খুরুমজরি!

রোজগার মেলাগীদমক দেবভুমি উত্তরাখান্দগী নহারোলশিং ঐনা থম্মোয় শেংনা থাগৎচরি। ঙসি অসি এপোইন্তমেন্ত লেত্তরশিং ফংলবশিংগী অনৌবা খোঙচৎ অমা হৌবা নুমিৎনি।মসিনা তশেংনা অদোম অমসুং অদোমগী ইমুং-মনুংগী মীওইশিংগী পুন্সিশিংদা অহোংবা অমা পুরক্লগনি। ঙসি নহাক্না চংলিবা থবক অসিনা, নহাক্কী পুন্সিদা অহোংবা পুরকপা খক নত্তনা অচৌবা অহোংবা কয়া পুরক্নবা পাম্বৈ অমশু ওইরবনি। নহাক্কী থবক অসিনা, রাজ্য অমসুং লৈবাক অসি চাউখৎনবা ঙমজবা থাক্তা থবক তৌগদবনি। নখোয় অয়াম্বা লাইরিক-লাইশু তাকপী-তম্বীবগী লমদা থবক তৌগনি।অনৌবা ইজুকেসন পোলিসিনা ভারতকী নহারোল অনৌবা চহিচাগীদমক থৌরাং তৌরে। মসিগী ৱারেপ অসি মাংলোমদা পুখৎনবা থৌদাং উত্তরাখান্দগী নহারোলশিংদা শীন্নরে।   

মরুপশিং,

কেন্দ্র সরকার নত্ত্রগা উত্তরাখান্দগী বি.জে.পি সরকার ওইগেরা, মাংলোমদা চংশিন্নবা চুনবা পাম্বৈ ফংহনবগা লোয়ন্না মখোয়না পামজবশিংগী মতুংইন্না নহারোল খুদিংমক অনৌবা খুদোংচাবশিং ফংহনবা হায়বসি কেন্দ্র অমসুং উত্তরাখান্দ সরকারগী লেংদ্রবা থবক অমনি। সরকারগী থবকশিং হাপ্নবা থবক লৌবগী কেম্পেন পাংথোক্লিবা অসি মাইকৈ অসিদা থাংজিনবা খোঙথাংনি। হৌখিবা থা খর অসিদা লৈবাক অসিদা নহারোল লাখ কয়া কেন্দ্র সরকারদগী মখোয়গী এপোইন্তমেন্ত লেত্তরশিং ফংলে অমসুং মসিগী শরুক অমা ওইনা উত্তরাখান্দ য়াওবদা হরাওবা ফোঙদোক্লি। অসিগুম্বা থবক লৌবগী কেম্পেনশিং বি.জে.পিনা পানবা লৈবাক অসিগী রাজ্যশিং অমসুং য়ু.তিশিংদা পাক-শন্না পাংথোক্লি। উত্তরাখান্দশু মসিগী কেম্পেন অসিদা শরুক য়াবদা ঐ হরাওই।

মরুপশিং,

অরিবা থাজনবী-“চীংগী ঈশিং অমসুং নহারোলশিংগী থৌনা চীংগী লমদা শীজিন্নফম খঙনা লৈ” হায়বা অমা লৈ। মরম অদুনা উত্তরাখান্দগী নহারোলশিং মখোয়গী খুঙ্গংশিংদা হল্লক্নবা কেন্দ্র সরকারনা লেপ্তনা হোৎনরি। মসিগীদমক চীংগী লমদমশিংদা অনৌবা থবক পীনবা অমসুং মশানা মশাবু থবক পীজনবা অনৌবা খুদোংচাবা কয়া শেম্লে। ঙসিদি উত্তরাখান্দা অনৌবা লম্বীশিং অমসুং রেল লাইনশিং শেম্বা নহাক্না উরে। মসি উত্তরাখান্দদা শেন য়াম্না থাদবদগী ওইরকপনি। মসিগী মহৈ ওইনা, মনুং-হুঞ্জিনবা খুঙ্গংশিংদা চৎথোক-চৎশিন নুংঙাইবা হেনগৎহল্লে। মসিনা মরম ওইদুনা মীওই কয়া থবক কয়া ফংহল্লে। মফম খুদিংদা থবক ফংবা হেনগৎলে অমসুং শীন্মীশিং, ইঞ্জিনিয়ারশিং, রো মেতেরিএল ইন্দস্ত্রিশিং অমসুং দুকানশিং থবক ফংলে। ত্রান্সপোর্ত সেক্তরদা দরকার ওইবা হেনগৎলকপা অসিনা মরম ওইদুনা অনৌবা খুদোংচাবা কয়া পীরে। মতম অমদা উত্তরাখান্দগী নহারোলশিং অচৌবা সহরশিংদা থবক থিবা চৎলম্বা অদু ঙসিদি নহারোল লিশিং কয়া কম্মন সর্বিস সেন্তরশিংদা থবক তৌদুনা খুঙ্গংশিংদা ইন্তরনেত অমসুং দিজিতেলগী থবকশিং ফংহল্লে। 

মরুপশিং,

উত্তরাখান্দগী মনুং-হুঞ্জিনবা মফমশিং লম্বী, রেল অমসুং ইন্তরনেত য়ৌবদগী উত্তরাখান্দদা তুরিজম সেক্তর পাকথোক-চাউথোরক্লে। তুরিস্ত মেপতা অনৌবা লমকোয়ফমশিং থোরক্লে। মসিনা মরম ওইদুনা, ঙসিদা উত্তরাখান্দগী নহারোলশিং থবক ফংনবা অচৌবা সহরশিংদা চৎপগী মহুত্তা মখোয়গী ময়ুম ময়াদা থবক ফংলে।তুরিজম সেক্তরদা থবক ফংবা হেনগৎহনবদা অমসুং মশানা মশাবু থবক পীজবদা মুদ্রা য়োজননা মরুওইবা থৌদাং অমা লৌরে। দুকানশিং, ধাবাশিং, গেস্ত হাওসশিং অমসুং হোমস্তেশিংদা গরেন্তি অমতা য়াওদনা লুপা লাখ ১০ ফাওবগী লোনশিং পীরে। হৌজিক ফাওবদা লৈবাক শীনবা থুংনা মুদ্রা লোন করোর ৩৮ পীখ্রে। নহারোল করোর ৮ রোম অহানবা ওইনা ওন্ত্রেপ্রেনিউয়রশিং ওইরে। কাংলুপ অসিদা এস.সি/এস.তি/ও.বি.সি কাংলুপকী নুপীশিং অমসুং নহারোলশিংনা মশিং খ্বাইদগী য়াম্লি। উত্তরাখান্দগী মরুপ লিশিং কয়াশু য়োজনা অসিগী কান্নবা ফংলে।  

মরুপশিং,

মসি ভারতকী নহারোলশিংগী অঙকপা খুদোংচাবশিং ‘অমৃত কাল’নি। অদোমগী থবকশিংনা মসিদা ইনোৎ হাপকদবনি। ঐনা অমুক হন্না ময়াম পুম্নমক য়াইফ-পাউজেল পীজরি অমসুং অদোম্না উত্তরাখান্দগী মীয়ামগী সেবা তৌগনি অমসুং হেন্না ফবা উত্তরাখান্দ অমা ওইহনবদা মতেং পাংগনি হায়না থাজবা থম্লি। হায়রিবা থবকশিং অসিনা ঐখোয়গী লৈবাক মপাঙ্গল কনবা, থবক ঙম্বা অমসুং নুংঙাই-য়াইফবা ওইরক্কনি। অদোমবু থাগৎচরি!

***