য়োর এক্সেলেন্সী, প্রধান মন্ত্রী অলবানীজ,

লৈবাক অনিমক্কী দেলিগেতশিং,

ঐহাক্কী মীদিয়াগী মরুপশিং,

নমস্কার!
খ্বাইদগী অহানবদা ঐহাক্না প্রধান মন্ত্রী অলবানীজপু মহাক্কী অহানবা ভারতকী খোঙচৎ অসিদা তরাম্না ওকচরি। লৈবাক অনিনা মমাংগী চহিদা প্রধান মন্ত্রীগী থাক্তা চহিগী সম্মিত পাংথোকপগী ৱারেপ লৌখি। অদুগা প্রধান মন্ত্রী অলবানীজকী খোঙচৎ অসিনা পরিং অদুবু হৌদোক্লি। মহাক্না ভারত্তা হোলিগী নুমিত্তা য়ৌরকখি অমসুং ঐখোয়না ক্রিকেতকী লম্পাক্তা মতম খরসু লেনমিন্নখি। মসিগুম্না হোলি, কলচর অমসুং ক্রিকেতকী নুংঙাইবা ফোংদোকপা অসিনা ভারত অমসুং ওস্ত্রেলিয়াগী মরক্তা লৈনরিবা মরুপ-মপাংগী মরীগী ফজরবা খুদম অমা ওইরি।

মরুপশিং,
 

ঐখোয়না ঙসি অমনা-অমদা তেংবাংবগী তোঙান-তোঙানবা হীরম কয়াগী মতাংদা য়াম্না কুপ্না খন্ন-নৈনখি। সেক্যুরিতী কোওপরেসন অসিনা ঐখোয়গী কম্প্রিহেন্সিব স্ত্রেতজিক পার্ত্নরশিপকী মরু ওইবা য়ুম্বী অমা ওইরি। ঙসি, ঐখোয়না ইন্দো-পেসিফিক মফমদা মেরিতাইম সেক্যুরিতী লৈহনবা অমসুং দিফেন্স অমসুং সেক্যুরিতীগী মতাংদা তেংবাংনবগী ৱাফম কয়া য়াম্না কুপ্না খন্নখি। ঐখোয়গী আর্ম্দ ফোর্স মশেলদা লোজিস্তিক্স সপ্পোর্ত পীবা য়াওনা ঐখোয়না মমাংগী চহি খরসিদা দিফেন্সকী লমদা মশক থোকপা ৱাফম কয়াগী য়ানবা পুরকখ্রে। ঐখোয়গী সেক্যুরিতী এজেন্সীশিংগী মরক্তসু কান্নবা ই-পাউ কয়া ঐখোয়না য়াম্না তোয়না পীনদুনা লাক্লি অমসুং মসিবু হেন্না মপাঙ্গল লৈহন্নবগী ৱাফমসু ঐখোয়না খন্নখি। ঐখোয়গী নহা ওইরিবা লান্মীশিংগী মরক্তা পাউ ফাওনবা অমসুং মরুপ-মপাং ওইবগী মরী হেনগৎহন্নবগীদমক্তা ঐখোয়না জেনেরেল রাৱত ওফিসর্স এক্সচেঞ্জ প্রোগ্রাম অমা হৌদোক্লে অমসুং মসিনা হন্দক্কী থাদগী মথৌ পাংথোকপা হৌরগনি।

মরুপশিং,
ঙসি, থাজবা য়াবা অমসুং অচৌবা গ্লোবেল সপ্লাই চেন অমা শাবদা তেংবাংনবগী মতাংদা ঐখোয়না খন্নখি। রিন্যুএবল ইনর্জী হায়বসিনা লৈবাক অনিগী খ্বাইদগী অহানবা মিৎয়েং চঙগদবা লম্নি অমসুং ঐখোয়না অশেংবা হাইদ্রোজেন অমসুং সোলরগী মতাংদসু পুন্না হোৎনমিন্নরি। মমাংগী চহিদগী চৎনবা হৌখিবা ত্রেদ এগ্রীমেন্ত – ই.সি.তি.এ.না লৈবাক অনিগী মরক্তা পাংথোকপা লল্লোন ইতিক অমসুং শেল থাদবগী হীরমদা অনৌবা খুদোংচাবা কয়া পুরক্লে। ঐখোয়গী তীমশিংনা কম্প্রিহেন্সিব ইকোনোমিক কোওপরেসন এগ্রীমেন্তকী মতাংদসু থবক তৌরি।

