ನಮಸ್ಕಾರ!
ಮಹಾರಾಷ್ಟ್ರದ ಮುಖ್ಯಮಂತ್ರಿ ಶ್ರೀ ಏಕನಾಥ್ ಶಿಂಧೆ ಜಿ, ಉಪಮುಖ್ಯಮಂತ್ರಿ ಭಾಯಿ ದೇವೇಂದ್ರ ಫಡ್ನವೀಸ್ ಜಿ, ಅಜಿತ್ ಪವಾರ್ ಜೀ, ಶ್ರೀ ಮಂಗಲ್ ಪ್ರಭಾತ್ ಲೋಧಾ ಜಿ, ಇಲ್ಲಿರುವ ರಾಜ್ಯ ಸರ್ಕಾರದ ಎಲ್ಲಾ ಸಚಿವರು, ಮಹಿಳೆಯರು ಮತ್ತು ಮಹನೀಯರೆ!
 
ನವರಾತ್ರಿಯ ಅದ್ಧೂರಿ ಉತ್ಸವ ನಡೆಯುತ್ತಿದೆ. ಇಂದು ನಾವು ಮಾತೃದೇವತೆಯ 5ನೇ ರೂಪವಾದ ಸ್ಕಂದಮಾತೆ ಪೂಜಿಸುವ ದಿನ. ಪ್ರತಿಯೊಬ್ಬ ತಾಯಿಯು ತನ್ನ ಮಗುವಿಗೆ ಎಲ್ಲಾ ಸಂತೋಷ ಮತ್ತು ಕೀರ್ತಿ ನೀಡಬೇಕೆಂದು ಬಯಸುತ್ತಾಳೆ. ಶಿಕ್ಷಣ ಮತ್ತು ಕೌಶಲ್ಯದಿಂದ ಮಾತ್ರ ಈ ಸಂತೋಷ ಮತ್ತು ಖ್ಯಾತಿಯ ಪ್ರಾಪ್ತಿ ಸಾಧ್ಯ. ಇಂತಹ ಸುಸಂದರ್ಭದಲ್ಲಿ ಮಹಾರಾಷ್ಟ್ರದ ನಮ್ಮ ಪುತ್ರ ಪುತ್ರಿಯರ ಕೌಶಲ್ಯಾಭಿವೃದ್ಧಿಗಾಗಿ ಇಂತಹ ಮಹತ್ವದ ಕಾರ್ಯಕ್ರಮ ಉದ್ಘಾಟಿಸಲಾಗುತ್ತಿದೆ. ಕೌಶಲ್ಯ ಅಭಿವೃದ್ಧಿಯ ಹಾದಿಯಲ್ಲಿ ಮುನ್ನಡೆಯಲು ನಿರ್ಧರಿಸಿದ ನನ್ನ ಮುಂದೆ ಕುಳಿತ ಲಕ್ಷಾಂತರ ಯುವಕರಿಗೆ, ಇಂದಿನ ಬೆಳಗ್ಗೆ ಅವರ ಜೀವನಕ್ಕೆ ಮಂಗಳಕರವಾಗಿದೆ ಎಂದು ನಾನು ಹೇಳಲೇಬೇಕು. ಮಹಾರಾಷ್ಟ್ರದಲ್ಲಿ 511 ಗ್ರಾಮೀಣ ಕೌಶಲ್ಯ ಅಭಿವೃದ್ಧಿ ಕೇಂದ್ರಗಳನ್ನು ಸ್ಥಾಪಿಸಲಾಗುತ್ತಿದೆ.
 
ಸ್ನೇಹಿತರೆ,
 
ಇಂದು ಭಾರತದ ನುರಿತ ಯುವಕರ ಬೇಡಿಕೆ ಇಡೀ ವಿಶ್ವದಲ್ಲೇ ಹೆಚ್ಚುತ್ತಿದೆ. ಹಿರಿಯ ನಾಗರಿಕರ ಸಂಖ್ಯೆ ತುಂಬಾ ಹೆಚ್ಚಿರುವ ಅನೇಕ ದೇಶಗಳಿವೆ! ಅಲ್ಲಿ ವೃದ್ಧರ ಸಂಖ್ಯೆ ಹೆಚ್ಚುತ್ತಿದೆ, ಆದರೆ ತರಬೇತಿ ಪಡೆದ ಯುವಕರನ್ನು ಹುಡುಕುವುದು ಕಷ್ಟ. ವಿಶ್ವದ 16 ದೇಶಗಳು ಸುಮಾರು 40 ಲಕ್ಷ ನುರಿತ ಯುವಕರಿಗೆ ಉದ್ಯೋಗ ನೀಡಲು ಬಯಸುತ್ತವೆ ಎಂದು ಈ ನಿಟ್ಟಿನಲ್ಲಿ ನಡೆಸಲಾದ ಸಮೀಕ್ಷೆಗಳು ತೋರಿಸುತ್ತಿವೆ. ಈ ದೇಶಗಳಲ್ಲಿ ನುರಿತ ವೃತ್ತಿಪರರ ಕೊರತೆಯಿಂದಾಗಿ ಅವರು ಇತರೆ ದೇಶಗಳ ಮೇಲೆ ಅವಲಂಬಿತರಾಗಿದ್ದಾರೆ. ನಿರ್ಮಾಣ ಕ್ಷೇತ್ರ, ಆರೋಗ್ಯ ಕ್ಷೇತ್ರ, ಪ್ರವಾಸೋದ್ಯಮ, ಆತಿಥ್ಯ, ಶಿಕ್ಷಣ ಮತ್ತು ಸಾರಿಗೆಯಂತಹ ಹಲವಾರು ಕ್ಷೇತ್ರಗಳಿಗೆ ಇಂದು ವಿದೇಶಗಳಲ್ಲಿ ಸಾಕಷ್ಟು ಬೇಡಿಕೆಯಿದೆ. ಆದ್ದರಿಂದ, ಇಂದು ಭಾರತವು ತನ್ನ ನುರಿತ ವೃತ್ತಿಪರರನ್ನು ತನಗಾಗಿ ಮಾತ್ರವಲ್ಲದೆ, ಜಗತ್ತಿಗೂ ಸಿದ್ಧಪಡಿಸುತ್ತಿದೆ.
 
