പ്രധാനമന്ത്രിയുടെ ഓഫീസ്‌
വീഡിയോ കോണ്‍ഫറന്‍സിംഗിലൂടെ, ഹൗറയെ ന്യൂ ജല്‍പായ്ഗുരിയുമായി ബന്ധിപ്പിക്കുന്ന വന്ദേ ഭാരത് എക്സ്പ്രസ് ഫ്‌ളാഗ് ഓഫ് ചെയ്തും കൊല്‍ക്കത്ത മെട്രോയുടെ പര്‍പ്പിള്‍ ലൈനിന്റെ ജോക്ക-തരതാല ഭാഗം ഉദ്ഘാടനം ചെയ്തു പ്രധാനമന്ത്രി നടത്തിയ പ്രസംഗം
Posted On:
30 DEC 2022 3:21PM by PIB Thiruvananthpuram
നമസ്‌കാരം,
പശ്ചിമ ബംഗാള്‍ ഗവര്‍ണര്‍ സി.വി. ആനന്ദ ബോസ് ജി, ബഹുമാനപ്പെട്ട മുഖ്യമന്ത്രി മമത ജി, എന്റെ മന്ത്രിസഭയിലെ സഹപ്രവര്‍ത്തകരായ അശ്വിനി വൈഷ്ണവ് ജി, സുഭാഷ് സര്‍ക്കാര്‍ ജി, നിസിത് പ്രമാണിക് ജി, ജോണ്‍ ബര്‍ല ജി, പ്രതിപക്ഷ നേതാവ് സുവേന്ദു അധികാരി ജി, എംപി പ്രസൂണ്‍ ജി, വേദിയിലുള്ള മറ്റ് സഹപ്രവര്‍ത്തകരെ, മഹതികളേ, മഹാന്‍മാരേ!
ഇന്ന് ഞാന്‍ നിങ്ങളുടെ എല്ലാവരുടെയും നേരിട്ട് എത്തേണ്ടതായിരുന്നു, പക്ഷേ വ്യക്തിപരമായ കാരണങ്ങളാല്‍ എനിക്ക് അതിനു കഴിഞ്ഞില്ല. അതിന് ബംഗാള്‍ ജനതയോടു ഞാന്‍ മാപ്പ് ചോദിക്കുന്നു. ബംഗാള്‍ എന്ന പുണ്യഭൂമിയെയും ചരിത്രഭൂമിയായ കൊല്‍ക്കത്തയെയും അഭിവാദ്യം ചെയ്യാന്‍ ഇന്ന് എനിക്ക് അവസരമുണ്ട്. ബംഗാളിന്റെ എല്ലാ ഭാഗങ്ങളും സ്വാതന്ത്ര്യ സമര ചരിത്രത്തിന്റെ ഭാഗമാണ്. വന്ദേമാതരം ആലപിച്ച നാട്ടില്‍ വന്ദേ ഭാരത് ട്രെയിന്‍ ഫ്‌ളാഗ് ഓഫ് ചെയ്തു. ഡിസംബര്‍ 30 എന്ന ഇന്നത്തെ തീയതിക്കും ചരിത്രത്തില്‍ അതിന്റേതായ പ്രാധാന്യമുണ്ട്. 1943 ഡിസംബര്‍ 30 ന് ആന്‍ഡമാനില്‍ ത്രിവര്‍ണ പതാക ഉയര്‍ത്തി നേതാജി സുഭാഷ് ഇന്ത്യയുടെ സ്വാതന്ത്ര്യത്തിന്റെ മണിനാദം മുഴക്കിയിരുന്നു.
