ମାନ୍ୟବର, ପ୍ରଧାନମନ୍ତ୍ରୀ ଆଲବାନିଜ୍‌,

ଉଭୟ ଦେଶର ପ୍ରତିନିଧିବୃନ୍ଦ,

 ମୋର ଗଣମାଧ୍ୟମ ବନ୍ଧୁମାନେ,

ନମସ୍କାର!

ସର୍ବପ୍ରଥମେ, ମୁଁ ଭାରତ ଗସ୍ତରେ ଆସିଥିବା ପ୍ରଧାନମନ୍ତ୍ରୀ ଆଲବାନିଜ୍‌ଙ୍କୁ ହାର୍ଦ୍ଦିକ ସ୍ୱାଗତ କରୁଛି । ଗତ ବର୍ଷ ଉଭୟ ଦେଶ ପ୍ରଧାନମନ୍ତ୍ରୀ ସ୍ତରରେ ବାର୍ଷିକ ସମ୍ମିଳନୀ କରିବାକୁ ନିଷ୍ପତ୍ତି ନେଇଥିଲେ । ପ୍ରଧାନମନ୍ତ୍ରୀ ଆଲବାନିଜ୍‌ଙ୍କ ଏହି ଗସ୍ତ ସହିତ ଏହି ପର୍ଯ୍ୟାୟର ଆରମ୍ଭ ହୋଇଛି । ସେ ହୋଲି ଦିନ ଭାରତରେ ପହଞ୍ଚିଥିଲେ ଏବଂ ଏହା ପରେ ଆମେ କ୍ରିକେଟ୍ ପଡ଼ିଆରେ ଏକାଠି କିଛି ସମୟ ବିତାଇଥିଲୁ । ରଙ୍ଗ, ସଂସ୍କୃତି ଏବଂ କ୍ରିକେଟର ଏହି ଉତ୍ସବ, ଏକ ପ୍ରକାରରେ, ଭାରତ ଏବଂ ଅଷ୍ଟ୍ରେଲିଆ ମଧ୍ୟରେ ବନ୍ଧୁତ୍ୱର ଉତ୍ସାହ ଏବଂ ଆବେଗର ଏକ ପ୍ରତୀକ।

ବନ୍ଧୁଗଣ,

ଆଜି, ଆମେ ପାରସ୍ପରିକ ସହଯୋଗର ବିଭିନ୍ନ ଦିଗ ବିଷୟରେ ବିସ୍ତୃତ ଭାବରେ ଆଲୋଚନା କଲୁ । ଆମର ବିସ୍ତୃତ ରଣନୀତିକ ଭାଗିଦାରୀରେ ସୁରକ୍ଷା ସହଯୋଗ ହେଉଛି ଏକ ଗୁରୁତ୍ୱପୂର୍ଣ୍ଣ ସ୍ତମ୍ଭ । ଆଜି ଆମେ ଭାରତ-ପ୍ରଶାନ୍ତ ମହାସାଗରରେ ସାମୁଦ୍ରିକ ସୁରକ୍ଷା ଏବଂ ପାରସ୍ପରିକ ପ୍ରତିରକ୍ଷା ଏବଂ ସୁରକ୍ଷା ସହଯୋଗ ବୃଦ୍ଧି ବିଷୟରେ ବିସ୍ତୃତ ଆଲୋଚନା କରିଥିଲୁ । ପ୍ରତିରକ୍ଷା କ୍ଷେତ୍ରରେ, ଆମେ ଗତ କିଛି ବର୍ଷ ମଧ୍ୟରେ ପରସ୍ପରର ସଶସ୍ତ୍ର ବାହିନୀର ଲଜିଷ୍ଟିକ୍ ସହାୟତା ସହ ଜଡ଼ିତ ଉଲ୍ଲେଖନୀୟ ଚୁକ୍ତିନାମା କରିଛୁ । ଆମର ସୁରକ୍ଷା ଏଜେନ୍ସି ମଧ୍ୟରେ ନିୟମିତ ଏବଂ ଉପଯୋଗୀ ସୂଚନା ଆଦାନପ୍ରଦାନ ମଧ୍ୟ ଅଛି, ଏବଂ ଆମେ ଏହାକୁ ଅଧିକ ମଜବୁତ କରିବା ଉପରେ ଆଲୋଚନା କରିଛୁ । ଆମର ଯୁବ ସୈନିକମାନଙ୍କ ମଧ୍ୟରେ ଯୋଗାଯୋଗ ଏବଂ ବନ୍ଧୁତା ବଢାଇବାକୁ, ଆମେ ଜେନେରାଲ୍ ରାୱତ ଅଫିସର୍ସ ଏକ୍ସଚେଞ୍ଜ୍ ପ୍ରୋଗ୍ରାମ ପ୍ରତିଷ୍ଠା କରିଛୁ, ଯାହା ଏହି ମାସରୁ ଆରମ୍ଭ ହୋଇଛି ।

