U Myntri khynnah jong ka Sorkar Pdeng ba dei khmih ia ka Tnat Information and Broadcasting, u Dr L Murugan mynta ka sngi u la plie ia ka India Pavilion ha Cannes ha Marché du Film ha ka jingdonlang u Jawed Ashraf, Nongrah ktien jong ka India sha France, u Prithul Kumar, Joint Secretary, MIB bad ki khlur ak phlim jong ka ri.

Ha ka jingai jingkren sha ki delegate na India ha ka jingialang ba kynthup ki khlur ak phlim bad ki ophisar, u Dr Murugan u la ong ba mynta ka India kadei ka nongpynmih phlim ba heh tam ha pyrthei ha kaba ki don palat 3000 tylli ki phlim ha palat 50 tylli ki ktien. Kine ki phlim ki rah ia ka khubor jong ka bor jong ka India ha ka jingiathuh khana sha kylleng ka pyrthei. Da kaba ai nuksa ia ka Elephant Whisperers of Mudumalai ba pawnam bha mynta, u Myntri u la ban ba mynta ki prokram ba bha kim ithuh ia u pud u sam bad ngi sakhi ia ka por ha kaba ki prokram na India ki dang iaid na ka ri sha kiwei kiwei ki ri.

U Dr Murugan u la kynmaw ia ka jingjop ba dang shen jong ki phlim jong ka ri bad ki nongshna phlim ha rynsan shabar ri bad bynrap ba mynta kalong kaba eh ban lap ia ka phlim khlem ka kyrteng jong ki briew na ka ri ha kiba don bynta ha ka animation ne ka VFX. U la ong shuh shuh ba ki kam shna phlim ha ka ri ki don hapdeng ki jingkylla ba kongsan ha kine ki snem da ka jingdon ki teknoloji ba thymmai bad ka jingkiew ki rynsan digital bad streaming. 

U Myntri u la ong ba ka ki kam media bad jingpynbyrnia jong ka ri ki don ha ka khep ban mad ia ka jingkiew kaba 11.4% ha u 2023, ka ban kyntiew ia ka jingkamai sha ka INR 2.36 trillion. Kane ka jingkiew kalong ka dak jong ka jingkhlain ki kam M&E jong ka ri bad ka jingplie ia ki lad ba thymmai, wat ha ka jingkylla sted ka jinglong ki kam digital. U la bynrap shuh shuh ba hadien ka khlam Covid, ki jingiohnong gross box office jong u snem 2022 ha India ki la kiew jan lai shah ki jingiohnong jong u snem 2021 sha ka 1.3 billion USD, bad la khmih lynti ban kot sha ka 3 billion USD hashuwa u 2025.

Haba ai jingkren shaphang ki sienjam ba la shim da ka Tnat na ka bynta ban pynkhlain ia ki jingdon jingem ba iadei bad ki kam shna phlim ha India, u Dr Murugan u la ong ba ki sienjam lyngba ka Digital India, Start Up India, ka jingpynpoi ia ki kam telecom sha ki jaka nongkyndong, ki jingpynkylla ha ki polisi ka wanrah ia ki jinglong jingman kiba plié lad ia ka jingioh ia ka data kaba jem dor kaba buh ia ka nongrim kaba khlain na ka bynta ka jingsaindur. “Ka bor jong ngi ha kaba iadei bad ka teknoloji jong ka IT ryngkat ka jingiasohlang ki sap jong ki barikor, ka pynlong ia ka India kaba biang bha ban long ka nongpynmih prokram na ka bynta ka pyrthei. Ka sorkar jong ngi ka la sdang ia ka task force ban kyntiew ia kane ka kam. Ka National Centre of Excellence na ka bynta ka AVGC ruh ka dei kaba dang pynkhreh,” u la bynrap

U Dr Murugan u la tyrwa ia ka India kum ka jaka ring phlim kaba itynnad na ka bynta ki phlim nabar ri bad ong ba ka sorkar ka trei borbah ban kyntiew ia ka India kum kaba khring ia ki kam shna phlim na kylleng ka pyrthei kynthup ka jingring phlim, ka jingiatreilang ha ka kam pynmih phlim, animation bad ka jingpynmih prokram ha ka dor kaba jem.

