ইনফোর্মেসন অমদি ব্রোদকাস্তিংগী কেন্দ্রগী রাজ্য মন্ত্রী দোক্তর এল. মুরুগন্না ঙসি ফ্রান্সতা লৈবা ভারতকী এম্বেসেদর শ্রী জাবেদ অস্রফ, এম.আই.বি.গী জোইন্ত সেক্রেতরী, শ্রী প্রিথুল কুমার অমদি ভারতকী ফিল্ম ইন্দস্ত্রীগী স্তারশিং য়াওবা থৌরম অমদা কেন্সতা পাঙথোকপা মার্স দু ফিল্মগী ইন্দিয়া পেভিলিয়ন ঙসি হৌদোকখ্রে‍।

ভারত্তগী ফিল্ম স্তার অমদি ওফিসিএলশিং য়াওবা দেলিগেসনশিংদুগী মফমদা ৱা ঙাঙলদুনা, দোক্তর মুরুগন্না ভারতনা লোল ৫০ হেনবদা ফিল্ম ৩০০০ হেন্না পুথোক্তুনা মালেমগী খ্বায়দগী মশিং য়াম্না ফিল্ম পুথোকপা লৈবাক ওইরি হায়খি‍। হায়রিবা ফিল্মশিং অসিনা ভারতকী ৱারি লিবগী মপাঙ্গলবু মালেম পুম্বদা পুদুনা চৎলি‍ হায়খি‍। হৌজিক মমিং চৎলিবা এলিফেন্ত হ্বিস্পরর্স ওফ মুদুমলাইগী খুদম পীরদুনা, মন্ত্রীনা অফবা মচাক হায়বসি ঙমখৈ নাইদে অমদি ভারতকী মচাকশিংনা লমদমদুদা নৈশিল্লগা লৈরম্বদগী মালেমগী মফম শিনবা থুংনা শন্দোরকপগী মতম অমা ঐখোয়না উবা ফংলি হায়খি‍।

দোক্তর মুরুগন্না হন্দক্তা ভারতকী মুভীশিং অমদি মুভী পুথোক্লিবশিংনা মালেমগী ফম্বাক্তা মশেক মঙাল নাইনা মায় পাক্লকখিববু নীংশিংলদুনা, ঙসিদি ভারত মচাগী মমিং ক্রেদিত্তা নৎত্রগা ভি.এফ.এক্সতা য়ায়দবা ফিল্ম থিবদা য়ারে হায়খি‍। হেন্না নৌবা তেক্নোলোজী লাকপা অমদি দিজিতেল অমদি স্ত্রীমিং প্লেৎফোর্ম মচিন তুমখৎলকপগা লোয়ননা হৌখিবা চহি খরসিদা ভারতকী ফিল্ম ইন্দস্ত্রীগী মশক থোক্না অহোংবা লাকখ্রে হায়না মহাক্না ফোঙদোকখি‍।

ভারতকী মেদিয়া অমদি এন্তরতেনমেন্ত সেক্তর অসি ২০২৩দা ১১.৪%গী তোপ তোপ্পা থাক্তা খুমাঙ চাওশিল্লক্তুনা লুপা ত্রিলিয়ন ২.৩৬ রোমগী রিভিন্যু লাক্লবা য়াই হায়না পারি হায়বা ৱাফম মন্ত্রীনা থমখি‍। হায়রিবা শিংথানিংঙাই ওইরবা খুমাঙ চাওশিনবা অসি ভারতকী এম. এন্দ ই. ইন্দস্ত্রীগী পাক চাউবা অমদি মাগী মতিংনা খোঙলৈ থুনা অওনবা লাক্লিবা দিজিতেল লেন্দস্কেপ য়াওনা অনৌবা খুদোংচাবশিং শেমগৎলিবা অসিগী খুদম্নি‍। কোবিদ লাইচৎ মতুংদা ভারত্তা লৈরিবা অপুনবা বোক্স ওফিস রিভিন্যু ২০২১দা লৈখিবা রিভিন্যুদগী শরুক অহুম্লোম হেনগত্তুনা য়ু.এস.দি. বিলিয়ন ১.৩ দা লৈখি, অমদি ২০২৫ ফাওবদা য়ু.এস.দি. বিলিয়ন ৩ য়ৌগনি হায়না পানরি হায়না মহাক্না মখা তাখি‍।

ভারত্তা ফিল্ম ইকোসিস্তেম মপাঙ্গল কনখৎহন্নবগী লমদা মন্ত্রালয়না পায়খৎলিবা থৌরাংশিংগী মতাঙদা ৱা ঙাঙলদুনা, দিজিতেল ইন্দিয়া, স্তার্ত অপ ইন্দিয়া, রুরেল তেলিকোম কন্নেক্তিবিতী, দেতা এফোর্দেবিলিতী অমদি এভাইলেবিলিতীগী অফবা এনভাইরনমেন্ত শেমগৎলিবা পোলিসী রিফোর্মনচিংবশিংগী খুত্থাঙদা পায়খৎলিবা য়াম্লবা থৌরাংশিংনা ক্রিওতিব ইকনমী অমগী অচৌবা য়ুম্ফম অমা থোল্লি হায়না দোক্তর মুরুগন্না হায়খি‍। “আই.তি. সেক্তরগী ঐখোয়গী মপাঙ্গল কল্লবা তেক্নোলোজীগা হৈথোই শিংথোইরবা আর্তিস্তশিংগা পুল্লগা, ভারতবু মালেমগী সিনেমাগী কন্তেন্ত ক্রিএতর ওইহন্নবগী খ্বায়দগী ফবা মফম ওইনা শেমগৎলি‍। ঐখোয়গী লৈঙাক্না সেক্তর অসিবু য়োকখৎনবগীদমক তাস্ক ফোর্স অমা লিংখৎলে‍। নেস্নেল সেন্তর ওফ এক্সেলেন্স ফোর এ.ভি.জি.সি. অমসু লিংখৎনবা পাইপলাইন্দা লৈরে,” হায়না মহাক্না হায়খি‍।

দোক্তর মুরুগন্না ভারতপু মপান লৈবাক্কী ফিল্মশিংগী পুক্নিং চিংশিন্নিংঙাই ওইরবা লমথুংফম অমা ওইনা পুথোক্লদুনা ভারতপু  ফিল্ম নম্বা, কো-প্রদক্সন, এনিমেসদ অমদি লো-কোস্ত প্রদক্সন য়াওনা মালেমগী মুভী ইন্দস্ত্রীগী য়োৎচাবী অমা ওইনা শেমগৎনবগীদমক ভারত লৈঙাক্না খোঙফম চেৎনা লেপ্লি হায়খি‍।

কেন্দ্র মন্ত্রী শ্রী অনুরাগ থাকুরনা মমাঙ চহিদা কেন্সতা ফিল্ম ইন্সেন্তিবশিং লাউথোকখ্রবা মতুংদা কেন্স ২০২৩দা ভারতনা মতিং লৈনা শরুক য়ারিবা অসিগুম মখা তানা লৈখিগনি হায়বগী থাজবসু মন্ত্রীনা ফোঙদোকখি‍। ভারতনা জি২০ সম্মিত পাঙথোক্নবা শেম শাবগা লোয়ননা, “ঐখোয়না কলচর অমদি তুরিজমগী মরুওইবা ৱাফমশিংদা অখন্নবা মীৎয়েঙ অমা থম্লি‍। ঐখোয়না পুম্নমক কোনশিনবা, তুং কোইগদবা খুন্নাই-শেন্মিৎলোন অমুক হঙ্গৎহনবা অমদি চাওখৎহন্নবগী শাথৌ অমা ওইনা কলচরবু শীজিন্ননবা মেদিয়া অমদি এন্তরতেন্মেন্তকী মতিকপু শীজিন্নদুনা পুম্নমক্কী তরং তরংবা তুংলমচৎ অমগী লম্বী য়াৎননবা পান্দম থম্লি‍। মালেম অমা – ইমুং অমা – তুংলমচৎ অমা হায়বসিনা মাঙদা চঙশিনগদৌরিবা লম্বী ওইগনি,” হায়না মহাক্না হায়খি‍।

তিল্লিবা মীয়ামগী মফমদা ভিদিও পাউজেল অমগী খুত্থাঙদা ৱা ঙাঙলদুনা, শ্রী অনুরাগ থাকুরনা ‘ফেস্তিবেল দি কেন্স’না ঐখোয়গী সিনেমাতিক এক্সলেন্সপু য়োকখৎপদা নত্তনা ভারত ফ্রান্সকী মরীবু হেন্না চেৎশিলহন্নবগী মরুওইবা শক্লোন অমা লৌরি হায়খি‍।

