খুরুমজরি !

মহারাস্ত্রগী মুখ্য মন্ত্রী শ্রীমান একনাথ সিন্দে জী, উপ মুখ্য মন্ত্রী ইনাউ দেবেন্দ্র ফদনাবীস জী, অজিত পৱার জী, শ্রী মঙ্গল প্রভাত লোরা জী, স্তেত লৈঙাক্কী মন্ত্রীশিং, ইবেম্মা অমদি ইবুংঙো পুম্নমক‍।

নবরাত্রীগী য়াইফরবা কুমহৈ মনুংনি‍। ঙসি ইমাগী মঙাশুবা শক্তম, স্কন্দমাতাবু খুরুমজবা নুমিৎনি‍। মচাশিংগী পুন্সিনা নুঙাই য়াইফবা ওইরকপা হায়বসি মমা ওইবী পুম্নমক্কী থৌনিনি‍। নুংঙাই য়াইফবা ফংবা হায়বসি মহৈ মশিং অমদি শিল্লম শিন্থাদগী ফংগদৌরিবনি‍। অসিগুম্লবা য়াইফরবা মতমসিদা মহারাস্ত্রগী ঐখোয়গী ইচাশিংগী শিল্লম শিন্থা চাওখৎহন্নবগীদমক অচৌবা থৌরম অমা হৌরি‍। অদুগা ঐগী মাঙদা লেঙশিনবিরিবা নহা লাখ কয়া অমদি শিল্লম শিন্থা চাওখৎপগী লম্বীদা মাঙদা চঙশিন্নবা ফিরেপ লৌবিরিবা ময়ামগী মফমদা ঐনা থমজনিংবা ৱাফমদি, মহারাস্ত্রদা শিল্লম শিন্থা চাওখৎনবগী মফমশিং হাংদোক্কদৌরিবা ঙসিগী অহৌবা নুমিৎ অসিনা মখোয়গী পুন্সিগী খোঙহৌ অমা ওইরে হায়বসিনি‍।

মরূপশিং,

ঙসি মালেম পুম্বদা ভারতকী হৈথোই শিংথোইরবা নহাশিংগী দিমান্দ হেনগৎলক্লি‍। অহল ওইরবা মীশিং য়াম্না লৈবা, অহল মশিং অসুম অসুম হেনগৎলক্লিবা নীংথিনা ত্রেন তৌরবা নহা য়াম্না তাঙনা ফংবা লৈবাক কয়া অমা লৈরি‍। হীরম অসিগী মতাঙদা পাঙথোকখিবা সর্ভেনা মালেমগী লৈবাক ১৬না মখোয়গী লমদা চাউরাক্না হৈথোই শিংথোইরবা নহা লাখ ৪০ থবক পীবা পাম্লি হায়বা তাক্লি‍। হায়রিবা লৈবাকশিং অসিদা স্কিল লৈবা প্রোফেস্নেলশিং ৱাৎপা মরম্না মখোয়না অতোপ্পা লৈবাকশিংদা তাংদুনা লৈরি‍। কন্সত্রক্সন সেক্তর, হেল্থকেয়র সেক্তর, তুরিজম ইন্দস্ত্রী, হোস্পিতেলিতী, মহৈ মশিং অমদি ত্রান্সপোর্তনচিংবা সেক্তর কয়াদা মপান লৈবাকশিংদা দিমান্দ য়াম্না লৈ‍। মরম অসিনা ভারতনা ঙসি মশাগীতা নত্তনা মালেমগী ওইনসু স্কিল লৈবা প্রোফেস্নেলশিং শেম শারি‍।

মহারাস্ত্রগী খুঙ্গংশিংদা হাংদোক্কদৌরিবা অনৌবা কৌশল বিকাস কেন্দ্রশিং অসিনসু নহাশিংবু মালেম পুম্বগী ওইনা খুদোংচাবশিং লৌহৌনবা শেম শাগনি‍। হায়রিবা মফমশিং অসিদা কন্সত্রক্সন সেক্তরগা মরী লৈনবা শিল্লম শিন্থাশিং তাকপি তম্বিগদৌরি‍। মতমগা চুনবা মওংদা লৌউ-শিংউ কমদৌনা তৌগনি হায়বসিগা মরী লৈনবা স্কিলশিং তম্বিগনি‍। মহারাস্ত্রদদি মিদিয়া অমদি এন্তরতেনমেন্তকী থবক অসি য়াম্না চাউবা থবক্নি‍। মসিগীদমক্তসু অখন্নবা ত্রেনিং পীননবা মফম কয়া শেমগৎকনি‍। ঙসি ভারত ইলেক্ত্রোনিক্স অমদি হার্দৱ্যারগী অচৌবা মফম অমা ওইরক্লি‍। অসিগুম্বা ফীভমসিদা মফম দজন কয়াদা হীরম অসিগা মরী লৈনবা শিল্লম শিন্থাশিং তাকপি তম্বিগদৌরি‍। মসিগীদমক মহারাস্ত্রগী নহাশিংগী মফমদা, হায়রিবা কৌশল বিকাস কেন্দ্রশিং অসিগীদমক নুংঙাইবা ফোঙদোকচরি, য়াইফ-পাউজেল পীজরি‍।

