Ka Tnat Housing and Urban Affairs (MoHUA) jong ka Sorkar India kan pynlong ia ka India Smart Cities Conclave 2023 ha ka Brilliant Convention Centre ha Indore, Madhya Pradesh ha ka 26-27 tarik u Nailur 2023. Ha kane ka Conclave yn wan iashim bynta da 100 tylli ki smart city kiba ialam lynti ha ka jingkylla kaba khraw ha ka jingtei ia ki nongbah lyngba ki jingsaindur thymmai. Kane ka prokram kan ai ka rynsan ia ki nongbah ba kin pyni ia ki kam ba ki la leh hapoh ka Mission ban pynskhem ia ka rukom treikam na ka bynta ki jingkylla ha ka ri na ka bynta ka lawei.

Ka President, ka DroupadiMurmu kan pynkup burom ia ki nongjop ha kane ka bynta kaba saw jong ka India Smart Cities Award Contest (ISAC) 2022 ha ka 27 tarik u Nailur 2023. Ka ISAC ka dei kaba pynlong hapoh ka Smart Cities Mission hapoh ka tnat Housing and Urban Affairs jong ka Sorkar India naduh u snem 2018. Kane ka dei kawei na ki kam ba kongsan ba la sdang hapoh ka Mission, ha kaba ki rukom treikam ba plie lad, ki projek bad ki jingthmu ki dei kiba ioh jingithuh lyngba ka jingpynkup burom namar ka rukom treikam kaba bha, kaba plie lad ia kiwei kiwei ba kin ioh jingnang jingstad bad ruh ban pynsaphriang ia ki rukom treikam ba biang tam.

Ka Conclave kan don ruh ka jingiashim bynta jong ki kynrem ki lyndan kiba kynthup ia u Mangubhai C. Patel, Lat ka jylla Madhya Pradesh, u Hardeep Singh Puri, Myntri ka tnat Housing & Urban Affairs, u Shivraj Singh Chouhan, Myntri Rangbah ka jylla Madhya Pradesh, u Bhupendra Yadav Myntri Sorkar Pdeng ba dei khmih ia ki tnat Labour and Employment, Environment, Forest and Climate Change, u AshwiniVaishnaw Myntri Sorkar Pdeng ba dei khmih ia ki tnat Information Technology, Communications, Railways, u Kaushal Kishore, Myntri Khynnah ka tnat Housing & Urban Affairs bad u Bhupendra Singh, Myntri Sorkar Madhya Pradesh ba dei khmih ia ka tnat Urban Development.

Ha ryngkat ki ophisar na ka tnat Madhya Pradesh, ki Mayor bad ki Commissioner jong baroh 100 tylli ki smart city, ki nongiatreilang ha ki kam bad ki nongmihkhmat na ka imlang sahlang kiba iadei bad ka Smart Cities Mission kin wan iashim bynta lang.

Kane ka prokram kan dei kaba ar sngi: 26 bad 27 tarik u Nailur 2023. Ia ki jingtip ba bniah shaphang ka prokram la ai ha ka Annexure A. Ka Sngi ba Nyngkong jong ka conclave kan don ruh ka jingplie ia ka Exhibition kaba pyni ia ki projek kiba jop hapoh ka ISAC 2022 bad ki nongbah, ki jingiakren bad ki Chief Executive Officer (CEO) jong ki smart city bad ka jingleit peit ia ki jaka pyntrei ia ki projek hapoh ka Smart Cities Mission ha Indore bad Ujjain.

Ka Sngi ba Ar ka dei ka ban peit bniah ia ka jingsam ia ki khusnam ISAC 2022 da ka kongsan ha kaba 5 tylli ki Jylla/UT bad 31 tylli ki nongbah ba kyrpang bad 7 tylli ki kynhun ba iatreilang kin ioh ia ki khusnam. Ki don 66 ngut ki nongjop ia ki khusnam ISAC bad ia ki jingtip ba bniah shaphane kine la ai ha ka Annexure B. Shuh shuh, ka Smart Cities Mission kan pyllait saw tylli ki kaiphod kiba long ka ISAC 2022 award compendium, Report by UN Habitat: Smart Cities Mission – Localizing Sustainable Development Goals, Compendium of Newsletters of SCM and ISAC 2023 award pamphlet ha kane ka conclave. Hadien kane baroh, ki Chief Executive Officer (CEO) jong ki nongbah kiba jop khusnam kin batai ia ki jingshem jong ki. Yn pynkut ia ka sngi da ka prokram pyni ia ka deiriti.

KATTO KATNE SHAPHANG KA SMART CITIES MISSION

Ia ka Smart Cities Mission la sdang ha ka 25 tarik u Jylliew 2015, da ka jingthmu ban pynbiang ia ki jingdon jingem, ka jinglong jingman kaba khuid bad ka rukom im kaba biang na ka bynta ki nongshong shnong lyngba ka jingpyntreikam ia ki ‘smart solution’. Ka dei ka mission na ka bynta ka jingkylla kaba thmu ban don ka jingkylla kaba khraw ha ka rukom tei ia ki nongbah ha ka ri. Haduh mynta palat 6,000 tylli ki projek kiba kot palat T 1.1 lak klur ki dei kiba la pyndep bad ia ki projek ba dang sah yn pyndep shuwa ka 30 tarik u Jylliew 2024.

U mawmer ba kongsan ba la kot ha kane ka Mission ka dei ki Integrated Command and Control Center (ICCC) kiba treikam ha baroh 100 tylli ki Smart City. Kine ki ICCC ki long kum ki jaka pdeng jong ki kam ha ki nongbah ha kaba la pyndonkam ia ka teknoloji ban pyniaid ia ki kam. Ki jingshakri ha ki nongbah ki la kiew bha ha ki kam bapher bapher kum ka jingbuddien ia ki kam beain, ka jingshngain jong ki nongshong shnong, ka jingpyniaid ia ki lad ka leit ka wan, ka jingpynkhuid ia ki jaboh, ka jingpynbiang ia ka um bad ka jingpeit ia ki jinglynshop ka mariang ha ryngkat kiwei kiwei ki kam.