2018-ല്‍, ഈ സംഭവത്തിന്റെ 75-ാം വാര്‍ഷികത്തില്‍, ഞാന്‍ ആന്‍ഡമാനില്‍ പോയി ഒരു ദ്വീപിന് നേതാജിയുടെ പേര് നല്‍കി. ഇപ്പോള്‍ രാജ്യം സ്വാതന്ത്ര്യത്തിന്റെ 75 വര്‍ഷം അല്ലെങ്കില്‍ അമൃത മഹോത്സവം ആഘോഷിക്കുകയാണ്. ഈ അമൃത മഹോത്സവത്തില്‍ 475 വന്ദേ ഭാരത് ട്രെയിനുകള്‍ ആരംഭിക്കാന്‍ രാജ്യം തീരുമാനിച്ചിരുന്നു. ഇന്ന്, ഈ ഹൗറ-ന്യൂ ജല്‍പായ്ഗുരി വന്ദേ ഭാരത് ട്രെയിനുകളിലൊന്ന് കൊല്‍ക്കത്തയില്‍ നിന്ന് യാത്ര ആരംഭിച്ചു. ഇന്ന് തന്നെ, റെയില്‍വേയുടെയും മെട്രോ റെയിലിന്റെയും കാര്യത്തില്‍ കണക്റ്റിവിറ്റിയുമായി ബന്ധപ്പെട്ട മറ്റ് പദ്ധതികളും ഉദ്ഘാടനം ചെയ്യപ്പെടുകയോ തറക്കല്ലിടുകയോ ചെയ്തിട്ടുണ്ട്. ഏകദേശം 5,000 കോടി രൂപ ചെലവില്‍ ജോക്ക-ബിബിഡി ബാഗ് മെട്രോ പദ്ധതിയുടെ ജോലികള്‍ നടന്നുവരുന്നു, അതില്‍ ജോക്ക-ടറാതല മെട്രോ റൂട്ട് പൂര്‍ത്തിയായി. ഇത് നഗരത്തിലെ ജനങ്ങളുടെ ജീവിത സൗകര്യം വര്‍ദ്ധിപ്പിക്കും.
സുഹൃത്തുക്കളെ,
പിന്നീട്, ഗംഗാജിയുടെ ശുചിത്വവും കുടിവെള്ളവുമായി ബന്ധപ്പെട്ട നിരവധി പദ്ധതികള്‍ പശ്ചിമ ബംഗാളിന് കൈമാറാനും എനിക്ക് അവസരം ലഭിക്കും. നമാമി ഗംഗെ മിഷനു കീഴില്‍ പശ്ചിമ ബംഗാളില്‍ 25 ലധികം അഴുക്കുചാല്‍ പദ്ധതികള്‍ക്ക് അംഗീകാരം നല്‍കിയിട്ടുണ്ട്. ഇതില്‍ 11 പദ്ധതികള്‍ ഇതിനകം പൂര്‍ത്തീകരിച്ചു. 7 പദ്ധതികള്‍ ഇന്ന് പൂര്‍ത്തിയാകും. 1500 കോടി രൂപ ചെലവില്‍ 5 പുതിയ പദ്ധതികളുടെ പ്രവര്‍ത്തനം ഇന്ന് ആരംഭിക്കുന്നു. ഈ പദ്ധതിയുടെ ഏറ്റവും പ്രധാനപ്പെട്ട ഭാഗം ആദിഗംഗ നദിയുടെ പുനരുജ്ജീവനമാണ്. നിര്‍ഭാഗ്യവശാല്‍ ആദിഗംഗ നദിയുടെ അവസ്ഥ ഇപ്പോള്‍ വളരെ മോശമാണെന്ന് എനിക്ക് അറിയാന്‍ കഴിഞ്ഞു. ഇതില്‍ വീഴുന്ന മാലിന്യവും മലിനജലവും വൃത്തിയാക്കാന്‍ 600 കോടിയിലധികം രൂപയുടെ ആധുനിക അടിസ്ഥാന സൗകര്യങ്ങള്‍ വികസിപ്പിക്കുകയാണ്.
