Ha ka jingai jingkren sha ki briew jong ka ri ha ka lyngkhuh sngi ioh jinglaitluid kaba 77 na Red Fort, u Myntri Rangbah Duh, u Narendra Modi u la ai khublei ia ki briew kiba la jied ia ka Sorkar kaba skhem bad kaba khlain hadien laiphew snem ka jingartatien, ka jingthut bad ki jingbym banse ha ki kam sain pyrthei. U la ong ba ka ri ka don ka Sorkar mynta kaba aiti baroh ka por bad ka pisa jong ki briew na ka bynta ka 'Sarva Jan Hitay, Sarva Jan Sukhay'

U la ong ba ka Sorkar mynta ka peit tang ia kawei kaba long ‘Ka ri ha kaba nyngkong’. Man ka rai ba shim da ka Sorkar ka dei na ka bynta kane, u la ong. U Modi u la ong ba ki ophisar ki dei ki kti bad ki kjat jong u kiba trei ha man ki bynta jong ka India bad kiba la ‘wanrah ia ka jingkylla’. “Ka dei namar kane ba kane ka juk jong ka ‘pynkylla, trei, pynpher’ ka la tei ia ka lawei jong ka India. Bad ngi dang kyntiew ia kito ki bynta ha ka ri ki ban pynkhlain ia ka nongrim jong kine ki hajar snem ban wan,” u la ong.

La seng ia ki tnat Sorkar ba thymmai na ka bynta ka roi ka par kaba ryntih

U Myntri Rangbah Duh u la kren shaphang ka roi ka par kaba ryntih ha ka ri da kaba seng ia ki tnat Sorkar ba thymmai kiba peit ia ki kam bapher bapher. U Modi u la ong ba ka pyrthei ka donkam ia ka bor jong ki samla bad ba ki samla ki donkam ia ka jingpyntbit. U la ong ba u ngeit skhem ba ka tnat skill development kaba thymmai ka pynbiang ia ki jingdonkam jong ka India bad ba kan sa pynbiang ruh ia ki jingdonkam jong ka pyrthei.

U Modi u la ong ba ka tnat Jal Shakti ka peit bniah ia ka jingpynthikna ia ka jingpynpoi ka umdih ba khuid sha baroh ki briew jong ka ri. “Ngi dang peit bniah ia ka jingkyntiew ia ki rynsan ba kyrpang ban iada ia ka mariang,” u la ong. U la kren shaphang ka jingialam lynti ka India ha ka por ka jingeh jong ka khlam Corona ha kaba u la ong ba ka Sorkar ka la seng ia ka tnat AYUSH kaba kyrpang bad mynta, ka Yoga bad ka AYUSH ka dei kaba la pawnam bha ha kylleng ka pyrthei. Hadien ba ka India ka la ieng pyrshah ia ka khlam Corona, ka pyrthei ka thrang ban ioh ia ka koit ka khiah kaba pura kaba long kaba donkam bha mynta, u la bynrap.

U la kren shaphang ki tnat fisheries, animal husbandry bad dairy ha kaba u la ong ba kine ki kam ki don ka bynta kaba khraw bad ki long kum ki rishot jong ka Sorkar bad ka ioh ka kot jong ka ri. Kane ka tnat kaba thymmai ka don ka bynta kaba khraw ban peit ba ym don mano mano ha ka imlang sahlang kiba shah ieh bein ha ka jingioh ia ki jingmyntoi ba la pynbna da ka Sorkar, la ong u Myntri Rangbah Duh.

U Modi u la ong ba ki kam cooperative ki long ka bynta kaba heh bha ha ka ioh ka kot jong ka imlang sahlang. U la ong ba ka tnat Cooperative ba dang shu seng ka pyniar ia ka rynsan jong ka lyngba ki kynhun cooperative khnang ba baroh ki iohsngew ia ki sur jong kiba duk tam bad khnang ban pynbiang ia ki jingdonkam jong ki. Kane ka tnat ka plie lad ia ki ba kin iadon la ka bynta ha ka roi ka par jong ki watla ki kam jong ki ki lah ban long kiba rit. “Ngi la pdiang ia ka lynti sha ka jingriewspah lyngba ka jingiatreilang,” u la ong.

*****