প্রধান মন্ত্রী শ্রী নরেন্দ্র মোদীনা এপ্রিল ২৭তা নুংথিলগী পুং ৪ তাবদা ভিদিও কনফরেন্সকী খুৎথাংদা গুজরাত্তা শ্বাগত চহি ২০ মপুংফারকপগী থৌরম অমা শরুক য়াগনি।থৌরম অদুদা প্রধান মন্ত্রীনা স্কিম অসিগী কান্নবা ফংখ্রবা মীওইশিংগসু উনগনি। থবক অসি মাইপাক্না চহি ২০ মপুংফারকপগী শ্বাগত শাপ্তা থৌরম গুজরাত সরকারনা পাংথোক্লি।

মহাক্না গুজরাতকী চীফ মিনিস্তর ওইরিঙৈদা, ২০০৩দা প্রধান মন্ত্রীনা শ্বাগত(স্তেৎ ৱাইদ এত্তেন্সন ওন গ্রিভান্সেস বাই এপ্লিকেসন ওফ তেক্নোলোজি) হৌদোকখি। চীফ মিনিস্তর অমগী থৌদাং অসি মহাক্কী রাজ্য অদুগী মীয়ামগী অৱাবশিং কোকহনবনি হায়বা মহাক্কী থাজবা অসিনা মাংজিল থাদুনা থৌরম অসি হৌদোকখিবনি। ৱারেপ অসিগা লোয়ন্না, হিংবদা লাইবা হেনগৎহন্নবা তেক্নোলোজিগী শীজিন্নফম ঙন্না খঙবদগী, মতম অদুগী চীফ মিনিস্তর মোদীনা লৈবাক অসিদা অহানবা মখলগী তেক্নোলোজিদা য়ুম্ফম ওইবা অৱাবা কোকহন্নবা থৌরম অসি হৌদোকখিবনি।

মীয়াম্না নোংম-নোংমগী ওইনা থেংনরিবা অৱাবশিং অথুবা মতমদা, নিংথিনা অমসুং অকক্নবা মতমগী মনুংদা তেক্নোলোজি শীজিন্নদুনা কোহন্নবা পান্দমদা থৌরম অসিনা মীয়াম অমসুং সরকারগী মরক্তা থোং অমা ওইনা থবক তৌরি। শ্বাগতনা মীয়ামগী পুন্সিদা অওনবা অমা পুরক্লে অমসুং চে য়াওদনা, অরোন-অথুপ লৈতনা অমসুং অৱাবা লৈতনা অৱাবা কোকহন্নবা অফবা খুৎলায় অমা ওইরে।

শ্বাগতকী অঙকপা মগুন অমনা থবক অসিনা মীচম মীয়াম্না মখোয়গী অৱাবশিং হকথেংন্না চীফ মিনিস্তরদা ফোঙদোকপদা মতেং পাংবা অসিনি। থৌরম অসি থা খুদিংগী মরিশুবা শগোলশেল নুমিত্তা পাংথোকই অমসুং অৱাবশিং কোকহন্নবা চীফ মিনিস্তরনা মীয়ামগা ৱারি শান্নখি। অৱাবশিং মপুংফানা কোকহন্দুনা মসিনা মীয়াম অমসুং সরকারগী মরক্তা লৈরিবা অহোবা অদু মেনশীল্লি। থৌরম অসিগী মখাদা, ৱাকৎলক্লিবা মীওই খুদিংমক্তা সরকারনা লৌখিবা ৱারেপ অদু খঙহনখি। এপ্লিকেসন খুদিংমক্কী পায়খৎখিবা থবকশিং ওনলাইন্দা ফংহল্লি। হৌজিক ফাওবদা ৱাকৎ লাকখিবা অৱাবশিংগী চাদা ৯৯ কোকহনখ্রে।

শ্বাগত ওনলাইন প্রোগ্রামদা মচাক মরি য়াওরি: স্তেৎ শ্বাগত, দিস্ত্রিক শ্বাগত, তালুকা শ্বাগত অমসুং গ্রাম শ্বাগত। স্তেৎ শ্বাগতকী মীয়ামগা উনবা থৌরমদা চীফ মিনিস্তর মশামক শরক য়াখি। দিস্ত্রিক কলেক্তরনা দিস্ত্রিক শ্বাগতকী থৌদাং লৌখি অমসুং মাম্লাতদার অমসুং ক্লাস-১ ওফিসার অমনা তালুকা শ্বাগতকী থৌদাং লৌখি। গ্রাম শ্বাগত্তা মীয়াম্না থা খুদিংগী তাং ১দগী তাং ১০ ফাওবা মীয়াম্না তালাতি/মন্ত্রিদা এপ্লিকেসনশিং পীশিনখি। হায়রিবা থবকশিং অসি তালুকা শ্বাগত থৌরমদা অৱাবা কোকহন্নবা য়াওহনখি। মসিগী মথক্তা, লোক ফরিয়াদ থৌরম অসি মীয়াম্না মখোয়গী অৱাবশিং শ্বাগত য়ুনিত অমদা পীশিন্নবা থৌরম্নি।

অরোন-অথুপ লৈতনা, মরম চানা অমসুং থৌদাং খঙনা থবক পাংথোকপগীদমক শ্বাগত ওনলাইন প্রোগ্রামনা য়ুনাইতেদ নেসন্স পব্লিক সর্বিস এৱার্দ ২০১০ য়াওনা তোঙান-তোঙানবা মনা কয়া ফংখ্রে।

*****