kam naxal bad ki jingiathut hapdeng ki jaitbynriew ki la hiar da 65% bad kane ka dei namar ki sienjam jong ki pulit ba shlur jong ngi.

U Amit Shah u la ong ba ha kine ki snem ba la dep, ha ka jingtrei lyngba ka NDRF, ki shipai na ki kynhun pulit bapher bapher ki la ioh jingiaroh hapoh ka ri bad shabar ri ruh haba ki la trei ha ki kam kiba iadei bad ka jingai jingiarap ha ka por ba lynshop ki bor ka mariang. U la ong ba haba ngi rung ha kane ka Amrit Kaal jong ka jingioh jinglaitluid ka India, ka Sorkar India, hapoh ka jingialam jong u Myntri Rangbah Duh u Narendra Modi, ka dang wanrah lai tylli ki ain ba thymmai ki ban pynkylla khait ia ki kam ain. U la ong ba kine ki lai tylli ki ain kin wan bujli ia ki ain kiba la buh naduh ka por jong ki nong Bilat bad kin pyni ia ka jinglong tynrai jong ka India bad iada ia ka hok jong baroh ki nongshong shnong katkum ka Riti Synshar jong ka Ri. U la ong ba u Myntri Rangbah Duh, u Narendra Modi u la ban jur halor ka jingpynkut ia ka jingsahteng jong ki jingbishar ha ki iingshari. U la ong ba hapoh ka jingialam jong u Myntri Rangbah Duh, ngin kot sha ka thong ban wanrah ia ka jingshai bad ka jinstet ha ki kam ain lyngba ka Police Technology Mission, 3 tylli ki ain ba thymmai bad ICJS.

U Shah u la ong ba ha ka jingbteng ia ka jingkyntait ia ki kam pyntriem, ka Sorkar Modi ka la wanrah ia ki ain kiba khlain bad ka la shim ia ki sienjam ban don ka kynhun kaba tbit tam ha ka pyrthei kaba ialeh pyrshah ia ki kam pyntriem da kaba wanrah ia ka Police Technology Mission ban pynthymmai ia ki kam pulit. U la ong ba na ka bynta ka bha ka miat jong ki pulit, ka Sorkar ba ialam da u Myntri Rangbah Duh ka la wanrah ia ki jingpynkylla ha ka Ayushman-CAPF, Housing Scheme, CAPF e-Awas Web Portal, Prime Minister Scholarship Scheme, Central Ex-gratia, Disability Ex-gratia, Air Courier Services bad Central Police Welfare Store.

U Amit Shah u la ong ba ka police memorial kam dei tang ka dak hynrei ka dei ka jingithuh ia ka jinglenlade bad ka jingtrei shitom jong ki pulit na ka bynta ka jingtei ia ka ri. U la ong ba ka Sorkar ka ieng skhem na ka bynta ka bha ka miat jong ki pulit bad kiba haiing jong ki.

*****