ಮಹಾರಾಷ್ಟ್ರದ ಹಳ್ಳಿಗಳಲ್ಲಿ ಸ್ಥಾಪಿಸಲಿರುವ ಈ ಹೊಸ ಕೌಶಲ್ಯ ಅಭಿವೃದ್ಧಿ ಕೇಂದ್ರಗಳು ಜಾಗತಿಕ ಅವಕಾಶಗಳಿಗೆ ಯುವಕರನ್ನು ಸಿದ್ಧಗೊಳಿಸುತ್ತವೆ. ಈ ಕೇಂದ್ರಗಳಲ್ಲಿ ನಿರ್ಮಾಣ ಕ್ಷೇತ್ರಕ್ಕೆ ಸಂಬಂಧಿಸಿದ ಕೌಶಲಗಳನ್ನು ಕಲಿಸಲಾಗುವುದು. ಆಧುನಿಕ ವಿಧಾನಗಳನ್ನು ಬಳಸಿಕೊಂಡು ಕೃಷಿಗೆ ಸಂಬಂಧಿಸಿದ ಕೌಶಲ್ಯಗಳನ್ನು ಸಹ ಕಲಿಸಲಾಗುತ್ತದೆ. ಮಹಾರಾಷ್ಟ್ರದಲ್ಲಿ ಮಾಧ್ಯಮ ಮತ್ತು ಮನರಂಜನಾ ಕೆಲಸವು ಅಂತಹ ಬೃಹತ್ ಕೆಲಸವಾಗಿದೆ. ಈ ಬಗ್ಗೆ ವಿಶೇಷ ತರಬೇತಿ ನೀಡುವ ಹಲವು ಕೇಂದ್ರಗಳನ್ನೂ ಸ್ಥಾಪಿಸಲಾಗುವುದು. ಇಂದು ಭಾರತವು ಎಲೆಕ್ಟ್ರಾನಿಕ್ಸ್ ಮತ್ತು ಹಾರ್ಡ್‌ವೇರ್‌ನ ಪ್ರಮುಖ ತಾಣವಾಗಿ ಬದಲಾಗುತ್ತಿದೆ. ಇಂತಹ ಸನ್ನಿವೇಶದಲ್ಲಿ ಈ ವಲಯಕ್ಕೆ ಸಂಬಂಧಿಸಿದ ಕೌಶಲಗಳನ್ನು ಹತ್ತಾರು ಕೇಂದ್ರಗಳಲ್ಲಿ ಕಲಿಸಲಾಗುತ್ತದೆ. ಈ ಕೌಶಲ್ಯ ಅಭಿವೃದ್ಧಿ ಕೇಂದ್ರಗಳಿಗಾಗಿ ನಾನು ಮಹಾರಾಷ್ಟ್ರದ ಯುವಕರನ್ನು ಅಭಿನಂದಿಸುತ್ತೇನೆ ಮತ್ತು ಅವರಿಗೆ ಶುಭ ಹಾರೈಸುತ್ತೇನೆ.
 
