নমস্তে!

অসুল য়াম্না ইংলবা মতমদা পরিক্ষাগী মতাংদা ৱারী শাবসি হন্দক্কীসিনা অহানবা ওইগদরা খল্লি। ঐখোয়না মসি অয়াম্বা মতমদা ফেব্রুৱারী থাদা পাংথোকপনি। অদুবু, অদোম অমসুং মীরম লৈবাক্কী মীওইশিংদা জনুৱারী ২৬কী কান্নবা লৌবা ওইনা পাংথোকপনা ফগদরা হায়না খন্নরকখি। কর্তব্যা পথতা চৎলুই। কমাইনা তৌগে? য়াম্না নুংঙাইখি। য়ুমদা হল্লগা তম্বীয়ুকো। করিমত্তা হাইরোইদরা? ফরে, মরুপশিং, মতম য়াম্না লৌজরোই। অদুবু পরিক্ষা পে চর্চা হায়বসি ঐহাক্কীসু পরিক্ষানি হায়বসিদি ঐনা শোইদনা হায়জনীংই। লৈবাক্কী মীওই করোর কয়ানা ঐহাক্কী পরিক্ষা লৌরিবনি। ঐহাক্তি মসিগী পরিক্ষা অসি থাবদা নুংঙাইবা ফাওই, পুক্নিং লৈতাজৈ, মসিগী মরমদি করিনো হায়বদা ঐহাক্না ৱাহং কয়া ফংই, লাখ কয়া কয়া ফংই। অঙাংশিংনা থৱাই য়াওনা ৱাহং কয়া হংই, মশাগী খুদোংচাবশিং পাউদম্মি, মশাগী ওইবা থৌরাং কয়াসু পাউদম্মি। ঐহাক্কী লৈবাক্কী নহাশিংনা করি খল্লি, করম্বা ফিভম মাইয়োক্নরি, লৈবাক্না মখোয়দগী করি থাজবা থম্মি, সরকারনা মখোয়দগী করি থাজবা থম্মি, মখোয়গী মঙলান করিনো, মখোয়গী পান্দম করিনো খঙবা ঙম্বসি ঐহাক্কী লাইবক ফবনি। তসেংনা, মসিদি ঐহাক্কী অচৌবা লন অমনি। অদুগা ঐহাক্তি ৱারোল অমসুং ৱাহংশিং অসি অমত্তা ওইনা খোমজিন্দুনা থম্নবা ঐহাক্কী সীস্তেমদা হায়দুনা থম্লিবনি। চহি ১০-১৫গী তুংদা করিগুম্বা খুদোংচাবা ফংলবদি, সোসিএল সাইন্তিস্তকী খুত্থাংদা মসিগী এনালাইসীস তৌবা য়ারিবনি। চারোন-শুরোন্দা করম্না অহোংবা লাকই, ফিভম, পান্দম, মঙলান করম্না হোংলক্লিবনো হায়না ঐখোয়না য়াম্না কুপ্না খন্ন-নৈনবা য়াগনি। অদোম্না হংলকপা ৱাহংশিং অসি খোমজিন্দুনা শেম্বা মদুগুম্বা অচম্বা থেসীস অমত্তা লৈরোই। ফরে, ৱারী শাংনা শাররোইসি। ৱারোল অমদগী হেক্তা হৌরসি, থৌরম অসি য়াম্না শাংই হায়বা ৱাকৎ কয়া ঐহাক্কী ইফমদা লাক্লবনি। অদোম করি খনবগে? য়াম্না শাংনা চত্থবরো? চত্থফম থোকই খনবীবরো? ফরে, ঐদি অদোমগীদমক্তা লৈরিবনি। ফরে করি তৌসিগে? অহানবা ৱাহং কনানা হংগদৌরিনো?

থৌরম লান্থোক্লিবা মীওই- মালেম্বু হোংদোকপা পাম্লবদি, ইশাবু হান্না হোংদোকপা তম্মু। ইকায় খুম্ননিংঙাই ওইরবা প্রধান মন্ত্রীজী, অদোমগী পুক্নিং থৌগৎপা অমসুং ইথিল পীবা ৱারোলশিংনা ঐখোয়বু তসেংনা শক্তিনা থনহল্লি, ইশাদা থাজবা হেনগৎহল্লি। অদোমগী মফমদগী লৌশিং অমসুং লমজিং লমতাক কয়া ফংগনি হায়না ঐখোয়না থাজবা থমজরি। অদোমগী থৌজালগা লোয়ননা ঐখোয়না থৌরম অসি হৌদোকচবগী য়াথং লৌজরি। অদোম্বু অহানবদা থাগৎচরি।

ইকায় খুম্ননিংঙাই ওইরবা প্রধান মন্ত্রীজী, মশাগী ইনাক খুল্লবা হেরিতেজ অমসুং নিংথিরবা য়ুমশারোলগীদমক্তা মমিং লৈরবা শহর, মদুরাইগী অশ্বিনীনা ৱাহং অমা হংবা পাম্লি। অশ্বিনী অদোমগী ৱাহং হংবীরো।

অশ্বিনী – ইকায় খুম্ননিংঙাই ওইরবা প্রধান মন্ত্রী সর, নমস্কার। ঐহাক্কী মিং অশ্বিনী কৌই। ঐহাক তমিল নাদুগী মদুরাইগী কেন্দ্রিয় বিদ্যলায়া নম্বর ২গী মহৈরোইনি। ঐহাক্না সরগী মফমদা হংজনিংবা ৱাহংদি, ঐহাক্কী রিজল্ত ফজদবা মতমদা ঐহাক্না ঐহাক্কী ইমুং মনুংগী নিংবা কায়বগী মতৌগা মাইয়োক্নবা তাই। করিগুম্বা ঐহাক্না থাজবা থম্লিবা মার্ক অসি ঐহাক্না ফংদ্রবদি? লাইরিক হৈবা মহৈরোই অমা ওইবসি য়াম্না লায়বা থৌওং অমা ওইদে, মরমদি, অহল লমনশিংনা কা হেন্না থাজবা থম্মি, অদুনা পরিক্ষা থারিবা মহাক্না মদুগুম্বা মার্ক ফংলক্তবা মতমদা মহাক্না দিপ্রেসন চৎলি। মহৈরোইশিংনা মসিনা মরম ওইরগা মশাগী খুদাং ককথৎচবগী চৎনবীসি য়াম্না তোয়রে অদুগা মখোয়না মশাগী অনিংবা ফোংদোকপা য়াবা কনামত্তা লৈতে। হীরমসিগী মতাংসিদা ঐহাকপু সরনা লমজিংবীয়ু। থাগৎচরি।

থৌরম লান্থোক্লিবা মীওই- অশ্বিনীবু থাগৎচরি। ইকায় খুম্ননিংঙাই ওইরবা প্রধান মন্ত্রী সর, ভারতকী কোনুং দিল্লীদগী নবদেশ জাগুর অমুক লৈরে। তোঙানবা নিংথৌরেল কয়াগী মফম, মেদিএবেল হিস্তরী অমসুং নিংথিরবা আর্কিতেকচর কয়াগী মফম ওইরিবা দিল্লী। নবদেশ হোল অসিদা ফম্লি অমসুং মহাক্না মহাকী ৱাহংগী খুত্থাংদা হীরম খরা খন্নবা পাম্মি। নবদেশ, চানবীদুনা অদোমগী ৱাহং হংবীরো।

নবদেশ – ইকায় খুম্নিংঙাই ওইরবা প্রধান মন্ত্রী সর, গুদ মোর্নিং! সর, ঐহাক দিল্লীগী পিতম পুরাগী কেন্দ্রিয় বিদ্যালয়দা তম্বা নবদেশ জাগুরনি। ঐহাক্কী রিজল্ত ফজরক্তবা মতমদা ঐহাক্না ঐহাক্কী ইমুংদা ওইরক্কদবা ফিভমগা করম্না মাইয়োক্নগদগে হায়বসি ঐহাক্কী ৱাহংনি। সরনা চানবীদুনা ঐহাকপু লমজিংবীয়ু। অদোম্বু কয়ারক হন্না থাগৎচরি।

থৌরম লান্থোক্লিবা মীওই- নবদেশপু থাগৎচরি। মালেম্বু শান্তি অমসুং মীনুংশি লৈবগী পাউজেল শন্দোকপীরম্বা ভগ্বান বুদ্ধ, গুরু গোবিন্দ সিংহ অমসুং বর্ধমান মহাবীরগী পোক্নফম ওইরিবা লিরবা শহর পত্নাদগী প্রিয়ঙ্কানা মান্নবা ৱাহং অমগী মতাংদা ইকায় খুম্ননিংঙাই ওইরবা প্রধান মন্ত্রীজীগী মফমদগী পাউতাক লৌবা পাম্লি। প্রিয়ঙ্কা অদোমগী ৱাহং হংবীরো।

প্রিয়ঙ্কা – ইকায় খুম্ননিংঙাই ওইরবা প্রধান মন্ত্রীজী, ঐহাক্কী মিং প্রিয়ঙ্কা কুমারী কৌই। ঐহাক পত্নাগী রাজেন্দ্র নগরদা লৈবা রবীন বালিকা প্লস তু বিদ্যালয়দা ক্লাস ১১ তম্লিবী মহৈরোই অমনি। ঐহাক্কী ইমুংগী মীওই লোইনমক মার্ক য়াম্না ফংদুনা পাস তৌনখি। ঐসু মার্ক য়াম্না ফংবা তারি। মসিগী মতাংদা খনবদা ঐহাক ৱাখল য়াম্না ৱারে, ঐহাক্না মসিগী মতাংদা অদোমগী পাউতাক পামজরি। থাগৎচরি।

থৌরম লান্থোক্লিবা মীওই- প্রিয়ঙ্কাবু থাগৎচরি। ইকায় খুম্ননিংঙাই ওইরবা প্রধান মন্ত্রীজী, নবদেশ অমসুং প্রিয়ঙ্কানা মান্নবা হীরম অসিনা অতোপ্পা মহৈরোই কয়াদসু ৱাহল্লি হায়না থাজৈ অদুনা মসিগী মতাংদা মখোয়না অদোমগী মফমদগী পাউতাক পামজরি।

প্রধান মন্ত্রী- অশ্বিনী অদোম ক্রিকেত শান্নবরা? ক্রিকেত্তা গুগ্লি বোল হায়বা অমা লৈ। থোম্ফম্না অমা অদুগা লংবনা তোঙানবা মাইকৈদা লংই। অদোম্না অহানবা বোলদা ঐবু আউত তৌহন্নিংবা পাম্মি হায়না ঐ খল্লি। ইমুংগী মীওইনা অদোমদা থাজবা থম্বা হায়বসি মহৌশানি। মসিদা অরানবা করিমত্তা লৈতে। অদুবু, সোসিএল স্তেতসনা মরম ওইরগা থাজবা থম্লবদি অরানবা ওইগনি। মখোয়গী সোসিএল স্তেতসকী প্রেসন অসি অদুক য়াম্না কল্লি, অদুনা সোসাইতীগী মমাংদা অঙাংগী মতাংদা করি হায়সিগে হায়না লুন্না খঞ্জিল্লি। করিগুম্বা অঙাংশিংনা লাইরিক্তা শোল্লবদি মখোয়গী মমাংদা ৱা ঙাঙনগনি হায়বগী অকীবা ফাওই। মশাগী অঙাংগী তৌবা ঙম্বগী মতিক খঙবগী মহুত্তা মখোয়গী সোসিএল স্তেতসনা হেন্না লুনা লৌই। মরুপশিংগা উন্নবা মতমদা, ক্লবতা চৎপা মতমদা, মী পুনবা মতমদা অঙাংশিংগী মতাং পল্লকপদা হেঞ্জিন্না পাউ তম্নৈ। অদুগা য়ুমদা হল্লক্লবা মতুংদা অঙাংশিংদা মদুমক তৌদবা য়াদে হায়না পোৎলুম পী। অদুগা অদোম্না নিংথিজনা তৌবা মতমদসু মদুদগী হেনবা থাজবা অমুক থম্মি। মার্ক ২০০ ফংবা মতমদা ২৫০ ফংদ্রিবা করিগীনো অমুক হায়। মাইকৈ খুদিংদা পোৎলুম পী। অদুবু ঐখোয়না মসিগুম্বা পোৎলুম অসি ইনফম থোকপরা অমুক্তা খন্থবীয়ু। মখোয়না নুমিৎ চুপ্পা ঙাঙলিবশিংদা অদোমগী মতম মাঙহনগদরা নত্ত্রগা ইশাগী মনুংদা য়েংজগদরা? ইশাগী পান্দম, অহানবা মিৎয়েং চঙফম থোকপা হীরম, ইশাগী থৌরাংবু অমত্তা ওইনা পুন্সিনবীয়ু। অদোম্না ক্রিকেত মেৎচ য়েংবা চৎপা মতমদা বেৎসমেন খরা শান্নবা থোক্লকপা অদোম্না উরমগনি। স্তেদিয়ম পুম্বা মীয়াম্না পীক থল্লি। লাও খোংবা হৌনৈ। সিক্স, ফোর, সিক্স, ফোর লাওনৈ। মখোয়না লাওরিবদুগী মখা পোন্না বেৎসমেন অদুনা শান্নবরা? মীয়াম্না কয়া য়াম্না লাওরবসু মহাক্কী পুক্নিংদি বোলদা থম্মি। বোলরগী ৱাখল্লোন খঙনবা হোৎনৈ। অদুগা মহাক্না লংলকপা বোলগী মতুং ইন্না শান্নৈ। অদুনা অদোমসু ইশাগী থৌদাংদা মিৎয়েং চঙলবদি, অদোম্না থেংনরিবা প্রেসরশিংগী ৱাংমা লানবা ঙমগনি। অদুনা প্রেসরনা অদোমগী মফমদা পোৎলুম ওইহনগনু হায়না ঐ হায়নিংই। হোই, করিগুম্বা মতমদা প্রেসরশিংদু অমুক্তা নৈনৌ অদোম্না ইশাবুদি অন্দর ইস্তেমেত্তী তৌদেকো? অদোমগী মতিক মগুন য়াম্না লৈ, অদুগা অশামক দিপ্রেস ওইনা লৈরবদি, করি অনৌবা পাংথোকপা ঙমগনি? অদুনা , করিগুম্বা মতমদসু, অদোমদা থাজবা থম্বা অদুনা অদোমগী পাঙ্গল ওইবসু য়াওরিবনি। মমা মপানসু খুন্নাইগী প্রেসরনা মরম ওইরগা মচাশিংদা অহেনবা পোৎলুম পীগদবা নত্তে। অদুগা, অঙাংশিংনসু মখোয়দা থম্লিবা থাজবশিংদগী তাই হায়না খনগদবা নত্তে। ৱাফম অনিমক অসিদা মিৎয়েং চঙলবদি, মসিগুম্বা শিংনবগা অদোম্না লাইনা মাইয়োক্নবা ঙমগনি হায়না ঐহাক্না থাজৈ। এঙ্করদুবু কদাইদা চৎখ্রগে?

