হকশেল অমসুং য়াইফ-য়ুম্বাল মন্ত্রালয়
প্রধান মন্ত্রীনা মালেমগী য়োগ নুমিত্তা লৈবাক্কী মফমদা ৱা ঙাঙখ্রে
য়োগ মালেমগী স্পিরিত, মীয়ামগী ইহৌ ওইরে: প্রধান মন্ত্রী
“য়োগনা তোঙান তোঙানবা লৈবাক্কী মীয়ামবু, ভারতকী জি২০ প্রেসিদেন্সীগী থীম: ‘মালেম অমা, ইমুং অমা, তুংলমচৎ অমা’ অসিবুসু লমজিংলিবা বসুদৈব কুতুম্বকমগী ৱাখল্লোন অদুমক্তা পুনশিল্লি”
দোক্তর মনসুখ মন্দাবিয়ানা লমজিংদুনা এইমস নই দিল্লীদা মাস য়োগ দেমোন্সত্রেসনগা লোয়ননা মালেমগী য়োগ নুমিৎ পাঙথোকখ্রে
য়োগনা ভারতকী অমেঙবা পাঙ্গল ওইরে: দোক্তর মন্দাবিয়া
“য়োগনা পুক্নিংবু ফাথবদা অমদি হকচাঙদা মতিং হাপ্পদা মতেং পাংই। ঐখোয়না হকশেল অমদি তিঞ্জং কায়জঙদবা পুন্সিগী মতাঙদা ৱারী শানবদা, ঐখোয়গী পুক্নিংদা য়োগ লাকই। মসিনা হকচাঙগী লায়না তিলনা ঙাকথোকপগী মতিং শেমগৎপনা মসি লায়না ঙাকথোক্নবগী লায়েং মখল অমনি”
“কোবিদ মতুংদা, মীয়াম অসি মশাবু হকচাঙ ফনা অমদি তিঞ্জং কায়জঙদনা থম্বগী লমদা হেন্না খঙহল্লে। মরম অসিনা, য়োগগী মরুওইবা অমদি পাম্নবসু মশক থোক্না হেনগৎলক্লে”
য়োগবু মালেমগী থাক্তা পুখৎপগীদমক প্রধান মন্ত্রীবু থাগৎচরি
Posted On:
21 JUN 2023 10:02AM by PIB Imphal
প্রধান মন্ত্রী শ্রী নরেন্দ্র মোদীনা ভিদিও পাউজেলগী খুত্থাঙদা মালেমগী য়োগ নুমিৎ থৌরমদা লৈবাক্কী মফমদা নুংঙাইবা ফোঙদোকখ্রে। “য়োগ মালেমগী স্পিরিত, মীয়ামগী ইহৌ ওইরে। য়োগনা তোঙান তোঙানবা লৈবাক্কী মীয়ামবু, ভারতকী জি২০ প্রেসিদেন্সীগী থীম: ‘মালেম অমা, ইমুং অমা, তুংলমচৎ অমা’ অসিবুসু লমজিংলিবা বসুদৈব কুতুম্বকমগী ৱাখল্লোন অদুমক্তা পুনশিল্লি,” হায়না মহাক্না হায়খি।
কেন্দ্রগী হকশেল অমদি য়াইফ-য়ুম্বাল মন্ত্রী দোক্তর মনসুখ মন্দাবিয়ানা লমজিংদুনা এইমস, নই দিল্লীদা মীয়ামগী ওইবা য়োগ দেমোন্সত্রেসন অমগা লোয়ননা ৯শুবা মালেমগী য়োগ নুমিৎ থৌরম পাঙথোকখ্রে।
থৌরমদুদা ৱা ঙাংলদুনা, কেন্দ্রগী হকশেল মন্ত্রীনা হায়খি, “য়োগ অসি ভারতকী অরিবা মতমগী থৌওং অমনি, অদুবু মতমগী মতুং ইন্না, মসি শীজিন্নবা হন্থরকখি। ইকায়খুম্নরবা প্রধান মন্ত্রী, শ্রী নরেন্দ্র মোদীনা য়োগ য়োকখৎনবা অচৌবা ইনোৎ অমা পীখি অমদি ঙসি য়োগ শান্নদবা মালেমগী মফম অমত্তা লৈত্রে। মসি ভারতকী অমেঙবা পাঙ্গল অমা ওইরে।”
নুংতিগী পুন্সিদা য়োগগী কান্নবশিং ফোঙদোক্লদুনা, দোক্তর মন্দাবিয়ানা হায়খি, “য়োগনা পুক্নিং ফাথবদা অমদি হকচাঙগী মতিং হাপ্পদা মতেং পাংই। ঐখোয়না হকশেল অমদি তিঞ্জং কায়জঙদবা পুন্সিগী মতাঙদা ৱারী শানবদা, ঐখোয়গী পুক্নিংদা য়োগ লাকই। মসিনা হকচাঙগী লায়না তিলনা ঙাকথোকপগী মতিং শেমগৎপনা মসি লায়না ঙাকথোক্নবগী লায়েং মখল অমনি”।
য়োগবু পাক শন্না পাম্নরিবসিগীম তাঙদা, কেন্দ্রগী হকশেল মন্ত্রীনা “কোবিদ মতুংদা, মীয়াম অসি মশাবু হকচাঙ ফনা অমদি তিঞ্জং কায়জঙদনা থম্বগী লমদা হেন্না খঙহল্লে। মরম অসিনা, য়োগগী মরুওইবা অমদি পাম্নবসু মশক থোক্না হেনগৎলক্লে,” হায়খি।
য়োগগী থৌরম অদুগী মাঙওইননা, দোক্তর মন্দাবিয়ানা সাইকল থৌদুনা চৎপা খোঙচৎ অমদা শরুক য়াদুনা এইমস গো গ্রীন ইনিসিএতিবপু শৌগৎপা উৎখি।
দোক্তর মন্দাবিয়ানা ইকায়খুম্নরবা প্রধান মন্ত্রীবু য়োগবু মালেম শিনবা থুংনা শন্দোকপগীদমক থাগৎখি অমদি মীপুম খুদিংমক্কী মফমদা য়োগ শান্নবখক নত্তনা অতৈবুসু তুং ইলহন্নবা পুক্নিং থৌগৎপিয়ু হায়খি।
থৌরম অদু মফমসিদা চঙলগা য়েঙবা য়াগনি: https://www.youtube.com/watch?v=Z201HxCOA5Y
কেন্দ্রগী হকশেল সেক্রেতরী শ্রী সুধান্স পন্ত; হকশেল মন্ত্রালয়গী জোইন্ত সেক্রেতরী শ্রী রাজিব মানঝি; এইমস, নই দিল্লীগী দাইরেক্তর প্রোফেসর এম. স্রিনিবাস অমদি হকশেল মন্ত্রালয়গী মকোক থোংবা ওফিসিএলশিংসু থৌরমদুদা শরুক য়াখি।
******
(Release ID: 1934002)
Visitor Counter : 74