নমস্কার!

নোংচুপ বেঙ্গোলগী রাজ্যপাল, শ্রী অনন্দিবেনজী, ইকায়খুম্ননিংঙাই ওইরবা মুখ্য মন্ত্রী মমতাজী, কেন্দ্রগী মন্ত্রী-মন্দলগী ঐহাক্কী মরুপ অশ্বিনী বৈশ্নবজী, সুভাস সরকারজী, নিস্থিক প্রমানিকজী, জন বরেলীজী, ওপোজিসনগী লুচিংবা সুবেন্দু অধিকারীজী, এম.পি. প্রসুনজী, তাংবলদা লেংখৎপীরিবা অতোপ্পা মরুপ, ইবেম্মা অমসুং ইবুংঙোশিং!

ঐহাক অসি ঙসি অদোমগী মরক্তা লাক্কদবনি, অদুবু ঐহাক্কী ইশাগী খুদোংচাদবা খরদগী অদোমগী নাক্তা লাকপা ফংদরে। মরম অদুনা অদোম্না অমসুং বঙ্গালনা ঐহাকপু ঙাকপীনবা হায়জরি। বঙ্গালগী শেংলবা লমদম, কোলকতাগী পুৱারী ওইরবা লমদম্বু ঐহাক্না ঙসি ইকায় খুম্নবা উৎপগী খুদোংচাবা ফংজরে। বঙ্গালগী শাগোন্নুংদা নিংতম্বগী ইহৌগী পুৱারী য়াওরি। বন্দে মাতরম হৌদোকখিবা লদমসিদা ঙসিদি বন্দে ভারত একপ্রেসকী অশংবা ফিরাল পাইহনখ্রে। ঙসিগী নুমিৎ, দিসেম্বর ৩০ অসিসু মশাগী ওইনা য়াম্না পুৱারী ওইরবা নুমিৎ অমনি। দিসেম্বর ৩০, ১৯৪৩ অসিদা নেতাজীনা অন্দমান্দা ভারতকী তিরঙ্গা পায়হন্দুনা নিংতম্বগী খোল্লাও লাওখিবনি।

থৌদোক অসিনা চহি ৭৫ মপুং ফাখিবা মতমদা ঐহাক্না অন্দমান্দা চৎখি, মফমদুগী ইথৎ অমবু নেতাজীগী মিংদা কত্থোকখি। অদুগা লৈবাক অসিনা হৌজিক নিংতম্বগী চহি ৭৫ মপুং ফাবগী নুংঙাইবা ফোংদোক্লি, অমৃত মহোৎসব পাংথোক্লি। মসিগুম্বা অমৃত মহোৎসব অসিদা লৈবাক অসিনা বন্দে ভারত ত্রেন ৪৭৫ হৌদোক্নবা ৱারেপ লৌখিবনি। মসিগী মনুংদগী অমা, হৌরাহ-ন্যু জালপাইগুরী বন্দে ভারত ত্রেন কোলকতাদগী ঙসিদগী চেনবা হৌরে। রেলৱে অমসুং মেত্রোগী কন্নেক্তিবিতীগা মরী লৈনবা অতোপ্পা প্রোজেক্ত কয়াসু ঙসি শঙ্গাবগা লোয়ননা উরেপ উয়ুং তম্লি। চাউরাকপা লুপা করোর লিশিং ৫গী শেনফমগী জোকা-বি.বি.দি. বাগ মেত্রো প্রোজেক্তকী থবক হৌরে। মসিগী মনুংদগী, জোকা-তরাতালা মেত্রো লম্বী শেম্বা লোইরে। মসিনা শহরগী মীয়ামগী পুন্সি মহিংসু হেন্না নুংঙাইহল্লগনি।