থৌরম লান্থোক্লিবা মীওই- ইকায় খুম্ননিংঙাই ওইরবা প্রধান মন্ত্রীবু থাগৎচরি। অদোমগী ইথিল পীনিংঙাই ওইরবা ৱাফমশিংনা মমা-মপাশিংদা মচাশিংদা অচুম্বা মাইকৈ তাকপা ঙমহনগনি। ঐখোয় প্রেসরগী মখাদা লৈগদৌবা নত্তে। অদোম্বু থাগৎচরি।

থৌরম লান্থোক্লিবা মীওই- ইকায় খুম্ননিংঙাই ওইরবা প্রধান মন্ত্রীজী, চম্বা অসিদি ভারতকী পেরিস হায়না খঙনবা মহৌশাগ ইমাগী ফজবনা থল্লবা চিংগী শহর মচা অমনি। চম্বা হিমাচল প্রদেশ প্রদেশতগী আরুশি থাকুরনা ঐখোয়গা ভর্চুএলগী খুত্থাংদা পুল্লি। আরুশি ইশাগী ৱাহং হংবীয়ু।

আরুশি – ইকায় খুম্ননিংঙাই ওইরবা প্রধান মন্ত্রীজী, ঐহাক্কী মিং আরুশি থাকুর কৌই, ঐহাক চম্বা জিলাগী কেন্দ্রিয় বিদ্যালয়া বনিখেত দালহাউজীদা ক্লাস ১১ তম্লি। পরিক্ষাগী মতমদা ঐহাকপু খ্বাইদগী হেন্না ৱাহনবা হীরমগী মতাংদা ৱাহং অমা হংজগে, মদুদি, ঐহাক্না লাইরিক পাবসি কদাইদগী হৌগনি? পুম্নমক কাওখ্রে হায়না ঐনা মতম পুম্বদা খল্লি, ইশাদা ফাওই। মসিনা ঐবু য়াম্না ৱাহল্লি। চানবীদুনা ৱারোইশিন অমত্তা পীবিয়ু। সরবু থাগৎচরি।

থৌরম লান্থোক্লিবা মীওই- অরুশিবু থাগৎচরি। ইকায় খুম্ননিংঙাই ওইরবা প্রধান মন্ত্রীজী, ফৌগী কোৎ হায়না ভারত্তা খঙনরিবা ছতিসগরগী কোনুংদি রাইপুরনি। রাইপুরগী অদিতি দিৱান্না মহাক্কী ৱাহং অমগী পাউখুম অদোমগী মফমদগী পাম্লি। অদিতি ৱাহং হংবীরো?

অদিতি দিৱান – ইকায় খুম্ননিংঙাই ওইরবা প্রধান মন্ত্রীজী নমস্কার! ঐগী মিং অদিতি দিৱান কৌই, ঐ কৃষ্ণ পব্লিক স্কুল রাইপুর ছতিসগরদা ক্লাস ১২ তম্লিবা মহৈরোইনি। ঐনা তৌগদৌবা য়াম্না লৈ হায়বা ৱাফমসিদা ঐহাক্না মতম পুম্বদা থৱাই ৱাই। অদুবু, লোইশিল্লকপা মতমদদি করিসু তৌবা ঙমদে। মসি করিগীনো হয়বদা ঐহাক্কী ইথৌ য়াম্না লৈবগীনি। অদুগা, ঐনা ঐগী থবক অমা মতম চানা পাংথোকপা ঙম্লবসু, হেন্না পাখৎপা হেল্লি। মরমদি, অতোপ্পা ইথৌ অমুক তৌবদা মতম হেন্না লৌবা নত্ত্রগা কোন্না তৌগে হায়না য়ৈথোকপগীনি। ঐহাক্কী ইথৌশিং অসি মতম চানা করম্না পাংথোকপা ঙমগনি হায়বগী মতাংদা অদোমগী মফমদা খঙজবা পাম্মি। থাগৎচরি।

থৌরম লান্থোক্লিবা মীওই- অদিতি থাগৎচরি। ইকায় খুম্ননিংঙাই ওইরবা প্রধান মন্ত্রীজী, আরুশি অমসুং অদিতিনা মখোয়গী পরিক্ষাগী শেম-শাবা অমসুং মতম নিংথীনা শিজিন্নবগী মতাংদা অদোমগী পাউতাক পাম্লি। মখোয়গী শিংনবা অসিগী চানবীদুনা পাউখুম অমুক্তা পীবিয়ু, প্রধান মন্ত্রীজী।

প্রধান মন্ত্রী- মসিদি শুপ্নগী পরিক্ষাখক্কী নত্তে। মতম নিংথিনা শেন্নবা হায়বসি পুন্সিদা খঙফম থোকপা অমনি। থবক অমা তৌবদা করিগী থেংলিবনো হায়বা অদোম উরম্লগনি। মখোয়বু মতম চানা পাংথোক্তবগী থেংলিবনি। থবক তৌবসি ৱাদবনি, নুংঙাইবনি। থবক তৌদবনা হেন্না ৱাবনি। মাঙদা থবক য়াম্না লৈরে হায়না উরে, মদুদা ওইনা ৱাবনি। তৌবা হৌরো। অদুগা, কোলোম পায়রগা ইশাগী দাইরীদা ইবা হৌরো। ইশাগী মতম করম্না শিজিন্নখি হায়বদু চয়োল অমা চুপ্না ইশিনবীরো। লাইরিক পাবা ওইরবসু, করম্বা সবজেক্ততা মতম কয়া য়াম্না পাখি, মদুদু ঐখোয়দি তেন্সিন্নবা হোৎনৈ। খরা কুপ্না তৌবীয়ু, এনালাইসীস তৌবীয়ু। ইশানা পামজবা হীরমশিংদা অহেনবা মতম শিজিন্নখি হায়না অদোম্না উবা ফংগনি হায়বা ঐ শোইদনা থাজৈ। মদুদা ঙাওদুনা লৈনবনি। অদুগা পাম্বদি ৱাৎপা, অদুবু তঙাই ফদবদি ওইবা হীরম অহুম লৈকো। মদু অদোম্না পোৎলুম ওইনা খল্লক্কনি। লাইরিক পাবা হায়রগা পুং অনি অহুম পাগদবা নত্তে, মাইন্দনা ফ্রেশ ওইবা মতমদা পামদবা অমসুং খ্বাইদগী লুই খনবা সবজেক্ত পাগদবনি। অহানবা মিনিত ৩০দা মদু পাগে, মদুদগী অরায়বা অমসুং অপাম্বা সবজেক্ত অমুক মিনিত ২০ পাগে , মদুদগী পামদবা সবজেক্ত অমা অমুক মিনিত ৩০ পাগে হায়না লেপ্পীরো। অদু ওইরবদি, অদোম্না পোত্থাবসু ফংলগনি, অদুগা পামদবা সবজেকতশিংদা থৱাই চঙবসু তপা তপ্না হৌরক্কনি। মসি ঐখোয়না কয়া তৌগন্দে, অদুনা অয়াম্বা মতমসু য়াম্না মাঙই। অদোমগী মরক্তগী তেলঙ্গা পায়বা য়াওবশিংনা করিগুম্বা অমা শোইদনা উরমগনি। ঐদি অঙাং ওইরিঙৈদা য়াম্না পাম্লকই। তেলঙ্গা পায়বগী লং অসি পুন্সিল্লগা লং চবুন ওইখিবা য়াওবনি। মদুদা ৱাখল লৈবা মীনা করি তৌই? হেক্তা চিংথোক্কদরা? তৌরোই। লং অমমম তপা তপ্না পায়রগা মতোন কদাইদনো অমসুং করম্না থোকহনগনি য়েংই। অদুদগী য়াম্না লাইনা অপুনবা থোকপা ঙম্মি। মহাক্কী অপাম্বা লং ফংই। ঐখোয়সু নম্ফু হাফু তৌরোইদবনি। ইংনা তপ্না ৱারোইশিন পুথোক্কদবনি, মদু তৌবা মতমদা থবক অদুসু নিংথিনা শোইদনা তৌগনি। অনিশুবা, য়ুমদা ইমানা থবক তৌবা অদোম্না মুন্না য়েংবা য়াওরবরা? স্কুলদগী হল্লকপদা ইমানা চাক থিরগা থনম্বদু ঐখোয়না নুংঙাই। অয়ুক স্কুল চৎলমদাইদসু ইমানা পুম্নমক শেম শারগা থম্বীরম্মি। অদুবা ইমানা মহাক্কী মতম করম্না শিন্দোকই হায়বা উরবরা? মসিদি ঐনা পুং ৬তা তৌগদবনি, মসিনা ৬.৩০দা, পুং ৯গী থবক ওইরবদি করম্বা মতমদা তৌগনি হায়বা মহাক্না লোয়না খঙই। মতম্বু খ্বাইদগী নিংথিনা শিন্দোকপদি ইমানি, থবক্সু মখোয়না খ্বাইদগী হেন্না তৌরিবনি। অদুগা মহাক্না থবক অমত্তবু পোৎলুম্নি হায়না খন্দে। ৱারে, থবক য়াম্না ৱাৎলি, অসুম্না মহাক্না কৈদৌনুংদা খন্দে, মরমদি, করম্বা মতমদা করি থবক তৌগনি হায়বা মহাক্না হান্ননা লেপথোক্লবনি। অদুগা অহেনবা মতম ফংলবসু, মহাক্তি পোত্থারগা লৈথোক্তবনি। ক্রিএতিব ওইবা কৈনোমদি অদূম তৌবনি। ফি লোনবনি খঙদে, কৈনোম্মা অদুম তৌবনি। পোত্থবাগীসু মহাক্না শিন্দুনা থম্লবনি। ইমাগী থৌদাংশিং ঐখোয়না কুপ্না য়েংশিল্লবদি, অদোম্না মহৈরোই অমা ওইনা তাইম মেনেজমেন্তকী মগুন খঙলক্কনি। তাইম মেনেজমেন্ত তৌবসি পুং ২, পুং ৪ হায়বগী নত্তেকো, মাইক্রো মেনেজমেন্ত তৌবগী মথৌ তাই। করম্বা সব্জেক্ততা মতম কয়াম্না থাদগনি, করম্বা থবক্তা মতম কয়া য়াম্না চঙহনগনি লেপকদবনি, অদুগা ঐদি লাইরিক পাগদৌ লৈরি অদুনা নুমিৎ ৬নি ফাওবতং মসি তৌগনি হায়বগী অকক্নবসু কৈদৌনুংদা থমগদবা নত্তে। অদোম্না মতম নিংথিনা শিন্দোকপা মতমদা অদোম্না কান্নবা য়াম্না ফংগনি। থাগৎচরি।

থৌরম লান্থোক্লিবা মীওই- অফবা মহৈরোই অমা ওইনবগীদমক্তা ৱাখল অমসুং পথাপ নাইবা মওংদা ঐখোয়বু লমজিং লমতাকপীবগীদমক্তা ইকায় খুম্ননিংঙাই ওইরবা প্রধান মন্ত্রীজীবু থাগৎচরি। রুপেশ কশ্যপ অসি মশক নাইবা ত্রাইবেল আর্ত, পুক্নিং হুরবা চিত্রকুত ৱাতর্ফোল অমসুং অফবা ৱাগীদমক্তা মমিং চৎপা ছতিসগরগী বস্তার জিলাদগীনি। মহাক ঐখোয়গা লোয়ননা মফমসিদা লৈরে অমসুং য়াম্না মরু ওইবা ৱাফম অমগী মতাংদা অদোমগী পাউতাক পাম্লি। রুপেশ অদোমগী ৱাহং হংবীরো।

রুপেশ - ইকায় খুম্ননিংঙাই ওইরবা প্রধান মন্ত্রীজী গুদ মোর্নিং! সর ঐগী মিং রুপেশ কশ্যপ কৌই। ঐহাক ছতিসগরগী বস্তার জিলাগী দ্রাভাদা লৈবা স্বামী আত্মানন্দ গোবর্নমেন্ত ইংলিশ মীদিয়ম স্কুলদা ক্লাস ৯ তমজরি। সর, পরিক্ষাদা ঐহাক্না অরানবা পাম্বৈদগী করম্না ঙাকথোক্কনি হায়বসি ঐহাক্কী ৱাহংনি। সরবু থাগৎচরি।

