ପ୍ରଧାନମନ୍ତ୍ରୀ ଶ୍ରୀ ନରେନ୍ଦ୍ର ମୋଦୀ ଆସନ୍ତାକାଲି ପିଏମ୍ କିଷାନ ସମ୍ମାନ ନିଧି ଯୋଜନା (ପିଏମ୍ – କିଷାନ) ଯୋଜନା ଅଧୀନରେ ପ୍ରତ୍ୟେକ  କୃଷକଙ୍କୁ  ୨୦୦୦ ଟଙ୍କା ଲେଖାଏଁ ପ୍ରଦାନ କରିବେ । ଏହି ଯୋଜନା ଅଧୀନରେ ମୋଟ ୧୬,୮୦୦ କୋଟି ଟଙ୍କାରୁ ଅଧିକ ଅର୍ଥ ଆଠ କୋଟିରୁ ଅଧିକ କୃଷକଙ୍କ ଆକାଉଣ୍ଟରେ ସିଧାସଳଖ ଜମା ହେବ ।

କର୍ଣ୍ଣାଟକର ବେଲାଗାଭି ଠାରେ ଭାରତୀୟ ରେଳବାଇ ଏବଂ ଜଳ ଜୀବନ ମିଶନର ସଂଯୋଜନାରେ ପିଏମ୍ – କିଷାନ ଯୋଜନାର ବହୁ ପ୍ରତୀକ୍ଷିତ ୧୩ ତମ କିସ୍ତିକୁ ପ୍ରଦାନ କରାଯିବ । ଏହି ଅବସରରେ କେନ୍ଦ୍ର କୃଷି ଓ କୃଷକ କଲ୍ୟାଣ ମନ୍ତ୍ରୀ ଶ୍ରୀ ନରେନ୍ଦ୍ର ସିଂହ ତୋମାର ଏବଂ କୃଷି ଓ କୃଷକ କଲ୍ୟାଣ ମନ୍ତ୍ରଣାଳୟର ସଚିବ ଶ୍ରୀ ମନୋଜ ଅହୁଜା ଉପସ୍ଥିତ ରହିବେ । ଏହି କାର୍ଯ୍ୟକ୍ରମରେ ପିଏମ୍ – କିଷାନ ଏବଂ ଜଳ ଜୀବନ ମିଶନ ହିତାଧିକାରୀ ମାନଙ୍କ ସମେତ ପ୍ରାୟ ଏକ ଲକ୍ଷରୁ ଅଧିକ ଲୋକ  ଉପସ୍ଥିତ ରହିବେ ବୋଲି ଆଶା କରାଯାଉଛି । ଯେଉଁ ଲୋକମାନେ ଏହି କାର୍ଯ୍ୟକ୍ରମର ସିଧାପ୍ରସାରଣ ଦେଖିବାକୁ ଇଚ୍ଛୁକ, ସେମାନେ ନିମ୍ନଲିଖିତ ୟୁଆର୍‌ଏଲ୍‌କୁ ଯାଇ କାର୍ଯ୍ୟକ୍ରମ ପାଇଁ ପଞ୍ଜୀକରଣ କରି ପାରିବେ ।

URL : https://lnkd.in/gU9NFpd ଏବଂ https://pmindiawebcast.nic.in/ ରେ କାର୍ଯ୍ୟକ୍ରମର ସିଧାପ୍ରସାରଣ ଦେଖିବା ପାଇଁ ଟ୍ୟୁନ୍ ଇନ୍ କରନ୍ତୁ ।

ଏହି ଯୋଜନା ଅନ୍ତର୍ଗତ ଏକାଦଶ ଏବଂ ଦ୍ୱାଦଶ କିସ୍ତି ଗତ ବର୍ଷ ମେ ଏବଂ ଅକ୍ଟୋବର ମାସରେ ପ୍ରଦାନ କରା ଯାଇଥିଲା । ୧୩ ତମ କିସ୍ତି ଜାରି କରିଯିବା ସହିତ ସରକାର ଭାରତର କୃଷକ ମାନଙ୍କୁ ସହାୟତା କରିବା ଏବଂ ସେମାନଙ୍କ ଜୀବିକା ଲକ୍ଷ୍ୟ ହାସଲ କରିବାରେ ସାହାଯ୍ୟ କରିବା ପାଇଁ ଯେଉଁ ପ୍ରତିଜ୍ଞା କରିଛନ୍ତି ତାହାକୁ ଜାରି ରଖିଛନ୍ତି । ପିଏମ୍ – କିଷାନ ଯୋଜନା ସାରା ଦେଶରେ କୃଷକ ମାନଙ୍କୁ ଉଲ୍ଲେଖନୀୟ ଲାଭ ପ୍ରଦାନ କରିସାରିଛି ଏବଂ ଏହି ନୂତନ କିସ୍ତି ସେମାନଙ୍କ ଆୟକୁ ଆହୁରି ଅଧିକ କରିବ ଏବଂ କୃଷି କ୍ଷେତ୍ରର ବିକାଶ ନିମନ୍ତେ ସହାୟକ ହେବ ।