100 tylli ki Smart City ki la pyntreikam ia ki projek bapher bapher kiba iadei bad ka leit ka wan, ka bording, ka um, ka jingkhuid, ki jaka paidbah kiba itynnad, ki jingdon jingem ha ka imlang sahlang, ki jingshakri ka Sorkar bad kiwei kiwei. Kum ban shu kdew, ha ki kam kiba iadei bad ka leit ka wan, 1,192 tylli ki projek kiba kot sha ka T 24,265 klur ki dei kiba la pyndep bad sa 494 project kiba kot sha ka T 16,905 klur ki dei kiba dang iaid shakhmat mynta. Ha kaba iadei bad ka bording, 573 tylli ki projek ki dei kiba la pyndep bad 94 tylli ki dei kiba dang iaid shakhmat. Ha kaba iadei bad ka Water Supply, Sanitation and Hygiene (WASH) la pyndep palat 1,162 tylli ki projek kiba kot sha ka T 34,751 klur bad sa 333 tylli ki projek kiba kot sha ka T 18,716 klur ki dang iaid shakhmat. 100 tylli ki smart city ki la tei palat 1,063 tylli ki jaka paidbah kiba kot sha ka T 6,403 klur bad sa 260 tylli ki projek kiba kot sha ka T 5,470 klur ki dei kiba dang iaid shakhmat. Shuh shuh, 180 tylli ki projek kiba pyntreikam ha ka rukom  Public Private Partnership (PPP) kiba kot sha ka T 8,228 klur ki dei kiba la pyndep bad sa 27 tylli ki dei kiba dang iaid shakhmat. La pyndep 652 tylli ki projek kiba iadei ba ki jingdon jingem ha ka ioh ka kot kum ka jingpynbha ia ki jaka shong iew bad ki start-up incubation center bad sa 267 tylli ki projek ki dei kiba dang iaid shakhmat. Ha kaba iadei bad ki jingdon jingem ha ka imlang sahlang (ka koit ka khiah, ka pule puthi, ki iing sah briew bad kiwei kiwei), la pyndep 679 tylli ki projek katba 153 tylli ki dei kiba dang iaid shakhmat.

KATTO KATNE SHAPHANG KI KHUSNAM ISAC

Ha ki por ba la dep, la pynlong lai bynta ka ISAC ha u snem 2018, 2019 bad 2020. Ka ISAC ka ai jingithuh ia ki nongbah, ki projek bad ki jingsaindur thymmai kiba kyntiew ia ka roi ka par kaba iaineh ha 100 tylli ki smart city, bad kiba kyntiew ruh ia ki nongbah kiba pdiang ia baroh, kiba ryntih, kiba shngain bad kiba koit ba khiah kiba kyntiew ia ka rukom im jong baroh. Ia ka bynta kaba saw jong ka ISAC la plie paidbah ha u Iaiong 2022 ha ka prokram ‘Smart Cities-Smart Urbanization’ ha Surat. Ka jingai khusnam ISAC 2022 ka la don ka jingai kyrteng kaba ar bynta kaba kynthup ia ka bynta ‘Qualifying’, ha kaba la peit ia ka rukom treikam ka nongbah, bad ka bynta ‘Proposal’ ha kaba ki smart city ki la ai jingmut jong ki na ka bynta ki hynriew tylli ki thup khusnam kiba kynthup:

• Project Awards: 10 tylli ki phang,
• Innovation Awards: 2 tylli ki phang,
• City Awards: 2 tylli ki phang: National bad Zonal
• State Awards,
• UT Award, bad
• Partners Awards, 3 tylli ki phang

La ioh 845 tylli ki jingai jingmut na ka bynta ka ISAC 2022 na 80 tylli ki smart city kiba la ioh ban iashim bynta. Ia kine la peit ha ki san tylli ki bynta. Ha ka bynta kaba nyngkong, la leh ia ka pre-screening jong ki 845 tylli ki jingai jingmut . 50% (423 tylli ki jingai jingmut) ki la poi sha ka bynta kaba ar. Ha ka bynta kaba ar, na ka bynta man ki thup, la jied ia 12 tylli ki jingai jingmut kiba biang tam da ka kynhun ki nongbishar na ka National Institute of Urban Affairs (NIUA). Ha ka bynta kaba lai, kito kiba la shah jied ki la ai jingbatai ia ka kynhun ki nongbishar bad la jied ia hynriew tylli kiba biang tam. Ha kaba khatduh, ha ka bynta kaba saw, la ai jingbatai da ki hynriew tylli kiba shah jied hakhmat ka thup ki nongbishar ba longkhlieh da ki director ka tnat kaba kynthup ruh ia ki riewshemphang kiba iadei bad kine ki kam. Hadien ka bynta kaba saw, la jied ia lai tylli ki jingai jingmut kiba biang tam ha man ka thup da ka Apex Committee of Smart Cities Mission. Na baroh 845 tylli ki jingai jingmut ba la ioh ha ki san tylli ki thup jong ki khusnam, la jied ia 66 ngut ki nongjop -  35 tylli ha ka Project Award, 6 tylli ha ka Innovation Award, 13 tylli ha ka National/Zonal City Award, 5 tylli ha ka State/UT Award bad 7 tylli ha ka Partner Award. Ia ka thup jong ki 66 tylli ki nongjop lah ban ioh ha ka Annexure B.