থৌরম লান্থোক্লিবা মীওই- রুপেশপু থাগৎচরি, ইকায় খুম্ননিংঙাই ওইরবা প্রধান মন্ত্রীজী, হেরিতেজ শহর অমসুং ওরিশাগী স্পিরিচুএল কেপিতেল ওইরিবা জগন্নাথ পুরী অসি মশক থোকপা কন্সেপ্ত লেআউতকী মতৌ চেল্লিবা রথ য়াত্রা অমসুং ফজরবা সমুদ্র তোর্বানগীদমক্তা মমিং চৎলি। লমদমসিদগী তনময় বিস্বালনা মান্নবা হীরমদা অদোমগী পাউতাক পাম্লি। তনময়, অদোমগী ৱাহং হংবীরো।

তনময় – ইকায় খুম্ননিংঙাই ওইরবা প্রধান মন্ত্রীজী। ঐহাক্কী তনময় বিস্বাল কৌজৈ অমসুং ওরিশাগী কোনার্ক পুরীগী জৱাহর নবোদয়া বিদ্যালয়াদা তমজরি। মহৈরোইশিংনা পরিক্ষা মনুংদা অরানবা পাম্বৈ শিজিন্নবা অমসুং শিনবগী থৌওংবু করম্না লৈহল্লোইদগে হায়বসি ঐহাক্কী ৱাহংনি। সরনা চানবীদুনা ঐহাকপু হীরমসিদা লমজিংবীয়ু। থাগৎচরি।

থৌরম লান্থোক্লিবা মীওই- ইকায় খুম্ননিংঙাই ওইরবা প্রধান মন্ত্রীজী, রুপেশ অমসুং তনময়না পরিক্ষাদা অরানবা পাম্বৈ তৌবা করম্না থিংগদগে হায়বগী মতাংদা অদোমগী ৱাখল্লোন লৌবা পামজরি।

প্রধান মন্ত্রী- পরিক্ষাদা অরানবা পাম্বৈ শিজিন্নরিবা অসিগী মতাংদা ৱারোইশিন পুরকফম থোকই হায়না ঐখোয়গী মহৈরোইশিংনা খনবা হৌনরক্লিবা অসিদা ঐহাক্না নুংঙাইবা পোকই। ঐখোয়না ৱানা হোৎনজৈ অদুগা মীওই খরনা ইরায় লায়না শিল্লগা পরিক্ষা থাই হায়না অফবা মহৈরোইনা মসিগুম্বা হীরমসিদা থৱাই নুংঙাইতবা হেল্লি। শিনবগী থবক অসি মমাংদসু তৌরমদবা নত্তে, অদুবু লোন্না থুপ্না তৌনরম্মি। অদুবু, হৌজিক্তি মসি য়াম্না ফোংনা তৌনরক্লে, ঐনা পরিক্ষা সুপর্বাইজরবু অদুম্না নম্থাক তৌই হায়না চাউথোকচনা পাউদম্নরে। মসিগুম্বা অহোংবা অমা লাক্লিবসি তসেংনা খন্থনীংঙাই ওইবা হীরম ওইরক্লে। অদুগা অতোপ্পা হীরম অমনা, হৌজিক্কান মশাগী কোচিং ক্লাস তৌবা ওজা য়াম্না লৈরে। মহৈরোইগী মমা-মপাদগী শেল লৌরিবনিনা পাস তৌহনফম থোকই, অদুনা পাম্বৈ অমা তৌরগা পরিক্ষাদা তেংবাংবা, শিলহনবা য়াহনবগী থৌওং থেংনদবা নত্তে। অদুগা, লাইরিক পাবদদি মতম থাদদে, অদুবু শিনবগী অনৌবা পাম্বৈ থিবদা মতম য়াম্না থাদবা মহৈরোই কাঙলুপসু লৈতবা নত্তে। কোপী শেম্বদা পুং কয়া চঙহনবা য়াওরে। মখোয়সে তসেংনা ক্রিএতিক ওইরে, অরানবা পাম্বৈ করম্না পাংথোকসিগে হায়না অনৌবা থৌওং কয়া পুথোক্নবা হোৎনবদা পুং কয়া তাহদৈ। মসিগুম্বা তেলেন্ত অমসুং মতম অসি লাইরিক পাবদা থাদরবদি, অফবা মহৈ পুরকপা ঙমগদবনি। মখোয়বু নিংথিনা লমজিং লমতাকপীফম থোকপনি। পুন্সি অমসুং মতমদা অহোংবা য়াম্না লাক্লবনি, পরিক্ষা অমা থাবা মতমদা পুন্সি লোইবা নত্তে, মসি ঐখোয়না খঙনা চৎকদবনি। পুন্সিদা পরিক্ষা কয়া অমা লাকখিগনি। কয়াম কুইনা শিনগে হায়রিবনো? শিনবা কাঙবুশিংনা পরিক্ষা অমা অনিদা শিনবদি য়াই, অদুবু শিল্লগা পুন্সি শেম্বা য়াবদি নত্তেনা। কদাই কদাইদগী মার্ক ফংনবা হোৎনবদি য়াই, অদুবু নোংমদি শোইদনা ৱাহং হংনরক্কনি। পরিক্ষা অমবুদি শিল্লগা মায় পাকখিবা য়াই, অদুবু মতুং তারকপদি অদোমগী পুন্সি লেপ্তুনা লৈখিবা য়াই। অদুগা, কন্না হোৎনজবা মহৈরোইশিংদা ঐহাক্না হায়নীংবদি, অদোমগী হোৎনজমনগী অফবা মহৈ শোইদনা ফংগনি। কনাগুম্বা অমনা অরানবা পাম্বৈ শিজিন্নদুনা অদোমদগী মার্ক ২-৪ হেনখিবদি য়াই, অদুবু মদুনা অদোমগী পুন্সিদা তুংদা কৈদৌনুংদা অপনবদি পীরক্লোই। অদোমগী নুংগী পাঙ্গল অদু শোইদনা মপান থোক্লক্কনি। ময়ামসু অসুম্না তৌনৈ, ঐসু তৌগে হায়না কৈদৌনুংদা খনগনু। পরিক্ষা লাক্কনি, চৎখিগনি, অদুবু পুন্সিদি হিংগদবনি, মায় পাক্না থম্মোই পেন্না হিংগদবনি। অদুনা ঐখোয়না কৈদৌনুংদা শোর্তকতকী মাইকৈদা চৎলোইদবনি। রেলৱে স্তেসনগী মথক্তা ওভর্ব্রিজ লৈ, মীওই অয়াম্বনা মদুদা চৎপগী মহুত্তা ত্রেক্তা ফাওজিল্লগা চৎপা পাম্নৈ। থোইদোকপা মরম লৈবগী নত্তে, শুম চৎনিংবা পাম্বগীসু য়াওই। শোর্তকতনা অদোম্বু তেন্না কক্কনি হায়না ইবনি। অদুগা, মীওই খরনা শোর্তকত শিজিন্নদুনা অপাম্বা ফংনখিবসু য়াই, অদুবু অদোমদি মসিগুম্বা ৱাখল্লোন অসি খনবীগনু। মিৎয়েং চেৎনা থম্বীয়ু। মদুগী মহৈ শোইদনা ফংগনি। থাগৎচরি।

থৌরম লান্থোক্লিবা মীওই- ইকায় খুম্ননিংঙাই ওইরবা প্রধান মন্ত্রীজী অদোমগী পাউতাক ঐখোয়না থম্মোইনুংদা লৌজরি। অদোম্বু থাগৎচরি। লিরি হুম্বা মালংনা খাউখ্রবা ফৌগী মনম পুদুনা চৎপা, কেরলাগী নাৎকী শৈ নোংমাইনা থল্লবা নুংশিৎ শিৎপা, লবুক কয়াগী লমদম ওইরিবা পল্লকরদগী সুজয় কে.না অদোমগী পাউতাক পাম্লি। সুজয়, ৱাহং হংবীরো।

সুজয় – ইকায় খুম্ননিংঙাই ওইরবা প্রধান মন্ত্রীজীবু খুরুমজরি। ঐহাক কঞ্জিকোর, কর্নাকুল্ম ব্রাঞ্চকী কেনদ্রিয় বিদ্যালয়দা ক্লাস ৯ তম্লি। হার্দৱর্ক অমসুং স্মার্তৱর্ক অনিসিগী মরমক্তা করম্বা ৱর্ক হেন্না মরু ওইবগে হায়বসি ঐহাক্কী ৱাহংনি। অফবা রিজল্ত পুরক্নবা অনিমক অসি মরু ওইবরা? চানবীদুনা অদোম্না লমজিংবীয়ু। থাগৎচরি।

থৌরম লান্থোক্লিবা মীওই- সুজয়বু থাগৎচরি, ইকায় খুম্ননিংঙাই ওইরবা প্রধান মন্ত্রীজী।

প্রধান মন্ত্রী- অদোম্না করি ৱাহং হংলিবনো?

থৌরম লান্থোক্লিবা মীওই- সর, হার্দৱর্ক অমসুং স্মার্তৱর্ক অনিসিগী মতাংদনি।

প্রধান মন্ত্রী- হার্দৱর্ক অমসুং স্মার্তৱর্ক।

থৌরম লান্থোক্লিবা মীওই- থাগৎচরি।

প্রধান মন্ত্রী- অদোম্না পীক্লিঙৈদা ৱারী অমা তম্লক্লমগনি। পুম্নমক্না তম্নরমগনি। হার্দৱর্ক অমসুং স্মার্তৱর্ক হায়বসি করিনো হায়বা মদুদগী শোইদনা খঙবা ঙমগনি। প্রুবা পাত্র অমদা ঈশিং য়াওই, ঈশিং য়াম্না খৌরাংবা ক্বাক অমনা ঈশিং থক্নিংলবসু, ঈশিং য়ৌবা ঙমদবদগী মহাক্না নুং মচা মচা হাপ্লগা ঈশিংগী ইমায় ৱাংখৎহল্লবা মতুংদা ঈশিং থবকপগী ৱারী ঐখোয়না অঙাং ওইরিঙৈদা তম্লকই। তম্লকইকো? মসিবু অদোম্না হার্দৱর্ক হায়গদরা নত্ত্রগা স্মার্তৱর্ক হায়গদরা? ৱারী ইখিবা মতমদুদা স্ত্রো থোক্লমদ্রি। নত্ত্রদি মহাক্না কৈথেলদগী স্ত্রো অমা লৈরগা নুংঙাইনা থকপা য়ারমগনি। হার্দৱর্ক খক তৌবা মীওই খরা লৈ। অদুগা হার্দৱর্ক শুক্তৌ তৌদবা মীওই খরসু লৈ। মীওই খরনা হার্দলী স্মার্ত ৱর্ক তৌই অদুগা মীওই খরনা স্মার্তলী হার্দ ৱর্ক তৌই। ক্বাক অসিনা ঐখোয়দা স্মার্তলী হার্দ ৱর্ক করম্না তৌগনি তাক্লি। অদুনা থবক অমবু ঐখোয়না নিংথিজনা খঙবগী মথৌ তাই। মীওই খরনা পোৎলম অমা করিনো খঙদ্রিঙৈদা মশাগী ৱাখল থাদবা হৌই। কন্না হোৎনরবা তুংদা মহৈ শুকফং ফংদে। ঐহাক্না ত্রাইবেলগী মফমদা থবক তৌরিঙৈগী মতম ঙসিসু নিংশিংলি। মনুং হঞ্জিন্না চৎপগী মথৌ তারম্মি। মদুদগী কনাগুম্বা অমনা থাইনগী মতমগী জীপ অমা শিনবীদুনা মদুদা তোংলগা চৎনবা হায়বীরকই। অয়ুক অঙনবা পুং ৫.৩০দা চৎকদবা থবক্নি, অদুবু জীপ স্তার্ত হৌদবদগী ঐখোয়না ইনবু ইনবরো, তৌবা য়াবা হার্দৱর্ক তৌরে, পুং ৭-৭.৩০ তারফাওবদা স্তার্ত হৌদ্রে। অদুদগীদি, মেকানিক অমা কৌরে অদুগা মহাক্না মিনিত ২ ফাওবা চঙলম্লোই, জীপ্তু শেম্লে, স্তার্ত হৌরে। মিনিত ২দা মহাক্না শেম্লে অদুগা সাহেব লুপা ২০০ পীরো হায়রকখিবনি। ঐনা মিনিত ২গী লুপা ২০০ লৈদোইবা হায়খি। মহাক্না সাহেব, মসিদি মিনিত ২গী পুপা ২০০ নত্তে, ঐগী চহি ৫০গী এক্সপেরিএন্সকী লুপা ২০০নি খুম্লকখি। ঐখোয়না হার্দ ৱর্ক তৌখি, জীপ স্তার্ত হৌখিদে। মহাক্না স্মার্ত ওইনা নত অমা অনি লৈশিল্লগা হোৎনখি। মিনিত ২মুক মহাক্না লৌখি। গারি স্তার্ত হৌখি। ঐনা হায়নিংবদি, থবক খুদিং ঐখোয়না পাঙ্গল পুথোক্লগা কন্না হোৎনবদা মতম পুম্বদা ৱারোইশিন ফংগদৌবা নত্তে। তঙাই ফদবা থৌওংদুদা মিৎয়েং চঙগদবনি। ঐখোয়দা কান্নবা পীগদবা থৌওংদা মিৎয়েং চঙগদবনি। অখন্নবা হীরমদুদা ঐখোয়না কোক থাদগদবনি। হীরম নিংথিনা খঙবা মীওইদুনা মদুগী ৱারোইশিন পুথোকপা ঙমগনি। করি তৌগদগে হায়বগী মতুং ইন্না, তঙাই ফদবা পুম্নমক শেম শাগদবনি। হার্দ ৱর্ক তৌগদবনি, অদুবু স্মার্ত ওইনা তৌগদবনি। অদুনা স্মার্তলী হার্দ ৱর্ক তৌরবা মতুংদা ঐখোয়গী পান্দম ফংগনি, থবক্কী মহৈ য়ানগনি। থাগৎচরি।