সিন্দে জী অমদি মহাক্কী কাঙবুনা হায়রিবা কৌশল বিকাস কেন্দ্রশিং অসিদা সোফ্ত ত্রেনিংগী লমদসু মতম খরা কায়থোকপিনবা, ঐনা লৈঙাক্কী মফমদা হায়জরি‍। করিগুম্বা ঐখোয়গী নহাশিংনা মপান লৈবাকশিংদা চৎনবা খুদোংচাবা ফংলবদি চৎনরিবা লীচৎ শাজৎ, মওং মতৌশিং খঙদোক্তুনা, অফবা মওংদা কান্নবা পুরক্নবগীদমক অসিগুম্বা মফমসিবু শীজিন্ননবা নৎত্রগা AI গী মতেঙনা মখোয়বু ইন্তরপ্রিতর ওইনা লোলগী খুদোংচাদবা থেংনদনবা হোৎনবিবনা মপান লৈবাকশিংদা চৎকদবা মীওইশিংদা চাউনা কান্নবা পীগনি‍। অসুম্না তৌবনা কম্পনীশিংনা মখোয়বু থুনমক লৌশিন্দুনা মপান লৈবাকশিংদা চৎলগা থবক থুনা ফংহনবা ঙমহনগনি‍। মরম অসিনা সোফ্ত-স্কিলগীসু থৌরাং অমা নৎত্রগা অমা শিন্দুনা, ওন্লাইন মোদ্যুলশিং শেম্বিদুনা ওনলাইন একজাম থাহন্দুনা মখোয়দা মরুওইবা পাম্বৈ অমা ওইনা শেমগৎপিবসু ঐনা পাম্মি‍।

মরূপশিং,

মতম শাংনা লৈঙাক্কী মফমদা স্কিল দিভেলপমেন্তকী মতাঙদা অসুম্না লুম্না লৌবা নৎত্রগা পায়খৎলম্বা লৈখিদে‍। মসিনা ঐখোয়গী নহাশিংদা চাউনা মাঙজবা ওইহল্লি‍। ইন্দস্ত্রীগী দিমান্দ লৈরবসু, নহাশিংদা তেলেন্ত লৈরবসু, স্কিল দিভেলপমেন্ত লৈরমদবনা মরম ওইরগা নহাশিংনা থবক ফংবদা অৱাবা মায়োক্নরম্মী‍। ঐখোয়গী লৈঙাক্না নহাশিংগী স্কিল দিভেলপমেন্তকী মরুওইবশিং খঙখি‍। ঐখোয়না স্কিল দিভেলপমেন্তকীদমক তোঙানবা মন্ত্রালয় শেমখি, অমদি ভারত্তা অহানবা ওইনা স্কিলগী অখন্নবা মন্ত্রালয় অমা শেমখি, হায়বদি লৈবাক্কী নহাশিংগী ওইবা অখন্নবা অনৌবা মন্ত্রালয় অমা শেমখি‍। তোঙানবা বজেৎ শেমখি অমদি তোঙান তোঙানবা থৌরাংশিং পায়খৎখি‍। কৌশল বিকাস য়,জনাগী মখাদা হৌজিক ফাওবদা নহা করোর অমগা লাখ ৩০ হেনবদা তোঙান তোঙানবা ত্রেদশিংদা ত্রেনিং পীখ্রে‍। লৈঙাক্না লৈবাক পুম্বদা প্রধান মন্ত্রী কৌশল কেন্দ্র চা কয়া লিংখৎখ্রে‍।

