Ki kurim jong ki khliehduh jong ki ri G20 ba iashim bynta ki la iohi ia ka bor ka India ha ki kam rep ha ka jingpyni kyrpang ba la pynlong da ka tnat Kam Rep bad ka Bha ka Miat jong ki Nongrep ha IARI Campus, Pusa, mynta ka sngi. Kane ka prokram ka la don ki bynta bapher bapher, kum ka bynta pyni rukom shet ia ki millet da ki nongshet ba pawnam kum u Kunal Kapur, Anahita Dhondy bad Ajay Chopra, bad ka jingpyni ruh ia ki teknoloji ha ki kam rep da ki start – up jong ka India, ka jingiakren bad ki longkmie lahduh ha ki kam rep jong ka India, ki ‘Agri-Street’.

Ki kurim ki la leit sha ka jaka ba pynlong ia kane ka jingpyni kyrpang bad shuwa kane ki la sangeh shipor ha ka ‘Rangoli Area’, ha kaba don ar tylli ki ‘Millet Rangoli’ kiba heh bha. La don ki jingsaindur ba itynnad bha ba la saindur da kaba pyndonkam ia ki khaw krai bad ki motif tynrai jong ka India. Ka rangoli ba nyngkong ka pyni ia ka phang ‘Harmony of Harvest’ kaba pyni ia ki jinglong tynrai ka India ha ki kam rep. kane ka pyni ia ka bor jong ka India ha ki kam rep, da kaba ban jur halor ka bynta jong ki longkmie ha ka jingkyntiew ia ka jinglah kyrda ki kam rep. La don ruh ki mar jingialehkai tynrai kum ka dak jong ki jingnoh synniang ba bun jong ki longkmie ha ki kam rep, ki  millets, bad ki khiew terracotta, bad lyngba kine, kane ka Rangoli ka la long ka bynta kaba kongsan jong kane ka prokram. Ka Rangoli ba ar ka la pyni ia ka jingngeit tynrai jong ka India ba ‘Ka Pyrthei ka dei Kawei ka Longiing’, kaba ban jur halor ka jingtylli ha baroh kawei ka pyrthei. Ka India kum ka ri kaba kongsan ha ki kam rep, ka don ka bynta kaba heh ha ka jingshngain ka jingioh mar bam ka pyrthei. Kumta ka rangoli ba ar ka rakhe ia ka jingkut jingmut ka India na ka bynta ka jingiatylli bad ka jingdap jingbiang.

Ha ka jaka ba pynlong ia ka jingpyni kyrpang, ki kurim ki la iohi ia ka jinglong jingman jong ki kam Agri-startup, ha kaba 15 tylli ki Agri-startup ki la pyni ia ki jingsaindur teknoloji jong ki ban pynbeit ia ki jingeh bapher bapher bad ban wanrah ia ki kam digital ha ki kam rep. Climate Smart Agriculture, Innovation in Agriculture Value Chain, Agri-logistics & Supply Chains, Quality Assurance for Sustainable Consumption, and Millets: Sustaining Health, Empowering Agriculture, ki dei katto katne ki phang kiba la ioh ha kane ka jingpyni kyrpang. Shuh shuh ki dkhot jong ki Farmer Producer Organization (FPO) na kylleng ka India ki la pyni ia ki mar bam bapher bapher ba pyniaid iew ha kylleng ka ri, kaba iahap bad ka phang 'Empowering Rural Prosperity through Collective Agriculture.'

Ka la don ruh ka bynta shet jingbam 'Live Cooking Session' kaba pyni ia ki rukom shet bapher bapher ia ki krai. Kane ka prokram ka la iahap bad ka jingrakhe ia ka International Year of Millets. Ha kane la ialam lynti da lai ngut ki nongshet ba pawnam – Kunal Kapur, Anahita Dhondy, bad Ajay Chopra, ha kaba la don ruh ar ngut ki riewshemphang ha ki kam shet na ka ITC Group, chef Kusha bad chef Nikita. Ha ka jaka ba la buh kyrpang ban shet jingshet, kine san ngut ki nongshet ba pawnam ki la pynkhreh ia ka bam da kaba peit bniah ia ki krai. Ha kane la don ki jingbam khutia mutia, ki salad, ki jingbam ba pura bad ki jingbam pyngngad (dessert).

Ka Chef Anahita, Chef Kunal, bad u Chef Ajay ki la shet ia kawei ka starter, kawei ka bam pura bad ka jingbam pyngngad. Kum ban shu kdew, ka Chef Anahita ka la shet ia ka Raw Banana Barnyard Millet Tikki ba don ruh u puffed Amaranth. U Chef Kunal u la shet ia ka Jowar-Mushroom Khichda. U Chef Ajay u la shet ia ka Millet Thekua bad ka Lemon Shrikhand Mille-feuille dessert. Ha kane ka jingpyni kyrpang ka la don ruh ka jaka kyrpang kaba pyni ia ki rukom shet jingshet da kaba pyndonkam ia ki millet na baroh ki ri G20 ha ka jingburom ia baroh ki ri kiba iashim bynta ha kane ka prokram.

