Ka Swachh Bharat Mission ka dei ruh ka dak jong ka jingngeit ‘Antyodaya Se Sarvodaya’. Ka la peit kham bniah ia ki bynta kiba shem jingeh ha ki nongbah bad ka la trei shitom ban kyntiew bad pynkup bor ia ki baduk basuk ha ki jaka sor, la ong u Hardeep Singh Puri, Myntri Sorkar Pdeng ba dei khmih ia ki tnat Housing & Urban Affairs bad Petroleum & Natural Gas mynta ka sngi. U la ong ia kane ha ka jingplie paidbah ia ka Swachhata Hi Seva – 2023.

Hashuwa ka Swachh Bharat Diwas, ki 14 sngi ka Swachhata Hi Seva (SHS) kaba long man u snem ka dei kaba pynlong lang da ka Swachh Bharat Mission-Urban bad Grameen hapdeng ka 15 tarik u Nailur bad ka 2 tarik u Risaw ‘23. Ha kine ki 14 sngi la thmu ban wanrah ia ka jingiatreilang jong ki klur ngut ki briew jong ka ri lyngba ki prokram bapher bapher kum ka Indian Swachhata League 2.0, SafaiMitra Suraksha Shivir bad ki prokram pynkhuid shnong.

Ka SHS-2023 ka dei kaba la plie paidbah da u Myntri ba dei khmih ia ka tnat Jal Shakti u Gajendra Singh Shekhawat, U Myntri ba dei khmih ia ka tnat Housing & Urban Affairs, u Hardeep Singh Puri bad u Myntri ba dei khmih ia ka tnat Rural Development & Panchayati Raj, u Giriraj Singh ha ka jingiadon lang u Kaushal Kishore, Myntri Khynnah ka tnat Housing & Urban Affairs, ka Vini Mahajan, Secretary, tnat Drinking Water and Sanitation bad u Manoj Joshi, Secretary ka tnat Housing & Urban Affairs lyngba ki lad digital.

Ha kane ka prokram, ki ophisar na ki nongbah Leh, Ladakh; Pimpri, Maharashtra; Meerut, Uttar Pradesh; Lakhimpur, Assam ki la iasam ia ki rukom treikam ba biang tam kiba iadei bad ki kam ka jingkhuid ha ki nongbah jong ki.

La pyllait ruh ia ka video shaphang ka SHS- 2023 ha kane ka sngi, ha ryngkat ka logo, website bad portal jong ka SHS- 2023. La pyllait paidbah ruh ia ki ‘Indian Swachhata League (ISL) 2.0’, ‘Safaimitra Suraksha Shivir’ Logo bad ‘Citizens’ Portal’ ha kane ka sngi.

Ha ka jingkren shaphang ka SBM bad ka jingplie paidbah ia ka SHS 2023, u Hardeep Singh Puri u la ong ba kane ka jingdap khyndai snem ka ban wan jong ka Swachh Bharat Mission bad ka jingsdang ia ka ‘Swachhata hi Seva’ 2023 ka dei ka por jong ka jingrakhe. Ka dei ruh ka por ban pynskhem biang ialade ha ka thong ban pynthikna ba ki nongbah jong ngi ki long kiba khuid. Da ka jingsdang jong kine ki 14 sngi ka Swachhata hi Seva, ngi pynskhem biang ialade ha ka thong Swachhata, la ong u Myntri.

U Puri u la ong ruh ba ha ka por ba u Myntri Rangbah Duh u la pynbna ia ka Swachh Bharat Mission na Red Fort ha ka 15 tarik u Nailar 2014, ym shym la don ba mutdur ba kan wan ka jingkylla kaba heh haduh katne katne. Watla ka India ka sahdien bha ha ki kam kiba iadei bad ka jingkhuid ha kito ki por, ka ri ka la kot sha ka thong ODF ha ki san snem ba bud. Baroh 4,884 tylli ki ULB (100%) ha India mynta ki la ioh ia ka jingithuh Open Defecation Free (ODF).

Ha ka jingkren shaphang ki jingkylla ba la wan lyngba ka SBM, u Puri u la ong ba da kaba shna 73.62 lak tylli ki painkhana (67. 1 lak tylli ki painkhana na ka bynta ki iing bad 6.52 lak tylli ki painkhana paidbah), ngi la wanrah ka burom bad ka koit ka khiah ia ki million ngut ki briew kiba duk ha ki jaka sor. 95% ki ward ha India ki don 100% ka jingwan lum ia ki niut. Palat 88% ki ward ki don ka jingiaphiah ia ki jait nuit na ki jaka ba lum. Kane ka la jia namar ka Swachh Bharat Mission ka la kylla sha ka ‘Jan Andolan’ bad kam dei tang ka prokram Sorkar, u la ong.