থৌরম লান্থোক্লিবা মীওই- ঐখোয়গী পুন্সিদা হার্দ ৱর্ক লেপ্তনা তৌবগী লম্বী খনবদা তেংবাংবগীদমক্তা ইকায় খুম্ননিংঙাই ওইরবা প্রধান মন্ত্রীজীবু থাগতচরি।  গুরু দ্রোনাচার্য়গী মিংদা খঙনবা হরিয়ানগী সাইবর সিতী ওইরিবা, ইন্দস্ত্রীগী মমিং লৈরবা লমদম, গুরুগ্রামগী মহৈরোই জোবিতা পাত্রদগী ৱাহং তাবীসি। জোবিতা, অদোমগী ৱাহং হংবীয়ু।

জোবিতা পাত্র – নমস্কার, ইকায় খুম্ননিংঙাই ওইরবা প্রধান মন্ত্রীজী। ঐহাক্কী মিং জোবিতা পাত্র কৌই, গুরুগ্রাম হরিয়ানগী জৱাহর নবোদয়া বিদ্যালয়দা ক্লাস ১০ তমজরি। ঙসিগী পরিক্ষা পে চর্চা ২০২৩দা শরুক য়াবা ফংবসি ঐহাক্কী লাইবক ফবনি। চাংচৎ ওইবা মহৈরোই অমা ওইনা, ঐহাক্না ঐহাক্কী লাইরিক লাইশুদা করম্না মায় ওন্সিনগনি হায়বসি ঐহাক্কী ৱাহংনি। হীরম অসিদা সরনা ঐহাকপু চানবীদুনা লমজিংবীয়ু। থাগৎচরি সর।

থৌরম লান্থোক্লিবা মীওই- জোবিতাবু থাগৎচরি। ইকায় খুম্ননিংঙাই ওইরবা প্রধান মন্ত্রীজী, চাংচৎকী মহৈরোই অমনা পরিক্ষাদা করম্না নিংথিনা তৌগনি হায়বগী মতাংদা অদোমগী পাউতাক পাম্লি। মহাকপু সরনা চানবীদুনা অমুক্তা লমজিংবীয়ু। 

প্রধান মন্ত্রী- অদোম্না ইশা অসি চাংচৎকী থাক্তা লৈ খঙবগীদমক্তা ঐহাক্না অদোম্বু অহানবমক্তদা থাগৎচরি। মশা অসি অতৈদগী য়াম্না তারবসু, মশাবু তীস মার খাননি খঞ্জবা মীওই কয়া অমা লৈ। ঐহাক্না অদোমগী ইমা-ইপাবুসু থাগৎচরি। ঐহাক্কী তসেংবা চাং খঙলবদি, মদুগা চুনবা থৌরাং থিবা তাই। ইশাবু তীস মার খাননি খনবগী মথৌ তাদে। ঐখোয়না ইশাগী তৌবা ঙম্বগী মতিক খঙবা নুমিত্তুদা অদুনা ঐখোয়গী খ্বাইদগী চাউবা পাঙ্গল ওইরকই। মশাগী তৌবা ঙম্বগী চাং খঙদবা মীওইশিংনা মদু খঙনবা হোৎনবদা মতম শাংনা চঙই। অয়েৎপা কয়া লম্বীদা মাইয়োক্নৈ। ইশাগী মতিক খঙনবা ঈশ্বরনা পাঙ্গল পীবিরি, ওজাশিংনা পাঙ্গল পীবিরি। মমা-মপা খুদিংনা মচাশিংবু মুন্না অমসুং শেংনা খঙবীয়ু হায়না ঐনা হায়জনিংই। ওইদবা ৱাখল্লোন লৈহন্নবা হোৎনবীগনু। মখোয়গী ৱাংমদা লৈবা মখোয়না পাম্বা অতাঙবা পোৎ লৈবগী মতাং লাকপা মতমদা, খরা ঙাইয়ু, ঐখোয়গী ইমুংনা মসি লৈবা ঙম্বগী মতিক ওইদ্রি, মসি ঐখোয়না লৈবা ঙম্লোই, চহি অমা অনি ঙাইখো হায়না অশেঙবা হায়বীয়ু। মসিদা করিসু কায়বা লৈতে। ইমুংগী অশেংবা ফিভমগী মতাংদা অঙাংদা খঙহনবা মতমদা করিসু কায়বা লৈতে। ঐখোয় অসি নোর্মেল থাক্তা লৈবনি, মীওই অয়াম্বনা নোর্মেল থাক্তা লৈ। এক্সত্রা ওর্দিনারী ওইবা মীওই মশিং য়ামদে। অচম্বা মীওইনা অচম্বা থবক তৌই, অদুবু অচম্বা মীওইনা মহৌশাদগী হেনবা থবক তৌরকা মতমদা মদুবু থাক ৱাংনা মায় পাকপা কৌই। ঙসি মায় পাক্লিবা মীওই অয়াম্বসি মতম অমদা অচম্বা মীওই ওইরম্মিবা ঙাক্তনি হায়বা অদোম্না উরম্লগনি। মালেম শিনবা থুংবদা হৌজিক শেন্মিৎলোনগী ফিভমগী মতাংদা ৱারী শান্নরি। করম্বা লৈবাক্না কয়া য়াম্না হেনখ্রে, করম্বা লৈবাক্কী ফিভম করি ওইরি। কোরোনাগী মতুংদা মসিনা মহৌশা ওইবা অনৌবা ৱাফম ওইখ্রে। মসি হায়রগা মালেমগী নাক্তা ইকোনোমিস্ত ফবা লৈত্রে হায়বা নত্তে। নোবেল প্রাইজ ফংবা মশক নাইবা মীওই কয়া অমা লৈরি। গ্যান পীবা ঙম্বা মীওইগী অৱাৎপা লৈতে, লৈকায় খুদিংদা লৈনরি। মায় পাকপা য়াম্না ফংলবা মীওই কয়া অমসু লৈতবা নত্তে। অদুবু, ভারত অসি অতোপ্পা লৈবাকশিংগা মতৌ করম্না চাংদম্না হৌরক্লি, ভারতপু থাজবগী অনৌবা মঙাল অমা ওইনা উরক্লিবসি ঐখোয়না উরে। চহি অনি-অহুমগী মমাংদা ঐখোয়গী সরকারগী নাক্তা ইকোনোমিস্ত অমত্তা লৈতে হায়না হায়নবা অদোম্না উরম্লগনি। পুম্নমক এভরেজ মীওই ঙাক্তনি। প্রধান মন্ত্রীদসু ইকোনোমিস্তকী লৌশিং লৈতে। অসুম্না ইনরম্বনি। অদোম মসিগুম্বা ই-পাউ পাখ্রেকো? অদুবু, মালেম্না এভরেজ হায়না কৌরম্বা লৈবাক অসিনা হৌজিক মালেমদা ঙান্থোইরি। অদুনা অদোমসে এক্সত্রা ওর্দিনারী ওই হায়বগী ৱাখলদা লৈবীগনু। অদোম এভরেজ ওইরমগনি, অদুবু অদোমগী মনুংদা এক্সত্রা ওর্দিনারী ওইবা মগুন খরদি শোইদনা লৈরিবনি। অদুগা এক্সত্রা ওর্দিনারী ওইবশিংগী মনুংদসু এভরেজ ওইবা মগুন শোইদনা য়াওরিবনি। ঈশ্বরনা মীপুম খুদিংদা মশক থোকপা মতিক মগুন পীবিরি। অদোম্না মদুবু শকখঙদবনি, মদুবু য়োকখৎকদবনি, অদোম্না য়াম্না থুনা মায় পাকপা ঙমগনি। মসি ঐগী থাজবনি। থাগৎচরি।

থৌরম লান্থোক্লিবা মীওই- মহৈরোই কয়া অমবু মশাগী মগুন লৈ অমসুং মদুগীদমক্তা নুংঙাইবা ফাওহন্নবা ৱাফম কয়াসিগীদমক্তা ইকায় খুম্ননিংঙাই ওইরবা প্রধান মন্ত্রীজীবু থাগৎচরি। অর্বান প্লান্নিং, মোদর্ন আর্কিতেকচর অমসুং শক্নাইরবা নেক চান্দগী ফজরবা রোক গার্দেনগীদমক্তা মমিং চৎলবা চন্দিগরগী কেপিতেল সিতীদগী মন্নত বাজ্বা লৈরে। মহাক্কুম্বী মহৈরোই কয়াদা চৈথেং পীরিবা তোয়না থোকপা হীরমগা মরী লৈননা মহাক্না অদোমগী পাউতাক পাম্লি। মন্নত, চানবীদুনা অদোমগী ৱাফম ফোংদোকপীরো।

মন্নত বাজ্বা – ইকায় খুম্ননিংঙাই ওইরবা প্রধান মন্ত্রীজীবু খুরুমজরি। সর ঐহাক মন্নত বাজ্বানি, ঐহাক সেন্ত জোসেফ সেনিয়র সেকন্দরী স্কুলদা তম্লিবী মহৈরোইনি। ঐহাক ইশানা ভারতকুম্বা অসুক য়াম্লবা মীওই, ওপিনিয়ন মেকর লৈবা লৈবাক অমা চলায়বগী অদোমগী ফম অসিদা ইশাবু থমদুনা ৱাখল খল্লি। অদোমগী মাইয়োক্তা ঙাঙবা মীওই কয়াসু লৈ। মখোয়না অদোমদা অহোংবা লৈহনবরা? করিগুম্বা লৈহনবা তারবদি, অদোম্না মদুগা করম্না মাইয়োক্নবগে? ঐহাকপু অদোম্না হীরম অসিদা লমজিংবীয়ু। থাগৎচরি শ্রীমানবু।

থৌরম লান্থোক্লিবা মীওই- মন্নতপু থাগৎচরি। ইকায় খুম্ননিংঙাই ওইরবা প্রধান মন্ত্রীজী, অশ্তমী সাইন অসি য়েংবদা পুক্নিং হুরবা চা বগান অমসুং উন্না থল্লবা হিমালয়গী নিংথিরবা লমদমগীদমক্তা মমিং চৎলিবা সিক্কিমদা লৈবনি। মথক্কী মান্নবা হীরমগী মতাংদা মহাকসু অদোমগী পাউতাক পামজরি। অশ্তমী, চানবীদুনা অদোমগী ৱাহং হংবীরো।

অশ্তমী -  ইকায় খুম্ননিংঙাই ওইরবা প্রধান মন্ত্রীজীবু নমস্কার! ঐহাক খাথংবা সিক্কিমগী রঙ্গিত নগরদা লৈবা দি.এ.ভি. পব্লিক স্কুলদা ক্লাস ১১ তম্লিবী মহৈরোইনি। ওপোজিসন অমসুং মীদিয়ানা অদোমগী মাইয়োক্তা ৱা ঙাঙবা মতমদা অদোম্না মদুগা করম্না মাইয়োক্নবগে হায়বা ঐহাক অদোমগী মফমদগী খঙবা পাম্মি। ঐহাক্তি ঐহাক্কী ইমা-ইপানা মখোয়না ঐঙোন্দা নিংবা কায়বগী ৱারী শারকপা মতমদা মাইয়োক্নবদা ৱানা থোকই। চানবীদুনা ঐহাকপু লমজিংবীয়ু। থাগৎচরি।

থৌরম লান্থোক্লিবা মীওই- অশ্তমীবু থাগৎচরি। ইকায় খুম্ননিংঙাই ওইরবা প্রধান মন্ত্রীজী, লৈবাক্কী মপাবুং, মহাত্মা গান্ধীজী, সর্দার পতেল অমসুং স্বামী দয়ানন্দ সরস্বতীগুম্বা শক্নাইরবা মীওইশিংগী পোক্নফম লমদম গুজরাতকী কুমকুম প্রতাপ ভাই সোলঙ্কীনা ভর্চুএলগী খুত্থাংদা ঐখোয়গা পুল্লি, মহাকসু মান্নবা হীরম অমদা থৱাই ৱাজরি। মহাক্না অদোমগী পাউতাক পাম্লি। কুমকুম, ৱাহং হংবীরো?