মরুপশিং,

ঐহাক্না ঙৈহাক্কী মমাংদা গঙ্গাজীবু লু-নান্না থম্বা অমসুং থক্নবা ঈশিংগা মরী লৈনবা প্রোজেক্ত কয়া অমা নোংচুপ বেঙ্গোলগী মফমদা খুৎশিন্নবগী খুদোংচাবা ফংজখি। নমামী গঙ্গে মিসনগী মখাদা নোংচুপ বেঙ্গোলদা সিৱরেজকী প্রোজেক্ত ২৫ হেনবগী অয়াবা পীখ্রে। মসিগী মনুংদগী প্রোজেক্ত ১১দি লোইশিনখ্রে অমসুং অতোপ্পা প্রোজেক্ত ৭ অমনা ঙসি লোইশিল্লি। ঙসিমক অসিদসু লুপা করোর লিশিং ১গা মখায়গী শেনফমগী অনৌবা প্রোজেক্ত কয়া হৌদোক্লি। মসিগী মনুংদগী মরু ওইবশিংদি, অদি গঙ্গা তুরেলবু অমুক হন্না হিংগৎহনবনি। হৌজিক্কী ওইনা, অদি গঙ্গাগী ফিভম য়াম্না ফত্তে হায়না ঐহাক্কী মফমদা পাউদম্লে। মসি য়াম্না লাইবক থীবনি। মসিদা ফত্ত-হৌদি কয়া থাদরিবা, নলাগী অমোৎপা ঈশিং তাশিল্লিবা, পুম্নমক অসিবু শেংদোক্নবগীদমক্তা লুপা করোর ৬০০ হেনবগী মতমগা চুনবা ইনফ্রাস্ত্রকচর কয়া শেম শাবগী থবক পায়খৎলি।

ঐখোয়না মীওইবগী পুন্সিগী শরুক অমা ওইনা প্রিভেন্তিব হেল্থকেয়রগী মতাংদা অয়াম্না মতমদা ৱারী তৌই, নারক্তনবা হান্না মাংজৌননা ঙাকথোকপনা হেন্না ফবনি হায়না তোয়না হায়নৈ। মতৌ অসিগুম্না, তুরেলশিংবু মোৎহন্দনবা কেন্দ্র সরকারনসু মাংজৌননা ঙাক-শেনবগী হীরমদা অহেনবা মিৎয়েং চঙলি। অদুগা মসিগুম্বা ঙাক-শেনবগী খ্বাইদগী মরু ওইবা অমসুং মতমগা চুনবা থৌওংদি য়াম্না মোদর্ন ওইবা সিৱেজ ত্রিতমেন্ত প্লান্তনি।

মথংগী চহি ১০-১৫দা ওইরক্কদবা ফিভমগী খল্লদুনা ঐখোয়না লৈবাক অসিদা সিৱেজ ত্রিতমেন্ত প্লান্ত ঙসিমক শেমগৎলি। নিংতম্বগী অমৃত কাল অসিদা ঐখোয়না তুংলমচত্তা থম্বা মিৎয়েংগা লোয়ননা লৈবাক অসিবু মাং থানা পুশিনবা তাবনি।

মরুপশিং,

হৌজিক চৎলিবা ২১শুবা চহি-চাসিদা লৈবাকপু খোঙজেল য়াঙনা চাউখৎহন্নবগীদমক্তা ইন্দিয়ন রেলৱেজপু খোঙজেল য়াঙনা চাউখৎহনবা, ইন্দিয়ন রেলৱেজপু নিংথিজনা শেমদোকপা, হায়বা ৱাফমশিং অসি য়াম্না মরু ওইবনি। মসিনা মরম ওইদুনা, কেন্দ্র সরকারনা ঙসিদি ইন্দিয়ন রেলৱেজপু মতমগা চুনহন্নবা অমসুং রেলৱে ইন্সফ্রাস্ত্রকচরবুসু মতমগা চুনহন্নবা রেকোর্দ ওইরবা ইনভেস্তমেন্ত তৌরি। ইন্দিয়ন রেলৱেজপু হেন্না ফগৎহন্নবগীদমক্তা ভারত্তা লৈবাক শিনবা থুংবগী কেম্পেন অমা চত্থরি। ঙসিদি, বন্দে ভারত, তেজস, হমসফরগুম্বা মতমগা চুনবা ত্রেন কয়া লৈবাক অসিমক্তদা শারি। বিস্তা দোম কোচশিংনা রেলগী পেসেঞ্জরশিংদা অনৌবা এক্সপেরিএন্স পীরি। তেক্ত-কায়দবা, মতমগা চুনবা কোচশিংগী মশিংদসু রেকোর্দ কয়া থম্বা ঙম্লে। ঙসিদি, রেলৱে স্তেসনশিংসু এয়রপোর্তকুম্না চাউখৎহল্লে। হায়রিবশিং অসিগী মনুংদা ন্যু জালপাইগুরীসু মনুং চল্লিবনি।

