ಕೇಂದ್ರ ಮಹಿಳಾ ಮತ್ತು ಮಕ್ಕಳ ಅಭಿವೃದ್ಧಿ ಸಚಿವೆ (ಡಬ್ಲ್ಯುಸಿಡಿ) ಶ್ರೀಮತಿ ಸ್ಮೃತಿ ಜುಬಿನ್ ಇರಾನಿ ಅವರು 10 ಮೇ 2023 ರಂದು ನವದೆಹಲಿಯ ವಿಜ್ಞಾನ ಭವನದಲ್ಲಿ ಆರಂಭಿಕ ಬಾಲ್ಯದ ಆರೈಕೆ ಮತ್ತು ಶಿಕ್ಷಣವನ್ನು (ಇಸಿಸಿಇ) ಬಲಪಡಿಸುವ ಕುರಿತು ಆಯೋಜಿಸಲಾದ ರಾಷ್ಟ್ರೀಯ ಕಾರ್ಯಕ್ರಮದಲ್ಲಿ “ಪೋಷಣ್ ಭಿ, ಪಢಾಯಿ ಭಿ” ಅಂದರೆ "ಪೋಷಣೆಯೊಂದಿಗೆ ಶಿಕ್ಷಣ" ಕಾರ್ಯಕ್ರಮಕ್ಕೆ ಚಾಲನೆ ನೀಡಿದರು. ಮಹಿಳಾ ಮತ್ತು ಮಕ್ಕಳ ಅಭಿವೃದ್ಧಿ ರಾಜ್ಯ ಸಚಿವರಾದ ಶ್ರೀ ಮುಂಜಪರಾ ಮಹೇಂದ್ರಭಾಯಿ, ಮಹಿಳಾ ಮತ್ತು ಮಕ್ಕಳ ಅಭಿವೃದ್ಧಿ ಕಾರ್ಯದರ್ಶಿ ಶ್ರೀ ಇಂದೇವರ್ ಪಾಂಡೆ ಮತ್ತು ಸಚಿವಾಲಯದ ಇಸಿಸಿಇ ಕಾರ್ಯಪಡೆಯ ಅಧ್ಯಕ್ಷ ಶ್ರೀ ಸಂಜಯ್ ಕೌಲ್ ಈ ಸಂದರ್ಭದಲ್ಲಿ ಉಪಸ್ಥಿತರಿದ್ದರು.

800ಕ್ಕೂ ಹೆಚ್ಚು ರಾಜ್ಯ ಪ್ರತಿನಿಧಿಗಳು, ಐಸಿಡಿಎಸ್ ಪದಾಧಿಕಾರಿಗಳು, ಸಿಡಿಪಿಒಗಳು, ಮೇಲ್ವಿಚಾರಕರು ಮತ್ತು ಅಂಗನವಾಡಿ ಕಾರ್ಯಕರ್ತೆಯರ ಸಮ್ಮುಖದಲ್ಲಿ ಕೇಂದ್ರ ಸಚಿವೆ ಶ್ರೀಮತಿ ಸ್ಮೃತಿ ಜುಬಿನ್ ಇರಾನಿ ಮುಖ್ಯ ಭಾಷಣ ಮಾಡಿದರು. ರಾಷ್ಟ್ರೀಯ ಶಿಕ್ಷಣ ನೀತಿ 2020 (ಎನ್‌ಇಪಿ) ಅಡಿಯಲ್ಲಿ ಗುರುತಿಸಲಾದ ಪ್ರಮುಖ ಅಭಿವೃದ್ಧಿ ವಲಯಗಳಲ್ಲಿ ಅವರ ಕೌಶಲ್ಯಗಳನ್ನು ಅಂದರೆ, ದೈಹಿಕ/ಮೋಟಾರ್, ಅರಿವು, ಸಾಮಾಜಿಕ-ಭಾವನಾತ್ಮಕ-ನೈತಿಕ, ಸಾಂಸ್ಕೃತಿಕ/ಕಲಾತ್ಮಕ, ಮತ್ತು ಸಂವಹನ ಮತ್ತು ಆರಂಭಿಕ ಭಾಷೆಯ ಅಭಿವೃದ್ಧಿ, ಸಾಕ್ಷರತೆ ಮತ್ತು ಸಂಖ್ಯಾಶಾಸ್ತ್ರದ ಅಡಿಯಲ್ಲಿ ' ಪೋಷಣ್ ಭಿ ಪಢಾಯಿ ಭಿ' ಬೆಳೆಸುವತ್ತ ಗಮನಹರಿಸುವುದರೊಂದಿಗೆ, 6 ವರ್ಷಕ್ಕಿಂತ ಕಡಿಮೆ ವಯಸ್ಸಿನ ಎಲ್ಲಾ ಮಕ್ಕಳ ಸಮಗ್ರ ಅಭಿವೃದ್ಧಿಯನ್ನು ಖಾತರಿಪಡಿಸುವ ಸರ್ಕಾರದ ಬದ್ಧತೆಯಾಗಿದೆ. ಇದು ರಾಷ್ಟ್ರೀಯ ಶಿಕ್ಷಣ ನೀತಿ ಮತ್ತು ಮಹಿಳಾ ಮತ್ತು ಮಕ್ಕಳ ಅಭಿವೃದ್ಧಿ ಸಚಿವಾಲಯದಿಂದ ಸ್ಥಾಪಿಸಲಾದ ಇಸಿಸಿಇ ಕಾರ್ಯಪಡೆಯ ಶಿಫಾರಸುಗಳ ಅನುಸಾರವಾಗಿದೆ. ಕಾರ್ಯಪಡೆಯ ಶಿಫಾರಸುಗಳು ರಾಜ್ಯ ಸರ್ಕಾರಗಳು, ತಜ್ಞರು ಮತ್ತು ಮುಖ್ಯವಾಗಿ ಪೋಷಕರು ಮತ್ತು ಸಮುದಾಯದೊಂದಿಗಿನ ಸಮಗ್ರ ಸಮಾಲೋಚನೆಯ ಫಲಿತಾಂಶವಾಗಿದೆ ಎಂದು ಸಚಿವರು ಒತ್ತಿ ಹೇಳಿದರು.

ಹೊಸ ಬೋಧನಾ ಸಾಮಗ್ರಿ (ಟಿಎಲ್‌ಎಂ) ಮತ್ತು ವಿಧಾನಗಳ ಕುರಿತು ಮಾತನಾಡಿದ ಕೇಂದ್ರ ಸಚಿವರು, 1 ಲಕ್ಷ ಚಟುವಟಿಕೆಗಳ ಮೂಲಕ 10,000 ಕ್ಕೂ ಹೆಚ್ಚು ಸಮುದಾಯಗಳಲ್ಲಿ 1.5 ಮಿಲಿಯನ್ ಪೋಷಕರೊಂದಿಗೆ ಇಸಿಸಿಇ ಮತ್ತು ಧ್ವನಿ-ದೃಶ್ಯ ವಸ್ತುಗಳನ್ನು ಪರೀಕ್ಷಿಸಲಾಗಿದೆ ಎಂದು ತಿಳಿಸಿದರು. ಸಾಮಾಜಿಕ ನ್ಯಾಯ ಮತ್ತು ಸಬಲೀಕರಣ ಸಚಿವಾಲಯ ಮತ್ತು ರಾಜ್ಯಗಳಲ್ಲಿನ ಸಂಬಂಧಿತ ಇಲಾಖೆಗಳ ಸಹಯೋಗದೊಂದಿಗೆ ಅಂತರ್ಗತ ಬೋಧನಾ ಕಲಿಕಾ ಸಾಮಗ್ರಿಗಳನ್ನು ಅಭಿವೃದ್ಧಿಪಡಿಸುವ ಪ್ರಾಮುಖ್ಯತೆಯನ್ನು ಅವರು ಒತ್ತಿ ಹೇಳಿದರು, ಇದರಿಂದಾಗಿ ದಿವ್ಯಾಂಗ ಮಕ್ಕಳಿಗಾಗಿ ಇಸಿಸಿಇಯಲ್ಲಿ ವಿಧಾನಗಳನ್ನು ಅಭಿವೃದ್ಧಿಪಡಿಸಲಾಗಿದೆ ಮತ್ತು ಅಂಗನವಾಡಿ ಕಾರ್ಯಕರ್ತರು ತಮ್ಮ ಮಕ್ಕಳನ್ನು ಅಂಗನವಾಡಿ ಕೇಂದ್ರಗಳಿಗೆ ಕಳುಹಿಸಲು ಪೋಷಕರಿಗೆ ಸಲಹೆ ನೀಡಬಹುದು ಎಂದರು.