 
ಕೌಶಲ್ಯ ಅಭಿವೃದ್ಧಿಗಾಗಿ ಸಾಫ್ಟ್ ತರಬೇತಿ ನೀಡಲು ಸ್ವಲ್ಪ ಸಮಯ ವಿನಿಯೋಗಿಸುವಂತೆ ನಾನು ರಾಜ್ಯ ಸರ್ಕಾರ, ಶಿಂಧೆ ಜಿ ಮತ್ತು ಅವರ ಇಡೀ ತಂಡವನ್ನು ವಿನಂತಿಸುತ್ತೇನೆ. ಇದರಲ್ಲಿ ನಮ್ಮ ಯುವಕರಿಗೆ ವಿದೇಶಕ್ಕೆ ಹೋಗುವ ಅವಕಾಶ ಸಿಕ್ಕರೆ ದಿನ ನಿತ್ಯದ ಬದುಕಿನಲ್ಲಿ ಬಳಸುವ 10-20 ವಾಕ್ಯಗಳನ್ನೂ ಕಲಿಸಬೇಕು. ಭಾಷಾ ಸಮಸ್ಯೆಗಳು ಉದ್ಭವಿಸದಂತೆ ಅವರಿಗೆ ಕೃತಕ ಬುದ್ಧಿಮತ್ತೆ ತಂತ್ರಜ್ಞಾನದ ಮೂಲಕ ವ್ಯಾಖ್ಯಾನ ಕಲಿಸಬೇಕು. ವಿದೇಶಕ್ಕೆ ಹೋಗುವವರಿಗೆ ಈ ವಸ್ತುಗಳು ತುಂಬಾ ಉಪಯುಕ್ತವಾಗಿವೆ. ಈ ರೀತಿಯಾಗಿ, ಈಗಾಗಲೇ ಸಿದ್ಧರಾಗಿರುವವರನ್ನು ಕಂಪನಿಗಳು ತ್ವರಿತವಾಗಿ ನೇಮಿಸಿಕೊಳ್ಳುತ್ತವೆ. ಇದರಿಂದ ಅವರು ಅಲ್ಲಿಗೆ ಹೋದ ತಕ್ಷಣ ಕೆಲಸಕ್ಕೆ ಅರ್ಹರಾಗುತ್ತಾರೆ. ಹಾಗಾಗಿ, ಮೃದು-ಕೌಶಲ್ಯಗಳಿಗೂ ಕೆಲವು ನಿಬಂಧನೆಗಳನ್ನು ಮಾಡಬೇಕೆಂದು ನಾನು ಬಯಸುತ್ತೇನೆ; ಆನ್‌ಲೈನ್ ಮಾಡ್ಯೂಲ್‌ಗಳನ್ನು ಅಭಿವೃದ್ಧಿಪಡಿಸಬೇಕು. ಉಳಿದ ಸಮಯದಲ್ಲಿ ಈ ಮಕ್ಕಳು ಆನ್‌ಲೈನ್ ಪರೀಕ್ಷೆಗಳನ್ನು ಎದುರಿಸುವುದನ್ನು ಮುಂದುವರಿಸಬೇಕು. ಇದರಿಂದ ಅವರು ವಿಶೇಷ ಕೌಶಲ್ಯಗಳನ್ನು ಕಲಿಯುತ್ತಾರೆ.
 
ಸ್ನೇಹಿತರೆ,
ದೀರ್ಘಕಾಲದವರೆಗೆ, ಹಿಂದಿನ ಸರ್ಕಾರಗಳು ಕೌಶಲ್ಯ ಅಭಿವೃದ್ಧಿಗೆ ಸಂಬಂಧಿಸಿದಂತೆ ಅದೇ ಗಂಭೀರತೆ ಅಥವಾ ಅದೇ ದೂರದೃಷ್ಟಿ ಹೊಂದಿರಲಿಲ್ಲ. ಇದರಿಂದ ನಮ್ಮ ಯುವಕರು ಸಾಕಷ್ಟು ತೊಂದರೆ ಅನುಭವಿಸಬೇಕಾಯಿತು. ಉದ್ಯಮದಲ್ಲಿ ಬೇಡಿಕೆಯಿದ್ದರೂ, ಯುವಕರಲ್ಲಿ ಪ್ರತಿಭೆಯ ಹೊರತಾಗಿಯೂ, ಕೌಶಲ್ಯ ಅಭಿವೃದ್ಧಿಯ ಕೊರತೆಯಿಂದಾಗಿ ಯುವಕರಿಗೆ ಉದ್ಯೋಗ ಸಿಗುವುದು ಅತ್ಯಂತ ಕಷ್ಟಕರವಾಗಿತ್ತು. ಆದರೆ ನಮ್ಮ ಸರ್ಕಾರ ಯುವಕರಲ್ಲಿ ಕೌಶಲ್ಯಾಭಿವೃದ್ಧಿಯ ಗಂಭೀರತೆ ಅರ್ಥ ಮಾಡಿಕೊಂಡಿದೆ. ನಾವು ಕೌಶಲ್ಯಾಭಿವೃದ್ಧಿಗಾಗಿ ಪ್ರತ್ಯೇಕ ಸಚಿವಾಲಯ ಸ್ಥಾಪಿಸಿದ್ದೇವೆ. ಭಾರತದಲ್ಲಿ ಮೊದಲ ಬಾರಿಗೆ ಈ ಏಕೈಕ ವಿಷಯವಾದ ಕೌಶಲ್ಯಕ್ಕಾಗಿ ಮೀಸಲಾದ ಪ್ರತ್ಯೇಕ ಸಚಿವಾಲಯವಿದೆ. ಅಂದರೆ ದೇಶದ ಯುವಜನರಿಗೆ ಮೀಸಲಾದ ಹೊಸ ಸಚಿವಾಲಯವೂ ಇದೆ. ಪ್ರತ್ಯೇಕ ಬಜೆಟ್‌ ಮೀಸಲಿಟ್ಟು ನಾನಾ ಯೋಜನೆಗಳನ್ನು ಆರಂಭಿಸಿದ್ದೇವೆ. ಕೌಶಲ ವಿಕಾಸ ಯೋಜನೆಯಡಿ ಇದುವರೆಗೆ 1 ಕೋಟಿ 30 ಲಕ್ಷಕ್ಕೂ ಹೆಚ್ಚು ಯುವಕರಿಗೆ ವಿವಿಧ ವ್ಯಾಪಾರಗಳಲ್ಲಿ ತರಬೇತಿ ನೀಡಲಾಗಿದೆ. ಸರ್ಕಾರವು ದೇಶಾದ್ಯಂತ ನೂರಾರು ಪ್ರಧಾನ ಮಂತ್ರಿ ಕೌಶಲ ಕೇಂದ್ರಗಳನ್ನು ಸ್ಥಾಪಿಸಿದೆ.
 