U Hardeep Singh Puri u la ban jur ba ka jingkhuid lane ka Swachhata ka la dei ka nongrim jong baroh ki skhim Sorkar bad ka la long ruh ka rukom im jong ki briew.

Ha ka jingkren shaphang ki jingjop jong ka SBM haduh mynta, u Myntri u la ong ba la dep shan 12 klur ki painkhana ha kine ki khyndai snem ba la dep, kaba la pyllait ia ka ri na ka jingsniew jong ka jingleit shabar pathar. Ka jingpynkhuid ia ki jaboh kaba duna bha ha ka por ba sdang ia ka mission mynta ka long 76% bad shen ngin kot sha ka 100%, u la bynrap.

U la ong ruh ba ka bynta sor jong ka mission ka dei kaba la bteng haduh u snem 2026 lyngba ka Swachh Bharat Mission – Urban 2.0 (SBM-U 2.0). Ka thmu ban pynlong ba baroh ki nongbah jong ngi ki lait na ki niut ki nier.

Ha ka jingpynkut ia ka jingai jingkren jong u, u Myntri u la ong ba u kyrmen ba man ki nongbah, shnong, ward bad ki dong ki bam smai ban noh synniang ka bor met jong ki na ka bynta ka Swachhata. U la kyntu ia ki briew ba kin bam smai ban pynthikna ba ki nongbah jong ngi ki lait na ki niut ki nier bad ka Swachhata kaba pura kan urlong.

Shaphang ka ‘Swachhata Hi Seva’:

Ha shuwa ka Swachh Bharat Diwas ha ka 2 tarik u Risaw, 2023, ka sngi ba ka ri ka rakhe ia ka lyngkhuh sngi kha jong u Mahatma Gandhi, ka tnat Housing and Urban Affairs (MoHUA) bad ka tnat Drinking Water and Sanitation, tnat Jal Shakti ki pynlong ia ki 14 sngi ka ‘Swachhata Hi Seva’ naduh ka 15 tarik u Nailur haduh ka 2 tarik u Risaw, 2023 ha ka jingiatreilang bad kiwei kiwei ki tnat Sorkar ban rakhe ia ka jingdap 9 snem ka Swachh Bharat Mission.

U budlum jong ka mission ka dei ka jingiakhih paidbah na ka bynta ka jingkhuid. Ka phang jong ka SHS 2023 ka long “Ka India kaba lait na ka nuit ki nier”.

Ka SHS-2023 kan peit bniah ban pynurlong ia ka jingkhuid shuh shuh ha baroh ki bynta lyngba ka jingtrei mon sngewbha bad ruh ka bha ka miat jong ki Safai Mitra. Baroh ki Tnat Sorkar kin pynlong ia ki jingpynkhuid ha ki ophis, ki jaka paidbah, ki jaka jngoh kai bad kiwei kiwei ha ki jaka sor bad ki jaka nongkyndong ha ki Jylla /UT.

Kine harum ki long ki prokram ban long hapoh ka SHS- 2023:

1. Swachhata Hi Seva – 14 sngi ki jingpynkhuid

Kum shi bynta ka SHS 2023, baroh ki tnat Sorkar India, ki PSU, ki Sorkar Jylla bad ki bor pyniaid shnong kin pynlong ia ki jingpynkhuid ia ki jaka bapher bapher.

2. Indian Swachhata League 2.0

Ka bynta kaba ar jong ka ‘India Swachhata League’ kan long kaba shongshit ha kaba palat 4000 tylli ki kynhun ki la khreh ban jop ia ka jingjaboh ha ka 17 tarik u Nailur.

3. SafaiMitra Suraksha Shivir

Katba ngi dap khyndai snem ka Swachh Bharat Mission- Urban bad ar snem ka SBM-U 2.0 bad ngi ai jingburom ia u Mahatma Gandhi, yn pynlong ia ki prokram SafaiMitra Suraksha Shivir da ki nongbah ha kylleng ka ri naduh ka 17 tarik u Nailur, 2023. Kine ki Sivir ki thmu ban pyntreikam pura ia ki skhim na ka bynta ka bha ka miat jong ki nongpynkhuid shnong bad ki longiing jong ki bad ban kyntiew ia ka jingim jong ki.

*****