ಅಡಿಪಾಯ ಅಭಿವೃದ್ಧಿಯಲ್ಲಿ ಟಿಎಲ್‌ಎಂ ಆಗಿ ಆಟಿಕೆಗಳ ಪಾತ್ರದ ಮಹತ್ವವನ್ನು ಹೇಳಿದ ಕೇಂದ್ರ ಸಚಿವರು, ಸ್ಥಳೀಯವಾಗಿ ಮತ್ತು ಸುಲಭವಾಗಿ ಲಭ್ಯವಿರುವ ಮರ, ಬಟ್ಟೆ, ಮಣ್ಣು, ಜೇಡಿಮಣ್ಣು ಮುಂತಾದ ವಸ್ತುಗಳೊಂದಿಗೆ ಸ್ಥಳೀಯ ಮತ್ತು ಡಿಐವೈ ಆಟಿಕೆಗಳ ರಚನೆಯ ಬಗ್ಗೆ ಮಾತನಾಡಿದರು, ಇದು ಅಂಗನವಾಡಿ ಕೇಂದ್ರಗಳನ್ನು ಆಟಿಕೆಗಳ ರಾಷ್ಟ್ರೀಯ ಕ್ರಿಯಾ ಯೋಜನೆ (ಎನ್‌ ಎ ಪಿ ಟಿ) ಯಡಿ ತಂದಿದೆ ಎಂದರು.

ವಿಶ್ವಸಂಸ್ಥೆಯ ಮಾನದಂಡಗಳ ಪ್ರಕಾರ ಸುಮಾರು 7 ಕೋಟಿ ಮಕ್ಕಳ ಎತ್ತರ ಮತ್ತು ತೂಕವನ್ನು ಅಳೆದ ಮತ್ತು ಮಾರ್ಚ್ 2023 ರಲ್ಲಿ ಪೋಷಣಾ ಪಾಕ್ಷಿಕದ ಸಮಯದಲ್ಲಿ  ಪೋಷಣ್ ಟ್ರ್ಯಾಕರ್ ಐಸಿಟಿ ವೇದಿಕೆಯಲ್ಲಿ ಮಾಹಿತಿಯನ್ನು ಅಪ್ಲೋಡ್ ಮಾಡಿದ ಅಂಗನವಾಡಿ ಕಾರ್ಯಕರ್ತೆಯರ ಉತ್ಸಾಹ ಮತ್ತು ಬದ್ಧತೆಯನ್ನು ಕೇಂದ್ರ ಸಚಿವರು ಅಭಿನಂದಿಸಿದರು. ಇದಕ್ಕೆ ವಿಶ್ವದಲ್ಲಿ ಸಾಟಿಯಿಲ್ಲ ಸಾಧನೆ ಎಂದು ಶ್ಲಾಘಿಸಿದರು. ಅಂಗನವಾಡಿಗಳಲ್ಲಿ ಮತ್ತು ಮಕ್ಕಳ ಅಭಿವೃದ್ಧಿಗೆ ಸಮಗ್ರವಾಗಿ ಕೊಡುಗೆ ನೀಡುವ ಸಾಮರ್ಥ್ಯದಲ್ಲಿ ಅಂಗನವಾಡಿ ಸಹೋದರಿಯರ ಬಗ್ಗೆ ದೇಶದ ಸಾಮೂಹಿಕ ವಿಶ್ವಾಸವನ್ನು ಪ್ರತಿಧ್ವನಿಸಿದರು. ರಾಷ್ಟ್ರೀಯ ಸಾರ್ವಜನಿಕ ಸಹಕಾರ ಮತ್ತು ಮಕ್ಕಳ ಅಭಿವೃದ್ಧಿ ಸಂಸ್ಥೆ (NIPCCD) ನೇತೃತ್ವದ ನಾಟಕ ಆಧಾರಿತ ಶಿಕ್ಷಣದೊಂದಿಗೆ ಮೂರು ದಿನಗಳ ವಿಶೇಷ ECCE ತರಬೇತಿಯ ಮೂಲಕ 1.3 ದಶಲಕ್ಷಕ್ಕೂ ಹೆಚ್ಚು ಅಂಗನವಾಡಿ ಕಾರ್ಯಕರ್ತೆಯರಿಗೆ ಇಸಿಸಿಇ ತರಬೇತಿ ಮತ್ತು ಬೋಧನಾ ಕಲಿಕಾ ಸಾಮಗ್ರಿಗಳಿಗಾಗಿ ಪ್ರಸ್ತಾಪಿಸಲಾದ ವರ್ಧಿತ ಬಜೆಟ್ ನೊಂದಿಗೆ ಹೆಚ್ಚುವರಿ ಬೆಂಬಲವನ್ನು " ಪೋಷಣ್ ಭಿ , ಪಢಾಯಿ ಭಿ" ಕಾರ್ಯಕ್ರಮದ ಅಡಿಯಲ್ಲಿ ಘೋಷಿಸಲಾಯಿತು.

ಮಹಿಳಾ ಮತ್ತು ಮಕ್ಕಳ ಕಲ್ಯಾಣ ರಾಜ್ಯ ಸಚಿವ ಶ್ರೀ ಮುಂಜಪರಾ ಮಹೇಂದ್ರಭಾಯಿ, ಪೋಷಣೆಯನ್ನು ಮನೆಮಾತಾಗಿಸುವಲ್ಲಿ ಭಾರತದ ಸಾಧನೆಯನ್ನು ಗುರುತಿಸಿದರು. "ಒಟ್ಟಾಗಿ, ನಾವು ನಮ್ಮ ವ್ಯವಸ್ಥೆಗಳು ಮತ್ತು ನಮ್ಮ ಆಲೋಚನೆಗಳನ್ನು ಸ್ವಚ್ಛಭಾರತ್‌ನಲ್ಲಿನ ಮೂಲಭೂತ ನೈರ್ಮಲ್ಯದಿಂದ, ಪೋಷಣ್ ಅಭಿಯಾನದಲ್ಲಿ ಉತ್ತಮ ಪೌಷ್ಟಿಕಾಂಶದ ಅಭ್ಯಾಸಗಳವರೆಗೆ ಮತ್ತು ಈಗ " ಪೋಷಣ್ ಭಿ, ಪಢಾಯಿ ಭಿ” ವರೆಗೆ ಬದಲಾಯಿಸಲು ಪ್ರಯತ್ನಿಸುತ್ತಿದ್ದೇವೆ" ಎಂದು ಅವರು ಹೇಳಿದರು.

