ইকায়খুম্নরবা প্রধান মন্ত্রী লী,

মোনিতরি ওথোরিতি ওফ শিঙ্গাপুরগী মেনেজিং দিরেক্তর,

রিজার্ব বেঙ্ক ওফ ইন্দিয়াগী গভর্নর,

ভারত অমসুং শিঙ্গাপুরগী ঐগী মরুপশিং,

ভারত অমসুং শিঙ্গাপুরগী মরক্তা মরুপ-মপাং ওইরকপা য়াম্না কুইরে অমসুং শাংলবা মতম মরুপ ওইদুনা লাক্লি। মসিগী মরুওইবা শরুক্তি ঐখোয়গী মীগা-মীগা লৈনবা মরী অসিনি। ঙসি  হৌদোক্লিবা য়ু.পি.আই-পে নাউ শম্নবা অসি খৌরাংনা ঙাইরক্লবা লৈবাক অনিগী মীয়ামদা পীবা খুদোল অমনি। থৌরম অসিদা ভারত অমসুং শিঙ্গাপুরগী মীয়াম ঐনা থাগৎচরি।

মরুপশিং,

ঙসিগী মালেমদা, তোঙান-তোঙানবা লম্বীশিংদা তেক্নোলোজিনা ঐখোয় শম্নহল্লে। ফিনতেক্নশু মীওই অমগা অমগা শম্নহল্লে। চৎনবী ওইনা, ফিনতেক অসি লৈবাক অমগী ঙমখৈ মনুং খক্তা পাংথোকপনি। অদুবু ঙসি হৌদোক্লিবা অসিনা ঙমখৈ লান্না ফিনতেক শম্নবগী অনৌবা পন্দুপ অমা হাংদোক্লে।

ঙসিদগী, মখোয় মখোয়গী লৈবাকশিংদা মখোয়না পাংথোক্লিবা অদুগা মান্নবা মওংদা মখোয়গী মোবাইল ফোনশিংদগী শিঙ্গাপুর অমসুং ভারতকী মীয়াম শেন থাদোক-থাজিন তৌবা য়ারগনি। মসিনা লৈবাক অনিগী মীয়াম মখোয়গী ফোনশিংদগী শেন য়াম্না চংদনা খুদক্তা শেন থাবা য়ারগনি। মসিগী খুদোংচাবা অসিনা, লৈবাক অনিগী মরক্তা মমল হোংনা অমসুং খুদক্তা রেমিত্তেন্স থাবা য়ারগনি। মসিনা মপান লৈবাক্তা লৈরিবা ঐখোয়গী ইচিন-ইনাওশিং, ইচল-ইচেশিং, শীনফম কয়াদা থবক তৌরিবা মীওইশিং, মহৈরোয়শিং অমসুং মখোয়গী ইমুং-মনুংগী মীওইশিংদা কান্নবা পীরগনি।

মরুপশিং,

হৌখিবা চহি কয়াদগী, অনৌবা থবক কয়া পাংথোক্নবা ফিবম অমা শেমগৎবা অসি ভারতনা মরুওইনা লৌদুনা লাক্লি। মসিগী মথক্তা, ঐখোয়গী দিজিতেল ইন্দিয়া প্রোগ্রাম অসিনা ভারত্তা নুংঙাইনা ললোন-ইতিক পাংথোকপা হেনগৎহল্লে অমসুং হিংবদা লাইহল্লে। মসিনা থবক কয়া দিজিতেলনা শম্নহন্দুনা মমাঙদা অমুক্তা ওইখিদ্রিবা ফিবমদা মীওই খুদিংমক শেন-থুমগী থবকশিংনা কোনশিনবগী থবক য়াংখৎহল্লে।

দিজিতেল ইন্দিয়া কেম্পেন্না লৈবাক ঙাকপা অমসুং সরকারগী থবকশিং মীয়ামদা য়ৌহনবদা মমাঙদা অমুক্তা ওইখিদ্রিবা মওংদা অহোংবশিং পুরক্লে। কোবিদ লাইচৎ মনুংদা ভারতকী দিজিতেল ইনফ্রাস্ত্রকচরগী থৌননা, ঐখোয়না মীওই করোর কয়াগী বেঙ্ক একাউন্তশিংদা হকথেংন্না শেন হাপচিনবা ঙমখি।

মরুপশিং,

চহি মঙাগী মমাঙদা, ঐনা শিঙ্গাপুরদা হায়খি, ফিনতেক অসি অনৌবা অমনি অমসুং নহারোলগী শক্তিদা থাজবা থমখি। ফিনতেক অমসুং দিজিতেল রিভোলুসন্দা ভারতকী মাইপাকপা অসি তেক্নোলোজিদা ত্রেনিং ফংলবা ঐখোয়গী নহারোলশিংনা পুরকপনি। ঙসিদি, ভারত্তা স্তার্দ-অপ লিশিং কয়া ফিনতেক্কী তাইবংদা শিংথাবা য়াবা থবক কয়া পাংথোক্লে। মসিগী থৌনা অসিনা মরম ওইদুনা, খুদক্তা দিজিতেল ওইনা শেন থাদোক-থাজিনগী থবক্তা মালেমদা মাঙজিল থাবা লৈবাকশিংগী মনুংদা ভারত য়াওরে।

ঙসিদি য়ু.পি.আই অসি ভারত্তা শেন পীনবগী খ্বাইদগী পাম্নবা থবক অমা ওইরে। ললোন-ইতিক তৌরিবশিং অমসুং পোৎ-চৈ লৈরিবশিং অনিমক্না মসি হেন্না হেন্না শীজিন্নরে। মরম অসিনা, ভারত্তা অথুবা মতমদা কেস ত্রান্সসেক্সন্দগী দিজিতেল-ৱাল্লেত ত্রান্সসেক্সনশিংনা হেল্লগনি হায়না অখঙ-অহৈশিংনা পানরি। হৌখিবা চহি ২০২২দা, চাউরাক্না লুপা করোর লাখ ১২৬(শিঙ্গাপুর দোল্লার ত্রিল্লিয়ন ২ হেন্না)য়ু.পি.আইগী খুৎথাংদা ত্রান্সসেক্সনশিং পাংথোকখি। করিগুম্বা অসিনা ত্রান্সসেক্সন মশিংদা হায়রবদি, মসি করোর ৭৪০০ হেনখি। ভারতকী য়ু.পি.আই সিস্তেম অসিনা মশিং য়াম্লবা মীওই কয়ানা লাইনা অমসুং অশোই-অঙাম থোক্তনা শীজিন্নরে হায়বা মসিনা তাক্লে।

অফবা অমনা তোঙান-তোঙানবা লৈবাকশিংগা য়ু.পি.আইগা পু্ন্না থবক তৌমিন্নবশু হেনগৎলক্লি। মী অমদগী মী অমদা শেন পীথোক-পীশিন তৌনবগী খুদোংচাবা হৌদোকপা অসি শিঙ্গাপুরনা অহানবা লৈবাক্নি। মসিগী থবক অসি মাইপাক্নবা হোৎনবদা শরুক য়াখিবা মোনিতরি ওথোরিতি ওফ শিঙ্গাপুর, রিজার্ব বেঙ্ক ওফ ইন্দিয়া অমসুং মীওই খুদিংমক ঐনা থাগৎচরি।

লৈবাক অনিমক্কী মীওইশিং ঐনা অমুক হন্না থাগৎচরি অমসুং ঐনা থম্মোয় শেংনা প্রধান মন্ত্রী থাগৎপা ফোঙদোকচরি।

অদোম থাগৎচরি।

*****