U Myntri u la pynpaw ka jingkyrmen ba hadien ki jingpynbna ia ki jingioh jingmyntoi ha ka jingshna phlim da u Myntri sorkar pdeng u Anurag Thakur ha u snem ba ladep ha Cannes, ka jingiashim bynta ka India ha Cannes ha u 2023 kan rah shakhmat ia kane ka bor. Katba ka India ka pynkhreh ban pynlong ia ka G20 summit, u la ong ba “ngi phakhmat kyrpang halor ka jingkongsan ka deiriti & ki kam jngoh kai. Ngi thmu ban pyndonkam ia ka bor jong ka jingshna prokram bad ki kam pynbyrnia ban pynlong ia ka deiriti kum ka bor jong ka jingpdiang ia baroh, ka jingkhyllie im ia ka ioh ka kot ha ka rukom ba iaineh bad ruh ka roi ka par, kaba plie lad na ka bynta ka lawei kaba bha ia baroh. Kawei ka Pyrthei- Kawei ka longiing- Kawei ka Lawei kadei ka lynti shakhmat.”

U Myntri u Anurag Thakur u la ai jingkren lyngba ka video. Ha ka jingkren jong u, u Myntri u la ong ba ka “Festival de Cannes’ ka long ka bynta ba kongsan ym tang ban kyntiew ia ka jingtbit jong ngi ha ki kam phlim hynrei ruh ban pynkhlain ia ki jingiadei ka India bad ka France.

U la ban ba ha ka sien ba nyngkong mynta u snem, ngi la phah ia ka kynhun jong ki nongshna phlim ba donsap na ki jylla ka thain shatei lammihngi jong ka ri sha ka Cannes Film Festival. U la ong ba ka jing thmu kalong ban wanrah sha Cannes ia ka jingiar jong ka deiriti shna phlim jong ka India katba ngi ithuh bad kyntiew ia ka jingiapher ha ki thain ha ki kam shna phlim hangne hapoh ri. U la pyntip sha ki nongiashim bynta ba ka National Film Archive of India ka la pynkylla digital ia ka ‘Ishanou,’ ka phlim ha ka ktien Manipuri, kaba la shah jied ha ka Cannes Classic Section mynta u snem. 

U Thakur u la ong shuh shuh lyngba ka jingshah jied 3 tylli ki phlim ha 3 tylli ki kyrdan bad 2 tylli na ki, ki la ioh ia ki Oscar- ka pyrthei ka dang iohi tang khyndait ia ka jingtbit bad ka bor pynmih prokram ki kam shna phlim ka India. Da ki khana kiba khlain, ka jingpynmih ia ki prokram da ka jingtbit bad ka bor ha ki kam hadien ba la dep shna ia ki prokram, bad ruh ki jingiakut ban pynmih prokram lang bad 16 tylli ki ri, ka India ka la long ka jaka kaba khring ia ki nongshna phlim na kylleng ka pyrthei, u la bynrap.

Hashuwa kane, u Jawed Ashraf, Nongrah ktien ka India sha France, ha ka jingai jingkren jong u ha ka jingialang u la kyntu ia kaba kham heh, kaba kham ryntih ka jingiashim bynta ha Cannes bad kiwei kiwei ki tamasa, bad na ka bynta ka jingtrei kham jur ban kyntiew ia ki phlim jong ka ri. Ka jingbun ki nongiashim bynta kan wanrah ka jingryntih bad ka bor jong ki kam shna phlim jong ka ri.

U Guillaume Esmiol, Executive Director, Marche du Film ha Cannes Film Festival u la ong ba ka India kadei ka ri kaba kongsan na ka bynta ki kam shna phlim kylleng ka pyrthei da kaba long ka iew kaba khlain bad ruh lyngba ka jingiar jong ki kam shna phlim.

Ha kane ka jingialang la sakhi ruh ia ka jingpyllait ia ka poster bad ka trailer na ka bynta ka 54^th Indian Film Festival jong ka India ban long ha Goa ha u Naiwieng, 2023.

Ka Video Message jong ka HMIB na ka bynta ka 76^th Cannes Film Festival

Namaskar!

Ka jingpdiang sngewbha ia ki delegate jong ngi, ki heh ki hain, kiba shah khot sngewbha bad ki paralok na ki kam shna phlim kylleng ka pyrthei kiba iadonlang hangne na ka bynta ka jingplie ia ka India Pavilion ha Marché du Film ha ka 76^th Festival de Cannes.

Nga la kwah ban iadonlang ha kane ka jingialang bad phi baroh, hynrei namar ki kam jong nga, ngam lah ban iadonlang. Kumta nga don hangne da kaba pyndonkam ia ka teknoloji.