ಮಹಿಳಾ ಮತ್ತು ಮಕ್ಕಳ ಕಲ್ಯಾಣ ಕಾರ್ಯದರ್ಶಿ ಶ್ರೀ ಇಂದೇವರ್ ಪಾಂಡೆ ಮಾತನಾಡಿ, “ಪೋಷಣ್ ಭಿ, ಪಢಾಯಿ ಭಿ” ಅಡಿಯಲ್ಲಿ ಅಂಗನವಾಡಿ ಕೇಂದ್ರಗಳಲ್ಲಿ ಪ್ರತಿದಿನ 2 ಗಂಟೆಗಳ ಇಸಿಸಿಇ ಬೋಧನೆಯನ್ನು ಸಾಧಿಸುವ ಪ್ರಯತ್ನವನ್ನು ಪ್ರಸ್ತಾಪಿಸಿದರು, ಅದನ್ನು ಮಾತೃಭಾಷೆಯಲ್ಲಿ ಮಾಡಲಾಗುತ್ತದೆ ಮತ್ತು ರಾಜ್ಯ ಪಠ್ಯಕ್ರಮದ ಮೂಲಕ ರಾಷ್ಟ್ರೀಯ ಪಠ್ಯಕ್ರಮ ಚೌಕಟ್ಟಿಗೆ ಜೋಡಿಸಲಾಗುತ್ತದೆ ಎಂದರು. 0-3 ವರ್ಷ ವಯಸ್ಸಿನ ಮಕ್ಕಳಿಗೆ ಆರಂಭಿಕ ಪ್ರೋತ್ಸಾಹ ಮತ್ತು ಮಕ್ಕಳು ಹಾಜರಾಗಲು ಎದುರುನೋಡುವ ರೋಮಾಂಚಕ ಕಲಿಕಾ ಕೇಂದ್ರಗಳಾಗಿ ಅಂಗನವಾಡಿ ಕೇಂದ್ರಗಳನ್ನು ನಿರ್ಮಿಸುವ ಅಗತ್ಯತೆ ಸೇರಿದಂತೆ ದೇಶದ ಕಿರಿಯ ಜನಸಂಖ್ಯೆಯ ಸಮಗ್ರ ಅಭಿವೃದ್ಧಿಯ ಸಾಮೂಹಿಕ ಜವಾಬ್ದಾರಿಯನ್ನು ಅವರು ಒತ್ತಿ ಹೇಳಿದರು. ಈ ನಿಟ್ಟಿನಲ್ಲಿ ದೇಶದ ಎಲ್ಲ ಮಿನಿ ಅಂಗನವಾಡಿ ಕೇಂದ್ರಗಳನ್ನು ಪೂರ್ಣ ಪ್ರಮಾಣದ ಅಂಗನವಾಡಿ ಕೇಂದ್ರಗಳನ್ನಾಗಿ ಪರಿವರ್ತಿಸಲು ನೀತಿ ನಿರ್ಧಾರ ಕೈಗೊಳ್ಳಲಾಗಿದೆ ಎಂದು ಅವರು ತಿಳಿಸಿದರು.

