প্রধানমন্ত্রীগী লোইশঙ
প্রধান মন্ত্রীনা শ্রী স্বামিনারায়ন গুরুকুল রাজকোৎ সন্সথানগী ৭৫৫শুবা অমৃৎ মহোৎসব থৌরমদা ভিদিও কন্ফরেন্সিংগী খুত্থাঙদা ৱা ঙাঙখ্রে
“গুরুকুলনা মহৈরোয়শিংগী পুক্নিং অমদি থম্মোয়বু অফবা ৱাখল্লোন অমদি ভেল্যুগা লোয়ননা মখোয়না হীরম খুদিংদা চাওখৎপা পুরক্নবগীদমক শেমগৎলি”
“অচুম্বা লৌশিং শন্দোকপনা মালেম অসিদা খ্বাইদগী মরুওইবা থবক্নি। হায়রিবা প্রোজেক্ত অসিদা ভারতনা কত্থোকপগা লোয়ননা চঙশিল্লি”
“স্পিরিচুএলিতীগী লমদা মপুক্নিং লুপ্লিবা মহৈরোয়শিংদগী হৌরগা ইস্রো অমদি বি.এ.আর.সি.দা লৈরিবা সাইন্তিস্তশিং ফাওবদা, গুরুকুলগী চৎনবীনা লৈবাকসিগী হীরম খুদিংদা মখোঙ শোম্বিরি”
“পুথোকপা অমদি থিজিন হুমজিনবনা ভারতকী পুন্সি মহিংগী থাদোক্নবা য়াদ্রবা শরুক ওইদুনা লাক্লি”
“ঐখোয়গী গুরুকুলশিংনা মীওইবা খুন্নাইবু সাইন্স, স্পিরিচুএলিতী অমদি নুপা নুপা থোং মান্নবগী লমদা লমজিংদুনা লাকখি”
“লৈবাকসিদা মহৈ মশিংগী ইনফ্রাস্ত্রকচর পাকথোক চাউথোকহন্নবা হান্না তৌরমদবা থাক্তা থবক পায়খৎলি”
Posted On:
24 DEC 2022 12:11PM by PIB Imphal
প্রধান মন্ত্রী, শ্রী নরেন্দ্র মোদীনা ঙসি শ্রী স্মামিনারায়ন গুরুকুল রাজকোৎ সন্সথানগী ৭৫শুবা অম্রুৎ মহোৎসব থৌরমদা ভিদিও কন্ফরেন্সিংগী খুত্থাঙদা ৱা ঙাঙখ্রে।
তিল্লিবশিংদুগী মফমদা ৱা ঙাঙলদুনা, প্রধান মন্ত্রীনা শ্রী স্মামিনারায়ন গুরুকুল রাজকোৎ সন্সথান্না চহি ৭৫ মপুং ফারকপদা মসিগা লোয়ননা চৎলিবা মীপুম খুদিংমক্কী মফমদা নুংঙাইবা ফোঙদোকখি অমদি খোঙচৎ অসিদা শাস্ত্রিজী মহারাজ শ্রী ধর্মজিবন্দাসজী স্বামীনা পায়খৎলিবা থবক থৌরাংশিংগীদমক থাগৎখি। ভগবান শ্রী স্বামী নারায়নগী মমিং নীংশিংজবখক্তদা মীওই অমনা অনৌবা ৱাখল্লোন কয়া ফংবা ঙমগনি হায়বা ৱাফম প্রধান মন্ত্রীনা ফোঙদোকখি।
প্রধান মন্ত্রীনা য়াইফরবা থৌরম অসি অমৃৎ কালগী মতমদা থোক্লিবসিদা লৈরিবা তাঞ্জা চানবা ৱাফম থমখি। পুৱারীগী লমায় থুংনা অসিগুম্বা তাঞ্জা চানবা কয়ানা মতিং হাপ্লিবা ভারতকী চৎনবীনি হায়রদুনা থৌরম অসিদু নুংঙাইরবা থৌরম অমনি হায়না প্রধান মন্ত্রীনা হায়খি। প্রধান মন্ত্রীনা থৌদাং অমদি শুবা নোম্বা কনবা, নাৎ অমদি কত্থোকপা, স্পিরিচুএলিতী অমদি মোদর্নিতী হায়রিবা পুৱারীগী ইতিনফমশিং নীংশিংখি। প্রধান মন্ত্রীনা লৈবাকসিনা নীংতম্লবা মতুংদা মহৈ মশিং অমদি ভারতকী অরিবা মহৈ মশিংগী মওং মতৌবু হিঙ্গৎহন্নবা থৌদাংবু মীরায়দুনা থম্বিরম্বগীদমক নুংঙাইতবা ফোঙদোকখি। মমাঙগী লৈঙাকশিংনা