মরূপশিং,

স্কিল দিভেলপমেন্তকী অসিগুম্বা থৌরাংনা খুন্নাইগী অচুম্বা ৱায়েল ফংহনবদসু চাউনা মতেঙ ওইরি‍। বাবা সাহেব অম্বেদকর সু খুন্নাইগী শোত্থহৌরবা কাঙলুপশিংগী শিল্লম শিন্থা চাউখৎহন্নবা ৱাফমদা মরুওইবা মীৎয়েঙ থম্লম্মি‍। বাবা সাহেবনা খল্লম্লিবা অসি ময়াম মরক্তা থেংনরিবা অচুম্বা ৱাফমশিংগা মরী লৈনবা ঙাক্তনি‍। ঐখোয়গী দলিত অমদি শোত্থহৌরবা ইচিল ইনাওশিংগী মফমদা লম মরাং কায়না লৈজদে হায়বা মহাক্না মমুৎ তানা খঙলম্মি‍। দলিত, শোত্থহৌরবা অমদি সিদ্যুল্দ ত্রাইবশিংদা ইকায়খুম্নবগা লোয়ননা হিংজবা ঙমহন্নবা মহাক্না ইন্দস্ত্রিএলাইজেসন্দসু মরুওইবা মীৎয়েঙ থম্লমখি‍। অদুগা ইন্দস্ত্রীশিংদা থবক তৌবদা খ্বায়দগী মরুওইনা মথৌ তারিবদি স্কিল অমদি শিল্লম শিন্থা খঙবনি‍। মমাঙদা হায়রিবা খুন্নাইগী অসিগুম্লবা কাঙলুপ অসি মশিং য়াম্না অফবা থবক, অফবা শিন্ফম ফংদনা লাকখি‍। অদুগা ঙসিদি ভারত লৈঙাক্কী কৌশল য়োজনাশিংনা খ্বায়দগী চাউনা কান্নবা পীরিবসি লায়রবা, দলিত, শোত্থহৌরবা অমদি সিদ্যুল ত্রাইবকী ইমুংশিংদনি‍।

মরূপশিং,

ইমা সাবিত্রীবাই ফুলেনা ভারতকী নুপীশিংগী মহৈ মশিংগীদমক খুন্নাইগী অফা অপুনশিংবু থুগাইদুনা লম্বী তাকপিরম্মি‍। ৱাখল লৌশিং লৈরবা অমদি শিল্লম শিন্থা খঙলবা মীওইশিংনা খুন্নাইদা অওনবা পুরক্কদবনি হায়না মহাক্না চেৎনা থাজরম্মি‍। ইমা সাবিত্রীবাইগী থৌনা লিংজেলদগী লৈঙাক্না নুপীমচাশিংগী মহৈ মশিং হেনগৎহনবদা অমদি মপাঙ্গল হাপ্পদা থৌনা হাপ্লি‍। ঙসি খুঙ্গংশিংদা সেল্ফ-হেল্প গ্রুপশিংগী খুত্থাঙদা নুপীশিংগী ত্রেনিংশিং পাঙথোক্লি‍। নুপীশিংগী মপাঙ্গল হাপ্নবগী থবক থৌরমশিংগী মখাদা নুপী করোর ৩ হেনবদ অখন্নবা ত্রেনিং পীখ্রে‍। হৌজিক্তি লৈবাকসিদা দ্রোনগী পাম্বৈনা লৌউ-শিংউ অমদি তোঙান তোঙানবা থবক থৌরমশিংদসু খুমাঙ চাওশিল্লি‍। মসিগীদমকসু খুঙ্গংগী নুপীশিংদা অখন্নবা ত্রেনিংশিং পীগনি‍।

