Ka Sorkar Pdeng ka la ioh jingtip ba ha kiba bun ki case namar ki jingiai pynkylla ia ka Bank Account Number da uba dei ban ioh jingmyntoi bad namar ka jingbym pynthymmai ia u account number ba thymmai da u Programme Officer ba dei khmih ia kane, namar ka jingbym ai ia u account ba thymmai ha ka por da uba dei ban ioh jingmyntoi, bun ki jingsiew ia ka bai bylla la kyntait (namar u account number barim) da ka bank branch ba don ha ka jaka ba ki trei.

Ha ka jingiakren bad kiba don bynta ha kane ka kam, la lap ba ban lait na kum kine ki jingshah kyntait, ka Aadhaar Payments Bridge System (APBS) kadei ka lad kaba biang tam ban ai jingsiew bai bylla lyngba ka Direct Benefit Transfer (DBT). Kane kan iarap ia kiba dei ban ioh jingmyntoi ba kin ioh ia ka jingsiew jong ki ha ka por.

Shisien ba la pynthymmai ia u Aadhaar ha ka database jong ka skhim, uba dei ban ioh jingmyntoi um donkam ban pynthymmai ia ki account number namar ka jingkylla ha ka jaka lane ka jingkylla ha u bank account number. Yn phah ia ka pisa sha ka account number kaba iasoh bad u Aadhaar number. Ha kaba iadei pat bad ka jingdon palat kawei ka account jong uba dei ban ioh jingmyntoi, kaba kham niar ban lap ha ka MGNREGA, u nongioh jingmyntoi u don ka lad ban jied ia ka account.

Ka data jong ka National Payments Corporation of India (NPCI) ka pyni ba ka don ka jingjop kaba khraw ha ka percentage kaba kot haduh 99.55% shaneng ha kaba u Aadhaar u iarap na ka bynta ka DBT. Ha kaba iadei bad ka jingsiew katkum ka Account ka jingjop kalong kumba 98%.

Ka APBS ka iarap ia ki nongioh jingmyntoi kiba dei ban ioh ia ka jingsiew jong ki bad ka iarap ban tehlakam ia ka jingbamsap da kaba weng ia ki nongioh jingmyntoi kiba shu thok. Ka Mahatma Gandhi NREGS kam pat pdiang ia ka jingsiew ba pyntreikam ia u Aadhaar. La peit bniah ia ka jingiaid shaphrang ka Aadhaar-based Payment System (ABPS) bad la pynjlan ia ka rukom siew lang ia ka bai bylla (NACH bad ABPS) haduh ka 31 tarik Nohprah 2023 lane haduh da pynbna da kumwei pat. Ka Tnat ka la pynshai sha baroh ki Jylla ba u nongioh jingmyntoi uba wan ban trei udei ban ioh ia u Aadhaar number hynrei um dei pat ban shah kyntait ban trei halor kane ka nongrim. Lada u nongioh jingmyntoi um dawa ia ka kam, ha kum kane ka jingjia u/ka ba dei ban ioh ia ka APBS kam ktah ia ka jingdawa kam. Ym lah ban pyndam ia ki Job card halor ka nongrim ba ka daw ba u nongtrei um biang na ka bynta ka APBS.

Hapoh ka Mahatma Gandhi NREGS, ka APBS ka la treikam naduh u snem 2017. Hadien ba baroh ki don ia u Aadhaar number, mynta ka Sorkar India ka rai ban bteng ia ka APBS na ka bynta kiba dei ban ioh jingmyntoi hapoh ka skhim. Ka jingsiew kan long tang lyngba ka APBS sha ka account ba iasoh bad ka APBS, kaba mut ba kalong ka rukom siew pisa kaba kham shngain bad kaba kham sted.

Na ka 14.33 klur ki nongioh jingmyntoi, la pyniasoh Aadhaar ia 13.97 klur. Na kine kiba la pyniasoh Aadhaar, 13.34 klur ki Aadhaar ki dei kiba la pynshisha bad 81.89% ki nongtrei mynta ki don hok ban ioh PBS. Ha u bnai Naitung 2023, la siew bai bylla kumba 88.51% lyngba ka APBS.

Ka Mahatma Gandhi NREGA kadei ka skhim kaba iaid katkum ka jingdonkam bad ka shong ha ki kam bapher bapher ba iadei bad ka ioh ka kot. Haba pyrkhat ia ki jingmyntoi jong ka APBS na ka bynta kiba dei ban ioh jingmyntoi, kane kalong ka lad kaba biang tam ban bud na ka bynta ka jingsiew.

Ka rukom siew katkum u Aadhaar kam dei kaei kaei hynrei ka lad ban rung ka pisa sha ka account jong kiba dei ban ioh jingmyntoi. K idon ki sienjam ba biang ba la pdiang ha kane ka rukom treikam bad ka bynta jong kiba dei ban ioh jingmyntoi, ki nongtrei bad baroh kiba don bynta ha kane ka kam kidei kiba la kdew shai.

********