ഒരു വ്യക്തിയുടെ ജീവിതത്തില്‍ രോഗപ്രതിരോധത്തെക്കുറിച്ചു നമ്മള്‍ പലപ്പോഴും സംസാരിച്ചുകൊണ്ടേയിരിക്കും. നമ്മുടെ ജീവിതശൈലി പ്രാഥമികമായി രോഗബാധിതരാകാത്ത തരത്തിലായിരിക്കണം എന്നാണ് ഉപദേശിക്കപ്പെടുന്നത്. സമാനമായ രീതിയില്‍, നദി വൃത്തിയാക്കുന്നതിനൊപ്പം മലിനീകരണം തടയുന്നതിനും കേന്ദ്ര ഗവണ്‍മെന്റ് വളരെയധികം ഊന്നല്‍ നല്‍കുന്നുണ്ട്. പ്രതിരോധത്തിനുള്ള ഏറ്റവും ഫലപ്രദവും ആധുനികവുമായ മാര്‍ഗ്ഗം കൂടുതല്‍ കൂടുതല്‍ ആധുനിക മലിനജല ശുദ്ധീകരണ പ്ലാന്റുകളാണ്.
വരാനിരിക്കുന്ന 10-15 വര്‍ഷത്തെ ആവശ്യങ്ങള്‍ കണക്കിലെടുത്ത് ഇന്ന് രാജ്യത്ത് ആധുനിക മലിനജല സംസ്‌കരണ പ്ലാന്റുകള്‍ സ്ഥാപിക്കുന്നു. സ്വാതന്ത്ര്യത്തിന്റെ അമൃതകാലത്തില്‍, ഭാവി മുന്നില്‍ കണ്ടുള്ള സമീപനത്തോടെ നാം രാജ്യത്തെ മുന്നോട്ട് കൊണ്ടുപോകണം.
സുഹൃത്തുക്കളെ,
21-ാം നൂറ്റാണ്ടിലെ ഇന്ത്യയുടെ ദ്രുതഗതിയിലുള്ള വികസനത്തിന്, ഇന്ത്യന്‍ റെയില്‍വേയുടെ ദ്രുതഗതിയിലുള്ള വളര്‍ച്ചയും ഇന്ത്യന്‍ റെയില്‍വേയുടെ ദ്രുതഗതിയിലുള്ള പുരോഗതിയും വളരെ പ്രധാനമാണ്. അതുകൊണ്ടാണ് ഇന്ത്യന്‍ റെയില്‍വേയെയും റെയില്‍വേ അടിസ്ഥാന സൗകര്യങ്ങളെയും നവീകരിക്കാന്‍ കേന്ദ്ര ഗവണ്‍മെന്റ് ഇന്ന് റെക്കോര്‍ഡ് നിക്ഷേപം നടത്തുന്നത്. ഇന്ന്, ഇന്ത്യന്‍ റെയില്‍വേയുടെ പുനരുജ്ജീവനത്തിനായുള്ള ഒരു രാജ്യവ്യാപക പ്രചാരണം ഇന്ത്യയില്‍ നടക്കുന്നു.
ഇന്ന് രാജ്യത്ത് വന്ദേ ഭാരത്, തേജസ്, ഹംസഫര്‍ തുടങ്ങിയ ആധുനിക ട്രെയിനുകള്‍ നിര്‍മ്മിക്കപ്പെടുന്നു. ഇന്ന് വിസ്റ്റാഡോം കോച്ചുകള്‍ റെയില്‍വേ യാത്രക്കാര്‍ക്ക് പുതിയ അനുഭവം നല്‍കുന്നു. സുരക്ഷിതവും ആധുനികവുമായ കോച്ചുകളുടെ എണ്ണത്തില്‍ ഇന്ന് റെക്കോര്‍ഡ് വര്‍ധനവാണ് ഉണ്ടായിരിക്കുന്നത്. ഇന്ന് റെയില്‍വേ സ്റ്റേഷനുകളും വിമാനത്താവളങ്ങള്‍ പോലെ വികസിക്കുകയാണ്. പുതിയ ജല്‍പായ്ഗുരി സ്റ്റേഷനും ഈ പട്ടികയില്‍ ഉള്‍പ്പെടുന്നു.