শোয়রম্বা হীরমশিংদা লৈবাকসিগী লম্বোইবা অমদি অচার্য়শিংনা অৱাৎপশিং অদুবু মেনখৎপিরম্মী হায়না প্রধান মন্ত্রীনা হায়খি। “স্বামিনারায়ন গুরুকুল অসি হায়রিবা ‘সুয়োগ’ অসিগী অচঙবা খুদম অমনি”, হায়না প্রধান মন্ত্রীনা হায়খি। ইনস্তিত্যুসন অসি নীংতম ঈহৌগী ৱাখল্লোন্দা য়ুম্ফম ওইদুনা শেমগৎলম্বনি হায়না মহাক্না মখা তাখি।
“অচুম্বা লৌশিং শন্দোকপা হায়বসি খ্বাইদগী মরুওইবা থবক্নি, অমদি মসিদা ভারতকী খুন্থোক্লোনগী মরা তাখ্রবা মালেম অসিদা ৱাখল লৌশিং অমদি মহৈ মশিংগী লমদা ভারতনা কত্থোক্তুনা লাক্লি”, হায়না প্রধান মন্ত্রীনা ফোঙদোকখি। গুরুকুল বিদ্যা প্রতিস্থানম রাজকোত্তা শুপ্নতগী মহৈরোয় তরেৎখক্তগা লোয়ননা হৌদোরকখ্রবসু, ঙসিদি মালেম শিনবা থুংনা মশা নিফু লৈদুনা মালেম পুম্বদগী মহৈরোয় লিশিং কয়াগী পুক্নিং চিংশিল্লি। হৌখিবা চহি ৭৫সিদা, মহৈরোয়শিংবু মপুং ফানা শেমগৎনবগীদমক গুরুকুলনা মখোয়গী পুক্নিং অমদি থম্মোয়বু অফবা ৱাখল্লোন অমদি ভেল্যুগা লোয়ননা শেমগৎলি হায়না মহাক্না মখা তাখি। “স্পিরিচুএলিতীগী লমদা মপুক্নিং লুপশিল্লিবা মহৈরোয়শিংদগী হৌরগা ইস্রো অমদি বি.এ.আর.সি.দা লৈরিবা সাইন্তিস্তশিং ফাওবদা, গুরুকুলগী চৎনবীনা লৈবাক অসিগী হীরম খুদিংদা মখোঙ শোম্বিরি”, হায়না মহাক্না হায়খি। প্রধান মন্ত্রীনা লায়রবা ইমুংগী মহৈরোয়শিংদা মহৈ মশিং তম্বা লায়হন্নবগীদমক শুপ্নতগী লুপা অমখক্কী ফী লৌরিবা গুরুকুলগী থৌওংবুসু পনখি।
ৱাখল লৌশিংবু পুন্সিগী খ্বাইদগী ৱাংবা পান্দম ওইনা লৌরিবা ভারতকী চৎনবীবু পল্লদুনা, প্রধান মন্ত্রীনা মালেমগী অতৈ মফমশিং মখোয়দা লৈবাক ঙাক্লিবা শাগৈশিংগীদমক খঙনবা মতমদা, ভারতকী শক্তমদি মহাক্কী গুরুকলুশিংগা লোয়নদুনা চৎখি হায়না হায়খি। “ঐখোয়গী গুরুকুলশিংনা থোং মান্নবা, খেন্নবা লৈতবা, মিনুংসি অমদি থৌগলগী ৱাখল্লোনশিংবু চহিচা কয়া মশক তাক্তুনা লাক্লি”, হায়না মহাক্না মখা তাখি। মহাক্না নলন্দা অমদি তক্সিলাবু ভারতকী অরিবা মীংচৎকা পাঙ্খক ওইনা নীংশিংখি। “পুথোকপা অমদি থিজিন হুমজিনবা হায়বসি ভারতকী পুন্সি মহিংগী থাদোক্নবা য়াদ্রবা শরুক ওইদুনা লাক্লি। ইশানা পুথোকচবদগী লাইগী মশক ওইবা ফাওবা, অয়ুর্বেদতগী স্পিরিচুএলিতী ফাওবা, সোসিএল সাইন্সতগী সোলার সাইন্স ফাওবা, অঙ্কদগী মেতেলর্জী ফাওবদা অমদি জিরোদগী ইন্ফিনিতী ফাওবদা, হীরম খুদিংদা থিজিন হুমজিনবা অমদি অনৌবা ৱাখৈ কয়া য়েক্লমখি। অমম্বা চক মতমদা ভারতনা মীওইবা খুন্নাইবা মঙাল মশেক পীদুনা মতমসিগী সাইন্সকী মায়কৈদা মালেমগী লম্বী য়াৎখি”, হায়না মহাক্না মখা তাখি। প্রধান মন্ত্রীনা ভারতকী অরিবা গুরুকুল সিস্তেমদা য়াওরিবা নুপা নুপী থোং মান্নবা অমদি মসিগী মরমদা লৈরম্লিবা ৱাখল্লোনশিংসু পনখি অমদি স্বামিনারায়ন গুরুকুলবু ‘কন্যা গুরুকুল’ হৌদোক্লম্বগীদমক থাগৎখি।
