প্রধানমন্ত্রীগী লোইশঙ
azadi ka amrit mahotsav g20-india-2023

পি.এম.না খেলো ইন্দিয়া য়ুনিভর্সিতী গেম্সকী ৩শুবা ইদিসন হৌদোকখ্রে


"খেলো ইন্দিয়া য়ুনিভর্সিতী গেম্স এক ভারত শ্রেস্থ ভারত'কী অচৌবা মেদিয়ম ওইরে"

"হৌখিবা চহি ৯সিদা ভারত্তা শান্ন-খোৎনবগী অনৌবা চক অমা হৌরে, শান্ন-খোৎনবগী মেদিয়মগী খুত্থাঙদা খুন্নাইবু মপাঙ্গল কলহনবগী চক অমা"

"শান্ন-খোৎনবা হৌজিক্তি পুক্নিং চিংশিন্নিংঙাই ওইরবা শিনফম অমা ওইনা উনরক্লে অমদি খেলো ইন্দিয়া অভিয়াম্না মসিদা অচৌবা শক্লোন লৌরি"

"নেস্নেল এজুকেস্নেল পোলিসীনা শান্ন-খোৎনববু সবজেক্ত অমা ওইনা লৌখৎনবা ৱাফম থমদুনা মসিনা করিকুলমগী শরুক অমা ওইরগনি"

"খেলো ইন্দিয়ানা ভারতকী মহৌশাগী মশান্নশিংগী ইকায়খুম্নববুসু হঞ্জিনহল্লে"

"ভারতকী চাওখৎ খোঙজেল অদোমগী হৈথোই শিংথোইবদা লৈ‍। অদোম্না তুংগী চেম্পিয়ন্নি"

"শান্ন-খোৎনবনা ঐখোয়বু লনাই ওইবা ৱাখল্লোন্দগী ৱাংমা লান্দুনা অপুনবগী মায় পাকপগী মায়কৈদা চঙশিন্নবা পুক্নিং থৌগৎলি"

Posted On: 25 MAY 2023 8:17PM by PIB Imphal

প্রধান মন্ত্রী, শ্রী নরেন্দ্র মোদীনা ঙসি ভিদিও কন্ফরেন্সিংগী খুত্থাঙদা খেলো ইন্দিয়া য়ুনিভর্সিতী গেম্স ২০২৩ হৌদোক্লে হায়না লাউথোকখ্রে‍। গেম্স অসিদা শান্ন-খোৎনবগী কাঙলুপ ২১দা য়ুনিভর্সিতী ২০০ হেনবদগী শান্নরোয় ৪৭৫০ হেনবনা শরুক য়াদুনা অথোই অহেন তান্নগনি‍।

