నాడు పోస్టు చేయడమైనది:
16 AUG 2023 7:43PM by PIB Hyderabad
ప్రధానమంత్రి శ్రీ నరేంద్ర మోదీని ఇవాళ ఎనిమిదిమంది సభ్యుల అమెరికా కాంగ్రెస్ ప్రతినిధి బృందం న్యూఢిల్లీలో కలుసుకుంది. ఈ భారత మద్దతు బృందంలో ఇండియా కాకస్ డెమోక్రటిక్ కో-ఛైర్ రో ఖన్నా, రిపబ్లికన్ కో-ఛైర్ మైక్ వాల్జ్‌, ఇతర ప్రతినిధులు ఎడ్ కేస్, కాట్ కమాక్, డెబోరా రాస్, జాస్మిన్ క్రోకెట్, రిచ్ మెకార్మిక్, శ్రీ ఠానేదార్ ఉన్నారు. ప్రధానమంత్రి ఈ బృందాన్ని స్వాగతిస్తూ… భారత్‌-అమెరికా సంబంధాలకు అమెరికా కాంగ్రెస్ ఉభయపక్షాలు నిరంతర మద్దతివ్వడాన్ని అభినందించారు. ఈ సందర్భంగా అధ్యక్షుడు జో బైడెన్‌ ఆహ్వానంపై ఈ ఏడాది జూన్‌లో తన అమెరికా పర్యటన నేపథ్యంలో అమెరికా కాంగ్రెస్‌నుద్దేశించి రెండోసారి చారిత్రక ప్రసంగం చేసే అవకాశం లభించడాన్ని ప్రధాని గుర్తుచేసుకున్నారు.
భారత్‌-అమెరికా సమగ్ర వ్యూహాత్మక అంతర్జాతీయ భాగస్వామ్యానికి రెండు దేశాలలో ఉమ్మడి ప్రజాస్వామ్య విలువలు, చట్టాలపట్ల గౌరవం, ప్రజల మధ్య బలమైన సంబంధాలు పునాదిగా ఉన్నాయని ఈ సందర్భంగా ప్రధానితోపాటు అమెరికా కాంగ్రెస్ ప్రతినిధి బృందం ఏకాభిప్రాయం వ్యక్తం చేయడం గమనార్హం.