Ka India kadei ka jaka kaba bun ki jingshem kiba iadei bad ka deiriti. Ngi sngewsarong ban long kawei na ki imlang sahlang ba la rim tam ha pyrthei, ka jaka ba iakhleh ki jingnang jingstad hyndai, ki rukom shna jingshna ba hyndai, ka deiriti ba itynnad bha, ki rukom im kiba neh, ki jingkhring kiba bun, ka nongrim kaba iar bad ki kam saindur kiba itynnad.

Ki kam shna phlim ki la pyni ia ka deiriti, ka ioh ka kot ka imlang sahlang bad ka roi ka par jong ka India. Bad ka ‘Festival de Cannes’  ka don ka bynta ba kongsan ym tang ban kyntiew ia ka jingtbit jong ngi ha ki kam shna phlim hynrei ruh ban pynkhlain ia ki jingiadei hapdeng ka India bad ka France. Ha u snem ba ladep, ka ri jong ngi kalong ka 'Country of Honour'  kaba nyngkong eh ha Marchè Du Film  ha kaba ngi la pynbna artylli ki skhim ban pynshlur ia ki nongshna phlim bad ki content creator ban wan bad ring phlim ha India. Kine kilong ka - The Incentive Scheme for Audio-Visual Co-production bad Incentive Scheme for Shooting of Foreign films in India.

Mynta u snem, ka India Pavilion ka thmu ban pyni ia ka ioh ka kot jong ka India lyngba ka jingsaindur da kaba pyndonkam ia ki jingtbit jong ngi ha ka jingthaw ia ki prokram bad ki kam hadien ba la dep pynmih prokram.

Ha ka sien ba nyngkong mynta u snem, ngi la phah ia ka kynhun jong ki nongshna phlim ba don sap na ki jylla ka thain shatei lammihngi jong ka India sha Cannes Film Festival . Ka jing thmu kalong ban wanrah ka jingsngewthuh ia ka jinglong bad ka jingiar jong ki kam shna phlim ha ka ri katba ngi ithuh bad kyntiew ruh ia ki kam shna prokram ha ka ri.

Nga sngewkmen ban iasam bad phi, ba ka National Film Archive of India (NFAI), kaba long ka kynhun ba bei tyngka da ka Sorkar India, ka pynkylla digital ia ka ‘Ishanou’, ka phlim ha ka ktien Manipuri, ba la shah jied ha ka Cannes Classic Section mynta u snem.

Mynta u snem, sa shisien ka India ka la pyniap bieit ia ki briew kylleng ka pyrthei da ka trailer jong ka jingbha ki kam shna phlim ha ka ri, ka jingtbit ha ki kam teknoloji, ka deiriti bad ka dustur iathuh khana.

Lyngba ka jingshah jied 3 tylli ki phlim ha ki 3 tylli ki kyrdan bad 2 tylli na ki ki la ioh Oscar- ka pyrthei ka dang iohi tang khyndiat ia ka jingsaindur ka bor teknoloji bad bor pynmih prokram jong ki kam shna phlim jong ka India

Ka Sorkar India, hapoh ka jingialam ba tbit u Myntri Rangbah duh u Narendra Modi, ka la trei ban pynsuk bad pyniar ia ki lad ha ki kam shna phlim lyngba ki sienjam kum ka single-window bad ka jingioh jingbit ban ring phlim bad ka jingplie ia ka taskforce halor ka AVGC.

Lyngba ki khana kiba khlain, ka jingpynmih prokram da ka jingtbit bad ka bor ha ki kam hadien ba la pynmih prokram bad ka jingiatreilang bad 16 tylli ki ri, ka India ka la kylla sha ka jaka kaba khring bha ia ki nongshna phlim na kylleng ka pyrthei.

Nga ngeit skhem ba, ka India Pavilion ha Marchè du Film kan wanrah ia ki jingiakren ba thymmai shaphang ka jingsaindur bad ka jingpynmih prokram bad kan kyntiew ia ka jingiatreilang ban pynmih prokram, ka jingiatreilang hapdeng ka India bad ki ri ka pyrthei.

Mynta, ka India ka plie ki lad bapher bapher, dei namar kata ba ka ri jong ki nongiathuh khana ka ktik ia ki jingmut jingpyrkhat jong kiba don kti ha ki kam shna prokram na kylleng ka pyrthei!

Nga phaikhmat ban iohi iaphi baroh ha ka 54^th International Film Festival of India (IFFI 54) ban long ha Goa, mynta u snem

Khublei!

Jai Hind.

Jai Bharat!