অহানবা ওইনা চহি অসিদা ঐখোয়না ভারতকী অৱাং নোংপোক স্তেতশিংদগী হৈথোই শিংথোইরবা ফিল্মমেকরশিংগী ওইবা ওফিসিএল তীম অমা কেন্স ফিল্ম ফেস্তিবেলদা থারি হায়বা ৱাফম মহাক্না থমখি‍। মসিদা লৈরিবা ৱাখল্লোন্দি ঐখোয়না লৈবাকসিগী লম লমগী ওইবা খেন্নবা মখলগী ফিল্মমেকিংবু মশক খঙদুনা য়োকখৎপগা লোয়ননা ভারতকী ইনাক খুল্লবা সিনেমাগী কলচরগী নুংদা লৈরিবা অমদি খেন্নবা মশকশিংবু কেন্সতা পুরকপনি হায়না মহাক্না হায়খি‍। চহি অসিগী কেন্স ক্লাসিক সেক্সন্দা খল্লক্লবা মনিপুরী লোলগী ফিল্ম ‘ইসানৌ’গী নেগেতিবশিংবু নেস্নেল ফিল্ম অর্কাইব ওফ ইন্দিয়ানা দিজিতেলাইজ তৌরে হায়না মহাক্না তিল্লিবা মীয়ামগী মফমদা পাউদমখি‍।

ফিল্ম অহুম তোপ তোপ্পা কাঙলুপ অহুমদা খল্লকপগা লোয়ননা মখোয়গী মরক্তা ২ না ওস্কার ফংলক্লিবসিগা লোয়ননা মালেম অসিনা ভারতকী ফিল্ম ইন্দস্ত্রীগী ক্রিএতিবিতী, কন্তেন্ত অমদি তেক্নিকেলগী ওইবা মতিংশিং খঙবা হৌরকপদা ঙায়রি হায়না শ্রী থাকুরনা হায়খি‍। মপাঙ্গল কনবা ৱারি খুৎলি, অৱাংবা থাক্কী স্কিলদা য়ুম্ফম ওইদুনা কন্তেন্ত খন্দোকপা অমদি পোস্ত প্রদক্সন অমসুং কো-প্রদক্সনগী মতাঙদা লৈবাক ১৬কা য়ানবা ৱাফম থমদুনা, ভারতনা মালেম পুম্বগী ফিল্মমেকরশিংগী পুক্নিং চিংশিন্নিংঙাই ওইরবা লমথুংফম অমা ওইরক্লি, হায়না মহাক্না মখা তাখি‍।

মমাঙদা, ফ্রান্সতা লৈবা ভারতকী এম্বেসেদর শ্রী জাবেদ অস্রফনা মহাক্কী ৱারোলদা কেন্স অমদি অতৈ ফেস্তিবেলশিংদা হেন্না চাউবা অমদি হেন্না ওর্গনাইজ ওইবা মওংদা শরুক য়াননবা, অমদি ভারতকী ফিল্মশিং য়োকখৎনবা হেন্না ইচঙ থৌবা থৌওং অমা লৈবগী তঙায় ফদবা ৱাফমশিং থমখি‍। মশিং হেন্না শরুক য়াবনা ভারতকী সিনেমাগী পাক চাউবা অমদি মপাঙ্গলদা মতিক চাবা মফম অমা পীবা ঙমগনি হায়না মহাক্না মখা তাখি‍।

কেন্স ফিল্ম ফেস্তিবেলগী মার্স দু ফিল্মগী একজেক্যুতিব দাইরেক্তর মিস্তর গুইলাউমি এস্মিওলনা ভারত অসি মাগী মপাগী মপাঙ্গল কনবা কৈথেল অমদি মাগী মুভী ইন্দস্ত্রীগী পাক চাউবসিনা মরম ওইরগা মালেমগী ফিল্ম ইন্দস্ত্রীগী মরুওইবা লৈবাক অমনি হায়খি‍।

থৌরমদুদা নবেম্বর, ২০২৩দা গোৱাদা পাঙথোক্কদবা ৫৪শুবা ইন্দিয়ন ফিল্ম ফেস্তিবেল ওফ ইন্দিয়াগী পোস্তর অমদি ত্রেলরসু মায়খুম হাংদোকখি‍।

৭৬শুবা কেন্স ফিল্ম ফেস্তিবেলদা ঐচ.এম.আই.বি.গী ভিদিও পাউজেল

খুরুমজরি!