ପ୍ରଧାନମନ୍ତ୍ରୀ ଶ୍ରୀ ନରେନ୍ଦ୍ର ମୋଦୀ ୨୦୧୯ରେ ପ୍ରଧାନମନ୍ତ୍ରୀ କିଷାନ ସମ୍ମାନ ନିଧି (ପିଏମ୍ – କିଷାନ) ଯୋଜନା ଆରମ୍ଭ କରିଥିଲେ । ଏହି ଯୋଜନାରେ କେତେକ ନିର୍ଦ୍ଦିଷ୍ଟ ବହିଷ୍କରଣକୁ ବାଦ ଦେଇ ଦେଶର ସମସ୍ତ ଚାଷ ନିମନ୍ତେ ଯୋଗ୍ୟ ଜମିଧାରକ କୃଷକ ପରିବାରକୁ ଆୟ ସହାୟତା ଯୋଗାଇ ଦେବାକୁ ଲକ୍ଷ୍ୟ ରଖା ଯାଇଛି । ଏହି ଯୋଜନା ଅଧୀନରେ, ପ୍ରତି ବର୍ଷ ପ୍ରତ୍ୟେକ କିସ୍ତିରେ ୨୦୦୦ ଟଙ୍କା ଲେଖାଏଁ କରି ତିନୋଟି କିସ୍ତିରେ ୬,୦୦୦ ଟଙ୍କା ସିଧାସଳଖ ହିତାଧିକାରୀ ମାନଙ୍କୁ ବ୍ୟାଙ୍କ ଆକାଉଣ୍ଟ ମାଧ୍ୟମରେ ପ୍ରଦାନ କରା ଯାଇଥାଏ ।

ଦେଶର ସମସ୍ତ ଭୂମିଧାରକ କୃଷକ ପରିବାର ନିର୍ଦ୍ଦିଷ୍ଟ ବହିଷ୍କରଣ ମାନଦଣ୍ଡ ଅନୁଯାୟୀ ପିଏମ୍ – କିଷାନ ଯୋଜନା ଅଧୀନରେ ଯୋଗ୍ୟ ଅଟନ୍ତି ।

ବର୍ତ୍ତମାନ ସୁଦ୍ଧା, ୧୧ କୋଟିରୁ ଅଧିକ କୃଷକ ପରିବାର, ମୁଖ୍ୟତଃ କ୍ଷୁଦ୍ର ଏବଂ ନାମ ମାତ୍ର କୃଷକ ପରିବାରକୁ ୨.୨୫ ଲକ୍ଷ କୋଟି ଟଙ୍କାରୁ ଅଧିକ ଅର୍ଥ ପ୍ରଦାନ କରାଯାଇଛି । ବିଶେଷ ରୂପରେ, କୋଭିଡ୍ ଲକଡାଉନ୍ ସମୟରେ ଏହି ଅଭାବୀ ଚାଷୀ ମାନଙ୍କୁ ସହାୟତା କରିବା ପାଇଁ ଅନେକ କିସ୍ତିରେ ୧.୭୫ ଲକ୍ଷ କୋଟି ଟଙ୍କା ବଣ୍ଟନ କରା ଯାଇଥିଲା । ଏହି ଯୋଜନାରେ ତିନି କୋଟିରୁ ଅଧିକ ମହିଳା ହିତାଧିକାରୀ ମଧ୍ୟ ଉପକୃତ ହୋଇଛନ୍ତି, ଯେଉଁମାନେ ସାମୁହିକ ଭାବେ ୫୩,୬୦୦ କୋଟି ଟଙ୍କାରୁ ଅଧିକ ଅର୍ଥ ପାଇଛନ୍ତି ।

ଏହି ପଦକ୍ଷେପ ଅନ୍ତର୍ଗତ ପାଣ୍ଠି ଗ୍ରାମୀଣ ଅର୍ଥ ବ୍ୟବସ୍ଥାର ଅଭିବୃଦ୍ଧିକୁ ତ୍ୱରାନ୍ୱିତ କରିଛି, କୃଷକ ମାନଙ୍କ ପାଇଁ ଋଣ ସୀମିତତାକୁ ହ୍ରାସ କରିଛି ଏବଂ କୃଷି କ୍ଷେତ୍ରରେ ନିବେଶକୁ ଅଧିକ କରିଛି । ଏହା ମଧ୍ୟ କୃଷକ ମାନଙ୍କର ବିପଦକୁ ହାତକୁ ନେବା କ୍ଷମତା ବୃଦ୍ଧି କରିଛି, ଯାହା ଅଧିକ ଉତ୍ପାଦନକାରୀ ନିବେଶକୁ ଆଗେଇ ନେଇଛି । ଆଇଏଫ୍‌ପିଆର୍‌ଆଇ ଅନୁଯାୟୀ, ପିଏମ୍ – କିଷାନ ପାଣ୍ଠି ପ୍ରାପ୍ତକର୍ତ୍ତା ମାନଙ୍କୁ ସେମାନଙ୍କର କୃଷି ଆବଶ୍ୟକତା ତଥା ଶିକ୍ଷା, ଚିକିତ୍ସା ସେବା ଏବଂ ବିବାହ ପରି ଅନ୍ୟାନ୍ୟ ଖର୍ଚ୍ଚ ପୂରଣ କରିବାରେ ସାହାଯ୍ୟ କରୁଛି ।

****

SSP