তিল্লিবা মীয়ামদা ৱা ঙাঙলদুনা, প্রধান মন্ত্রীনা পুম্নমক্কী মফমদা খেলো ইন্দিয়া য়ুনিভর্সিতী গেম্স ২০২৩ পাঙথোকপগীদমক নুংঙাইবা ফোঙদোকখি অমদি উত্তর প্রদেশ ঙসিদি শান্ন-খোৎনবগী লমদা হৈথোই শিংথোইবশিংগী ইতিনফম অমা ওইরক্লে হায়খি‍। খেলো ইন্দিয়া য়ুনিভর্সিতী গেম্স অসিদা শরুক য়ারিবা শান্নরোয় ৪০০ হেনবসি তোঙান তোঙানবা স্তেতশিং অমদি মফমশিংদগী লাক্লিবনি অমদি মরুওইনা মখোয়বু স্তেত অসিদগী মেম্বর ওফ পার্লিয়ামেন্ত অমা ওইনা তরাম্না ওকচরি হায়না মহাক্না হায়খি‍। থৌরম অসিগী লোইশিনবগী থৌরম মহাক্কী কেন্দ্র ওইরিবা ভরানসীদা পাঙথোক্কনি হায়বসিদা মহাক্না নুংঙাইবা ৱাফম ফোঙদোকখি‍। ভারতনা অজাদী কা অমৃৎ মহোৎসব পাঙথোক্লিঙৈ মরকসিদা খেলো ইন্দিয়া য়ুনিভর্সিতী গেম্সকী অহুমসুবা ইদিসন পাঙথোকপগী মরুওইবা ৱাফমশিং থম্লদুনা, প্রধান মন্ত্রীনা থৌরম অসিনা অপুনবগী ৱাখল্লোনগা লোয়ননা ‘এক ভারত শ্রেস্থ ভারত’কী ৱাখল্লোন মীয়ামদা ফাওহন্নবগী অথোইবা পাম্বৈ অমা ওইরে হায়খি‍। তোঙান তোঙানবা মফমশিংদগী লাক্লিবা শান্নরোয়শিংনা অমগা অমগা শকখঙ মায়খৎনবগা লোয়ননা শান্ন-খোৎনবগী থৌরমসি পাঙথোক্লিবা উত্তর প্রদেশকী তোঙান তোঙানবা মফমশিংদসু চৎকনি‍। মসিনা অসিগুম্বা মফম অমগা মরী শেমগৎপদা মতেং ওইগনি হায়রদুনা, খেলো ইন্দিয়া য়ুনিভর্সিতী গেম্সতা শরুক য়াবনা শান্নরোয় পুম্নমক্কী কাউঙম্লোইদবা নীংশিং খুদম ওইগনি হায়বগী থাজবু প্রধান মন্ত্রীনা ফোঙদোকখি‍। পাঙথোক্কদৌরিবা অথোই অহেন তান্নবা অসিদা মখোয় পুম্নমক্কী মফমদা চাউনা মায় পাক্নবা য়াইফ-পাউজেলসু মহাক্না পীখি‍।

প্রধান মন্ত্রীনা হৌখিবা চহি ৯ অসিদা শান্ন-খোৎনবগী অনৌবা চক অমা হৌরে, মসিনা ভারতপু শান্ন-খোৎনবগী অচৌবা পৱার হাউস অমা ওইহনবতা নত্তনা শান্ন-খোৎনবগী পাম্বৈগী খুত্থাঙদা খুন্নাইবু মপাঙ্গল কলহন্নবগী চক অমসু ওইরি‍ হায়খি‍। প্রধান মন্ত্রীনা মমাঙদা শান্ন-খোৎনবদা পুক্নিং চঙলমদবা মতৌ, লৈঙাক্না শান্ন-খোৎনবদা চৈঙাক নীংথিনা পীরমদবা মতৌবু নীংশিংখি‍। মসিনা লায়রবা, মিদ্দল ক্লাস অমদি খুঙ্গংগী অঙাংশিং শান্ন-খোৎনবদা মায় পাক্নবা হোৎনবদা শাথিনা খুদোংচাদবা মায়োক্নহল্লম্মি‍। মসিনা মরম ওইরগা মমা মপা কয়ানা শান্ন-খোৎনববু অঙাংশিংগী করিয়রদা মীৎয়েঙ চাউনা লৈতে হায়না মীরায়নরম্মি‍। মমা মপা ওইবশিংগী মরক্তা শান্ন-খোৎনবদা লৈরম্বা মওং মতৌদা চাউনা অহোংবা লাক্লিবা ফীভমবু প্রধান মন্ত্রীনা পুথোক্তুনা থমখি‍। “হৌজিক্তি শান্ন-খোৎনবা হায়বসি পুক্নিং চিংশিন্নিংঙাই ওইরবা শিনফম অমা ওইনা উরক্লে অমদি মসিদা খেলো ইন্দিয়া অভিয়ান্না অচৌবা শক্লোন অমা লৌরি,” হায়না মহাক্না হায়খি‍।