റെയില്‍വേ ലൈനുകളുടെ ഇരട്ടിപ്പിക്കലും വൈദ്യുതീകരണവും ഇന്ന് റെക്കോര്‍ഡ് വേഗത്തിലാണ് നടക്കുന്നത്. രാജ്യത്ത് വരാനിരിക്കുന്ന കിഴക്കന്‍, പടിഞ്ഞാറന്‍ സമര്‍പ്പിത ചരക്ക് ഇടനാഴികള്‍ ചരക്കുനീക്ക മേഖലയില്‍ വിപ്ലവകരമായ മാറ്റങ്ങള്‍ കൊണ്ടുവരാന്‍ പോകുന്നു. സുരക്ഷയോ, വൃത്തിയോ, കാര്യക്ഷമതയോ, ഏകോപനമോ, സമയനിഷ്ഠയോ, സൗകര്യമോ ആകട്ടെ, ഇന്ത്യന്‍ റെയില്‍വേ ഇന്ന് ഒരു പുതിയ വിലാസം സൃഷ്ടിക്കുകയാണ്. അതിനാല്‍, നമ്മുടെ പ്രയത്നങ്ങള്‍ ഇന്ന് ഫലം കാണുന്നു.
കഴിഞ്ഞ എട്ട് വര്‍ഷമായി ഇന്ത്യന്‍ റെയില്‍വേ ആധുനികതയുടെ അടിത്തറയിലാണ് പ്രവര്‍ത്തിച്ചത്. ഇനി വരുന്ന എട്ട് വര്‍ഷത്തിനുള്ളില്‍ ഇന്ത്യന്‍ റെയില്‍വേ ആധുനികതയുടെ ഒരു പുതിയ യാത്ര ആരംഭിക്കുന്നത് നാം കാണും. ഇന്ത്യയെപ്പോലുള്ള ഒരു യുവരാജ്യത്തിനായി ഇന്ത്യന്‍ റെയില്‍വേയും ഒരു യുവ അവതാരമായി മാറാന്‍ പോകുന്നു. 475-ലധികം വന്ദേ ഭാരത് ട്രെയിനുകള്‍ ഈ ഉദ്യമത്തില്‍ ഒരു പ്രധാന പങ്ക് വഹിക്കുമെന്ന് ഉറപ്പാണ്.
സുഹൃത്തുക്കളെ,
സ്വാതന്ത്ര്യത്തിനു ശേഷമുള്ള ഏഴു ദശകങ്ങളില്‍ 20,000 കിലോമീറ്റര്‍ റെയില്‍ പാത വൈദ്യുതീകരിച്ചപ്പോള്‍ 2014-ല്‍ നമ്മുടെ ഗവണ്‍മെന്റ് രൂപീകരിച്ച ശേഷം കഴിഞ്ഞ 7-8 വര്‍ഷത്തിനുള്ളില്‍ 32,000 കിലോമീറ്ററിലധികം റെയില്‍ പാത വൈദ്യുതീകരിച്ചു. ഈ വേഗത്തിലാണ് നാട്ടില്‍ പണി നടക്കുന്നത്. റെയില്‍വേയുടെ നവീകരണത്തിന്റെ വേഗതയാണിത്. ഈ പ്രക്രിയ കൂടുതല്‍ വേഗത്തിലാക്കാന്‍, ഇപ്പോള്‍ ലോകത്തിലെ ഏറ്റവും ശക്തമായ ഇലക്ട്രിക് എന്‍ജിനുകളും ഇന്ത്യയില്‍ അതിവേഗം നിര്‍മ്മിക്കപ്പെടുന്നു.
