জি-২০ মীফম নাকলদা অহানবা ওইনা ভারতনা য়ুথ-২০ মীফম য়ুম্বু ওইবগা লোয়ন্না,ফেব্রুৱারি ৬দগী ফেব্রুৱারি ৮ ফাওবদা গুৱাহাতিদা য়ুথ-২০ গ্রুপকী অহানবা মীফম পাংথোক্লগনি। ওগস্ত ২০২৩ ফাওবা য়ুথ-২০ মীফমগী ফাইনেল ফাওবা ভারতকী তোঙান-তোঙানবা মফমশিংদা থিম মঙাদা পাংথোক্কদবা মীফমশিংগী মনুংদা মসিনা অহানবনি। নুমিৎ ৩ চুপ্না অসামদা পাংথোক্কদৌরিবা থৌরম অসিদা মালেমগী মফম কয়াদগী দেলিগেদ ২৫০ হেন্না শরুক য়ারবা য়ারি। মীফম অসিদা থিম মঙা হায়বদি তুংদা ওইরক্কবা থবক শুবগী মওং; অইং-অশাগী খল হোংলকপা অমসুং অমাং-অতা থোকপা হন্থহনবা; শান্তি পুরকপা অমসুং ৱাখল তামিন্নবা; গনতন্ত্র অমসুং হকশেলদা নহারোল অমসুং নুংঙাই-য়াইফবা অমসুং শান্ন-খোৎনবা হায়বসিদা খন্নগনি।

য়ুথ-২০ অসি জি-২০গী মখাদা লৈগদবা ওফিসিএল ওইবা গ্রুপ মঙাগী মনুংদা অমনি। জি-২০গী প্রসিদেন্দ ওইরিবা লৈবাক অদুনা য়ুথ সম্মিৎ পাংথোকপগী থৌদাং লৌগনি অমসুং নহারোলশিংগী অনিংবশিং খঙদোক্নবা অমসুং মখোয় মশাগী থৌশিলশিংগী মশাগী ওইবা পাউতাকশিং মখোয়দগী লৌনবা ফোরম অসি পাংথোক্কদবা চয়োল খরগী মমাঙদা পাংথোকই। মসি জি-২০ সরকারশিং অমসুং মখোয়গী লৈবাক্কী নহারোলশিংগা শম্ননবা থৌরাং অমনি। ২০২৩দা পাংথোক্কদৌরিবা য়ুথ ২০ ইন্দিয়া সম্মিৎ অসিন ভারতকী নহারোলশিংগী মরুওইবা থবকশিং উৎথোক্কনি অমসুং মালেমগী মীয়ামদা লৈবাক অসিগী নহারোলশিংগী মগুনশিং অমসুং থৌশিলশিং উৎনবা খুদোংচাবা অমা ফংলগনি।

য়ুথ-২০ মীফম পাংথোক্ত্রি ফাওবা, জনুৱারি ১৯দগী হৌদুনা অসামগী তোঙান-তোঙানবা জিলা ৩৪গী কোলেজ অমসুং য়ুনিভর্সিতি ৫০ সেমিনারশিং, ৱার্কশোপশিং, দিবেতশিং অমসুং খন্ন-নৈনবা পাংথোক্কনি। হায়রিবা থৌরমশিং অদুদা মহৈরোয় ১২০০০ রোম শরুক য়াগনি হায়রি। জি-২০ গ্রুপশিং অমসুং মসিগী মথৌশিং খঙহন্নবা অৱাংবা থাক্কী মহৈলোয়শঙ অমনা মখোয়গী অনকপদা লৈবা স্কুল ১০ রোমদা এৱারনেস প্রোগ্রামশিং পাংথোক্কনি।

ফেব্রুৱারি ৭,২০২৩দা আই.আই.তি গুৱাহাতিদা পাংথোক্কদবা মরুওইবা থৌরমদা কোলেজ/য়ুনিভর্সিতিশিংদগী মহৈরোয় ৪০০ রোম্না মনা ফংগদবা চাংদম্নবশিং শরুক য়াগনি। মখোয়না মালেমগী লৈবাক কয়াদগী লাকপা নহারোল দেলিগেদশিংগা ৱারি শানবগী খুদোংচাবা অমা ফংগনি।

*****