প্রধান মন্ত্রীনা ভারত্তা পাঙথোকখিবা কম্মনৱেল্থ গেম্সতা লৈখিবা স্কামশিংবু মমাঙগী লৈঙাক্না শান্ন-খোৎনবদা লৈরম্বা মওং মতৌগী খুদম অমা ওইনা নৌহৌননা নীংশিংখি‍। তুংদা রাজীব গান্ধী অভিয়ান হায়না মমিং হোংখিবা পঞ্চায়ত য়ুবা ক্রীদা ঔর খেল অভিয়ান্নচিংবা স্কীমশিংদা পুকচেল শেংবা ৱাৎপগী মমি তাখি হায়না ৱাফম কয়া ফোঙদোকখি‍। শ্রী মোদীনা মমাঙদা শান্ন-খোৎনবগী ইনফ্রাস্ত্রকচর নীংথিনা লৈরমদদবু পেন্দবা ফোঙদোকখি‍। পুম্নমক অসি হোংলক্লি হায়না মহাক্না হায়খি‍। অর্বান স্পোর্তস ইনফ্রাস্ত্রকচরগী মতাঙদা, প্রধান মন্ত্রীনা মমাঙগী লৈঙাকশিংনা চহি ৬দা শুপ্নতগী লুপা করোর ৩০০০খক চাদিং তৌরম্মি অদুগা হৌজিক্না খেলো ইন্দিয়াগী মখাদা শান্ন-খোৎনবগী ইনফ্রাস্ত্রকচর শেমগৎপদা লুপা করোর ৩০০০ থাদদুনা শান্নরোয় মশিং হেন্না শান্ন-খোৎনবদা মায় ওনশিনহল্লকপা ঙমহল্লি‍।

প্রধান মন্ত্রীনা হৌজিক ফাওমদা খেলো ইন্দিয়া গেম্সশিংদা শান্নরোয় ৩০,০০০রোম শরুক য়াখ্রে হায়না অপেনবা ফোঙদোকখি‍। মসিগী মনুংদা শান্নরোয় ১৫০০ না শেলগী তেংবাং ফংলি‍। শান্ন-খোৎনবগী বজেৎসু চহি ৯গী মমাঙদা লৈরম্বদুদগী শরুক অহুম থোক্না হেনগৎলে‍। খুঙ্গং অমদি মনুং হঞ্জিনবা মফমশিংদা ফাওবা হেন্না ফবা শান্ন-খোৎনবগী ইনফ্রাস্ত্রকচর ফংলি হায়না মহাক্না হায়খি‍।

উত্তর প্রদেশকী মতাঙদা ৱা ঙাঙলদুনা, প্রধান মন্ত্রীনা লখনৌদা স্পোর্তস ফেসিলিতীশিং পাকথোক চাউথোকপা, বরানসীদা সিগ্রা স্তেদিয়ম মতমগা চুনহনবা, অমদি লুপা করোর ৪০০ কায়থোক্তুনা মতমসিগী চুনবা শান্ন-খোৎনবগী ফেসিলিতীশিং শেমগৎপগী মতাঙদা ৱাফম কয়া ফোঙদোকখি‍। লালপুরদা লৈরিবা সিন্থেতিক হোকী ফীল্দ, গোরখপুরগী বীর বহাদুর সিংহ স্পোর্তস কলেজতা লৈরিবা মল্তিপর্পজ হোল, মীরুত্তা লৈরিবা সিন্থেতিক হোকী ফীল্দ অমদি সাহরনপুরদা লৈরিবা সিন্থেতিক রন্নিং ত্রেকনচিংববুসু মহাক্না মমিং পনখি‍।

প্রধান মন্ত্রীনা হেন্না ফবা কম্পিতিসন এক্সপোজর ফংহন্দুনা মখোয়দা মশাগী ফীভম নৈনদুনা হেন্না ফগৎহন্নবা খুদোংচাবা হেন্না পীরি হায়বা ৱাফম ফোঙদোকখি‍। মসি খষলো ইন্দিয়া গেম্স হৌদোকখিবগী মরুওইবা মরম্নি, অমদি হৌজিক্তি মসি খষলো ইন্দিয়া য়ুনিভর্সিতী গেম্স অমদি খষলো ইন্দিয়া ৱিন্তর গেম্স ফাওবা পাকথোক চাউথোকখ্রে‍। মসিগী মহৈ চারি অমদি ঐখোয়গী শান্নরোয়শিংগী থাজবা হেনগৎহল্লি অমসুং মালেমগী অথোই অহেন তান্নবদা অফবা মহৈ ফংলক্লি হায়না মহাক্না হায়খি‍।