സുഹൃത്തുക്കളെ,
ഇന്നത്തെ ഇന്ത്യയുടെ വേഗതയുടെയും വ്യാപ്തിയുടെയും മറ്റൊരു സാക്ഷ്യം നമ്മുടെ മെട്രോ റെയില്‍ സംവിധാനമാണ്. പതിറ്റാണ്ടുകളായി മെട്രോ റെയില്‍ പൊതുഗതാഗതത്തിനുള്ള മികച്ച മാര്‍ഗമാണെന്ന് കൊല്‍ക്കത്തയിലെ ജനങ്ങള്‍ക്ക് അറിയാം. 2014ന് മുമ്പ് രാജ്യത്തെ മൊത്തം മെട്രോ ശൃംഖല 250 കിലോമീറ്ററില്‍ താഴെയായിരുന്നു. ഡല്‍ഹി കേന്ദ്രഭരണ മേഖലയ്ക്ക് ഇതിലും വലിയ പങ്കുണ്ട്. കേന്ദ്ര ഗവണ്‍മെന്റും ഈ സാഹചര്യം മാറ്റുന്നതില്‍ പങ്കുവഹിച്ചു. മാറ്റം വളരെ വേഗത്തില്‍ കൊണ്ടുവരാനുള്ള എല്ലാ ശ്രമങ്ങളും നടത്തിയിട്ടുമുണ്ട്.
കഴിഞ്ഞ 8 വര്‍ഷത്തിനുള്ളില്‍, നാം 2 ഡസനിലധികം നഗരങ്ങളിലേക്ക് മെട്രോ വ്യാപിപ്പിച്ചു. ഇന്ന് രാജ്യത്തെ വിവിധ നഗരങ്ങളിലായി ഏകദേശം 800 കിലോമീറ്റര്‍ ട്രാക്കിലാണ് മെട്രോ ഓടുന്നത്. 1000 കിലോമീറ്റര്‍ പുതിയ മെട്രോ പാതയുടെ പണി അതിവേഗം പുരോഗമിക്കുകയാണ്. ഈ ദൃഢനിശ്ചയത്തിന്റെ ഭാഗമാണ് ജോക്ക-ബിബിഡി ബാഗ് മെട്രോ പദ്ധതി.
സുഹൃത്തുക്കളെ,
കഴിഞ്ഞ നൂറ്റാണ്ടില്‍ ഇന്ത്യ നേരിടുന്ന രണ്ട് പ്രധാന വെല്ലുവിളികള്‍ കൂടി ഉണ്ടായിട്ടുണ്ട്, അത് രാജ്യത്തിന്റെ വികസനത്തെ വളരെ പ്രതികൂലമായി ബാധിച്ചു. അടിസ്ഥാന സൗകര്യവികസനവുമായി ബന്ധപ്പെട്ട പ്രവര്‍ത്തനങ്ങളില്‍ വിവിധ ഏജന്‍സികള്‍ തമ്മിലുള്ള ഏകോപനമില്ലായ്മയാണ് ഒരു വെല്ലുവിളി. രണ്ടാമത്തെ വെല്ലുവിളി വ്യത്യസ്ത ഗതാഗത മാര്‍ഗ്ഗങ്ങള്‍ തമ്മിലുള്ള ഏകോപനം ഒട്ടുമില്ലായിരുന്നു എന്നതാണ്. തല്‍ഫലമായി, ഗവണ്‍മെന്റിന്റെ ഒരു വകുപ്പിന് മറ്റൊരു വകുപ്പ് എവിടെയാണ് പുതിയ പദ്ധതി ആരംഭിക്കാന്‍ പോകുന്നതെന്ന് അറിയാന്‍ കഴിയാതെപോയി. രാജ്യത്തെ സത്യസന്ധരായ നികുതിദായകര്‍ക്കാണ് ഇതിന്റെ ദുരിതം പേറേണ്ടി വന്നത്.
