U Myntri Rangbah duh, u Narendra Modi un plie ia ka bynta ba kongsan jong ka Delhi-Ghaziabad-Meerut RRTS Corridor ha Sahibabad RapidX Station, Uttar Pradesh ha ka 20 tarik Risaw 2023 ha ka por kumba 11:15 mynstep. Un pyllait ruh ia ka rel RapidX kaba pyniasoh ia ka Sahibabad sha Duhai Depot, kaba long ka dak jong ka jingplie ia ka Regional Rapid Transit System (RRTS) ha India. Ha ka por kumba 12 baje mynsngi, u Myntri Rangbah duh un pyniaid ia ka jingialang paidbah ha Sahibabad ha kaba un ai jingkren ha ka jingialang plie ia ka RRTS ha ka ri. Shuh shuh, un aiti ruh sha ka ri ia ki artylli ki bynta jong ka east west corridor jong ka Bengaluru Metro.

Ka Delhi-Ghaziabad-Meerut RRTS Corridor

Ka bynta ba kongsan kaba 17 km jong ka Delhi-Ghaziabad-Meerut RRTS Corridor ia kaba yn pyllait paidbah, kan pyniasoh ia ka Sahibabad sha ka ‘Duhai Depot’ ha kaba yn don ki steshon ha Ghaziabad, Guldhar bad Duhai ha kane ka lynti. Ia u maw nongrim jong ka Delhi-Ghaziabad-Meerut corridor la buh da u Myntri Rangbah Duh ha ka 8 tarik u Lber 2019.

Katkum ka jingthmu jong u Myntri Rangbah Duh ban pynkylla ia ki lad ka leit ka wan ha ki thain jong ka ri lyngba ka jingtei ia ki jingdon jingem katkum ka juk mynta, la tei ia ka Regional Rapid Transit System (RRTS) project. Ka RRTS ka dei ka lad ka leit ka wan kaba don nongrim ha ki rel kaba sted bad kaba bun ki jingleit jingwan. Ha ka jingstet kaba 180 kmph, ka RRTS ka dei kaba wanrah ia ka jingkylla na ka bynta ka roi ka par ia kaba la saindur ban pynbiang ia ki rel kiba stet hapdeng ki nongbah man ka 15 minit ha kaba lah ban pyniaid ruh ia ki man ka 5 minit katkum ka jingdonkam.

La ithuh phra tylli ki RRTS corridor ban tei ha ka NCR, na kine, la peit shuwa ia lai tylli ban pyntreikam ha ka bynta kaba nyngkong ba kynthup ka Delhi – Ghaziabad – Meerut Corridor; Delhi – Gurugram – SNB – Alwar Corridor bad Delhi – Panipat Corridor. Ka Delhi-Ghaziabad-Meerut RRTS ka dei kaba dang tei ha ka jinglut jingsep kaba kot sha ka T 30,000 klur bad kan pyniasoh ia ka Delhi bad ka Meerut hapoh shi kynta ka por kaba lut ha ka leit ka wan lyngba ki jaka sor jong ka Ghaziabad, Muradnagar bad Modinagar.

Ka RRTS kaba dang tei ha ka ri ka dei ka lad ka leit ka wan kaba katkum ka juk mynta bad ka iaryngkat kyrdan ruh bad ki lad ha kiwei kiwei ki ri. Kan pynbiang ka lad ka leit ka wan kaba shngain, kaba ryntih bad kaba stet hapdeng ki nongbah jong ka ri. Katkum ka PM GatiShakti National Master Plan, ka rynsan RRTS kan iasoh bad ki steshon rel, ki steshon metro bad ki jingshakri lyngba ki bus bad kiwei kiwei. Kine ki lad na ka bynta ka leit ka wan kin kyntiew ia ki kam ka ioh ka kot ha ka thain, kan plie lad ha ka ioh kam ioh jam, ka pule puthi & ki lad ai jingsumar; bad iarap pynduna ka jingpynjakhlia ka lyer.

Bengaluru Metro

Kine ki ar bynta ka metro ban aiti sha ka ri da u Myntri Rangbah Duh ki pyniasoh ia ka Baiyappanahalli bad ka Krishnarajapura bad ka Kengeri bad ka Challaghatta. Kine ki ar bynta jong ka metro ki dei kiba la pyntreikam naduh ka 9 tarik u Nailur 2023 ban pynsuk ia ki briew kiba leit ba wan lyngba kane ka lynti, khlem da ap ia ka jingplie paidbah.

***