মরূপশিং,

ঐখোয়গী খুঙ্গংশিংদা মীরোল মথং মনাউ নাইনা শিন্ফম থংথরকপা ইমুং কয়া লৈ‍। শম ককপা, খোঙউপ শেম্বা, ফি শুবা, চেক শুবা, উ শুবা, চফু শাবা, য়োৎ শুবা, সনা শুবা অসিনচিংবা শিন্ফমশিং অমা নৎত্রগা অমা হৈতবা করম্বা খুঙ্গংগী ইমুংশিংবু লৈবগ‍ে‍। অসিগুম্বা ইমুংশিংদা মতেঙ পাংনবগীদমক, হৌজিক্তসু অজিত দাদানা পনবিখিবগুম, ভারত লৈঙাক্না পি.এম. বিস্বকর্ম য়োজনা হৌদোকখি‍। মসিগী মখাদা ত্রেনিংদগী হৌরগা মতমগা চুনবা পাম্বৈশিং অমদি থবকশিং য়োকখৎনবগীদমক, থাক খুদিংদা লৈঙাক্না শেলগী তেংবাং পীরি‍। মসিদা কেন্দ্র লৈঙাক্না লুপা করোর লিশিং ১৩ শীজিন্নগদৌরি‍। মহারাস্ত্রদা শাগৎকদৌরিবা গ্রামীন কৌশল্য বিকাস কেন্দ্র ৫০০ হেনবসিনসু পি.এম. বিস্বকর্ম য়োজনাবু য়োকখৎকনি হায়না ঐঙোন্দা পাউদম্লকই‍। মসিগীদমক ঐনা মহারাস্ত্র লৈঙাকপু অখন্ননা থাগৎচরি‍।

মরূপশিং,

কৌশল বিকাসকী হায়রিবা থৌরাংশিং অসিগী মরক্তা, ঐখোয়না করম্বা হীরমশিংদা স্কিল হেনগৎহনপনা লৈবাক্কী মপাঙ্গল হাপকনি হায়বা অসিসু ঐখোয়না খনবা মথৌ তাই‍। মেনুফেকচরিংদা অফবা ক্বালিতীগী পোত্থোকশিং, অশোয় অঙাম লৈতবা পোত্থোকশিং লৈবাকসিদা লৈহনবা মথৌ তাই‍। ইন্দস্ত্রী ৪.০গীদমক অনৌবা স্কিলশিং মথৌ তাই‍। সর্ভিস সেক্তর, নোলেজ ইকনমি অমদি অনৌবা তেক্নোলোজীবু মাঙদা থমদুনা লৈঙাকশিংনা অনৌবা স্কিলশিংদা মরুওইবা মীৎয়েঙ থম্বা তাই‍। মতৌ করম্না ঐখোয়না পোত্থোক পুথোকপদা ইরোমদোম লেপচবগী মায়কৈদা খোঙ থাংজিনগদগে হায়বা ঐখোয়না য়েংবা তাই‍। অসিগুম্বা পোত্থোকশিং পুথোক্নবগীদমক ঐখোয়না স্কিল হেনগৎহনবা মথৌ তাই‍।

মরূপশিং,

ভারতকী লৌউ-শিংউগী সেক্তরদসু ঙসি অনৌবা স্কিলশিং য়াম্না মথৌ তারে‍। কেমিকেল শীজিন্নদুনা লৌ উবনা ঐখোয়গী মালেম ইমাবু য়াম্না তমথিনা ওৎপি নৈবিরি‍। মালেম অসিবু কন্নবগীদমক মহৌশাগী লৌউ পথাপ মরুওই অমদি মসিগীদমক্তসু স্কিল মথৌ তাই‍। লৌউ-শিংউদা কমদৌনা ঈশিং খল কায়হন্দনা শীজিন্নগনি হায়বগী মতাঙদসু অনৌবা স্কিল মথৌ তাই‍। ঐখোয়না লৌউ-শিংউগী পোত্থোকশিংগী প্রোসেসিং, ভেল্যু এদিসন, পেকেজিং, ব্রেন্দিং অমদি ওনলাইনগী তাইবংদা য়ৌহনবদসু স্কিল মথৌ তাই‍। মরম অসিনা লৈবাকসিগী তোঙান তোঙানবা লৈঙাকশিংনা স্কিল দিভেলপমেন্তকী ঙমখৈ পাকথোক চাউথোকহনবা তাই‍। শিল্লম শিন্থা চাওখৎহনবগী মতাঙদা লৌখৎলিবা থৌরাংশিং অসিনা নীংতম্বগী অমৃৎকালদা চাওখৎপা ভারত অমা পুরক্নবগী লমদা অচৌবা থৌদাং লৌরক্কনি হায়না ঐনা থাজৈ‍।