মরুপশিং,
মীয়াম মশেলগী মরক্তা লৈনবা মরী হায়বসিনা ভারত-ওস্ত্রেলিয়াগী মরীগী মরু ওইবা য়ুম্বী অমা ওইরি। মহৈরোইশিংগী খুন্নাইশিংদা য়াম্না কান্নবা পীগদবা থৌওং অমা ওইরিবা, লৈবাক মশেলগী এজুকেস্নেল ক্বালিফিকেসন মশক খঙনবগী মেকানিজম অমগী মতাংদসু ঐখোয়না খুৎয়েক পীনখ্রে। ঐখোয়না মোবিলিতী এরেঞ্জমেন্তকী মতাংদসু তুংলমচৎকী মাইকৈদা খোঙদারি। মসিনা মহৈরোই, শিন্মী অমসুং প্রোফেস্নেলশিংদা য়াম্না কান্নবা পীগনি। ভারতকী দাইস্পোরানা হৌজিক্তি ওস্ত্রেলিয়াগী খ্বাইদগী অনিশুবা চাউবা ইমিগ্রেন্ত কম্ম্যুনিতী ওইরি। ভারতকী কম্ম্যুনিতীনা ওস্ত্রেলিয়াগী খুন্নাই অমসুং শেন্মিৎলোন্দা মশক থোকপা শরুক তম্লি। মমাংগী চয়োল খরদা লাইশঙদা লান্দাবগী পাউ খরা লাকপসি য়াম্না লাইবক থীবনি। মসিগুম্বা ই-পাউনা ভারত্তা লৈরিবা মীয়ামদা নুংঙাইহন্দবা অমসুং ৱাখল ৱাহনবা হায়বসি মহৌশানা তাবনি। ঐহাক্না ঐখোয়গী মসিগুম্বা ৱাখল্লোনশিংগী মতাংদা প্রধান মন্ত্রী অলবানীজকী মফমদসু তম্লবনি। ভারত মচাশিংগী তেক্ত-কায়দবা হায়বসি মহাক্কী খ্বাইদগী অহানবা মিৎয়েং চঙবা থবক্নি হায়না মহাক্না থাজবসু পীবিরে। ঐখোয়গী তীমশিংনা হীরম অসিগী মতাংদা তোয়না পাউ ফাওনরি অমসুং য়ারিবমখৈ তেংবাংনগনি। 

মরুপশিং,

ঐখোয়গী বাইলেতরেল মরী অসি মালেমগী শিংনবশিংদা মিৎয়েং চঙবা অমসুং মালেম্না নুংঙাই য়াইফনা লৈবদা য়াম্না মরু ওইগনি হায়না প্রধান মন্ত্রী অলবানীজ অমসুং ঐহাক্না য়ানরে। ভারতকী জি.২০ প্রসিদেন্সেগী অহানবা মিৎয়েং থম্বা ৱাফম কয়া ঐহাক্না প্রধান মন্ত্রী অলবানীজতা পাউদম্লে অমসুং ওস্ত্রেলিয়ানা লেপ্তনা তেংবাংবগীদমক্তা ঐহাক্না থাগৎপসু ফোংদোকখ্রে। ভারত অমসুং ওস্ত্রেলিয়া অনিমক ক্বাদকী মেম্বরনি অমসুং  প্লেতফোর্ম অসিদা ঐখোয়না তেংবাংনবগী হীরমসু ঐখোয়না ঙসি খন্ন-নৈনখি। হন্দক্কী চহিগী মে থাদা পাংথোক্কদৌরিবা ক্বাদ লীদর্স সম্মিত্তা ঐহাকপু শরুক য়াবীনবা পাউজেল পীরকপগীদমক্তা ঐহাক্না প্রধান মন্ত্রী অলবানীজপু থাগৎচরি। মদুগী মতুংদা, সেপ্তেম্বরদা পাংথোক্কদবা জি.২০ সম্মিত্তা ঐহাক্না প্রধান মন্ত্রী অলবানীজপু ভারত্তা অমুক হন্না লাকপীনবা পাউজেল পীবগী খুদোংচাবা ফংগনি অমসুং মদুগীদমক্তা ঐহাক্না য়াম্না নুংঙাইবা ফাওগনি। ঐহাক্না প্রধান মন্ত্রী অলবানীজপু ভারত্তা অমুক্কা হন্না তরাম্না ওকচরি। মহাক্কী খোঙচৎ অসিনা ঐখোয়গী মরীশিংদা অনৌবা খোঙজেল অমসুং ইনোৎ হাপকনি হায়না ঐহাক্না থাজবা থমজরি।

থাগৎচরি।
 

***