Ka President jong ka India, ka Droupadi Murmu ka la sam ia ki khusnam National Film Award mynta ka sngi na ka bynta u snem 2021 hapoh ki thup bapher bapher ha ka bynta kaba 69 jong kane ka jingsam khusnam ha New Delhi. La ai ia ka Dada Saheb Phalke Award sha ka Waheeda Rehman ha kane ka sngi. U Myntri Sorkar Pdeng ba dei khmih ia ka tnat Information & Broadcasting (I&B), u Anurag Singh Thakur, u Myntri Khynnah ka tnat I&B, u Dr. L. Murugan, u Secretary, ka tnat I&B, u Apurva Chandra, ki Chairperson jong ka kynhun nongbishar bad kiwei kiwei ki kynrem ki lyndan ki la don lang ha kane ka sngi.

Ka President, Droupadi Murmu ka la ai khublei ia ka Waheeda Rehman bad ka la ong ba ka la pynskhem ialade ha ka kam shna phlim lyngba ka jingtbit bad ka jinglong jong ka. Wat ha ka jingim shimet, ka la pyni ba ka dei ka briew kaba don burom, kaba ngeit ha la ka jong ka jingtbit bad kaba saindur dalade. Ka la jied shibun ki phlim ha kaba ka la pynkylla ia ki rukom pyrkhat shaphang ki longkmie. Ka Waheeda ka la pyni nuksa ba ki longkmie ki dei ban shim hi ia ki sienjam na ka bynta ka jingpynkupbor ia ki longkmie.

Ha ka jingkren shaphang ki khusnam National Film Award, ka President ka la ong ba kane ka jingsam khusnam ka la pyni ia ka jingiar jong ka India bad ka jingtylli kaba don hapoh ka ri. Ka la ong ba ki briew ba don sap kiba iadon lang ha kane ka jaka ki la pyni ia ki ktien bapher bapher, ki jinglong jong ki thain, ki jingngeit ha ka imlang sahlang, ki jingjop bad ki jingeh bad ka la ong ruh ba ki briew ha ka rta bad ka kyrdan bapher bapher ki iawan lang ban iadon bynta ha ka jingsam khusnam National Film Award.

Ka President ka la ong ba ki barikor bad ki nongshna phlim ki dei kiba wanrah ia ka jingkylla. Lyngba ki phlim jong ki, ki pyni ia ka jingiar jong ka imlang sahlang ha India. Ka la ong ruh ba ka kam pynmih phlim ka batai shaphang ka imlang sahlang jong ngi bad ka long ruh ka lad ban kyntiew ia kane ka imlang sahlang. Ka kam jong ki ka pyniasoh ia ki briew, ka la ong.

Ka Murmu ka la ong ba ka ngeit skhem ba ha ka ri kaba bun ki briew kiba tbit, ki briew kiba don kti ha ka jingpynmih phlim kin dang bteng ban pyni lynti sha ka jingtbit bad tei ia ka India kaba la kiew shaphrang.

U Myntri Sorkar Pdeng, u Anurag Thakur u la ong ba u dap da ka jingsngew sarong haba u peit ia ka kam pynmih phlim ha India da kaba bynrap ba mynta ki por, kam don kano kano ka prokram kaba sahkut tang ha ka thain. U la ong ba lada ka prokram ka dei kaba itynnad, ki briew na kylleng ka pyrthei kin iohi ia ka. Ha ka jingkren shaphang ka Waheeda Rehman, u Thakur u la ong ba ki phlim ka India kim sahkut tang ha ka ri, da kaba bynrap ba kane ka iadei ruh bad ka jingpawnam jong ka Rehman. U la ai khublei ia ka na ka bynta ka jingioh ia ka khusnam Dadasaheb Phalke Award.

U Myntri u la ong ba ka Sorkar ka iadon lang bad ki nongpynmih phlim ban ialeh pyrshah ia ka jingtuh bad ka jingpynmih beain ia ki prokram bad ba ka Sorkar ka la wanrah ia ka Cinematograph Act kaba long ka sienjam kaba heh ban ialeh pyrshah ia kane ka jingsniew. Ha kajuh ka por, u Myntri u la kren shaphang ka lad jong ki kam AVGC ha India bad u la ong ba shen ka Sorkar kan sa wanrah ia ka polisi halor kane bad ba kane kan sa pynurlong ia ka thong jong ka India ban long ka tyllong jong ka jingpynmih prokram ha kylleng ka pyrthei.

Da kaba pyntip ba ka jingsam khusnam ka dei na ka bynta u snem 2021, u Secretary, Apurva Chandra u la ong ba kane ka dei ka snem jong ka khlam COVID 19 ha kaba la khang ia ki jaka pyni cinema bad u snem ha kaba ka kam pynmih prokram ka la kynduh jingeh. Hynrei, ngi la lah ban bteng biang ia ki kam bad mynta ki kam pynmih prokram ki la poi biang ha ka lynti jong ka jingkiew shaphrang. U la pyntip ruh ba kine ki lai bnai ba la dep ki long kiba seisoh bha ia ki kam pynmih phlim ha India. U la ong ba watla ka jingiaid iew ki phlim ka long kaba donkam, kane ka jingsam khusnam ka dei kaba ithuh ia ka jingbha jong ki phlim. U Chandra u la ai jingsngewnguh ia ka Waheeda Rehman kaba la pdiang ia ka khusnam Dadasaheb Phalke Award.

Ia ka thup jong baroh ki khusnam ba la ai lah ban ioh ha kane ka link harum

https://pib.gov.in/PressReleasePage.aspx?PRID=1951758

*********