কুমকুম - ইকায় খুম্ননিংঙাই ওইরবা প্রধান মন্ত্রীজী, ঐহাক্কী মিং সোলঙ্কী কুমকুম কৌই। ঐহাক গুজরাতকী অহমেদবাদ জিলাগী শ্রী হদালা বাই হাই স্কুলদা ক্লাস ১২ তমজরি। অদোম অসি মশিং য়াম্লবা লৈবাক অমগী প্রধান মন্ত্রীনি, অদুগা তোঙানবা শিংনবা কয়া মাইয়োক্নৈ। শিংনবশিং অসিগা অদোম্না করম্না মাইয়োক্নবগে হায়বদু অমুক্তা তম্বীয়ু। থাগৎচরি।

থৌরম লান্থোক্লিবা মীওই- কুমকুম্বু থাগৎচরি। ইকায় খুম্ননিংঙাই ওইরবা প্রধান মন্ত্রীজী, আকাশ দরিরা অসি ভারতকী সিলিকোন সিতী, বেঙ্গালোরদা লৈবনি। লমদম অসি নাৎ অমসুং মোদর্নগী থবক থৌরম অনিমক্কী মতিক চারবা লমদম ওইবগীদমক্তা মমিং চৎলিবনি। মহাকপু মতম খরদগী ৱাহল্লিবা মান্নবা হীরমগী মতাংদা মহাক্না অদোমগী মফমদগী পাউতাক পাম্লি। আকাশ, অদোমগী ৱাহং হংবীরো।

আকাশ - মোদীজীবু নমস্তে। ঐহাক বেঙ্গালোরগী হ্বাইত ফিল্দ গ্লোবেল স্কুলদা ক্লাস ১২ তম্লিবা আকাশ দরিরানি। ঐহাক্কী ইবোক্কী শৈরেং, এ মখিজানা অদোমগী মফমদগী মতম পুম্বদা তমজনবা পাউতাক পীবি, ওপোজিসন্না অদোমগী মাইয়োক্তা থম্বা ৱাফমবু অদোম্না তোনিক ওইনা উবগী মতৌ ঐহাক উজরে। অদোম্না মসি করম্না তৌবগে? ঐখোয়না পুন্সিগী পরিক্ষা পুম্বদা মায় পাক্নবা অদোম্না পাউতাক পীবিয়ু। থাগতচরি।

থৌরম লান্থোক্লিবা মীওই- আকাশপু থাগৎচরি। ইকায় খুম্ননিংঙাই ওইরবা প্রধান মন্ত্রীজী, অদোমগী পুন্সিনা নহা করোর কয়াদা ইথিল পীবিরি, মন্নত, অশ্তমী, কুমকুম অমসুং আকাশকী পুন্সিদা লাক্কদৌরিবা শিংনবা খুদিংবু করম্না মায় পাক্না মাইয়োক্নবা ঙমগনি হায়বগী মতাংদা মখোয়না অদোমগী মফমদগী পাউতাক্পাম্লি। মখোয়বু অমুক্তা লমজিংবীয়ু, প্রধান মন্ত্রীজী। 

প্রধান মন্ত্রী- অদোম্না পরিক্ষা থারবা মতুং য়ুমদা হল্লকপা মতমদা ইমুং মনুং নত্ত্রগা মরুপশিংগা ফম্মিনৈ। নক্নবা ওজা লৈরবদি, মখোয়গা ফম্মিন্নৈ। ৱাহং অমগী পাউখুম নিংথিনা পীরমদ্রবা ওইরবদি, মদু সিলেবসকী ৱাংমদগী লাকপনি হায়বসিনা অদোমগী অহানবা রিএক্সন ওই, ওইকো? অদুবু অদোম্না করি হায়নিংই হায়বা ঐ খঙই। অদোম্না ঐবু মরকসিদা য়াওহল্লমদবা ওইরবদি, অদোম্না তোঙানবা মওং অমদা হায়বসু পাম্লমগনি। অদুবু, অদোমগী ইমুংগী মীওইশিংসু তারিবনিনা ফোঙনা হায়বদা মাঙজবা লৈবনা য়াম্না শিংনা শেমদোক্লগা ৱাহং হংলিকো। ঐহাক্কী ওইনদি, ঐগী থাজবা অমা লৈ, মসিনা ঐগী আর্তিকল ওফ ফেথ অমনি। য়ানিংদবা ফোংদোকপসি গনতন্ত্রদা কায়দবা থৌওং অমনি হায়না ঐদি খল্লি। তেক্নোলোজীদা ওপন সোর্স তেক্নোলোজী লৈ হায়বসি অদোম্না খঙলে। খঙইকো? ওপন সোর্স ওইবনিনা মীয়াম্না মশা-মশাগী পোৎলম হাপচিন্নৈ। মসি ঐখোয়না তৌবনি, ঐখোয় মসিদা পন্দুনা লৈরে, অৱাৎপা খরা লৈরম্বা য়াই হায়বসি ওপন তেক্নোলোজীগী খুত্থাংদা পাংথোকপসু য়াহল্লি। অদৈদি, অতোপ্পনা মসিদা মশা মশাগী তেক্নোলোজী অমুক হাপচিন্নৈ। অদুগা মীয়াম পুন্না হোৎনমিন্নবদগী মদুনা মপুং ফাবা সোফৱেয়র ওইরকই। অদুনা ওপন সোর্সপু হৌজিক্কানা মপাঙ্গল য়াম্না লৈবা খুৎলায় ওইনা লৌনরিবনি। মতৌ অসুম্না, কম্পেনী খরনা মখোয়গী পোত্থোকশিং মার্কেত্তা থাদোক্তুনা মসিদা অশোইবা য়াওবা পুথোক্লবদি মনা পীগনি লাওথোকই। বাউন্দ সীস্তেমগী খুদোংচাবা শেমদুনা থম্মি। অদুনা, অশোইবা লৈবশিংবু লৌথোক্নবা পাম্বৈ তাক্নরবদি অফবা ওইগনি হায়না মীপুম খুদিংনা খন্নৈ। য়ানিংদবা ফোংদোক্লিবসি কনানো হায়বা খঙবতা ৱারী লোইনমক ময়েক শেংবা য়াওরিবনি। খুদম ওইনা লৌরসি, অদোমগী স্কুলগী ফেন্সী দ্রেস কম্পিতিসন্দা অদোম্না ফেন্সী দ্রেস ফজবা অমা শেত্তুনা চৎলে, অদোমগী খ্বাইদগী চান্নবা মরুপ্না নহাক্না শেত্তুনা লাক্লিবসিবো করিনো হায়না নেগেতিব ওইনা হায়রকপা মতমদা অদোমগী রিএক্সন করি ওইগনি? অদোম্না কা হেন্না পামদবা, অদুগা ৱাখলসু চান্নদবা মরু অমনা ৱাফমসিমক হায়রকপা মতমদা অদোমদা তোঙানবা রিএক্সন অমুক লৈগনি। ঐখোয়গী মীওইনা হায়বনা পোজিতিব ওইনা লৌই, অদুগা নত্তবনা হায়বনা শিথবনি খল্লি। ঐহাক্না অপাম্বা তৌবদা ৱা ঙাংলিবা নহাক কনানো হায়না শাওনিংই। অদোমগী মাইয়োক্তা তোয়না ঙাংবশিংবু বোক্স অমদা হাপচিল্লগা থমখ্রো। মখোয়না পাম্লিবসি তোঙানবা অমনি, অদুনা মদুদা মতম মাংহনগদৌবা নত্তে। য়ুমদা ক্রিতিসিজম তৌরিবসিদি অশোইবা খরা লৈবগীনি। য়ুমদা ক্রিতিসিজম তৌনদ্রবদি পাখৎনিংঙাই ওইরে। ঐখোয়দা ঙাংবীনবা ইমা, ইচে ইচল লৈরি। মখোয় অমসুং ওজানা অদোম্বু শেন্নফম থোকই, অদোম্না করি তৌরি, মোবাইলদা মতম কয়া য়াম্না লেল্লি। য়াম্না কুপ্না হায়বগী মথৌ তাদ্রবসু, অদোমগী ইমা-ইপানা য়েংশিল্লিবনি। অদোম্না ৱাখল নুংঙাইনা লৈবা মতমদা মখোয়সু উরিবনি, ইচানুপা নহাক্কী তৌবা ঙম্বগী মতিক অসুক অসুক লৈ, মদু নিংথিনা শিজিন্নৌ হায়না মখোয়না নুংশিনবা হায়বীবা মতমদা মদু কান্নবা ক্রিতিসিজম ওইরিবনি। মদুগী কান্নবা য়াম্না লাক্কদৌরিবনি। হৌজিক্কান্দি মমা-মপাশিংগী মনাক্তা মতম লৈতবনা মখোয়না ক্রিতিসাইজ তৌদ্রে, হকথেংননা চৈরে, অদুদা অদোমদা শাওনিংবা অমুক পোকই। চারবসু ঙাংই, চাদ্রবসু ঙাংই। মসিমক তৌইকো? অদোমগী ইমা ইপানা চৈরিবা, ক্রিতিসিজম তৌরিবদু ক্রিতিসিজম নত্তে। অদুগা, ঐহাক্না মমা-মপাশিংদা হায়জনিংবদি, ইচাগী ফনবনি হায়দুনা চৈবগী থবক তোক্লসি। মদুনা অদোম্না অদোমগী অঙাংশিংগী পুন্সিগা চুশিন্নবা ঙম্লরোই। অয়ুক্তা ঙাংখিবসিনা মখোয়গী নুমিৎ চুপ্পা নুংঙাইহন্দবনি।

অদোমসু পার্লিয়ামেন্তকী দিবেত য়েংলমগনি। মীওই খরদি দিবেতকীদমক্তা পার্লিয়ামেন্ততা নিংথিনা শেম শারগা লাকই। অদুবু অদোমগী মাঙদা ফম্লিবা ওপোজিসনগী মীওইশিংনা অদোমগী ৱাখল্লোন খঙই। অদুনা রিএক্ত শোইদনা তৌরক্কনি খঙলবা কম্মেন্ত পীনৈ। মদুদগীদি ঙাংনবা শেম শারগা লাক্লিবদু কাউরে, কম্মেন্ততুগী পাউখুম পীরে। শেম শারক্লিবা পুম্নমক অরেম্বা তারে। মখোয়গী অপাম্বদুমক ফংলে। অদুনা, ঐখোয়না কৈদৌনুংদা ফোকস মাঙলোইদবনি। অদুগনে, ক্রিতিসিজম তৌনবগীদমক্তা য়াম্না হোৎনবা তাবনি, য়াম্না কুপ্না য়েংশিনবা, নৈনবগী মথৌসু তারিবনি। কম্পেরিজন তৌবগীসু মথৌ তারিবনি। মমাংগী থৌদোক নিংশিংবা তাই, হৌজিক অমসুং তুংগী মতমগীসু খন্থদবা য়াদে। য়াম্না ৱানা হোৎনরবা মতুংদা ক্রিতিসিজম তৌবা য়ারিবনি। অদুনা, হৌজিক্কা অসিদি শোর্তকতকী মতম্নি। মীয়াম্না অয়াম্বা মতমদা মরাল ওইনা শীনরে, ক্রিতিসিজম তৌনদ্রে। অনিসিগী মরক্তা য়াম্না চাউনা খেন্নবা লৈ। ঐখোয়দি মরাল শিববু ক্রিতিসিজম্নি খন্দে। ক্রিতিসিজম হায়বসিদি ঐখোয়গী পাঙ্গল কনখৎহনগদবা মচি ওইবা পোৎশক্নি। মরাল শীবগী ওইনদি, মরাল শীরক্লিবশিংদু লুনা খঞ্জিল্লুবগী মথৌ কৈদৌনুংদা তাদে। মতম মাঙহনবা কান্নবা নত্তে। অদুবু, ক্রিতিসিজম্বু কৈদৌনুংদা লায়না লৌবা য়াদে। মসিদি য়াম্না ভেল্যু লৈনা লৌগদবনি। মসিনা ঐখোয়গী পুন্সি শেম্বগী মতাং লাকপসু য়ারিবনি। করিগুম্বা ঐখোয়না থম্মোই শেংলবা অমসুং অচুম্বা ৱাখল্লোন্দা থবক তৌখিবা ওইরবদি, খুন্নাইগীদমক্তা থবক তৌবা ওইরবদি, মরাল শিরক্লিবা মীওইশিংদুগী মরমদা করিমত্তা খল্লুনু মরুপশিং। মসিনা অদোমগী অচৌবা পাঙ্গল ওইগনি হায়না ঐনা খল্লি। থাগৎচরি।

থৌরম লান্থোক্লিবা মীওই - ইকায় খুম্ননিংঙাই ওইরবা প্রধান মন্ত্রীজী, অদোমগী পোজিতিব ইনর্জীনা মীওই কয়াদা অনৌবা লম্বী তাকপীরে। অদোম্বু থাগৎচরি। ইকায় খুম্ননিংঙাই ওইরবা প্রধান মন্ত্রীজী, তালগী শহর ভোপালদগী দিপেশ অহিরৱার্না ঐখোয়গা ভর্চুএলগী খুত্থাংদা পুল্লি। মহাক্না প্রধান মন্ত্রীজীগী মফদা ৱাহং খরা হংবা পাম্লি। দিপেশ অদোম ৱাহং হংবীরো?

দিপেশ – ইকায় খুম্ননিংঙাই ওইরবা প্রধান মন্ত্রীজী, ঐহাক্কী মিং দিপেশ অহিরৱার কৌই। ঐহাক ভোপালগী শাস্কিয় উচ্চতর মধ্যামিক বিদ্যালয়দা ক্লাস ১০দা তম্লিবা মহৈরোইনি। হৌজিক্কান অসিদি, অঙাংশিংনা ফেন্তাসী স্পোর্ত অমসুং ইন্সতাগ্রামদা লাইচুবা অসিদি মহৌশাগুম ওইরে। মসিগুম্বা মতমসিদা ঐখোয়না লাইরিক পাবদা মতৌ করম্না থৱাই চঙগনি? ঐখোয়না ৱাখল চাইথোক্তনা মহৈদা থৱাই চঙনবা করি তৌবা য়াবগে হায়বা অদোম্না অমুক্তা তাকপীয়ু। থাগৎচরি।

থৌরম লান্থোক্লিবা মীওই- দিপেশপু থাগৎতচরি। ইকায় খুম্ননিংঙাই ওইরবা প্রধান মন্ত্রীজী, অদিতাব গুপ্তগী ৱাহং অসিদি ইন্দিয়া তি.ভি.গী মাইকৈদগী খনখিবনি। অদিতাবনা ঐখোয়গা ভর্চুএলগী খুত্থাংদা পুল্লি। অদিতাব, ৱাহং হংবীরো?