ಕಾರ್ಯಕ್ರಮದಲ್ಲಿ "ಇಸಿಸಿಇಯಲ್ಲಿ ನಿಮ್ಮ ರಾಜ್ಯವು ಹೇಗೆ ಬೆಳೆಯಬಹುದು: ಪೂರ್ವನಿದರ್ಶನದಿಂದ ಕಲಿಯುವುದು" ಎಂಬ ಶೀರ್ಷಿಕೆಯ ಚರ್ಚೆಯನ್ನು ಆಯೋಜಿಸಲಾಯಿತು, ಇದು ಮಹಾರಾಷ್ಟ್ರ, ಮೇಘಾಲಯ, ತಮಿಳುನಾಡು ಮತ್ತು ಉತ್ತರ ಪ್ರದೇಶ ರಾಜ್ಯಗಳ ಇಸಿಸಿಇ ಉತ್ತಮ ಅಭ್ಯಾಸಗಳನ್ನು ಗುರುತಿಸಿತು, ಇದನ್ನು ಸಚಿವಾಲಯದ ಇಸಿಸಿಇ ಕಾರ್ಯಪಡೆ ಅಧ್ಯಕ್ಷರಾದ ಶ್ರೀ ಸಂಜಯ್ ಕೌಲ್ ನಡೆಸಿಕೊಟ್ಟರು. ಮೇಘಾಲಯ ಸರ್ಕಾರದ ಪ್ರಧಾನ ಕಾರ್ಯದರ್ಶಿ ಶ್ರೀ ಸಂಪತ್ ಕುಮಾರ್ ಮಾತನಾಡಿ, ಮಕ್ಕಳ ಆರೋಗ್ಯ, ಶಿಕ್ಷಣ ಮತ್ತು ಜೀವನದ ಫಲಿತಾಂಶಗಳನ್ನು ಸುಧಾರಿಸಲು ಇಸಿಡಿಯಲ್ಲಿ ಹೂಡಿಕೆಗೆ ಪ್ರಾಮುಖ್ಯತೆ ನೀಡಬೇಕು ಮತ್ತು ಅಂಗನವಾಡಿ ಕೇಂದ್ರಗಳನ್ನು ಇಸಿಇ ಕೇಂದ್ರಗಳಾಗಿ ಪರಿವರ್ತಿಸುವ ಬಗ್ಗೆ ಗಮನಹರಿಸಬೇಕು ಎಂದು ಹೇಳಿದರು.

ಐಸಿಡಿಎಸ್‌ನ ಉಪನಿರ್ದೇಶಕರಾದ ಶ್ರೀ ಮೊಹಮ್ಮದ್ ಜಾಫರ್ ಖಾನ್ ಅವರು ಉತ್ತರ ಪ್ರದೇಶ ರಾಜ್ಯದಲ್ಲಿ ಸಂಭವ್, ಪೋಷಣ್ ಪಾಠಶಾಲಾ ಮತ್ತು ಅಪೌಷ್ಟಿಕತೆಯನ್ನು ಕಡಿಮೆ ಮಾಡಲು ಮಾರ್ಗಸೂಚಿಯಂತಹ ವಿಭಿನ್ನ ಉಪಕ್ರಮಗಳ ಕುರಿತು ಮಾತನಾಡಿದರು. ಅಂಗನವಾಡಿ ಕೇಂದ್ರಗಳನ್ನು ಪರಿವರ್ತಿಸುವ ಅಗತ್ಯ ಶ್ರೀ ಸಂಪತ್ ಕುಮಾರ್ ಅವರ ಮಾತುಗಳನ್ನು ಪುನರುಚ್ಚರಿಸಿದ ಅವರು, ಬಾಲ ವರ್ಣಚಿತ್ರಗಳು, ಮಕ್ಕಳ ಸ್ನೇಹಿ ಪೀಠೋಪಕರಣಗಳು, ವೈಫೈ, ಎಲ್ಇಡಿ ಟಿವಿ ಇತ್ಯಾದಿಗಳನ್ನು ಸೇರಿಸುವ ಕುರಿತು ಮಾತನಾಡಿದರು.