രാജ്യത്തെ സത്യസന്ധരായ നികുതിദായകര്‍ പൊതു പണം പാഴാക്കുന്നതും പദ്ധതികളിലെ കാലതാമസവും അഴിമതിയും എന്നും വെറുക്കുന്നു. അധ്വാനിച്ചുണ്ടാക്കിയ പണത്തില്‍ നിന്ന് അടക്കുന്ന നികുതി ഉപയോഗപ്പെടുന്നതു പാവപ്പെട്ടവര്‍ക്കല്ല, ഒരു അഴിമതിക്കാരനാണെന്ന് കാണുമ്പോള്‍, അയാള്‍ അസ്വസ്ഥനാകുന്നത് സ്വാഭാവികമാണ്.
ഈ പണം പാഴാക്കുന്നത് തടയാന്‍ വകുപ്പുകളുടെയും ഗവണ്‍മെന്റുകളുടെയും ഏകോപനം വര്‍ധിപ്പിക്കുന്നതിന് പിഎം ഗതിശക്തി ദേശീയ മാസ്റ്റര്‍ പ്ലാന്‍ നടപ്പാക്കിയിട്ടുണ്ട്. ഇപ്പോള്‍ അത് വ്യത്യസ്ത സംസ്ഥാന ഗവണ്‍മെന്റുകളായാലും വ്യത്യസ്ത ഗവണ്‍മെന്റ് വകുപ്പുകളായാലും നിര്‍മ്മാണവുമായി ബന്ധപ്പെട്ട ഏജന്‍സികളായാലും വ്യവസായങ്ങളായാലും എല്ലാം ഒരു വേദിയില്‍ ഒത്തുചേരുന്നു.
രാജ്യത്തെ വിവിധ ഗതാഗത മാര്‍ഗങ്ങളെ ബന്ധിപ്പിച്ചുകൊണ്ട് ബഹുതല കണക്റ്റിവിറ്റിയുടെ പ്രവര്‍ത്തനങ്ങളും പിഎം ഗതിശക്തി വേഗത്തിലാക്കുന്നു. ഇന്ന് രാജ്യത്ത് ഹൈവേകളും വിമാനത്താവളങ്ങളും ജലപാതകളും പുതിയ തുറമുഖങ്ങളും റെക്കോഡ് വേഗത്തിലാണ് നിര്‍മിക്കുന്നത്. ഏറ്റവും പ്രധാനമായി, ഒരു ഗതാഗത മാര്‍ഗ്ഗം മറ്റൊരു ഗതാഗത രീതിയെ പിന്തുണയ്ക്കുന്ന തരത്തിലാണ് അവ ഇപ്പോള്‍ വികസിപ്പിക്കുന്നത്. അതായത്, റെയില്‍വേ സ്റ്റേഷനുകളുമായി ഹൈവേകള്‍ നന്നായി ബന്ധിപ്പിക്കണം; റെയില്‍വേ സ്റ്റേഷനുകള്‍ വിമാനത്താവളങ്ങളുമായി ബന്ധിപ്പിക്കണം; ഗതാഗത സമയത്ത് ആളുകള്‍ക്കു തടസ്സമില്ലാത്ത കണക്റ്റിവിറ്റി ലഭിക്കണം.
സുഹൃത്തുക്കളെ,
21-ാം നൂറ്റാണ്ടില്‍ വേഗത്തില്‍ മുന്നേറാന്‍, രാജ്യത്തിന്റെ സാധ്യതകള്‍ നാം ശരിയായി ഉപയോഗിക്കേണ്ടതുണ്ട്. ജലപാതകളുടെ ഉദാഹരണം രാജ്യത്തെ ജനങ്ങളുമായി പങ്കുവെക്കാനും ഞാന്‍ ആഗ്രഹിക്കുന്നു. ഇന്ത്യയില്‍ വ്യാപാരത്തിനും വിനോദസഞ്ചാരത്തിനും ജലപാതകള്‍ വ്യാപകമായി ഉപയോഗിച്ചിരുന്ന ഒരു കാലമുണ്ടായിരുന്നു. അതുകൊണ്ടാണ് നദികളുടെ തീരങ്ങളില്‍ വിവിധ നഗരങ്ങള്‍ ഉയര്‍ന്നുവന്നത്, നദീതീരങ്ങളില്‍ വന്‍ വ്യവസായ വികസനം ഉണ്ടായത്. എന്നാല്‍ ഈ കഴിവ് ആദ്യം നശിപ്പിക്കപ്പെട്ടത് നൂറുകണക്കിനു വര്‍ഷത്തെ കൊളോണിയല്‍ ഭരണവും പിന്നീട് സ്വാതന്ത്ര്യത്തിനു ശേഷമുള്ള ഗവണ്‍മെന്റിന്റെ അനാസ്ഥയുമാണ്.