ಸ್ನೇಹಿತರೆ,
ಇಂತಹ ಕೌಶಲಾಭಿವೃದ್ಧಿಯ ಪ್ರಯತ್ನಗಳಿಂದ ಸಾಮಾಜಿಕ ನ್ಯಾಯವೂ ಸಾಕಷ್ಟು ಉತ್ತೇಜನ ಪಡೆದಿದೆ. ಬಾಬಾ ಸಾಹೇಬ್ ಅಂಬೇಡ್ಕರ್ ಅವರು ಸಮಾಜದ ದುರ್ಬಲ ವರ್ಗಗಳ ಕೌಶಲ್ಯ ಅಭಿವೃದ್ಧಿಗೆ ಹೆಚ್ಚಿನ ಒತ್ತು ನೀಡಿದ್ದರು. ಬಾಬಾ ಸಾಹೇಬರ ಚಿಂತನೆಯು ನೆಲದ ಸತ್ಯದೊಂದಿಗೆ ಸಂಪರ್ಕ ಹೊಂದಿತ್ತು. ನಮ್ಮ ದಲಿತ ಮತ್ತು ವಂಚಿತ ಸಹೋದರ ಸಹೋದರಿಯರಿಗೆ ಸಾಕಷ್ಟು ಭೂಮಿ ಇಲ್ಲ ಎಂದು ಅವರು ಚೆನ್ನಾಗಿ ತಿಳಿದಿದ್ದರು. ದಲಿತರು, ಹಿಂದುಳಿದ ವರ್ಗಗಳು ಮತ್ತು ಬುಡಕಟ್ಟು ಜನಾಂಗದವರಿಗೆ ಗೌರವಯುತ ಜೀವನ ಸಿಗುವಂತೆ ಮಾಡಲು ಅವರು ಕೈಗಾರಿಕೀಕರಣಕ್ಕೆ ಹೆಚ್ಚಿನ ಒತ್ತು ನೀಡಿದ್ದರು. ಕೈಗಾರಿಕೆಗಳಲ್ಲಿ ಕೆಲಸ ಮಾಡಲು ಅತ್ಯಂತ ಅಗತ್ಯವಾದ ಪೂರ್ವಾಪೇಕ್ಷಿತವೆಂದರೆ ಕೌಶಲ್ಯ. ಈ ಹಿಂದೆ ಹೆಚ್ಚಿನ ಸಂಖ್ಯೆಯ ಸಮಾಜದವರು ಕೌಶಲ್ಯದ ಕೊರತೆಯಿಂದ ಉತ್ತಮ ಕೆಲಸ ಮತ್ತು ಉತ್ತಮ ಉದ್ಯೋಗಗಳಿಂದ ವಂಚಿತರಾಗಿದ್ದರು. ಇಂದು ಬಡವರು, ದಲಿತರು, ಹಿಂದುಳಿದ ಮತ್ತು ಬುಡಕಟ್ಟು ಕುಟುಂಬಗಳು ಭಾರತ ಸರ್ಕಾರದ ಕೌಶಲ್ಯ ಯೋಜನೆಗಳಿಂದ ಹೆಚ್ಚು ಪ್ರಯೋಜನ ಪಡೆಯುತ್ತಿದ್ದಾರೆ.
 