ঐনা অমুক্কা হন্না সিন্দে জী অমদি মহাক্কী কাঙবুগী মফমদা নুংঙাইবা ফোঙদোকচরি, য়াইফ-পাউজেল পীজরি‍। অদুগা স্কিলগী লম্বীদা খোঙ থাংজিল্লক্লিবা নহাশিংনা খল্লিবা ৱাখল্লোন অমদি খঙলিবা ৱাফমশিং অদু অচুম্বা মায়কৈদনি হায়বা ৱাফমসু ঐনা থমজগে‍। মখোয়না শিল্লম শিন্থাশিং অসিগী পাম্বৈনা মখোয়না হোৎনজবগী পাম্বৈনা মখোয়গী ইমুং মনুংদা চাউনা মতেঙ ওইগদৌরিবনি, লৈবাক্কীদমক চাউনা থৌদাং য়ারক্কদৌরিবনি‍। ঐগী মায়কৈদগী নহা পুম্নমক্কী মফমদা অখন্ননা য়াইফ-পাউজেল পীজরি‍।

ঐ ৱাফম অমসু তমজগে, ঐনা নোংমা সিঙ্গাপুর চৎপা মতমদা সিঙ্গাপুরগী প্রধান মন্ত্রীগা লোয়ননা থৌরম পাঙথোক্কদবা মরম্না ঐগী সিদ্যুল য়াম্না চিল্লম্মি, এঙ্গেজমেন্ত য়াম্না লৈরম্মি, অদুবু মহাক্না পাম্বা অমা হেক্তা তৌদুনা মহাক্কীদমক মতম খরা কাইথোকপিনবা হায়রকখি‍। প্রধানমন্ত্রীনা হায়রকপনিনা ঐনা ফরে ঐ করিগুম্বা খরদা শিন্নরগে হায়খি‍। ঐনা, ঐখোয়গী কাঙবুনা পুম্নমক শিন্দোক্লে, মহাক্না মতম নিরকখিবদু করিগী ওইরম্বগে হায়বদা ঐখোয়গী সিদা ITI লৈবগুম্না মখোয়গীদসু স্কিল দিভেলপমেন্ত সেন্তরশিং লৈরিবদু য়েংহন্নবগীদমক্তনি‍। মহাক্না চাউথোকচবগা লোয়ননা ঐঙোন্দা য়েংহনখি অদুগা মহাক্না মদুবু থৱায় হকচাঙ য়াওনা লিংখৎখিবনি, মতম অমদা মফমদুগী মীয়ামশিংনা ইন্সতিত্যুৎ অসিদা চৎপদা খুন্নাইনা পুক্নিং থৌগৎনরমদে, ইকায়নরম্মি, মখোয়দা নহাক্কী নচাদি কলেজ তমদ্রবোইরে, মদু তৌই, মদু তৌদে হেক হেক হায়বি হায়না মহাক্না পাউদম্লকখি‍। অদুবু ঐনা স্কিল দিভেলপমেন্ত সেন্তর অসি লিংখৎলবা মতুংদগীদি ইনাক কৈরাক খুল্লবা ইমুং কয়াদগীসু মখোয়গী মচা মশুশিং মফমসিদা মিং চনবা ফংননবা ৱানোম্বা কয়া লাকখি হায়নসু মহাক্না হায়রকখি‍। তশেংবসু মহাক্না হীরম অসিদা চাউনা মীৎয়েঙ চঙবনা মরম ওইরগা হীরম অসিগী মতাঙদা খুন্নাইনা য়েংলমবা মীৎয়েঙসু হোংলক্লে‍ হায়রকখি‍। ঐখোয়গী লৈবাকসিদসু শিন্মীশিংগী ইকায়খুম্নবা হেনগৎহনবা, ‘শ্রমেব জয়তে’ হায়দুনা, ঐখোয়গী স্কিল লৈরবা শিন্মীশিংবু খুন্নাইদা ইকায়খুম্নবা ফিদা ফংহনবা হায়বসি খুন্নাই অসিগী থৌদাংনি‍।

ঐনা অমুক্কা হন্না নহা পুম্নমক্কী মফমদা থম্মোয়নুংদগী নুংঙাইবা ফোঙদোকচরি, য়াইফ-পাউজেল পীজরি‍। অদুগা ঐবু ঙসিগী থৌরমসিদা শরুক য়াননবা তাঞ্জা ফংহনবিরি, মীওই লাখ কয়া তিল্লিবসিদা, ঐনা শুম য়েংবদা মায়কৈ মরিদা নহা ঙাক্তনা থন্না উরি‍। হায়রিবা নহা পুম্নমকসিগা উনবা ফংহনবিরি‍। মসিগীদমক ঐনা মঙ্গল প্রভাত জী অমদি সিন্দে জীগী কাঙবু পুম্নমকপু থম্মোয়নুংদগী থাগৎচবা ফোঙদোকচরি‍।

খুরুমজরি !

***