ঐখোয়গী দেলিগেৎ, ইকায়খুম্নরবা লেঙশিনবিরিবা মীথুংশিং অমদি ৭৬শুবা ফেস্তিবেল দি কেন্সকী মার্স দু ফিল্মদা ইন্দিয়া পেভিলিয়ন হৌদোকপগী থৌরমসিদা সিনেমাগী তাইবংদগী ঙসি মফমসিদা তিনবিরিবা মরূপশিংবু তরাম্না ওকচরি‍।

ঐ ময়ামগী মরক্তা হকথেংননা য়াওবা পামজবনি, অদুবু ঐগী থবক্না মরম ওইরগা য়াওবা ফংখিদ্রে‍। মরম অসিনা ঐনা তেক্নোলোজীগী খুদোংচাবা লৌজদুনা ময়ামগী মরক্তা তিঞ্জরি‍।

ভারত অসি কলচর কয়াগী ওইবা অঙকপনা থনবা অমদি য়াম্না লুবা ইতিনফম অমনি‍। ঐখোয়না মালেমসিগী খ্বায়দগী লিবা খুন্থোকশিংগী মরক্তা অমা ওইবগীদমক; অরিবা মতমগী ৱাখল লৌশিং, মতম নাইদ্রবা অর্কিতেকচর, মশক নাইরবা পারী পুরীগী লনথুম, মতম নাইদ্রবা চৎনবী, মশিং থিঙমদ্রবা পুক্নিং চিংশিনফমশিং, ইনাক খুল্লবা নাৎ অমদি ক্রিএতিব আর্তকীদমক চাউথোকচৈ‍।

সিনেমানা ভারতকী তশেং তশেংবা নাৎ, শেন্মিৎলোন অমদি খুন্নাইগী ইহৌ অমসু চাওখৎপগী শক্তমবু লোকশিন্দুনা পুৱারীগী চেনাশিংদা মায় পাক্না চনশিল্লি‍। অদুগা ‘ফেস্তিবেল দি কেন্স’না ঐখোয়গী সিনেমাতিক এক্সেলেন্সপু য়োকখৎপখক নত্তনা ভারত ফ্রান্সকী মরক্তা লৈনরিবা মরীবু হেন্না মপাঙ্গল কনখৎহন্নবগী মরুওইবা শক্লোন অমা লৌরি‍। মমাঙ চহিদা, মার্স দু ফিল্মদা ঐখোয়গী লৈবাক অসিনা ইহান হানবা ‘কন্ত্রী ওফ ওনর’ ওইদুনা ফিল্মমেকরশিং অমদি কন্তেন্ত ক্রিএতরশিংবু ভারত্তা লাক্তুনা ফিল্ম নম্লনবগীদমক পুক্নিং থৌগৎনবা স্কীম অনি লাউথোকখি‍। মখোয়শিং অদুদি – ইন্সেন্তিব স্কীম ফোর ওদিও-ভিজুএল কো-প্রদক্সন অমদি ইন্সেন্তিব স্কীম ফোর সুতিং ওফ ফোরেন ফিল্মস ইন ইন্দিয়ানি‍।

চহি অসিদা, ইন্দিয়া পেভিলিয়ন্না কন্তেন্ত দিভেলপমেন্ত অমদি পোস্ত-প্রদক্সনগী লমদা লৈরিবা ঐখোয়গী মতিং শীজিন্নদুনা ভারতকী ক্রিএতিব ইকনমী উত্থোক্নবা পান্দম থম্লি‍।

অহানবা ওইনা চহি অসিদা ঐখোয়না কেন্স ফিল্ম ফেস্তিবেলদা ভারতকী অৱাং নোংপোক স্তেতশিংদগী হৈথোই শিংথোইরবা ফিল্মমেকরশিংগী ওইবে ওফিসিএল দেলিগেসন অমা থারি‍। মসিদা লৈরিবা ৱাখল্লোন্দি, ঐখোয়না লৈবাকসিগী লম লমগী ওইবা খেন্নবা মখলগী ফিল্মমেকিংবু মশক খঙদুনা য়োকখৎপগা লোয়ননা ভারতকী ইনাক খুল্লবা সিনেমাগী কলচরগী নুংদা লৈরিবা অমদি খেন্নবা মশকশিংবু কেন্সতা পুরকপনি হায়না মহাক্না হায়খি‍।