রেলৱে লাইনশিংগী মশিং অনি থোক্না হেনগৎহনবা, রেলৱে লাইনশিংবু ইলেক্ত্রিক ওন্থোকপদা খোঙজেল য়াঙলিবা, মসি হান্না অমুক্তা পাংথোকখিদ্রি। লৈবাক অসিদা ইস্তর্ন অমসুং ৱেস্তর্ন দেদিকেতেদ ফ্রৈত কোরিদোর শারিবা অসিনা লোজিস্তিক সেক্তরদা অচৌবা অহোংবা অমা পুরক্লগনি। তেক্ত-কায়দবা ওইরো, লু-নানবা ওইরো, খুদোংচাবা ওইরো, চাং-নাইবা অমসুং মতম চাবা ওইরো, নুংঙাইবা ওইরো, ইন্দিয়ন রেলৱেজনা ঙসিদি অনৌবা শক্তাক অমা শেম্বা ঙম্লে অমসুং পুম্নমক্না হোৎনরিবা কয়াগী মহৈ ফংবা ঙম্লে। ইন্দিয়ন রেলৱেজনা মমাংগী চহি ৮সিদা মতমগা চুনহনবা হায়বসিদা য়ুম্ফম ওইদুনা থবক কয়া পায়খৎলে। অদুনা লাক্কদৌরিবা চহি ৮সিদা ইন্দিয়ন রেলৱেজনা মতমগা চুনবগী অনৌবা খোঙচৎ অমা চৎপগী মতৌ উবা ফংলগনি। ভারতকুম্বা মহা ওইরিবা লৈবাক্কীদমক্তা ইন্দিয়ন রেলৱেজসু নহা ওইওবা শক্তাক অমগা লোয়ননা থোক্লক্লগনি। মসিগী মনুংদা মরু ওইনা পনবা য়াবা থৌদাংনা বন্দে ভারত ত্রেন ৪৭৫ অসিনা লৌগনি।

মরুপশিং,

নিংতম্বা ফংলবা মতুংগী দিকেদ ৭সিদা রেল লাইন কিলোমীতর লিশিং ২০ খক ইলেক্ত্রিক্না চেলহনবা ঙমখি। ইং ২০১৪দা ঐখোয়গী সরকার শেম্লবা মতুংগী চহি ৭-৮ মক্তদা রেল লাইন কিলোমীতর লিশিং ৩২ হেনববু ঐখোয়না ইলেক্ত্রিক্না চেলহনবা ঙমখি। মসি ঐখোয়গী লৈবাক্কী থবক তৌবগী খোঙজেলনি, রেলৱেজপু মতমগা চুনহন্না হোৎনবগী থবক্কী খোঙজেলনি। অদুগা হায়রিবা খোঙজেল অসিবু শরুক অনি থোক্না অমুক্কা হেনগৎহন্নবগীদমক্তা ভারত্তা হৌজিক মালেমগী খ্বাইদগী অহানবা অমসুং খ্বাইদগী মপাঙ্গল লৈবা ইলেক্ত্রিক্কী রেল ইঞ্জিন শিজিন্নবসু খোঙজেল য়াঙনা হেনগৎলক্লি।