অদিতাব গুপ্তা – ঐহাক্কী মিং অদিতাব গুপ্তা কৌই। ঐহাক ক্লাস ১০দা তম্লি। তেক্নোলোজী চাউখৎপা লেপ্ত্রি, মসিগা লোয়ননা ঐখোয়গী দিস্ত্রেক্সনসু অসুম অসুম হেনগৎলক্লি, ঐখোয়গী ফোকসনা লাইরিক পাবদগী লাপথোরক্লি, সোসিএল মীদিয়াদা হেন্না ফোকস চঙনরক্লি। অদুনা, ঐহাক্না অদোমগী মফমদা হংজনিংবা ৱাহংদি, ঐখোয়গী মতমদা লৈবগুম্না অদোমগী মতমদদি দিস্ত্রেক্সন অসুক য়াম্না লৈরমদে, অদুনা ঐখোয়না সোসিএল মীদিয়াদা ফোকস পীবা হন্থরগা লাইরিক পাবদা হেন্না ফোকস করম্না তৌবা য়াগনি হায়বসিনি।

অদিতাবপু থাগৎচরি। ইকায় খুম্ননিংঙাই ওইরবা প্রধান মন্ত্রীজী, মথংগী ৱাহং অসিদি মহৈরোই খুদিংগী মপুং ওইবা ৱাহংনি, মসিদি কমাক্সী রাওদগীনি। মহাক্কী ৱাহং অসি রিপব্লিক তি.ভি.না খনবনি। কমাক্সী, অদোমগী ৱাহং হংবীরো।

কমাক্সী রাই – প্রধান মন্ত্রী অমসুং মীয়াম পুম্নমকপু তরাম্না ওকচরি। ঐহাক দিল্লীদগী কমাক্সী রাইনি অমসুং ঐহাক ক্লাস ১০দা তম্লি। মহৈরোইশিংনা পরিক্ষাগী মতমদা মখোয়গী ৱাখল চাইথোকহন্দনবা করি করম্বা তোঙানবা পাম্বৈশিং শিজিন্নবা য়াবগে? থাগৎচরি।

থৌরম লান্থোক্লিবা মীওই- কমাক্সী, থাগৎচরি। ইকায় খুম্ননিংঙাই ওইরবা প্রধান মন্ত্রীজী, ৱাহং অসি জি তি.ভি.না খনবনি। মনন মিত্তলনা ঐখোয়গা ভর্চুএলগী খুত্থাংদা পুল্লি। মনন চানবীদুনা ৱাহং হংবীরো।

মনন মিত্তল – নমস্তে প্রধান মন্ত্রীজী। ঐহাক দি.পি.এস. বেঙ্গালুরু সাউথতগী মনন মিত্তলনি, ঐহাক্না অদোমগী মফমদা ৱাহং অমা হংজনিংই। ওনলাইন্দা লাইরিক পাবা মতমদা দিস্ত্রেক্সন য়াম্না লৈ, খুদম ওইনা হায়রবদা, ওনলাইন গেমিংনচিংবা কয়া, মসিদগী ঐখোয়না করম্না নান্থোক্কনি?

প্রধান মন্ত্রী – মসিবু মহৈরোইলো? গেজেত্তা ঙাওদুনা লৈরেনে।  

থৌরম লান্থোক্লিবা মীওই- মননবু থাগৎচরি। ইকায় খুম্ননিংঙাই ওইরবা প্রধান মন্ত্রীজী, দিপেশ, অদিতাব, কমাক্সী অমসুং মনন মিত্তলনা পরিক্ষাদা থেংনবা অপনবশিংদগী করম্না নান্থোক্কনি হায়বগী মতাংদা অদোমগী পাউতাক পাম্লি। মখোয়বু চানবীদুনা অমুক্তা লমজিংবীয়ু, প্রধান মন্ত্রীজী।

প্রধান মন্ত্রী- অদোম স্মার্ত ওইবরা নত্ত্রগা গেজেত স্মার্ত ওইবরা হায়বসিগী ৱারেপ অমা হান্না লৌখিসি। অদোম্না ইশাদগী গেজেতনা হেন্না স্মার্ত ওইরে হায়না করিগুম্বা মতমদা ফাওবা মাল্লি অদুগা প্রোব্লেম অসি মসিদগী হৌরিবনি। মপু ইবুংঙোনা অদোমগী মফমদা শক্তি য়াম্না পীখ্রবজাৎনি, অদোম স্মার্ত ওই, গেজেৎনা অদোমদগী স্মার্ত হেন্না ওইবা নত্তে। অদোম্না স্মার্ত ওইবা হেল্লিবমখৈ, মদুম্না স্মার্ত ওইনা গেজেত শিজিন্নগদৌরিবনি। মসিদি শুপ্নগী খুৎলায় অমনি, অদোমগী থবক্কী খোঙজেল য়াঙখৎহনবখক্তনি, মসিনা ঐখোয়গী ৱাখল খনবগী ফম্বাক ওইরবদি, অদোম্না মসিদগী নিংতম্বা ফম্বা ঙমগনি হায়না ঐনা থাজৈ। লৈবাক্কী পাখৎনিংঙাই ওইবা হীরম অমনা, ভারত্তা চাংচত্তা পুং ৬তি স্ক্রীনগী মমাংদা লৈনৈ হায়না ঐহাক্কী ইফমদা পাউদম্লে। মসিগী কারবার তৌবশিংগীদি মসি য়াম্না হরাওবা ৱানি। মোবাইল ফোন্দা তোকতাইম লৈরিঙৈ মতমদুতদা চাংচত্তা মিনিত ২০দি লৈনরম্মিবনি। হৌজিক্তি, স্ক্রীন্দা রীল হায়বরা করিনো ময়াম অমসু লাক্লে, অমুকপু চঙখ্রবদি থোক্লকপগী ৱাফম লৈত্রে। অদোমদি রীল য়েংদরো? য়েংদবা নত্ত্রো? করিগী ইকায়রিবনো? থোকপা ঙম্মি ঙমদে হাইয়ো? ক্রিএতিব ওইবা চহি অমসুং ঐখোয়গী ক্রিএতিবিতীগী মতিকপু শিজিন্নদখৈ ঐখোয়না নোংমদা পুং ৬ স্ক্রীন মমাংদা লেল্লবদি, মসি পাখৎনিংঙাই ওইদবরনে? গেজেত্না ঐখোয়বু মহাক্কী মীখা পোলহল্লবনি। ঐখোয়না মসিগী মীনাই ওইরগা হিংগদৌবা নত্তে। ঈশ্বরনা ঐখোয়দা নিংতম্না হিংনবা অমসুং নিংতম্বা ইশাগী শক্তাক লৈজনবা থৌজানীবিরি, অদুনা ঐখোয়না মসিগী মীনাই ওইরবরা হায়বগী মতাংদা মুন্না খন্থফম থোকপনি। ঐহাক্কী খুত্তা মোবাইল পাইবা অদোম্না উরম্লোই, ঐনা ইশাবু অসুক য়াম্না চেকশিন্না থম্লিবনি, ঐহাক এক্তিব য়াম্না ওই, মদুগীসু ঐনা মতম খাইদোক্তুনা থম্মি, মতমদুগী ৱাংমদা ঐ কয়া তৌদে। গেজেতকী মীখা পোন্দুনা লৈগদরা লৈরোইদরা হায়বসিগী মতাংদদি ঐখোয় ইশানা লেপফম থোকই হায়না ঐদি খল্লি। ঐদি মনিং মখা তম্বা পর্সোনেলিতীনি। ঐদি মনিং মখা তম্না হিংবনি। অদুগা মসিদা ঐহাক্কী কান্নগদবা থবকশিং মনুংদা ঐনা অকক্ননা লৈগনি, ঐহাক তেক্নোলোজী শিজিন্নগনি, তেক্নোলোজীগীদমক্তা চেনগনি, অদুবু শিজিন্নবগী মতাংদদি ঐহাক্কী ইশাগী কাঙলোনগী মখা পোন্না শিজিন্নগনি। ওনলাইন্দগী দোসা শাবগী রেসিপী পারে খল্লসি, করি করি মচং চঙই থিবদা পুং কয়া চঙহনখ্রে, অদুনা পুক থনগদরা? পুক থন্নবগীদমক্তা দোসাদু হৌরগা চাবা অমা চঙদরো? মরম অদুনা, গেজেতনা পীরিবদু অরোইবা অফবা পোত্থোক নত্তে। তৌবা ঙম্বগী শক্তিদি অদোমগী নুংদা লৈবনি। মমাংগী মতমশিংদা অঙাংশিংনা চিং লায়না কাবগী মতৌ ঐখোয়না উরে। মীরম লৈবাক্কী মীওইশিংনা অসুক য়াম্না পীকপা অঙাংশিংনা চিং করম্না কাবা ঙম্লিবনো হায়না ঙক্নরিবনি। হৌজিক্তি মদু ফাওদ্রে। হৌজিক্কান্দি চিং কাবা অঙাং থিবদা ৱানা থোক্লে। মতম য়াম্না হোংলে। ঐখোয়গী তৌবা ঙম্বগী মতিক মাঙশিল্লক্লে। ঐখোয়না ইশাগী তৌবা ঙম্বগী মতিক মাঙহন্দনা মসিবু হেনগৎহন্নবা হেন্না হোৎনফম থোকই। নত্ত্রবদি, পুম্নমক মাঙখ্রগনি। ইশানা ইশাবু তোয়না চাংয়েংজবগী মথৌ তারে, নত্ত্রবদি আর্তিফিসিএল প্লেতফোর্ম কয়া অমা লৈরকপদগী ঐখোয়না করিসু তৌদবা য়ারবনি, প্লেতফোর্ম অমগী চেত্তা চঙবদা মালেম পুম্বগী লৌশিং ফংলবনি। গুগলদগীসু খোঙ্কাপ অমা হেন্না লাক্লবনি। মসিদবু চঙখ্রবদি, ক্রিএতিবিতী লোয়না মাঙখ্রগনি। ঐখোয়গী থাইনগী চৎনবীদা হকচাং ফনবগীদমক্তা চরা হেনবগী চৎনবী লৈরম্মি। ধর্মগী মতাংদসু চরা হেনবগী চৎনবী লৈ। অদুবু, মতম হোংলক্লবনিনা, ঐনা তেক্নোলোজীবু পুং খরগী ওইনা চরা হেনবগুম্না হেল্লো হায়জনিংলে। ইমুং মনুংশিংদা ক্লাস ১০ অমসুং ১২কী পরিক্ষাগী মতাংদা তেন্সন লৈনবা পুম্নমক্না উরমগনি। পরিক্ষা নকশিল্লকপা মতমদা য়ুমগী তি.ভি.বু ফি কুপশিন্নরিবনি। মসিগুম্না তৌবা য়ারবদি, ঐখোয়না তেক্নোলোজী খরা হেনগে, চয়োল ১দা নোংমদি দিজিতেল ফাস্তিং তৌগে খনবদি করি কায়বগে? মদুদগী ফংবা কান্নবশিং অমুক্তা কুপ্না য়েংবীয়ু। মদুদগীদি মতম হেনগৎনিংবা তপ্না তপ্না ফাওরক্কনি। ইমুং মনুংশিং পিকশিল্লকপগী মতৌসু ঐখোয়না উরে। ইমুং-মনুংসু দিজিতেল মালেমদা লুপখ্রে। পুম্নমক্তি লৈমিন্নৈ অদুবু, অমনা অমদা ৱাৎসএপ থানরে। পুল্লপ ফম্মিন্নরবসু, মশা-মশাগী মোবাইলদা লোয়না মায় ওন্সিন্নরে। অমনা অমদা য়েংই, অমনা অমদা য়েংদুনা লৈনরে। মসিমক তৌরেকো? মসি ওইরবদি, ইমুং কমাইনা পানগনি? মমাংদদি, বস্তা ত্রেন্দা চৎপা মতমদা ৱাজাও ঙাংদনা, ৱারী নুংঙাইবা শারগা চৎনরম্মি। হৌজিক্তি, কন্নেক্তিবিতীবু ফংলবদি মালেমসে মখোয়না চলায়বদৌনা মোবাইলদা লোয়না চিন্নরে। ঐখোয়না লাইনা অসিবু মশক খঙদোক্তবগী মথৌ তারে, মসিবু মশক খঙদোক্লবদি মসিদগী করম্না কনগনি হায়বগী পাম্বৈসু খঙবা ঙমগনি। অদুনা ইমুং মনুংদা তেক্নোলোজী শিজিন্নরোইদবা মফম অমা লেপথোকপীরো হায়না ঐনা হায়জনিংই। মফমদুদা লাকপা মতমদা মোবাইল থনম্লগা লাকও। মদুদা নুংঙাইনা ৱারী শানৌ। য়ুম মনুংদা লাই অমসুং মন্দিরগী তোঙানবা মফম থম্বগুম্না নো তেক্নোলোজী জোন হায়বা অপীকপা কাচিন অমা শেম্বীরো। মদুনা তৌবা মতমদা পুন্সিদা তপ্না তপ্না নুংঙাইবা অমুক হল্লক্কনি। অমুক্তং য়েংবীয়ু। মদু ওইরবদি, মীনাই ওইবদগীসু নিংতম্লক্কনি। থাগৎচরি।

থৌরম লান্থোক্লিবা মীওই- হীরম অসিবু লাইনা মাইয়োক্নবা ঙম্নবা দিজিতেল ফাস্তিংগী মন্ত্রবু য়াম্না নুংঙাইবা মওংদা থম্বীবগীদমক্তা ইকায় খুম্ননিংঙাই ওইরবা প্রধান মন্ত্রীজীবু থাগৎচরি।

থৌরম লান্থোক্লিবা মীওই- ইকায় খুম্ননিংঙাই ওইরবা প্রধান মন্ত্রীজী, হিমালয় চিংশাংগী মফমদা লৈবা, মহৌশাগী ফজবনা থল্লবা, য়ুনিয়ন তেরিতরী, জম্মুদগী নিদানা ঐখোয়গা ভর্চুএলগী খুত্থাংদা পুল্লি। মহাক্না ৱাহং অমা হংবা পাম্লি। নিদা, ৱাহং হংবীরো।

নিদা - ইকায় খুম্ননিংঙাই ওইরবা প্রধান মন্ত্রীজী, নমস্কার! ঐ নিদানি, জম্মুগী সঞ্জৱানগী গবর্নমেন্ত মোদেল হাইয়র সেকন্দরী স্কুলদা ক্লাস ১০ তম্লি। সর, ঐখোয়না কন্না হোৎনরবা ফাওবদা অপাম্বা রিজল্ত ফংলক্তবা মতমদা ঐখোয়না মদুগী স্ত্রেস অদুবু পোজিতিব ওইবা মাইকৈদা করম্না পুগনি হায়বসি ঐহাক্কী ৱাহংনি। ইকায় খুম্ননিংঙাই ওইরবা প্রধান মন্ত্রীজী, অদোমসু মসিগুম্বা দিভম মাইয়োক্নবা য়াওখ্রবরা? থাগৎচরি।