ବନ୍ଧୁଗଣ,

ବିଶ୍ୱସ୍ତ ଏବଂ ଦୃଢ ବିଶ୍ୱ ଯୋଗାଣ-ଶୃଙ୍ଖଳା ବିକାଶ ପାଇଁ ଆଜି ଆମେ ପାରସ୍ପରିକ ସହଯୋଗ ଉପରେ ଆଲୋଚନା କଲୁ । ଅକ୍ଷୟ ଶକ୍ତି ହେଉଛି ଉଭୟ ଦେଶ ପାଇଁ ପ୍ରାଥମିକତା ଏବଂ ଧ୍ୟାନର ଏକ କ୍ଷେତ୍ର, ଏବଂ ଆମେ ସ୍ୱଚ୍ଛ ହାଇଡ୍ରୋଜେନ ଏବଂ ସୌରଶକ୍ତି ଉପରେ ମିଳିତ ଭାବରେ କାର୍ଯ୍ୟ କରୁଛୁ । ବାଣିଜ୍ୟ ଚୁକ୍ତି –ଇସିଟିଇଏ, ଯାହା ଗତ ବର୍ଷ କାର୍ଯ୍ୟକାରୀ ହୋଇଥିଲା ତାହା ଦୁଇ ଦେଶ ମଧ୍ୟରେ ବାଣିଜ୍ୟ ଏବଂ ପୁଞ୍ଜି ନିବେଶ ପାଇଁ ଉତ୍ତମ ସୁଯୋଗ ସୁଯୋଗ ସୃଷ୍ଟି କରିଛି । ଆମର ଟିମ୍‍ ମଧ୍ୟ ବ୍ୟାପକ ଆର୍ଥିକ ସହଯୋଗ ଚୁକ୍ତିନାମା ଉପରେ କାର୍ଯ୍ୟ କରୁଛନ୍ତି ।

ବନ୍ଧୁଗଣ,

ଲୋକଙ୍କ ମଧ୍ୟରେ ସମ୍ପର୍କ, ଭାରତ-ଅଷ୍ଟ୍ରେଲିଆ ବନ୍ଧୁତ୍ୱର ଏକ ପ୍ରମୁଖ ସ୍ତମ୍ଭ । ଶିକ୍ଷାଗତ ଯୋଗ୍ୟତାର ପାରସ୍ପରିକ ସ୍ୱୀକୃତି ପାଇଁ ଆମେ ଏକ ବ୍ୟବସ୍ଥା ସ୍ୱାକ୍ଷର କରିଛୁ, ଯାହା ଆମ ଛାତ୍ର ସମାଜ ପାଇଁ ଉପଯୋଗୀ ହେବ । ଆମେ ମଧ୍ୟ ମୋବିଲିଟି ଚୁକ୍ତିରେ ଆଗକୁ ବଢ଼ୁଛୁ । ଏହା ଛାତ୍ର, ଶ୍ରମିକ ଏବଂ ପେସାଦାରମାନଙ୍କ ପାଇଁ ଲାଭଦାୟକ ହେବ । ପ୍ରବାସୀ ଭାରତୀୟ ବର୍ତ୍ତମାନ ଅଷ୍ଟ୍ରେଲିଆର ଦ୍ୱିତୀୟ ବୃହତ୍ତମ ପ୍ରବାସୀ ସମ୍ପ୍ରଦାୟ । ଏହି ଭାରତୀୟ ସମ୍ପ୍ରଦାୟ ଅଷ୍ଟ୍ରେଲିଆର ସମାଜ ତଥା ଅର୍ଥବ୍ୟବସ୍ଥାରେ ଏକ ମହତ୍ୱପୂର୍ଣ୍ଣ ଅବଦାନ ରଖିଛି । ଏହା ଅତ୍ୟନ୍ତ ଦୁଃଖର ବିଷୟ ଯେ ଗତ କିଛି ସପ୍ତାହ ମଧ୍ୟରେ ଅଷ୍ଟ୍ରେଲିଆରେ ମନ୍ଦିର ଉପରେ ନିୟମିତ ଆକ୍ରମଣ ଦେଖିବାକୁ ମିଳୁଛି । ଏହା ସ୍ୱାଭାବିକ ଯେ ଏଭଳି ଖବର ଭାରତର ଲୋକଙ୍କୁ ଚିନ୍ତିତ କରିଛି ଏବଂ ଆମ ମନକୁ ବିଚଳିତ କରୁଛି ।  ମୁଁ ଆମର ଏହି ଭାବନା ଏବଂ ଦୃଷ୍ଟିକୋଣକୁ ପ୍ରଧାନମନ୍ତ୍ରୀ ଆଲବାନିଜ୍‌ଙ୍କ ସହ ସେୟାର କରିଛି ଏବଂ ସେ ମୋତେ ଆଶ୍ୱାସନା ଦେଇଛନ୍ତି ଯେ ଭାରତୀୟ ସମ୍ପ୍ରଦାୟର ସୁରକ୍ଷା ତାଙ୍କ ପାଇଁ ଏକ ବିଶେଷ ପ୍ରାଥମିକତା । ଆମର ଟିମ୍‍ ଏହି ବିଷୟ ଉପରେ ନିୟମିତ ଯୋଗାଯୋଗରେ ରହିବେ ଏବଂ ଯଥାସମ୍ଭବ ସହଯୋଗ କରିବେ ।