ಸ್ನೇಹಿತರೆ,
ಮಾತೆ ಸಾವಿತ್ರಿಬಾಯಿ ಫುಲೆ ಅವರು ಭಾರತದಲ್ಲಿ ಮಹಿಳಾ ಶಿಕ್ಷಣಕ್ಕಾಗಿ ಸಾಮಾಜಿಕ ಅಡೆತಡೆಗಳನ್ನು ಮುರಿಯುವ ಮಾರ್ಗ ತೋರಿದರು. ಜ್ಞಾನ ಮತ್ತು ಕೌಶಲ್ಯ ಇದ್ದವರು ಮಾತ್ರ ಸಮಾಜದಲ್ಲಿ ಬದಲಾವಣೆ ತರಲು ಸಾಧ್ಯ ಎಂಬ ಅಚಲ ನಂಬಿಕೆ ಆಕೆಗಿತ್ತು. ಮಾತೆ ಸಾವಿತ್ರಿಬಾಯಿ ಅವರ ಪ್ರೇರಣೆಯಿಂದ ಸರ್ಕಾರವು ಹೆಣ್ಣು ಮಕ್ಕಳ ಶಿಕ್ಷಣ ಮತ್ತು ತರಬೇತಿಗೆ ಸಮಾನ ಒತ್ತು ನೀಡುತ್ತಿದೆ. ಇಂದು ಪ್ರತಿ ಗ್ರಾಮಗಳಲ್ಲಿ ಸ್ವಸಹಾಯ ಸಂಘಗಳ ಮೂಲಕ ಮಹಿಳೆಯರಿಗೆ ತರಬೇತಿ ನೀಡಲಾಗುತ್ತಿದೆ. ಮಹಿಳಾ ಸಬಲೀಕರಣ ಕಾರ್ಯಕ್ರಮದಡಿ 3 ಕೋಟಿಗೂ ಹೆಚ್ಚು ಮಹಿಳೆಯರಿಗೆ ವಿಶೇಷ ತರಬೇತಿ ನೀಡಲಾಗಿದೆ. ಈಗ ದೇಶವು ಡ್ರೋನ್‌ಗಳ ಮೂಲಕ ಕೃಷಿ ಮತ್ತು ವಿವಿಧ ಕೆಲಸಗಳನ್ನು ಪ್ರೋತ್ಸಾಹಿಸುತ್ತಿದೆ. ಇದಕ್ಕಾಗಿ ಹಳ್ಳಿಗಳಲ್ಲಿ ವಾಸಿಸುವ ಸಹೋದರಿಯರಿಗೂ ವಿಶೇಷ ತರಬೇತಿ ನೀಡಲಾಗುವುದು.
 
ಸ್ನೇಹಿತರೆ,
 
ನಾವು ಪ್ರತಿ ಹಳ್ಳಿಯಲ್ಲೂ ಅಂತಹ ಕುಟುಂಬಗಳನ್ನು ಹೊಂದಿದ್ದೇವೆ, ಅದು ಅವರ ಕೌಶಲ್ಯಗಳನ್ನು ಪೀಳಿಗೆಯಿಂದ ಪೀಳಿಗೆಗೆ ತಲುಪಿಸುತ್ತದೆ. ಕ್ಷೌರಿಕರು, ಶೂ ತಯಾರಕರು, ಬಟ್ಟೆ ಒಗೆಯುವವರು, ಮೇಸ್ತ್ರಿಗಳು, ಬಡಗಿಗಳು, ಕುಂಬಾರರು, ಅಕ್ಕಸಾಲಿಗರು ಮುಂತಾದ ನುರಿತ ಕುಟುಂಬಗಳನ್ನು ಹೊಂದಿರದ ಯಾವುದೇ ಗ್ರಾಮಗಳಿಲ್ಲ. ಅಂತಹ ಕುಟುಂಬಗಳನ್ನು ಬೆಂಬಲಿಸಲು ಭಾರತ ಸರ್ಕಾರವು ಪ್ರಧಾನ ಮಂತ್ರಿ ವಿಶ್ವಕರ್ಮ ಯೋಜನೆ ಪ್ರಾರಂಭಿಸಿದೆ, ಅಜಿತ್ ದಾದಾ ಈಗಷ್ಟೇ ಪ್ರಸ್ತಾಪಿಸಿದ್ದಾರೆ. ಇದರ ಅಡಿ, ಕೆಲಸವನ್ನು ಮುಂದಕ್ಕೆ ಕೊಂಡೊಯ್ಯಲು ತರಬೇತಿಯಿಂದ ಹಿಡಿದು ಆಧುನಿಕ ಉಪಕರಣಗಳವರೆಗೆ ಪ್ರತಿ ಹಂತದಲ್ಲೂ ಸರ್ಕಾರವು ಹಣಕಾಸಿನ ನೆರವು ನೀಡುತ್ತಿದೆ. ಇದಕ್ಕಾಗಿ ಕೇಂದ್ರ ಸರ್ಕಾರ 13 ಸಾವಿರ ಕೋಟಿ ರೂ. ತೆಗೆದಿಟ್ಟಿದೆ. ಮಹಾರಾಷ್ಟ್ರದಲ್ಲಿ ಸ್ಥಾಪಿಸಲಿರುವ 500ಕ್ಕೂ ಹೆಚ್ಚು ಗ್ರಾಮೀಣ ಕೌಶಲ್ಯಾಭಿವೃದ್ಧಿ ಕೇಂದ್ರಗಳು ಪ್ರಧಾನ ಮಂತ್ರಿ ವಿಶ್ವಕರ್ಮ ಯೋಜನೆಯನ್ನು ಮುಂದಕ್ಕೆ ಕೊಂಡೊಯ್ಯಲಿವೆ. ಇದಕ್ಕಾಗಿ ನಾನು ಮಹಾರಾಷ್ಟ್ರ ಸರ್ಕಾರವನ್ನು ವಿಶೇಷವಾಗಿ ಅಭಿನಂದಿಸುತ್ತೇನೆ.
 