মরুপশিং,

ঙসিগী ভারতকী স্পীদ অমসুং স্কেলগী অতোপ্পা খুদম অমদি ঐখোয়গী মেত্রো রেল সীস্তেম্না ওইরি। মেত্রো রেলনা পব্লিক ত্রান্সপোর্তকী খ্বাইদগী ফবা পাম্বৈ অমা ওই হায়বসিদি কোলকতাগী মীয়াম্না নিংথিনা খঙলবনি। ইং ২০১৪গী মমাংদা, লৈবাক অসিগী মেত্রো রেল নেতৱর্ক্কী অপুনবা অশাংবনা কিমি. ২৫০দগী হেন্না তারম্মি। মসিগী মনুংদা খ্বাইদগী শাংবা শরুক্না দিল্লী-এন.সি.আর.দা লৈরম্মি। কেন্দ্র সরকারনা ফিভম অসিদা অহোংবা পুরকখি, মসিবু শেমদোক্নবা ঙমজবী থাদুনা হোৎনখি। অদুগা খোঙজেল য়াঙনসু শেমদোকপা ঙমখি। মমাংগী চহি ৮সিদা ঐখোয়না মেত্রোবু শহর দর্জন অনি হেনবদা হৌদোকখি। ঙসিদি, লৈবাক্কী শহর অয়াম্বদা চাউরাকপা মিলোমীতর ৮০০গী ত্রেক্তা মেত্রো চেল্লি। কিলোমীতর ১০০০ শাংবা মেত্রো ত্রেক অমগী থবকসু খোঙজেল য়াঙনা পায়খৎলি। জোকা-বি.বি.দি. বাগ মেত্রোসু মসিগী মনুং চনবা পান্দম অমনি।

মরুপশিং,

মমাংগী চহি-চা অসিদা ভারতকী অচৌবা শিংনবা অনি অমগা লৈরক্লি। মখোয়শিং অসিনা লৈবাক্কী চাউখৎ-থৌরাংবু অকনবা চৈথেং পীদুনা লাকখি। ইনফ্রাস্ত্রকচরগী থবকশিংদা তোঙানবা এজেন্সীগী মরক্তা নিংথিনা পাউ-ফাওনবা ঙমদবা হায়বসিনা অচৌবা শিংনবা অমা ওইদুনা লাকখি। অদুগা অতোপ্পা শিংনবা অসিনা, ত্রান্সপোর্তকী তোঙানবা খুদোংচাবশিংগী মরক্তা অমগা-অমগগী মরক্তা চুশিন্নবা ৱাৎপা। পুম্নমক অসিনা মরম ওইদুনা, সরকারগী বিভাগ অমনা অতোপ্পা বিভাগ অমনা করি থবক পায়খৎলি খঙবা ঙমহন্দে, করি অনৌবা থবক পায়খৎনবা হোৎনরি নত্ত্রগা পায়খৎলি হায়বা খঙবা ঙমহন্দে। মসিগী অৱাবনা লৈবাক্কী পুকচেল শেংনা তেক্স থীজবা মীওইশিংনা থেংনরি।

সরকারগী শেল মফম খঙদনা মাঙবা, প্রোজেক্ত থেংথবা অমসুং শেঞ্জা থুমজাগী মতৌবু লৈবাক্কী পুকচেল শেংনা তেক্স থীজবা মীওইশিংনা মতম পুম্বদা পামদনা লাক্লি। মখোয়না ৱানা তাঞ্জবা শেলশিংনা থীরিবা তেক্সশিং অসি লাইরবশিংগী কান্নবা থবক তৌবগী মহুত্তা শেঞ্জা থুমজাদা ওইনা চৎলে খঙবদা মখোয়না য়াম্না নুংঙাইতবা হায়বসিদি মহৌশানা তাবনি।

মতৌ অসুম্না শেল মাঙবা অসিবু থিংনবগীদমক্তা, বিভাগশিংগী মরক্তা পাউ হেন্না নিংথিনা ফাওনবা ঙমহন্নবগীদমক্তা ঐখোয়না পি.এম. গতিশক্তি মাস্তর প্লান হৌদোকখি। তোঙানবা রাজ্য সরকারশিং ওইরো, তোঙানবা বিভাগশিং ওইরো, কন্সত্রক্সনগা মরী লৈনবা এজেন্সীশিং ওইরো, নত্ত্রগা ইন্দস্ত্রীগী মীওইশিং ওইরো, মসিনা পুম্নমকপু প্লেতফোর্ম অমদা পুরক্লগনি। পুরক্লি।