থৌরম লান্থোক্লিবা মীওই- নিদাবু থাগৎচরি। ইকায় খুম্ননিংঙাই ওইরবা প্রধান মন্ত্রীজী, ভগ্বান কৃষ্ণগী শান্নফম, মালেমদা লৈবাক্কী মিংচৎ পুরক্লবা নিরজ চোপ্রাগুম্বা শান্নরোই কয়াগী লমদম, হরিয়ানাগী পলবলদা লৈবা প্রশান্তনা মহাক্কী ৱাহং হংবা পাম্মি। প্রশান্ত, অদোমগী ৱাহং হংবীরো।

প্রশান্ত – ইকায় খুম্ননিংঙাই ওইরবা প্রধান মন্ত্রীজী, ঐহাক্কী মিং প্রশান্ত কৌই। ঐহাক হরিয়ানাগী পলবলগী হথীন জিলাগী শহীদ নায়ক রাজেন্দ্র সিংহ রাজকিয় মোদেল সংস্কৃতি বরিস্থ মধ্যামিক বিদ্যালয়দা ক্লাস ১২ তম্লি। স্ত্রেসনা পরিক্ষাগী রিজল্ততা করম্না কায়হনবগে হায়বসি ঐহাক্কী ৱাহংনি। চানবীদুনা পাউতাক পীবিয়ু। থাগৎচরি। 

থৌরম লান্থোক্লিবা মীওই- প্রশান্তপু থাগতচরি। ইকায় খুম্ননিংঙাই ওইরবা প্রধান মন্ত্রীজী, প্রশান্তকুম্বা লৈবাক্কী মহৈরোই করোর কয়ানা পরিক্ষাগী রিজল্ততা স্ত্রেসনা করম্না শোকহনবগে হায়বগী মতাংদা খঙবা পাম্লি। পাউতাক অমুক্তা পীবিয়ু। থাগৎচরি।

প্রধান মন্ত্রী- পরিক্ষাগী রিজল্ত লাকপা মতমদা মদুগা লোয়ননা লাক্লিবা স্ত্রেসকী মরু ওইবা মরম খরা লৈ। ঐখোয়না পরিক্ষা থারগা হল্লকপা মতমদা ইমুংগী মীওইশিংদা হোই ফজনা তৌরম্লে হায়বগী চৎনবী লৈ। ঐদি হন্দক্তি পরিক্ষা য়াম্না নুংঙাইখি, ৯০দি শোইদনা লাক্কনি হায়রে, য়ুমগী মীওইশিংসু থাজরে। ৱাথী চাগদবা ওইরবসু থা খরগী মতুংদা চাজরগে খনখ্রবনি। হৌজিক্কী ওইনদি অদুম হাইজিনখ্রে, ইমুং মনুংগী মীওইশিংসু থাজরে। মখোয়সু মরুপ মপাংশিংদা পাউ তম্বা হৌরে, হন্দক্কী মহাক য়াম্না হোৎনখিবনি, মরী মতাগী লুহোংবা ফাওবা চত্তবনি, মসিগুম্বা ফিভম অমা য়ুমদা শাগৎখ্রে, অদুগা পরিক্ষা হায়দোরকপা মতমদদি, মার্ক ৪০-৫০ খক লাক্লে। অদুদগীদি ইরাং অদুম হৌরনি। অদুনা ঐখোয়না খ্বাইদগী অহানবদা অচুম্বা হাইগদবনি। অচুম্বা হায়বগী হৈনবী মাঙহনবা য়াদে। ঐখোয়না নম্থাক্কী মখা পোন্না কয়াম কুইনা হিংগদোইনো? ঐ হন্দক পরিক্ষা খরা নুংঙাইখিদে, ঐদি হোৎনখিবনি অদুবু নুংঙাইখিদ্রে হায়বা ঙমগদবনি। অদোম্না মাংজৌননা হায়হৌবা ওইরবদি, অদোম্না পারম্বা মার্ক্তগী মার্ক ৫ ফাওবা হেল্লকপা মতমদা য়ুমদা স্ত্রেস অমত্তা লৈরোই, নহাক্না হায়বদুদগী মার্ক ৫বু হেন্না লাকএ হরাওনগদৌরিবনি।  স্ত্রেসকী অতোপ্পা মরম অমনা, অদোমগী ৱাখলদা ইমান্নবগী অদুম খনবসিনি। মহাক্না অদু তৌরদি, ঐসু মদু তৌগনি খনবগীনি। ক্লাস্তা মবুকচেল শেংবা অঙাং য়াম্না লৈ, ঐসু পুকচেল শেংই, শুপ্নগী মার্ক ১৯-২০ খেন্নবখক্তনি। মতম্পুম্বদা কম্পিতিসনগী ৱাখল্লোন্দা অদুমক লৈবা অসিসু মরম অমনি। মসিগী মহুত্তা অমদগী তম্নদুনা চৎকদবনি, ইশাগী তৌবা ঙম্বগী মতিক্তা থাজবা থমগদবনি। ঐখোয়না মসি পাংথোকপা ঙম্লবদি, স্ত্রেস্তগী নিংতম্বা হৌরক্কনি। অতোপ্পা মরম অমনা, পরিক্ষা অমদা নিংথিনা তৌহৌদ্রবদি পুন্সি লোইরে খনবা হৌবা মতমদা স্ত্রেস লাকপসু হৌগনি। পরিক্ষা অমা লোইখ্রবসু, অতোপ্পা পরিক্ষা অমা লাক্কনি। পরিক্ষা অসি এন্দ ওফ দি লাইন নত্তেনে। মসি তৌগদবনি হায়বগী ঐখোয়গী পান্দমদি লৈগদবনি, ইশাবু ফনবা ইৎকদবনি, ঐখোয়না মসুনা হোৎনফম থোকই। মসিগুম্বা তেন্সন অসিদগী নিংতম্বা ফংগে হায়না ঐখোয়না ইশাদা লেপকদবনি, পুন্সিদা লাকপশিংদু থেংনরগা হিংলগা লোইরে। করিগুম্বা ঐখোয়না মসুম্না খল্লবদি করিমত্তা ৱানিংঙাই লৈত্রে। অদুনা, ঐনা খনবদি, রিজল্তকা মরী লৈনবা মসিগুম্বা স্ত্রেসকী মতাংদা য়াম্না লুনা খনগদৌবা নত্তে হায়বসিনি। থাগৎচরি।

থৌরম লান্থোক্লিবা মীওই- ইকায় খুম্ননিংঙাই ওইরবা প্রধান মন্ত্রীজী, অদোমগী এক্সপেরিএন্স তাবদা পুম্নমক্না নুংঙাইবা ফাওনরি। আর. অক্সরা সিরি অসি তেলঙ্গানাগী রঙ্গা রেদ্দীদা লৈবীনি। মহাক্না মান্নবা হীরম অমগী মতাংদা খঙবা পাম্লি। অক্সরা অদোমগী ৱাহং হংবীরো।

অক্সরা - ইকায় খুম্ননিংঙাই ওইরবা প্রধান মন্ত্রীজী, ঐহাক্কী মিং অক্সরা সিরি কৌই অমসুং ঐহাক  হাইদ্রবাদকী রঙ্গা রেদ্দীগী জৱাহর নবোদয়া বিদ্যালয়দা ক্লাস ৯ তম্লি। ঐখোয়না লোল ময়াম অমদা তম্নবগীদমক্তা করি তৌফম থোকই হায়বসি ঐহাক্কী ৱাহংনি। মসিদা ঐহাক্না অদোমগী পাউতাক লৌজনিংই। থাগৎচরি শ্রীমানবু।

থৌরম লান্থোক্লিবা মীওই- অক্সরাবু থাগৎচরি। ইকায় খুম্ননিংঙাই ওইরবা প্রধান মন্ত্রীজী, মসিগা মান্নবা ৱাহং অমসু ভারতকী ময়োলগী শহর ওইরিবা ভোপালগী রিতিকা ঘোর্কেনা হংবা পাম্লি। রিতিকা, অদোমগী ৱাহং হংবীরো।

রিতিকা ঘোর – ইকায় খুম্ননিংঙাই ওইরবা প্রধান মন্ত্রীজী, ঐহাক্কী মিং রিতিকা ঘোর্কে কৌই অমসুং ঐহাক ভোপাল মধ্য প্রদেশকী শাস্কিয় সুভাস উতকস্ত মধ্যামিক বিদ্যালয় স্কুল ফোর এক্সিলেন্সকী ক্লাস ১২কী মহৈরোইনি। ঐখোয়না লোল য়াম্না মতৌ করম্না তম্বা য়াবগে হায়বসি ঐহাক্কী ৱাহংনি। থাগৎচরি।

থৌরম লান্থোক্লিবা মীওই- রিতিকাবু থাগৎচরি। ইকায় খুম্ননিংঙাই ওইরবা প্রধান মন্ত্রীজী, অক্সরা অমসুং রিতিকানা লোল য়াম্না খঙবা পাম্লিবা অসিগী পাউতাক অমুক্তা পীবিয়ু। 

প্রধান মন্ত্রী- অদোম্না য়াম্না ফজবা ৱাহং হংলি। অতোপ্পা থবকশিং থাদোক্লগা ফোকস তৌবা তম্মু, ফোকস মাঙহনগনু হায়না ঐনা মমাংদসু হায়দুনা লাক্লি। অদুবু, ৱাহং অসিগী ওইনদি অদোম এক্সপর্ত খরা ওইবীয়ু, এক্সপর্ত ওইবগী মথৌ তাবা খরা লৈগনি। ঐহাক্না মসি হায়বগী মরম লৈ। ভারত অসি তোঙানবা মতৌনা থনবা লৈবাক্নি, ঐখোয়গী লৈবাক্তা লোল মশিং য়াম্না লৈ হায়না ঐখোয়না চাউথোক্না হায়বা ঙমগনি, মসিমক ঐখোয়গী লন্নি, ঐখোয়গী পাঙ্গলনি। ঐখোয়না মসিদা চাউথোকফম থোকই। ঐখোয়না মীরম লৈবাক্কী মীওই থেংনবা মতমদা মখোয়না ঐখোয়সি ইন্দিয়াদগীনি খঙবা মতমদা মখোয়না নমস্তে শোইদনা হায়রক্কনি, প্রনন্সিএসন্দা খরা শোইনবদি য়াই, অদুবু হায়বদি হায়রক্কনি। মদু তাবদা নুংঙাইবা ফাওগনি, অহানবা রাউন্দ মক্তদা অনকপা মরী অমা লৈনবা হৌরক্কনি। মীরম লৈবাক মচানা নমস্তে হায়রক্লে, হায়বদি কম্ম্যুনিকেসনগী মপাঙ্গল য়াম্না লৈ হায়বনি, মসি খুদম অমনি। অসুক য়াম্না চাউরবা লৈবাক্তা অদোম লৈরি, তব্লা তমগে, বাসি তমগে, সিতার তমগে, পিয়ানো তমগে হায়না খনবা ফাওরমগনি, ফাওদবরানে? ফাওরবদি, য়ুম্লোন্নবা রাজ্যগী লোল তম্নিংবা ফাওবদি করি কায়বগে? মসিদা হোৎনফম থোকই। ঐখোয়না লোল খক্তমক তম্বা নত্তে, মফমদুগী চৎনবীসু তমগদৌরিবনি। লোল অমা নৈনবা হৌরকপা মতমদা, মসিগী মরুমদা চহি লিশিং কয়াগী চৎনবী লৈরিবনি। শিংনবা অমসুং য়েৎনবা কয়া থেংনরক্লবা মতুংদা লোল অসি লৈরক্লিবনি। অদুনা ঐখোয়না লোল অমা খঙবা মতমদা, মদুগী চহি লিশিং কয়াগী পুৱারীসু খঙলক্কনি। অদুনা, ঐখোয়না করিমত্তা খঞ্জিল্লুদনা লোল তম্বা হৌবা য়াই। লৈবাক্কী মফম অমা হেক্তদা নুংগী নিংথিরবা নিংশিং খুভম লৈরম্বা মতমদা মীওইশিংনা মসিদি চহি ২০০০ শুরেনে হায়রকপসি ঐহাক থৱাই য়াম্না নুংঙাইতে। অদুবু, চহি ২০০০গী মমাংদা মসিগুম্বা নিংথিরবা খুভম শারম্বসিদা ঐখোয়না চাউথোকচবা ফাওদ্রনে? মদুদা, ঐখোয়গী অহল লমনশিংনা চহি ২০০০গী মমাংদা মসিগুম্বা খুভম শাবা ঙম্বমখৈ চাউখৎলম্মি হায়না খন্নদবা অসিদা ঐহাক নুংঙাইতবা ফাওই। ভারতকী খক নত্তনা, মালেমগী খ্বাইদগী লিবা লোল অসি ঐখোয়গী লৈবাক্তা লৈরিবনি। ঐখোয়না মকা ফন্না চাউথোকচনা হায়বা য়ারিবনি। ঐখোয়গী তমিল লোল অসিদি মালেমগী খ্বাইদগী অরিবা লোলনি হায়বা অদোম খঙবরা? মালেম পুম্বগী চাউরবা খুদোল অমা ঐখোয়গী লৈবাক্তা লৈরিবনি। অসুক য়াম্না শক্নাইবা পোৎলম অমা ঐখোয়গী লৈবাক্তা লৈ হায়না ঐখোয়না মালেমদা হায়দ্রিবা করিগীনো? ঐহাক্না মালেমদা তম্নিংবনা মরম ওইরগা ঐহাক্না য়ু.এন.ও.দা মমাংদা ৱা ঙাঙবদা তমিল লোলগী মতাংদা ৱাফম থমখিবনি। তমিল লোল অসি ঐখোয়গী লৈবাক্কীনি হায়না ঐহাক্তি চাউথোকচরিবনি। অদুগা অমুক্তা য়েংবীয়ু, অৱাং ভারত্তা দোসা য়াম্না চানৈ, সাম্ভরসু চানৈ, মদুদদি খা-অৱাং হায়বা অমত্তা লৈতে। খা ভারত্তসু পরাথা, পুরি সবজী অদুমক পাম্না চান্নরিবনি। তেন্সন প্রেসর অমত্তা লৈনদে। পুন্সিনা অসুম্না লাইনা চত্থবগুম, ঐখোয়গী ইমালোল ঙাংবা মতমদা, অতোপ্পা লোলগী ৱাহৈ পরেং অমনা মখা চত্থবগী সেত্তিং অমা লৈফম থোকই হায়না ঐনা খল্লি। অতোপ্পনা ঐখোয়গী ইমালোল ঙাংলকপদা তাবা য়াম্না নুংঙাইবনি, নক্নবা মরী অমা খুদক্তা শাগৎপনি। ঐহাক্না মতম কয়াগী মমাংদা খুন্নাইগী থবক তৌরিঙৈ মতমগী থৌদোক অমা ঙসিসু নিংশিংলি। অঙাংশিংসি লোল খঙবা য়াম্না থুবনি। অহমেদবাদতা শিন্মীগী ইমুং অমা লৈরম্মি। ঐসু মখোয়গী য়ুমদা চাক চাবা চৎপনি, ইমুংদুদা নুপীমচা অমা লৈরম্মি, লোল য়াম্না ঙাংই। শিন্মীশিংগী খুন্দা লৈবা, কোস্মোপোলিতান ওইবা, মমানা কেরলাদগী, মপানা বেঙ্গোলদগী, অকোয়বদা ঙাংনরিবা লোলনা হিন্দি, য়ুম্লোন্নবা ইমুংনা মরাথী, চৎলিবা স্কুলনা গুজরাতী। মহাক্তি লোল য়াম্না ঙাংই। চহি ৭-৮গী অঙাং নুপীমচাদুনা বেঙ্গোলী, মরাথী, মলায়ালম, হিন্দিসে নিংথিনা ঙাংবদুদা ঐহাক ঙকপনি। মহাক্না য়ুমদা ফম্লিবা মীওই ৫-৬কী মরক্তুদা অমদনা বেঙ্গোলী, অমদনা মরাথী, অমদনা মলায়ালমদা ৱারী শাবনি। মহাক্কী তেলেন্ত অদু অদুক্কী মতিক লৈরে, অদুনবু ঐহাক্না ঐখোয়গী হেরিতেজতা চাউথোকচবা ফাওসি হায়না হায়রিবনি, অদুগা ঐহাক্না হন্দক্কী মতাংদা লাল কিলাদগী ৱাশক মঙাগী মতাংদসু ৱাফম থমখ্রে। ঐখোয়না ইশাগী হেরিতেজতা চাউথোকচবা ফাওগদবনি, ঐখোয়গী ইপা-ইপুশিংনা ঐখোয়দা মসিগুম্বা লোল কয়া পীবিরম্মি। মসিদা হিন্দুস্তানী খুদিংনা চাউথোকচগদবনি। থাগৎচরি।