ഇപ്പോള്‍ ഈ ജലവൈദ്യുതി വിപുലീകരിക്കാനുള്ള ശ്രമത്തിലാണ് ഇന്ത്യ. രാജ്യത്ത് നൂറിലധികം ജലപാതകള്‍ വികസിപ്പിക്കുന്നുണ്ട്. ഇന്ത്യയിലെ നദികളില്‍ അല്ലെങ്കില്‍ ബിസിനസ്സിനും വിനോദസഞ്ചാരത്തിനുമായി ആധുനിക ക്രൂയിസുകള്‍ ഓടിക്കുന്ന ഈ ദിശയിലേക്ക് നാം അതിവേഗം നീങ്ങുകയാണ്. ബംഗ്ലാദേശ് ഗവണ്‍മെന്റുമായി സഹകരിച്ച് ഗംഗ, ബ്രഹ്‌മപുത്ര നദികള്‍ക്കിടയില്‍ ഒരു ജലപാത സ്ഥാപിക്കുന്നതിനും കേന്ദ്ര ഗവണ്‍മെന്റ് കരുക്കള്‍ നീക്കിയിട്ടുണ്ട്.
ഇന്ന്, ഇതുമായി ബന്ധപ്പെട്ട വിവരങ്ങള്‍ രാജ്യത്തെ ജനങ്ങളുമായി പങ്കിടാന്‍ ഞാന്‍ ആഗ്രഹിക്കുന്നു. 2023 ജനുവരി 13-ന് കാശി, വാരണാസി എന്നിവിടങ്ങളില്‍ നിന്ന് ഒരു ക്രൂയിസ് യാത്ര ആരംഭിച്ച് 3200 കിലോമീറ്റര്‍ നീളമുള്ള ജലപാതയിലൂടെ ബംഗ്ലാദേശ് വഴി ദിബ്രുഗഢില്‍ എത്തിച്ചേരും. ലോകമെമ്പാടും ഇത്തരമൊരു അഭൂതപൂര്‍വമായ ക്രൂയിസ് ആയിരിക്കും ഇത്. ഇന്ത്യയില്‍ വളരുന്ന ക്രൂയിസ് ടൂറിസത്തിന്റെ പ്രതിഫലനം കൂടിയാകും ഇത്. ഇത് തീര്‍ച്ചയായും പ്രയോജനപ്പെടുത്തണമെന്ന് പശ്ചിമ ബംഗാളിലെ ജനങ്ങളോട് ഞാന്‍ അഭ്യര്‍ത്ഥിക്കുന്നു.
കൂടാതെ, ഇന്ന് ഞാന്‍ ബംഗാളിലെ ജനങ്ങളെ ഒരു കാര്യത്തിന് പ്രത്യേകമായി അഭിവാദ്യം ചെയ്യാന്‍ ആഗ്രഹിക്കുന്നു. ബംഗാളിലെ ജനങ്ങള്‍ക്ക് രാജ്യത്തോടുള്ള സ്‌നേഹത്തെ ഞാന്‍ എന്നും അഭിനന്ദിച്ചിട്ടുണ്ട്. രാജ്യത്തിന്റെ വിവിധ ഭാഗങ്ങളെക്കുറിച്ച് പഠിക്കാനും രാജ്യത്തിന്റെ വിവിധ ഭാഗങ്ങളിലേക്ക് യാത്ര ചെയ്യാനും ബംഗാളിലെ ജനങ്ങള്‍ കാണിക്കുന്ന ആവേശം അതിശയകരമാണ്!