নেস্নেল এজুকেস্নেল পোলিসীনা শান্ন-খোৎনববু সবজেক্ত অমা ওইনা লৌশিন্নবা ৱাফম থমদুনা মসিনা করিকুলমগী শরুক অমা ওইহনগদৌরি, অমদি লৈবাকসিগী অহানবা নেস্নেল স্পোর্তস য়ুনিভর্সিতী লিংখৎপনা পায়খৎলিবা থৌরাং অসি হেন্না মপাঙ্গল কনখৎহনগনি হায়না প্রধান মন্ত্রীনা পাউদমখি‍। স্তেতশিংদা স্পোর্তস-স্পিসিএলাইজ হাইয়র এজুকেসনকী মায়কৈদা থবক কয়া পায়খৎলি হায়না প্রধান মন্ত্রীনা পাউদমখি‍। উত্তর প্রদেশনা য়াম্না শিংথানিংঙাই ওইরবা থবক পায়খৎলি হায়রদুনা মীরুত্তা লৈবা মেজর ধ্যান চন্দ স্পোর্তস য়ুনিভর্সিতীবু মহাক্না খুদম ওইনা পীখি‍। লৈবাক পুম্বদা খেলো ইন্দিয়া সেন্তর ১০০০ লিংখৎলি হায়বা ৱাফমসু মহাক্না থমখি‍। নেস্নেল সেন্তর ওফ এক্সেলেন্স ১২ রোমসু মথৌ তৌহন্দুনা পর্ফোর্মেন্স হেনগৎহন্নবগীদমক ত্রেনিং অমদি স্পোর্তস সাইন্সকী লমদা ঙাক্লৌ পীরি হায়না প্রধান মন্ত্রীনা পাউদমখি‍। “খেলো ইন্দিয়ানা ভারতকী মহৌশাগী শান্ন-খোৎনবগী ইকায়খুম্নববুসু হঞ্জিনহল্লে,” হায়না প্রধান মন্ত্রীনা হায়রদুনা গতকা, মল্লখম্ব, থাং-তা, কলারিপয়াত্তু অমদি য়োগাসন্নচিংবা তোঙান তোঙনবা য়েল্হৌ মশান্নশিং পুক্নিং থৌগৎনবগীদমক লৈঙাক্না স্কোলারসিপশিং পীরি হায়বা ৱাফমসু থমখি‍।

খেলো ইন্দিয়া থৌরমশিংদা নুপী শরুক য়াবা হেনগৎলকপনা পুরক্লিবা পুক্নিং থৌগৎনিংঙাই ওইরবা মহৈবু শিংথারদুনা, প্রধান মন্ত্রীনা লৈবাকসিগী ময়োল্লম কয়াদা খেলো ইন্দিয়া ৱুমেন্স লীগ পাঙথোক্লি হায়না পাউদমখি‍। “মসিদা হৌজিক ফাওবদা তোঙান তোঙানবা চহি কাঙলুপকী নুপী শান্নরোয় লিশিং ২৩ রোম্না শরুক য়াখ্রে,” হায়না মহাক্না হায়খি‍। প্রধান মন্ত্রীনা খেলো ইন্দিয়া য়ুনিভর্সিতী গেম্সতা নুপী শান্নরোয় মশিং য়াম্না শরুক য়াখিববু শিংথাখি অমদি মখোয়গী মফমদা য়াইফ-পাউজেল পীখি‍।