থৌরম লান্থোক্লিবা মীওই- ইকায় খুম্ননিংঙাই ওইরবা প্রধান মন্ত্রীজী, অদোমগী পাউতাক্কীদমক্তা থাগৎচরি।

থৌরম লান্থোক্লিবা মীওই- ইকায় খুম্ননিংঙাই ওইরবা প্রধান মন্ত্রীজী, পরিক্ষা পে চর্চা ২০২৩গী অরোইবা ৱাহং ওইনা ঐহাক্না লন্থোকচগদৌরিবা অসিদি ঐখোয়গী ইরক্তা লৈরিবা দিল্লীগী পেরেন্ত শ্রীমতি সুমন মিশ্রাদগীনি, মহাক্না অদোমগী মফমদগী মহাক্কী ৱাহংগী পাউখুম পাম্লি। মেম, চানবীদুনা অদোমগী ৱাহং হংবীরো।

সুমন মিশ্রা - ইকায় খুম্ননিংঙাই ওইরবা প্রধান মন্ত্রীজী, গুদ মোর্নিং, ঐহাক ইশামক সুমন মিশ্রা। সর, স্কুলগী মহৈরোই অমনা সোসাইতীদা করম্না চৎকনি হায়বগী মতাংদা অদোমগী পাউতাক পামজৈ। সরবু থাগৎচরি।

থৌরম লান্থোক্লিবা মীওই- মেম্বু থাগৎচরি, ইকায় খুম্ননিংঙাই ওইরবা প্রধান মন্ত্রীজী।

প্রধান মন্ত্রী- মহৈরৈশিংনা খুন্নাইদা করম্বা লিচৎ চৎকনি, মসি অদোমগী ৱাহংনিকো? মসিদি তোঙানবা মওং অমদা থম্বনা ফগনি হায়না ঐনা খল্লি। ঐখোয়না মতাংসিদা করম্বা সোসাইতীগী ৱারী শারইবনো? ঐখোয়না তোয়না উন্নবা মীওইশিং, অৱা-নুংঙাই মতম লেনমিন্নবা, ফোন্দা পুং কয়া ৱারী শাবা অদুরা? মদুগী লিমিতেদ ভর্চুএলগী মতাংদা ওইরগদি, অদোম্না অঙাংশিংদা অদুম হায়রিবদুনি, মদুগী ফিরোল শেৎলু, মফমসিদা খোঙউপ লৌথোকউ, মফমসিদা নিংথিবা লিচৎ চৎলু, মফমসিদা অদু তৌ হায়রিবদুনি। মসি অদোম্না হায়বা য়াগনি। অদুবু তসেংবদি, মখোয়বু য়ুম অমগী মনুংদা অকক্ননা থমগদৌবা নত্তে, মখোয়বু খুন্নাইদা য়ারিবমখৈ পুথোক্কদবনি, খুন্নাইগী মরমদা খঙহনগদবনি। ঐহাক্না মমাংদসু হায়খ্রবনি, পরিক্ষা পে চর্চাদা হায়খিবা ওইরমগনি, ঐ নিংশিংদরে। ঐনা হায়খিবনি, অঙাংশিংগী ক্লাস ১০ অমসুং ১২ পরিক্ষা মতুংদা মখোয়দা শেল অদুক পীরগে, রাজ্য মনুংদা কোইনিংবা লম ৫ কোইরুরগা য়ুমদা অমুক হল্লকউ, ফোতো নম্লগা মদুগী মতাংদা কুপ্না ইশিল্লগা লাকউ হায়বীয়ু হায়খিবনি। মখোয়দা থৌনা হাপ্তুনা থাদোকপীয়ু। অঙাংশিংনা মদুদগী ৱাফম কয়া অমা তম্লগা লাক্কনি, অমুক্তা য়েংবীয়ু। পুন্সি করিনো খঙবদগী মশাদা থাজবা য়াম্না লাক্কনি। অদুদগীদি মখোয়না অদোমগী মফমদা লাউখোংবা তৌররোই, অদুগা ক্লাস ১২কী মহৈরোই ওইরবদি, রাজ্যগী মপান্দা থাদোকপীয়ু। শেল মসিখক পীরবনি, ত্রেন্দা চৎকদবনি, রিজর্বেসন য়াওদনা চৎকদবনি হায়না থাদোকপীয়ু। অকক্নবা পোৎলম অমসুং চানবা পীবিরো, অদুগা লম কয়া য়েংলগা হল্লকউ, হল্লকপগা ৱারী অমুক লিনবা হায়বীয়ু। খুন্নাইগী তোঙানবা মফমশিংদা চত্তুনা য়েংনবা ইথিল পীবিয়ু। ঐখোয়না অশিংশিংবু মতম পুম্বদা ত্রাইএল লৌগদবনি। মখোয়গী স্কুলদা কবদ্দীদা মায় পাকপা অঙাংদুদগী মখোয়না করি তম্বা ফংই, সাইন্স ফেয়রদা নিংথিনা পাংথোকপা অঙাংদুগা উন্নরুরবরা। অসুম্না হংগদবনি। মশানা মশাবু খঙজবগী খুদোংচাবা পীগদবনি। মসি তৌগদবনি, মসি তৌরোইদবনি হায়বগী অকক্নবগী মনুংদা মখোয়বু চানবীদুনা কৈদৌনুংদা থম্বীগনু। তেলঙ্গাদা য়ুনিফোর্ম শেৎহল্লগা করি কান্নগনি? মদুগী লোজিক করিনো? অঙাংশিং মশানা মশাবু খঙহন্নবা হোৎনগদবনি। মখোয়বু অনৌ-অনৌবা মাইকৈদা পুবীগদবনি, মীওই উন্নহনগদবনি, ঐখোয়গসু নোংমা ফাদোক চৎমিন্নগদবনি। ঐখোয়গী ছুতিগী মতমদা মামাগী য়ুমদা চৎকনি, মফম অদুদা চৎকনি হায়বগী চৎনবী করিগী লৈরম্লিবনো? মসিগী তোঙানবা নুংঙাইবা অমা লৈ, মসিগী তোঙানবা সংস্কার অমা লৈ। পুন্সিগী মচল অমা হেনগৎলি। ঐখোয়গী অপাম্বদা অঙাংশিংবু পুন্সিন্দুনা থমগদৌবা নত্তে। ঐখোয়না মখোয়গী মিৎয়েংবু হেন্না পাকথোক চাউথোকহনগদবনি। হোই, ঐখোয়না য়েংশিনবগী মথৌসু তাই। মহাক্না ফত্তবা হৈনবীদা চৎখিদনবা ঐখোয়না য়েংশিনফমদি থোকই। কাদা ফুম্বংননা লৈহল্লোইদবনি। থৱাই নুংঙাইতনা খক লৈহল্লোইদবনি। হান্নদি চামিন থকমিন্নবদা য়াম্না নোক-খেরম্বনি, হৌজিক্কান্দি তৌদ্রে, কৈদৌরে? মসি য়েংশিনগদবনি। মমা-মপাদি শুপ্নগী ইথিল অমসুং মৈরী চুগদবনি। অঙাং অসিদি ঈশ্বরগী খুদোলনি। মখোয়দা ঐখোয়না থাজবা থমগদবনি। মদুগী থাজবা অদু মখোয়না ঙাকহনগদবনি। মসিগী ৱাখল্লোন চেল্লবদি অফবা মহৈসু মথন্নতা লৈরক্কনি। অদুবু, মহাক্তি ঐগী ইচানি, ঐনা হায়বা তৌগদবনি। ঐদি অদু তৌরকই, অদুনা মহাকসু মদুম্না তৌগদবনি হায়বগী ৱাখল্লোন লৈরক্লবদি অশোইবা অমুক লৈরক্কনি। মরম অদুনা, ঐখোয়না ওপন মাইন্দেদ ওইদুনা, মখোয়বু খুন্নাইগী মরমদা খঙহনফম থোকই। মখোয়বু পুন্সিগী তোঙানবা হীরম কয়াগা মরী লৈনহন্নবা ঐখোয়না ইথিল পীফম থোকই। অদোমগী অঙাংশিংগী ৱাখল্লোন পাক চাউহন্নবা হোৎনবীয়ু, মখয়বু অকক্নবা মরীদা পুন্সিন্দুনা থম্বীগনু। ঈশ্বরনা মখোয়দা নিংতমজৌ হায়বগী অয়াবা পীরিবনি, নিংতমহল্লু, ৱাখল চাউহল্লু, মহাক্না খুন্নাইদা শাফু পীবা ঙম্বা মীওই ওইরক্কনি। অদোম্বু থাগৎচরি।

থৌরম লান্থোক্লিবা মীওই- ইকায় খুম্ননিংঙাই ওইরবা প্রধান মন্ত্রীজীবু অদোমগী ইথিল পীবা ৱারোল কয়াগীদমক্তা থাগৎচরি। একজাম ৱারিয়র কয়াগী অৱাবা কয়া অদোম্না কোকহনবীরে, পরিক্ষা হায়বসি লুনা খঞ্জিনগদবা নত্তে, হরাও নুংঙাইবা ফোংদোকপগী মরম অমনি হায়না অদোম্না মখোয়দা খলহনবীরে। মসগা লোয়ননা, ঐখোয়গী থৌরম অসি লোইশিল্লক্লে। নিংশিংনিংঙাই ওইরবা ৱারোল কয়ানা ঐখোয়গী থম্মোইনুংদা লৈহৌরগনি। ঐখোয়না প্রধান মন্ত্রীজীবু ঙসিগী হোল অসিদা লেংশিনবীরক্তুনা ইথিল কয়া পীবিবগীদমক্তা থাগৎচরি।

প্রধান মন্ত্রী- অদোম পুম্নমকপু ঐহাক্না থাগৎচরি অমসুং পরিক্ষাগী পোৎলুম হেনগৎলক্লে, ইনভাইরনমেন্ত অমা লৈরে হায়বগী ৱাখল্লোনশিং য়ারিবমখৈ লৈহন্দনবা হোৎনসি হায়না ঐহাক্না মহৈরোই, মমা-মপা অমসুং ওজাশিংগী মফমদা হায়জনিংই। পুন্সি নুংঙাইনা হিংবগী মতৌ অমা ঐখোয়না শেমগদবনি। পুন্সি অসি লাইহনগদবনি। হরাও নুংঙাইনা লৈবা মতমদা পরিক্ষাগী পোৎলুমসু হন্থগনি। ঐখোয় পুম্নমক নুংঙাইনা লৈসি, মসি ঐহাক্কে য়াইফ পাউজেলনি। থাগৎচরি।

*********