ಐಸಿಡಿಎಸ್‌ ಆಯುಕ್ತೆ (ಹೆಚ್ಚುವರಿ ಪ್ರಭಾರ) ಡಾ. ಇಂದುರಾಣಿ ಜಾಖರ್, ಮಹಾರಾಷ್ಟ್ರದಲ್ಲಿ ಜಾರಿಗೊಳಿಸಲಾದ ಅತ್ಯುತ್ತಮ ಇಸಿಸಿಇ ಅಭ್ಯಾಸಗಳ ಬಗ್ಗೆ ಮಾತನಾಡಿದರು ಮತ್ತು ಅವರ ಟ್ರಿಪಲ್ A: ಆರಂಭ, ಆಕರ್, ಅಂಕುರ್ ತಂತ್ರವನ್ನು ಒತ್ತಿಹೇಳಿದರು. ಆಕರ್ ಅಂಗನವಾಡಿ ಕೇಂದ್ರ ಮಟ್ಟದಲ್ಲಿ ಇಸಿಸಿಇಯೊಂದಿಗೆ ವ್ಯವಹರಿಸುತ್ತದೆ ಮತ್ತು 2016 ರಿಂದ ಜಾರಿಗೊಳಿಸಲಾದ ಮಕ್ಕಳ ಕೇಂದ್ರಿತ ಶಾಲಪೂರ್ವ ಶಿಕ್ಷಣ ಕಾರ್ಯಕ್ರಮವಾಗಿದೆ. ಇದು ಪ್ರಾಯೋಗಿಕ ಕಲಿಕೆಯ ಮೂಲಕ ಮಗುವಿನ ಸಮಗ್ರ ಬೆಳವಣಿಗೆಯ ಮೇಲೆ ಕೇಂದ್ರೀಕರಿಸುತ್ತದೆ ಮತ್ತು ಅನುಷ್ಠಾನವಾದ 5 ವರ್ಷಗಳಲ್ಲಿ ಕಲಿಕೆಯ ಫಲಿತಾಂಶಗಳಲ್ಲಿ ಅಗಾಧವಾದ ಬೆಳವಣಿಗೆಯನ್ನು ತೋರಿಸಿದೆ ಎಂದರು.

ಸಮಾಜ ಕಲ್ಯಾಣ ಮತ್ತು ಮಹಿಳಾ ಸಬಲೀಕರಣ ಪ್ರಧಾನ ಕಾರ್ಯದರ್ಶಿ ಶ್ರೀ ಎಸ್.ಜೆ. ಚಿರು, 54 ಸಾವಿರ ಅಂಗನವಾಡಿಗಳು 22 ಲಕ್ಷಕ್ಕೂ ಹೆಚ್ಚು ಮಕ್ಕಳಿಗೆ ಸೇವೆ ಸಲ್ಲಿಸುತ್ತಿರುವ ತಮಿಳುನಾಡಿನ ದೃಷ್ಟಿಕೋನವನ್ನು ಮುಂದಿಟ್ಟರು. ಉತ್ತಮ ಅಭ್ಯಾಸಗಳನ್ನು ಪ್ರಸ್ತಾಪಿಸಿದ ಅವರು, ಆಡಿ ಪಾಡಿ ವಿಲಿಯಾಡು ಪಪ್ಪಾ (ಎಪಿವಿಪಿ) ಕಾರ್ಯಕ್ರಮದ ಕುರಿತು ಮಾತನಾಡಿದರು, ಇದು ಅಭಿವೃದ್ಧಿ ಮತ್ತು ವಯಸ್ಸಿಗೆ ಸೂಕ್ತವಾದ ವಾರ್ಷಿಕ ಮತ್ತು ಸಂದರ್ಭೋಚಿತ ಪಠ್ಯಕ್ರಮವಾಗಿದ್ದು, ಇದರಲ್ಲಿ 11 ಮಕ್ಕಳ ಸ್ನೇಹಿ ವಿಷಯ ಆಧಾರಿತ ಚಟುವಟಿಕೆಗಳನ್ನು ಅಂಗನವಾಡಿ ಕಾರ್ಯಕರ್ತೆಯರಿಗೆ ವಿತರಿಸಲಾಗುತ್ತದೆ ಎಂದು ಹೇಳಿದರು.

ಹೊಸ ವಿಧಾನ ಮತ್ತು ಸಂಬಂಧಿತ ತಂತ್ರಗಳ ಬಗ್ಗೆ ಅಂಗನವಾಡಿ ಕಾರ್ಯಕರ್ತೆಯರು ನೀಡಿದ ಆಸಕ್ತಿದಾಯಕ ಪ್ರದರ್ಶನದೊಂದಿಗೆ ರಾಷ್ಟ್ರೀಯ ಕಾರ್ಯಕ್ರಮವನ್ನು ಮುಕ್ತಾಯಗೊಳಿಸಲಾಯಿತು.

*****