ധാരാളം ആളുകള്‍ അവസരം ലഭിച്ചാലുടന്‍ മറ്റ് രാജ്യങ്ങള്‍ സന്ദര്‍ശിക്കാന്‍ ഇഷ്ടപ്പെടുന്നു, പക്ഷേ ബംഗാളിലെ ആളുകള്‍ എപ്പോഴും അവരുടെ രാജ്യത്തിന് മുന്‍ഗണന നല്‍കുന്നു. ബംഗാള്‍ ജനത വിനോദസഞ്ചാരത്തില്‍ പോലും രാഷ്ട്രം ഒന്നാമത് എന്ന ആവേശം പുലര്‍ത്തുന്നു. ഇന്ന്, രാജ്യത്ത് കണക്റ്റിവിറ്റി വികസിക്കുകയും റെയില്‍വേ, ഹൈവേ, ഐ-വേകള്‍, ജലപാതകള്‍ എന്നിവ ആധുനികമാകുകയും ചെയ്യുന്നതിനാല്‍, യാത്രയുടെ എളുപ്പം വര്‍ധിച്ചുകൊണ്ടിരിക്കുന്നു. ബംഗാളിലെ ജനങ്ങള്‍ക്കും ഇതുവഴി വലിയ നേട്ടമാണ് ലഭിക്കുന്നത്.
സുഹൃത്തുക്കളെ,
ഗുരുദേവ് ടാഗോര്‍ രചിച്ച ചില പ്രശസ്ത വരികള്‍-
''ഓ ആമാര്‍ ദേശേര്‍ മതി, തോമര്‍ പൗറെ ഠേകൈ മാതാ''
അതായത്, എന്റെ ജന്മമണ്ണേ, അങ്ങേക്ക് അഗാധമായ പ്രണാമം അര്‍പ്പിക്കുന്നു. ഈ 'സ്വാതന്ത്ര്യത്തിന്റെ അമൃതകാല'ത്തില്‍, മാതൃരാജ്യത്തെ പരമപ്രധാനമായി നിലനിര്‍ത്തിക്കൊണ്ട് നമ്മള്‍ ഒരുമിച്ച് പ്രവര്‍ത്തിക്കണം. ഇന്ന് ലോകം മുഴുവന്‍ ഇന്ത്യയെ വളരെ വിശ്വാസത്തോടെയാണ് നോക്കുന്നത്. ഈ വിശ്വാസം നിലനിര്‍ത്താന്‍, ഓരോ ഇന്ത്യക്കാരനും സാധ്യമായ എല്ലാ ശ്രമങ്ങളും നടത്തണം. രാഷ്ട്രനിര്‍മ്മാണത്തിനായി നാം ഓരോ ദിവസവും ഓരോ നിമിഷവും പ്രവര്‍ത്തിക്കണം. രാജ്യത്തെ സേവിക്കാനുള്ള നമ്മുടെ ശ്രമങ്ങള്‍ നാം നിര്‍ത്തരുത്.
ഈ വാക്കുകളിലൂടെ, വിവിധ പദ്ധതികള്‍ക്ക് ബംഗാളിനെ ഞാന്‍ അഭിനന്ദിക്കുന്നു. ഒരിക്കല്‍ കൂടി നിങ്ങള്‍ക്ക് എന്റെ ഹൃദയംഗമമായ ആശംസകള്‍ നേരുന്നു, എന്റെ പ്രസംഗം അവസാനിപ്പിക്കുന്നു.
ഒത്തിരി നന്ദി !
ND
(Release ID: 1906031)
Visitor Counter : 83
Read this release in:
Tamil
,
English
,
Urdu
,
Hindi
,
Marathi
,
Manipuri
,
Assamese
,
Bengali
,
Punjabi
,
Gujarati
,
Odia
,
Kannada