ঙসি নিউ দিল্লিদা ইসরোগী চিয়ারমেন অমসুং স্পেস দিপার্তমেন্তগী সেক্রেতরি, দোক্তর এস. সোমনাথনা সাইন্স অমসুং তেক্নোলোজিগী রাজ্য মন্ত্রী(মনিংতম্বা), পি.এম.ও, পর্সোনেল, পব্লিক গ্রিভান্সেস, পেন্সন্স, এতোমিক ইনর্জি অমসুং স্পেসকী রাজ্য মন্ত্রী দোক্তর জিতেন্দ্র সিংহ উনখ্রে অমসুং ওগস্ত ২৩,২০২৩গী নুমিদাংৱাইরমদা থাগী লৈমাইদা চন্দ্রয়ান-৩ তানবা থৌরাং তৌরিবা অসিগী মতাংদা পাউদমখ্রে।

চন্দ্রয়ান-৩গী ফিবমগী মতাংদা পাউদম্লদুনা ইসরোগী চিয়ারমেন্না হায়খি সিস্তেম খুদিংমক মপুংফানা থবক তৌরি অমসুং য়ুমশকৈশা নুমিৎ ফাওবদা খুদোংচাদবা অমতা থেংনগনি হায়বগী থাজবা লৈতে। মথং নুমিৎ নিনিদা চন্দ্রয়ান-৩গী হকশেলগী ফিবম লেপ্তনা য়েংশিনগনি। নুমিৎ নিনিগী মমাঙদা অরোইবা তানবা থবকশিং পাংথোক্কনি।

চন্দ্রয়ান-৩ থাগী লৈমাইদা অশোই-অঙাম থোক্তনা তাগনি হায়বগী থাজবা দোক্তর জিতেন্দ্রনা ফোঙদোকখি অমসুং প্রধান মন্ত্রী শ্রী নরেন্দ্র মোদীগী লমজিং মখাদা প্লানেতোরি এক্সপ্লোরেসনগী পুৱারিদা অনৌবা ৱারি অমা ইরগনি।

ইসরোনা হায়খি ওগস্ত ২৩,২০২৩গী নুমিদাংৱাইরমদা থাগী লৈমাইদা চন্দ্রয়ান-৩ তানবা থৌরাং তৌরি। থাগী লৈমাইদা কন্না তারবা মতুংদা চন্দ্রয়ান-২ শরুক খর মাইপাকখি। চন্দ্রয়ান-৩ লেন্দর মোদুল অমসুং চন্দ্রয়ান-৩ ওর্বিতরগী মরক্তা ইসরোনা মাইপাক্না পাউ ফাওনরি। ঙসি ইসরোনা চন্দ্রয়ান-৩না নম্বা থাগী লৈমাইগী অনৌবা ফোতোশিং থারকখি।

য়ু.এস.এ, রুসিয়া অমসুং চাইনাগী মতুংদা ভারতনা মালেমদা থাগী সাউথ পোলদা তাবা ঙম্বা মালেমগী মরিশুবা লৈবাক ওইবা ঙম্লগনি।

চন্দ্রয়ান-৩ মিসনগী মরুওইবা পান্দমদি, থাগী লৈমাইদা তপ্না তাবা, থাগী লৈমাইদা রোভর চৎপা অমসুং মফম অদুদা সাইন্তিফিক ওইবা চাংয়েংশিং পাংথোকপনি।

দোক্তর জিতেন্দ্রনা হায়খি চান্দ্রয়ানগী পরিংদা চন্দ্রয়ান-১ না থাগী লৈমাইদা ঈশিং ফংলে হায়না পুথোকখি  অমসুং মমিং লৈরবা স্পেসকী এজেন্সি অমা ওইরিবা য়ু.এস.এগী নসা ফাওবা অঙকপা পোকহনখি। জুলাই ১৪,২০২৩দা অন্ধ্র প্রদেসকী শ্রীহরিকোতাদগী নুংথিল পুং ২:৩৫ তাবা মতমদা জি.এস.এল.ভি মার্ক ৩না চন্দ্রয়ান-৩ থাগৎখি।

****