ବନ୍ଧୁଗଣ,

ପ୍ରଧାନମନ୍ତ୍ରୀ ଆଲବାନିସ୍ ଓ ମୁଁ ସହମତ ଯେ ବିଶ୍ୱ ଆହ୍ୱାନ ଗୁଡିକର ମୁକାବିଲା ପାଇଁ ଏବଂ ବିଶ୍ୱବ୍ୟାପୀ ସୁସ୍ଥତା ପାଇଁ ଆମର ଦ୍ୱିପାକ୍ଷିକ ସମ୍ପର୍କ ଗୁରୁତ୍ୱପୂର୍ଣ୍ଣ । ମୁଁ ଭାରତର ଜି -୨୦ ଅଧ୍ୟକ୍ଷତାର ପ୍ରାଥମିକତା ବିଷୟରେ ପ୍ରଧାନମନ୍ତ୍ରୀ ଆଲବାନିଜ୍‌ଙ୍କୁ ବୁଝାଇଥିଲି ଏବଂ ଅଷ୍ଟ୍ରେଲିଆର ନିରନ୍ତର ସମର୍ଥନ ପାଇଁ ମୁଁ କୃତଜ୍ଞତା ଜଣାଇଥିଲି । ଭାରତ ଏବଂ ଅଷ୍ଟ୍ରେଲିଆ ଉଭୟ କ୍ୱାଡର ସଦସ୍ୟ ଅଟନ୍ତି ଏବଂ ଆଜି ଆମେ ଏହି ମଞ୍ଚରେ ଆମ ମଧ୍ୟରେ ସହଯୋଗ ବିଷୟରେ ମଧ୍ୟ ଆଲୋଚନା କରିଛୁ । ଚଳିତ ବର୍ଷ ମେ ମାସରେ ହେବାକୁ ଥିବା କ୍ୱାଡ ନେତୃତ୍ୱ ସମ୍ମିଳନୀରେ ମୋତେ ନିମନ୍ତ୍ରଣ କରିଥିବାରୁ ମୁଁ ପ୍ରଧାନମନ୍ତ୍ରୀ ଆଲବାନିଜ୍‌ଙ୍କୁ ଧନ୍ୟବାଦ ଦେଉଛି । ଏହା ପରେ, ସେପ୍ଟେମ୍ବରରେ ହେବାକୁ ଥିବା ଜି -୨୦ ଶିଖର ସମ୍ମିଳନୀରେ, ମୋତେ ପୁନର୍ବାର ପ୍ରଧାନମନ୍ତ୍ରୀ ଆଲବାନିଜ୍‌ଙ୍କୁ ସ୍ୱାଗତ କରିବାର ସୁଯୋଗ ମିଳିବ ଏବଂ ମୁଁ ଏଥିରେ ବହୁତ ଖୁସି ହେବି । ପୁଣିଥରେ ଭାରତରେ ପ୍ରଧାନମନ୍ତ୍ରୀ ଆଲବାନିଜ୍‌ଙ୍କୁ ସ୍ୱାଗତ ସମ୍ବର୍ଦ୍ଧନା ଜଣାଉଛି । ମୁଁ ନିଶ୍ଚିତ ଯେ ତାଙ୍କ ଗସ୍ତ ଆମ ସମ୍ପର୍କକୁ ନୂତନ ଗତି ଏବଂ ଦିଶା ଦେବ ।

ଧନ୍ୟବାଦ

HS