 ಸ್ನೇಹಿತರೆ,
 
ಕೌಶಲ್ಯ ಅಭಿವೃದ್ಧಿಯ ಈ ಪ್ರಯತ್ನಗಳ ನಡುವೆ, ಕೌಶಲ್ಯಗಳನ್ನು ಹೆಚ್ಚಿಸುವುದರಿಂದ ದೇಶವನ್ನು ಬಲಪಡಿಸುವ ಕ್ಷೇತ್ರಗಳ ಬಗ್ಗೆಯೂ ನಾವು ಯೋಚಿಸಬೇಕಾಗಿದೆ. ಉದಾಹರಣೆಗೆ, ಇಂದು ಉತ್ಪಾದನೆಯಲ್ಲಿ ದೇಶಕ್ಕೆ ಉತ್ತಮ ಗುಣಮಟ್ಟದ ಉತ್ಪನ್ನಗಳ ಅಗತ್ಯವಿದೆ. ಶೂನ್ಯ ದೋಷಗಳನ್ನು ಹೊಂದಿರುವ ಉತ್ಪನ್ನಗಳು. ಉದ್ಯಮ 4.0ಕ್ಕೆ  ಹೊಸ ಕೌಶಲ್ಯಗಳು ಬೇಕಾಗುತ್ತವೆ. ಸೇವಾ ವಲಯ, ಜ್ಞಾನ ಆರ್ಥಿಕತೆ ಮತ್ತು ಆಧುನಿಕ ತಂತ್ರಜ್ಞಾನವನ್ನು ಗಮನದಲ್ಲಿಟ್ಟುಕೊಂಡು ಸರ್ಕಾರಗಳು ಹೊಸ ಕೌಶಲ್ಯಗಳಿಗೆ ಒತ್ತು ನೀಡಬೇಕಾಗುತ್ತದೆ. ಯಾವ ರೀತಿಯ ಉತ್ಪನ್ನಗಳ ತಯಾರಿಕೆಯು ನಮ್ಮನ್ನು ಸ್ವಾವಲಂಬನೆಯತ್ತ ಕೊಂಡೊಯ್ಯುತ್ತದೆ ಎಂಬುದನ್ನು ನಾವು ಮನಗಾಣಬೇಕು. ಅಂತಹ ಉತ್ಪನ್ನಗಳನ್ನು ತಯಾರಿಸಲು ಅಗತ್ಯವಾದ ಕೌಶಲ್ಯಗಳನ್ನು ನಾವು ಉತ್ತೇಜಿಸಬೇಕು.
 
ಸ್ನೇಹಿತರೆ,
 
ಭಾರತದ ಕೃಷಿ ಕ್ಷೇತ್ರಕ್ಕೂ ಇಂದು ಹೊಸ ಕೌಶಲ್ಯಗಳ ಅವಶ್ಯಕತೆಯಿದೆ. ರಾಸಾಯನಿಕ ಕೃಷಿಯಿಂದ ನಮ್ಮ ಭೂಮಿಗೆ ಹಾನಿಯಾಗಿದೆ. ಭೂಮಿ ಉಳಿಸಲು ನೈಸರ್ಗಿಕ ಕೃಷಿ, ಸಾವಯವ ಕೃಷಿ ಅಗತ್ಯ. ಅದಕ್ಕಾಗಿ ಕೌಶಲ್ಯವೂ ಬೇಕು. ಕೃಷಿಯಲ್ಲಿ ನೀರಿನ ಸಮತೋಲಿತ ಬಳಕೆ ಖಚಿತಪಡಿಸಿಕೊಳ್ಳಲು ಹೊಸ ಕೌಶಲ್ಯಗಳನ್ನು ಸೇರಿಸುವುದು ಸಹ ಅಗತ್ಯವಾಗಿದೆ. ಕೃಷಿ ಉತ್ಪನ್ನಗಳನ್ನು ಸಂಸ್ಕರಿಸಲು, ಅದಕ್ಕೆ ಮೌಲ್ಯ ಸೇರಿಸಲು, ಪ್ಯಾಕೇಜಿಂಗ್ ಮಾಡಲು, ಬ್ರ್ಯಾಂಡ್ ಮಾಡಲು ಮತ್ತು ಆನ್‌ಲೈನ್ ಜಗತ್ತನ್ನು ತಲುಪಲು ನಮಗೆ ಹೊಸ ಕೌಶಲ್ಯಗಳು ಬೇಕಾಗುತ್ತವೆ. ಆದ್ದರಿಂದ, ದೇಶದ ವಿವಿಧ ಸರ್ಕಾರಗಳು ತಮ್ಮ ಕೌಶಲ್ಯ ಅಭಿವೃದ್ಧಿಯ ವ್ಯಾಪ್ತಿಯನ್ನು ಇನ್ನಷ್ಟು ವಿಸ್ತರಿಸಬೇಕಾಗುತ್ತದೆ. ಕೌಶಲ್ಯ ಅಭಿವೃದ್ಧಿಗೆ ಸಂಬಂಧಿಸಿದ ಈ ಅರಿವು 'ಆಜಾದಿ ಕಾ ಅಮೃತಕಾಲ'ದಲ್ಲಿ ಅಭಿವೃದ್ಧಿ ಹೊಂದಿದ ಭಾರತ ನಿರ್ಮಿಸುವಲ್ಲಿ ದೊಡ್ಡ ಪಾತ್ರ ವಹಿಸುತ್ತದೆ ಎಂಬ ವಿಶ್ವಾಸ ನನಗಿದೆ.
 