পি.এম. গতিশক্তিনা লৈবাক্কী ত্রান্সপোর্তপু তোঙান-তোঙানবা পাম্বৈশিংগা অমত্তা ওইনা মরী লৈনহল্লি, মলতি মোদেল কন্নেক্তিবিতীগী থবকশিংসু খোঙজেল য়াঙনা তেংবাংলি। ঙসিদি লৈবাক অসিদা রেকোর্দ ওইবা খোঙজেলদা হাইৱে শারি, এয়রপোর্ত, হিথাংফম, ৱাতরৱে কয়া শারি। ত্রান্সপোর্তকী পাম্বৈ অমবু ত্রান্সপোর্তকী অতোপ্পা পাম্বৈ অমবু শৌগৎনবা মওংদা মরী লৈনবা থবকশিং পাংথোকপা অসিসু পনবা য়াবা মরু ওইবা থৌওং অমা ওইরি। হায়বদি, হাইৱেশিংগা রেলৱে স্তেসনশিংগা মওং তানা শম্নহনবা, এয়রপোর্তশিংগা মওং তানা শম্নহনবা অমসুং মীওইশিংনা চত্থোক চৎশিন তৌবদা মওং-মরিল চুম্বা কন্নেক্তিবিতী ফংহনবা হায়বনি।

মরুপশিং,

২১শুবা চহি-চাসিদা লৈবাকপু খোঙজেল য়াঙনা চাউখৎহন্নবগীদমক্তা লৈবাক্কী রিসোর্সশিংবু ঐখোয়না নিংথিনা শিজিন্নবা তাবনি। ঐহাক্না লৈবাক মীয়ামদা ৱাতরৱেজকী খুদম পীবা পাম্মি। মতম অমা লৈরম্মি, ভারত্তা ৱাতরৱেবু তুরিজম অমসুং কারবারগীদমক্তা পাক শন্না শিজিন্নরম্মি। মরম অদুনা, শহর অমসুং শহর মচা কয়া তুরেল মপান্দা অয়াম্বা তানরম্মিবনি, তুরেল মপানগী লমদমশিংনা য়াম্না চাউখৎনরম্মিবনি। অদুবু, মসিগী পথাপ অসিবু চহি চা কয়া মীখা পোনখিবা অমসুং নিংতম্বা ফংলবা মতুংদা সরকারনা মিৎয়েং অমুক চঙবীদবনা অদুমক মাঙখ্রিবনি।

ঙসিদি, ভারতনা মসিগুম্বা ঈশিংগী পাঙ্গল অসিবু অমুক হন্না পুরক্নবা থবক পায়খৎলি, লৈবাক মনুংসিদা ৱাতরৱে ১০০ হেন্না শেমগৎলি। ভারতকী তুরেলশিংদা মতমগা চুনবা ক্রুজ চেন্নবা, কারবার তৌনবা, তুরিজম লৈনবা ঐখোয়না খোঙজেল য়াঙনা থবক পায়খৎলি। কেন্দ্র সরকারনা বাঙ্গলাদেশ সরকারগী অয়াবা লৌদুনা গঙ্গা অমসুং ব্রহ্মপুত্রা তুরেল মরক্তা ৱাতরৱে লিঙ্ক শেম্বগী থবকসু পায়খৎলে।