Kane ka jingpyni kyrpang ka la pyni ruh ia ki jingjop jong ka India ha ki kam wad bniah lyngba ki jaka ba la pyniaid da ka Indian Council of Agricultural Research (ICAR), ba pyni ia ki jingsaindur thymmai ha ki kam rep, ka teknoloji ha ki kam rep, bad ki jingpyndonkam ia ki kor kaba aibor ia ka jingkiew shaphrang jong ki kam. Man ka stall ka la pyni ia ki jingiaid shaphrang ha ki jait jingthung bapher bapher ba kyrshan da ki sienjam jong ka Sorkar. Don ki stall kiba peit bniah ia ki phang kum ka jingiaid lynti jong ka Basmati revolution, ka bynta jong kane ha ka jingkiew spah ki million ngut ki nongrep Basmati, bad ka kyrdan jong kane kum ka nongkamai 5 billion USD forex. Sa kawei ka stall ka la pyni ia ka kyrdan jong ka India kum ka ‘Jaka jong ki Musli Musla’ da kaba ban jur ia ka jingbun ki musli musla ka India kiba pawnam ha kylleng ka pyrthei bad ruh ki lad kiba don ha kane ka kam. Sa kawei ka stall ka pyni ia ka bor tei met bad ka bor dawai jong ki tit, ka jingbun jait jong ki ha India bad ki lad ban shalan ia kine shabar ri. Shuh shuh ki nongwan peitkai ki la iohi ia ki rukom treikam ba don nongrim ha ki sensor kiba la plie lad ia ka jingpeit mardor ia ki jinglong jingman ka suinbneng ha ka por pynkit, por buh bad ka por pynih ia ki kait ha ryngkat kiwei kiwei ki jingpyni ba phylla jong ka ICAR.

Ka ‘Agriculture Street’ ka la dei sa kawei ka bynta ba kyrpang jong kane ka jingpyni kyrpang ba la pyniaid da ka Tnat kaba la long kum ka jingiaid lynti lyngba ki kam rep ka India bad kaba pyni ia ki jinglong jingman jong ki por ba la dep bad ka lawei. Hangne, ka tnat ka la pyni ia ki rukom rep da kaba pyniasoh lang ia ki riewshemphang, ki stad science bad ki nongrep ha kawei ka jaka. Ha kane ka jaka la don khyndai tylli ki stall kiba saindur ha ki dur jaka nongkyndong kaba la khring bha ia ki kurim jong ki khliehduh jong ki ri G20. Ka la pyni ruh ia ki sienjam jong ka India kiba thmu ban kyntiew ia ka jingshngain ha ka jingioh bam bad ka bam kaba tei. Kawei na ki mat ba kongsan jong ka Agri Gully ka dei ka jingpyni jong ka Lahri Bai, ka samla kynthei ba trei ha ki kam rep kaba dei na Dindori, Madhya Pradesh kaba la pynneh ia palat 150 jait ki symbai tynrai ba kynthup 50 jait ki symbai jong ki krai ha ka iing trep ba ar kamra jong ka bad kane ka la pynlong ia ka ban ioh ia ka nam ‘Millet Queen’ jong ka India.

Hadien ba la kut ka prokram, ki kurim jong ki khliehduh ki ri G20 ki la ioh ia ki song jingai sngewbha. Ia ki tiar kiba don ha kine ki song la jied bha ban pyni ia ki jinglong tynrai jong ka India ha ka deiriti bad ka jingsaindur. Kine ki tiar ki kynthup ia ki stole ba thain da ka kti da kaba pyndonkam ia ka jain silk ba ioh na ki khlaw Sal ha Chhattisgarh, ka bell nar ba shna da ka kti da kaba pyndonkam ia ka rukom shna tiar wax ba la pyndonkam ban shna ia ka 'Dancing Girl' kaba na ka imlang sahlang Harappn (3300 BCE to 1300 BCE), bad ka jingdro Cheriyal.

Kane ka jingpyni kyrpang ka la ailad ia ki kurim jong ki khliehduh jong ki ri G20 ba kin sngewthuh ia ka jingiaid shaphrang jong ka India ha ki kam rep ba kynthup ruh ia ka jingrep ia ki krai. Ki longkmie ba trei ha ki kam rep ba la khot sngewbha na 10 tylli ki jylla ba pynmih ia ki krai kum ka Rajasthan, Maharashtra, Karnataka, Madhya Pradesh, Tamil Nadu, Uttarakhand, Odisha, Chhattisgarh, Bihar bad Assam ki long ka dak jong ki jingkylla ba dang jia bad ki jingiakren bad ki ki la pyni ia ki jingkylla ha ki kam kiba iadei bad ki krai ha ka ri. Ki nongshet ba pawnam ki la shet ia ka bam kaba bang ban pyni ia ka jingbun lad ha ki krai bad ki rukom pynkhreh bam ka India katba ki Start-Up bad ki Farmer Producer Organization (FPO) ki la pyni ia ki teknoloji bad ki kam bapher bapher jong ki ha kaba kane ka prokram ka la long ka ba phylla bha ia kito kiba la leit shim bynta ha ka.

****.