চহি অসিগী কেন্স ক্লাসিক সেক্সন্দা খল্লক্লবা মনিপুরী লোলগী ফিল্ম ‘ইসানৌ’গী নেগেতিবশিংবু, ভারত লৈঙাক্না শেল থাদদুনা চলাইবা ওর্গনাইজেসন অমা ওইরিবা, নেস্নেল ফিল্ম অর্কাইব ওফ ইন্দিয়ানা দিজিতেলাইজ তৌরে হায়না পাউদম্বদা ঐ হরাওবা ফাওই‍।

চহি অসিদা, অমুক্কা হন্না, ভারতনা ঐখোয়গী লৈবাক্কী সিনেমাতিক এক্সেলেন্স, তেক্নোলোজিগী মপাঙ্গল, অপুনবগী কলচর অমদি মশক মচু নাইরবা ৱারী লিবগী হেরিতেজগী ত্রেলর অমনা মালেমগী অয়েংবশিংগী মীৎ থক্কৎহল্লে‍।

ফিল্ম অহুম তোপ তোপ্পা কাঙলুপ অহুমদা খল্লকপগা লোয়ননা মখোয়গী মরক্তা ২ না ওস্কার ফংলক্লিবসিগা লোয়ননা মালেম অসিনা ভারতকী ফিল্ম ইন্দস্ত্রীগী ক্রিএতিবিতী, কন্তেন্ত অমদি তেক্নিকেলগী ওইবা মতিংশিং খঙবা হৌরকপদা ঙাইরিবনি‍।

ইকায় খুম্নরবা প্রধান মন্ত্রী মিস্তর নরেন্দ্র মোদীগী ইচঙ থৌরবা লুচিং মখাদা, ভারত লৈঙাক্না সিঙ্গল ৱিন্দো ফেসিলিতেসন এন্দ ক্লিয়রেন্স ফোর্ম ফিল্মিং অমদি এ.ভি.জি.সি.গী তাস্কফোর্ম অমা লিংখৎপনচিংবা থৌরাং কয়াগা লোয়ননা ফিল্ম সেক্তরদা লৈরিবা খুদোংচাবশিং য়োকখৎনবা অমদি পাকথোক চাউথোকহন্নবা থবক পায়খৎলি‍।

মপাঙ্গল কনবা ৱারি খুৎলি, অৱাংবা থাক্কী স্কিলদা য়ুম্ফম ওইদুনা কন্তেন্ত খন্দোকপা অমদি পোস্ত প্রদক্সন অমসুং কো-প্রদক্সনগী মতাঙদা লৈবাক ১৬কা য়ানবা ৱাফম থমদুনা, ভারতনা মালেম পুম্বগী ফিল্মমেকরশিংগী পুক্নিং চিংশিন্নিংঙাই ওইরবা লমথুংফম অমা ওইরক্লি‍।

মার্স দু ফিল্মগী ইন্দিয়া পেভিলিয়ন্না ক্রিএতিবিতী অমদি কন্তেন্ত ক্যুরেসনগী ৱারী ৱাতায়, অমদি কো-ক্রিএসন, কোলাবোরেসন য়োকখৎপা অমদি ভারত অমদি মালেমগী মরক্তা তেংবাংনবগী অনৌবা ফীভম কয়া পুরকপা ঙমগনি হায়না ঐনা থাজৈ‍।

ঙসি, ভারতনা খুদোংচাবা কয়াগী ইফুৎ অমা পীরিবসিদা ৱারী লিবশিংগী লমদম অসিনা সিনেমাগী তাইবংগী মীৎয়েঙফম ওইরকপদা করিসু ঙক্নিংঙাই ওইদে!

ঐনা ময়াম পুম্নমকপু চহি অসিগী লোইশিল্লকপদা গোৱাদা পাঙথোক্কদবা ৫৪শুবা ইন্তরনেস্নেল ফিল্ম ফেস্তিবেল ওফ ইন্দিয়া (আই.এফ.এপ.আই. ৫৪)দা অমুক হন্না উননবা খৌরাংনা ঙাইজরি‍।

অদোমবু থাগৎচরি!

জয় হিন্দ

জয় ভারত!

****