ನಾನು ಮತ್ತೊಮ್ಮೆ ಶಿಂಧೆ ಜಿ ಮತ್ತು ಅವರ ಇಡೀ ತಂಡವನ್ನು ಅಭಿನಂದಿಸುತ್ತೇನೆ, ಅವರಿಗೆ ಶುಭ ಹಾರೈಸುತ್ತೇನೆ. ಕೌಶಲ್ಯದ ಹಾದಿಯಲ್ಲಿ ತಮ್ಮ ಪ್ರಯಾಣವನ್ನು ಪ್ರಾರಂಭಿಸಿದ ಯುವ ಪುತ್ರರು ಮತ್ತು ಹೆಣ್ಣು ಮಕ್ಕಳು ಅದರ ಬಗ್ಗೆ ಯೋಚಿಸುತ್ತಿದ್ದಾರೆ, ಪ್ರಾರಂಭಿಸಲು ಬಯಸುತ್ತಾರೆ, ಅವರು ಸರಿಯಾದ ಮಾರ್ಗ ಆರಿಸಿಕೊಂಡಿದ್ದಾರೆ ಎಂದು ನಾನು ನಂಬುತ್ತೇನೆ. ಅವರು ಕೌಶಲ್ಯಗಳ ಮೂಲಕ, ಸಾಮರ್ಥ್ಯಗಳ ಮೂಲಕ, ಅವರು ತಮ್ಮ ಕುಟುಂಬಗಳಿಗೆ ಮತ್ತು ದೇಶಕ್ಕೆ ಬಹಳಷ್ಟನ್ನು ನೀಡಬಹುದು. ಈ ಎಲ್ಲಾ ಯುವ ಪುತ್ರರು ಮತ್ತು ಪುತ್ರಿಯರಿಗೆ ನಾನು ವಿಶೇಷವಾಗಿ ನನ್ನ ಶುಭಾಶಯಗಳನ್ನು ತಿಳಿಸುತ್ತೇನೆ.
 