হীরম অসিগা মরী লৈনবা ৱাফম খরা ঐহাক্না ঙসি লৈবাক মীয়ামদা তমজনিংই। জনুৱারী ১৩, ২০২৩দা কাশিদগী ভরানসী ফাওবা ক্রুজ অমা চেনগদৌরি, মসিনা কিলোমীতর ৩২০০ শাংবা ৱাতরৱে  ফাওদুনা বাঙ্গলাদেশ ফাওদুনা দিব্রুগর ফাওবা চেনগনি। মসিনা মালেমগী ওইবা মসিগুম্বা মখলগী তোঙানবা ক্রুজ অমা ওইগনি। মসিনা ভারত্তা চাউখৎলক্লিবা ক্রুজ তুরিজম্বু হেন্না খুমাং চাউশিলহনগনি। নোংচুপ বেঙ্গোলগী মীয়াম্না মসিগী কান্নবা শোইদনা লৌবীয়ু হায়না ঐহাক্না হায়জরি।

ঐহাক্না ঙসিগী নুমিৎসিদা বেঙ্গোলগী মীয়ামদা য়াম্না অখন্ননা হায়বা পামজৈ। বেঙ্গোলগী মীয়াম্না লৈবাকপু নুংশিজবা অসিবু ঐহাক্না মতম পুম্বদা থাগৎচনিংদুনা লাক্লি। লৈবাক্কী তোঙানবা মফমশিংবু খঙনিংবা, লৈবাক্কী তোঙানবা মফমশিংদা চৎনিংবা পাম্বগী মতৌ অমা বেঙ্গোলগী মীয়ামদা লৈরিবা অসি তসেংনা তোপ-তোপ্পা মগুন্নি।

মীওই অয়াম্বনা খুদোংচাবা হেক ফংবগা অতোপ্পা লৈবাক্তা লমকোয়বা চৎনৈ, অদুবু বেঙ্গোলগী মীয়ামদি ইশাগী লৈবাক মনুংদা কোয়বনা অহেনবা মরু ওইবা পীনৈ। বেঙ্গোলগী মীয়ামদি লমকোয়বগী মতাংদসু ইমা লৈবাক্না হান্না হায়বা ৱাখল্লোন চেল্লি। লৈবাক্কী কন্নেক্তিবিতী ফগৎলক্লিবা, রেলৱে, হাইৱে, ৱাতরৱে চাউখৎলক্লিবা অসিদগী ইজ ওফ ত্রাভেলসু মান্ননা ফগৎলক্লি। বেঙ্গোলগী মীওই কয়া অমনা মসিগী কান্নবা কয়া অমসু ফংনরি। 

মরুপশিং,

গুরুদেব তেগোরনা লেংলম্বা ৱাফম খরাঃ “ও ওমার দেশের মাতী, তোমার পোরে থেকাই মাথা”। মসিনা হায়বদি, ঐহাক্কী লৈবাক্কী লৈহাও মমাংদা ঐহাক্কী কোক নোঞ্জরি। নিংতম্বগী হৌজিক্কী অমৃত কাল অসিদা ইমা লৈবাকপু খ্বাইদগী মকোক্তা থমদুনা, ঐখোয়না মসিগী থবকসিমক পাংথোক্কদবনি। মালেম পুম্বনা ঙসিদি ভারত্তা থাজবা মিৎয়েংগা লোয়ননা য়েংলি। থাজবা অসিবু ঙাক্নবগীদমক্তা ভারত মচা খুদিংনা মশাগী পাঙ্গল শিজিন্নগদবনি। ঐখোয়না লৈবাক্কী কান্নবগীদমক্তা ইশাগী নুমিৎ খুদিংমক শিজিন্নগদবনি, মিৎকুপ খুদিংবু লৈবাক্কী য়াইফবগীদমক্তা লেনগদবনি। লৈবাক্কী শেবা লেপ্পা য়াদে।

ৱাফমশিং অসিগা লোয়ননা ঐহাক্না অদোম্বু য়াম্লবা প্রোজেক্তশিংগীদমক্তা থাগৎচরি। ঐহাক্না পুম্নমকপু অমুক্কা হন্না ইকায় খুম্নবা উৎচরি। ৱাফম অসিগা লোয়ননা ঐহাক্কী ৱারোল লোইশিঞ্জগে।

পুম্নমকপু থাগৎচরি!

*****