“ভারতকী খোঙজেল অদোমগী হৈথোই শিংথোইবদা লৈ‍। অদোম্না তুংগী চেম্পিয়ন্নি,” হায়না প্রধান মন্ত্রীনা ফোঙদোক্লদুনা মচু অহুমগী ফিরালবু ইচঙ থৌনা ৱাংনা হাইনা হুম্না পাইহনবা হায়বসি শান্নরোয়শিংগী থৌদাংনি হায়বা ৱাফম থমখি‍। স্পোর্তসমেন্সিপ অমদি তীম স্পিরিতকী মতাঙদা ৱা ঙাঙলদুনা, প্রধান মন্ত্রীনা শান্ন-খোৎনবা হায়বসি মায়থিবা অমদি মায় পাকপবু য়াজবা অমদি তীম ৱর্কখক্তনা লোইরবরা হায়বা ৱাফম থমখি‍। স্পোর্তসমেন্সিপকী ৱাহন্থোক মসিদগী হেন্না পাক চাউই হায়না প্রধান মন্ত্রীনা শন্দোক্না তাকখি‍। শান্ন-খোৎনবনা ঐখোয়বু লনাই ওইবা ৱাখল্লোনগী ৱাংমা লান্দুনা অপুনবগী ওইবা মায় পাকপগী লম্বীদা চঙশিন্নবা পুক্নিং থৌগৎলি‍। শান্ন-খোৎনবনা ঐখোয়দা চৎনবী অমদি কাঙলোন ঙাক্নবগীদমকসু তম্বিরি হায়না মহাক্না মখা তাখি‍। শান্নরোয়শিংনা ফীভম্না মখোয়গী মায়োক্তা লৈরক্লবা মতমদা মখোয়গী খোঙফম কায়হন্দনা লৈ অমদি মতম পুম্বদা কাঙলোন ঙাক্তুনা লৈ হায়না মহাক্না শিংথাখি‍। মহাক্কী ৱারোল লোইশিল্লকপদা প্রধান মন্ত্রীনা চৎন-কাঙলোন অমদি চৎন-পথাপকী ঙমখৈ মনুংদা লৈবা অমদি মোং হাদবা মতৌগা লোয়ননা মায়োক্নবা লম্বাবু মায়থিবা পীবনা শান্নরোয় অমগী শক্তম্নি হায়খি‍। “মায় পাক্লবা মীওই অমনা স্পোর্তসমেন্সিপ অমদি চীং লেম্বা মতৌ ঙাক্না চৎলবা মতমদতা অথোইবা শান্নরোয় অমা ওইরকই‍। মায় পাক্লবা মীওই অমনা খুন্নাইনা মঙোন্দগী তমজনফম ওইরক্লবা মতমদতা অথোইবা শান্নরোয় অমা ওইরকই,” হায়বগা লোয়ননা প্রধান মন্ত্রীগী ৱারোল লোইশিনখি‍।

বেকগ্রাউন্দ

লৈবাকসিদা শান্ন-খোৎনবগী কলচর অমা শেমগৎনবা অমদি নহাশিংবু শান্ন-খোৎনবগী লমদা পুক্নিং থৌগৎপগী লমদম প্রধান মন্ত্রীনা চাউনা মীৎয়েঙ চঙনবা ৱাফম থমখি‍। মচিন তুমখৎলক্লিবা শান্নরোয়শিংদা ঙাক্লৌ পীননবা লৈঙাক্না তোঙান তোঙানবা স্কীমশিং হৌদোকখি অমদি লৈবাকসিগী শান্ন-খোৎনবগী ইকোসিস্তেম মপাঙ্গল কলহন্নবা থৌরাংশিং পায়খৎখি‍। খেলো ইন্দিয়া য়ুনিভর্সিতী গেম্স পাঙথোকপা অসি মায়কৈ অসিদা থাংজিনবা মরুওইবা খোঙথাঙ অমনি‍।

চহি অসিদা, খেলো ইন্দিয়া য়ুনিভর্সিতী গেম্সকী অহুমসুবা ইদিসন উত্তর প্রদেশতা মে ২৫দগী জুন ৩ ফাওবা পাঙথোক্কদৌরি‍। অথোয় অহেন তান্নগদৌরিবা থৌরম অসি বরানসী, গোরখপুর, লখ্নৌ অমদি গৌতম বুদ্ধ নগরদা পাঙথোক্কনি‍। শান্ন-খোৎনবগী থৌরমসিদা য়ূনিভর্সিতী ২০০ হেনবদগী শান্নরোয় ৪৭৫০ হেনবনা মশান্ন ২১দা অথোই অহেন তান্নগনি‍। গেম্স অসি লোইশিনবগী থৌরম জুন ৩দা বরানসীদা পাঙথোক্কনি‍। গেম্স অসিগী মাসকোৎকী মমিং জিতু কৌই, মসিনা স্বাম্প দীয়র (বরাসিংঘ) – উত্তর প্রদেশকী স্তেত এনিমেল, অসিবু মহুৎ শিল্লি‍।

*****



(Release ID: 1927993) Visitor Counter : 71