ಒಂದು ಅನುಭವವನ್ನು ನಿಮ್ಮೊಂದಿಗೆ ಹಂಚಿಕೊಳ್ಳಲು ಬಯಸುತ್ತೇನೆ. ಒಮ್ಮೆ ನಾನು ಸಿಂಗಾಪುರಕ್ಕೆ ಹೋಗಿದ್ದೆ, ಅಲ್ಲಿ ಸಿಂಗಾಪುರದ ಪ್ರಧಾನಿಯೊಂದಿಗೆ ಕಾರ್ಯಕ್ರಮ ಇತ್ತು. ನಾನು ಬಿಗಿಯಾದ ವೇಳಾಪಟ್ಟಿ ಹೊಂದಿದ್ದೆ. ನಾನು ಬಹಳಷ್ಟು ಕಾರ್ಯಕ್ರಮಗಳಲ್ಲಿ ಭಾಗವಹಿಸುವುದು ಇತ್ತು. ಆದರೆ ಹೇಗಾದರೂ ಅವರಿಗಾಗಿ ಸ್ವಲ್ಪ ಸಮಯ ಮೀಸಲಿಡಬೇಕು ಎಂದು ಒತ್ತಾಯಿಸಿದರು. ಸಿಂಗಾಪುರ ಪ್ರಧಾನಿ ಅವರ ಕೋರಿಕೆ ಇದ್ದ ಕಾರಣ ಕೆಲವು ಹೊಂದಾಣಿಕೆ ಮಾಡಿಕೊಳ್ಳಲು ಒಪ್ಪಿಕೊಂಡೆ. ನಾನು ಮತ್ತು ನಮ್ಮ ತಂಡ ಕೆಲವು ಹೊಂದಾಣಿಕೆಗಳನ್ನು ಮಾಡಿಕೊಂಡೆವು. ಸಮಯ ಮೀಸಲಿಡುವಂತೆ ಅವರು ನನ್ನನ್ನು ಏಕೆ ಕೇಳಿದರು ಎಂಬುದೇ ನನ್ನ ಪ್ರಶ್ನೆಯಾಗಿತ್ತು. ಸಿಂಗಾಪುರದಲ್ಲಿರುವ ಸ್ಕಿಲ್ ಡೆವಲಪ್‌ಮೆಂಟ್ ಸೆಂಟರ್ ಅನ್ನು ನನಗೆ ತೋರಿಸಬೇಕೆಂದು ಅವರು ಬಯಸಿದ್ದರು, ಅದು ಇಲ್ಲಿ ನಾವು ಹೊಂದಿರುವ ಐಟಿಐಗೆ ಸಮನಾಗಿದೆ. ಅವರು ಅದನ್ನು ನನಗೆ ತುಂಬಾ ಹೆಮ್ಮೆಯಿಂದ ತೋರಿಸುತ್ತಿದ್ದರು. ತುಂಬ ಪ್ರೀತಿಯಿಂದ ಕಟ್ಟಿದ್ದೇನೆ ಎಂದು ಹೇಳುತ್ತಿದ್ದರು. ಈ ರೀತಿಯ ಸಂಸ್ಥೆಗೆ ಸೇರಲು ಜನರು ಸಾಮಾಜಿಕವಾಗಿ ಗೌರವವಿಲ್ಲದ ಕಾಲ ಒಂದಿತ್ತು. ಜನರಿಗೆ ನಾಚಿಕೆ ಆಗುತ್ತಿತ್ತು. ಮಗು ಕಾಲೇಜಿಗೆ ಹೋಗದೆ, ಬದಲಾಗಿ ಈ ಸಂಸ್ಥೆಯಲ್ಲಿದ್ದ ಕಾರಣ ಪೋಷಕರಿಗೆ ನಾಚಿಕೆ, ಹಿಂಜರಿಕೆ ಆಗುತ್ತಿತ್ತು. ನಂತರ ಅವರು ಹೇಳಿದರು, ಈ ಕೌಶಲ್ಯ ಕೇಂದ್ರವನ್ನು ಅಭಿವೃದ್ಧಿಪಡಿಸಿದ ಕಾರಣ, ಪ್ರಭಾವಿ ಕುಟುಂಬಗಳ ಜನರು ಸಹ ಕೌಶಲ್ಯ ಅಭಿವೃದ್ಧಿಗಾಗಿ ತಮ್ಮ ಮಕ್ಕಳನ್ನು ಇಲ್ಲಿ ಪ್ರವೇಶ ಪಡೆಯಲು ಶಿಫಾರಸು ಮಾಡಲು ನನ್ನನ್ನು ಕೇಳುತ್ತಿದ್ದಾರೆ. ವಾಸ್ತವವಾಗಿ, ಅವರು ಅದರ ಬಗ್ಗೆ ವಿಶೇಷ ಗಮನ ಹರಿಸಿದ್ದರ ಪರಿಣಾಮ, ಅದರ ಖ್ಯಾತಿ ಹೆಚ್ಚಾಗಿದೆ. ಹಾಗಾಗಿ, ನಮ್ಮ ದೇಶದಲ್ಲೂ ನಮ್ಮ ನುರಿತ ಮಾನವಶಕ್ತಿ ‘ಶ್ರಮೇವ ಜಯತೇ’ ಎಂಬ ದುಡಿಮೆಯ ಕೀರ್ತಿ ಹೆಚ್ಚಿಸುವುದು ನಮ್ಮ ಸಮಾಜದ ಕರ್ತವ್ಯವಾಗಿದೆ.
 
ಮತ್ತೊಮ್ಮೆ, ನಾನು ಈ ಎಲ್ಲಾ ಯುವಕರನ್ನು ಹೃತ್ಪೂರ್ವಕವಾಗಿ ಅಭಿನಂದಿಸುತ್ತೇನೆ, ಅವರಿಗೆ ಶುಭ ಹಾರೈಸುತ್ತೇನೆ. ಈ ಲಕ್ಷಗಟ್ಟಲೆ ಜನರ ಮಧ್ಯೆ ನಿಮ್ಮ ಕಾರ್ಯಕ್ರಮಕ್ಕೆ ಬರಲು ನನಗೆ ಅವಕಾಶ ಸಿಕ್ಕಿದ್ದರಿಂದ ಮಂಗಲ್ ಪ್ರಭಾತ್ ಜಿ ಮತ್ತು ಶಿಂಧೆ ಜೀ ಅವರ ಇಡೀ ತಂಡಕ್ಕೆ ನಾನು ಹೃತ್ಪೂರ್ವಕವಾಗಿ ಧನ್ಯವಾದ ಹೇಳುತ್ತೇನೆ. ನಾನು ಎಲ್ಲೆಡೆ ಯುವಕರನ್ನು ಮಾತ್ರ ನೋಡುತ್ತೇನೆ. ಆ ಎಲ್ಲ ಯುವಕರನ್ನು ಭೇಟಿ ಮಾಡಲು ನನಗೆ ಅವಕಾಶ ನೀಡಿದ್ದಕ್ಕಾಗಿ ಧನ್ಯವಾದಗಳು.
 
ನಮಸ್ಕಾರ!
 
ಹಕ್ಕು ನಿರಾಕರಣೆ: ಪ್ರಧಾನ ಮಂತ್ರಿ ಅವರ ಭಾಷಣದ ಅಂದಾಜು ಇಂಗ್ಲೀಷ್ ಅನುವಾದದ ಕನ್ನಡ ರೂಪಾಂತರ ಇದಾಗಿದೆ. ಅವರು ಮೂಲತಃ ಹಿಂದಿ ಭಾಷೆಯಲ್ಲಿ ಭಾಷಣ ಮಾಡಿದ್ದಾರೆ.

****