প্রধান মন্ত্রীনা ভারতকী তরং তরংবা তুংলমচৎ শেম্বদা মহৈ মশিংগী সিস্তেম অমদি মহৈ মশিংগী ইনস্তিত্যুসনশিংনা লৌগদবা শক্লোনশিংগী মতাঙদা মরুওইবা ৱাফম কয়া থমখি অমদি অজাদী কা অমৃৎ কাল অসিদা থাক খুদিংদা লৈবাকসিদা মহৈ মশিংগী ইনফ্রাস্ত্রকচর ফগৎহন্নবা অমদি খুজিল থৌরাং য়াৎনবগীদমক লৈবাকসিদা খোঙজেল য়াঙনা চৎলি হায়খি। লৈবাকসিদা আই.আই.তি., আই.আই.আই.তি., আই.আই.এম. অমদি এইমস মশিং হেনগৎলকপা উরি অমদি ২০১৪গী মমাঙদা চাংদম্নবদা হৌজিক লৈবাকসিদা মেদিকেল কলেজ মশিং চাদা হুম্ফুমঙাগী চাংদা হেনগৎলে হায়না প্রধান মন্ত্রীনা পাউদমখি। অনৌবা এজুকেসন পোলিসীগা লোয়ননা লৈবাক অসিনা তুংলমচৎকা চুনবা মহৈ মশিংগী সিস্তেম অমা লৈবাকসিনা শেম্লি হায়না মহাক্না মখা তাখি। মসিগী মহৈনা, অনৌবা সিস্তেম অসিদা মহৈ মশিং তম্বা ফংগদৌরিবা অনৌবা মীরোলনা লৈবাকসিগী ফিদম্নিংঙাই ওইরবা মীওইশিং ওইরক্কনি।
প্রধান মন্ত্রীনা লাক্কদৌরিবা চহি ২৫গী খোঙচৎসিদা লম্বোইবশিংগী মরুওইবা ৱাফম কয়া থমখি। “ঙসি ভারতকী পান্দমশিং অনৌবনি অদুগা মখোয়বু ফংনবা তাল্লিবা থৌরাংসু অনৌবনি। ঙসি লৈবাকসিনা দিজিতেল ইন্দিয়া, আত্মনিরভর ভারত, ভোকেল ফোর লোকেল, দিস্ত্রিক্ত খুদিংদা অমৃৎ সরোবর ৭৫ অমদি এক ভারত শ্রেস্থ ভারতকী মঙলান অমদা খোঙ থাংজিল্লি। হায়রিবা খউন্নাইদা অওনবা অমদি অহোংবা পুরক্নবগী প্রোজেক্তশিং অসিদা সবকা প্রয়াস (পুম্নমক্না হোৎনমিন্নবা)না মীওই করোর কয়াগী পুন্সিদা ইথিল পীগদৌরিবনি”, হায়না মহাক্না হায়খি। প্রধান মন্ত্রীনা গুরুকুলগী মহৈরোয়শিংদা অৱাং নোংপোক ভারত্তা য়ামদ্রবদা নুমিৎ ১৫নিদি চত্তুনা মফমদুগী মীয়ামগী তোৎন-তিন্নদুনা লৈবাকসিবু হেন্না মপাঙ্গল কনখৎহন্নবা ৱাফম থমখি। মহাক্না বেতি বচাও অমদি অকোয়বগী ফীভম ঙাক শেনবগী মরমদা ৱাফম কয়াসু ফোঙদোকখি অমদি মীয়ামদা এক ভারত শ্রেস্থ ভারতপু হেন্না মপাঙ্গল হাপ্নবা ৱাফম থমখি। “স্বামিনারায়ন গুরুকুল বিদ্যা প্রতিস্থনমগুম্বা ইনস্তিত্যুসনশিংনা হায়রিবা ভারতকী পান্দমশিং অসি ফংনবগী খোঙচত্তা মতিং মখা তানা হাপ্লকখিগনি হায়না ঐনা থাজৈ”, হায়বা ৱাফমগা লোয়ননা প্রধান মন্ত্রীগী ৱারোল লোইশিনখি।
বেকগ্রাউন্দ
শ্রী স্বামিনারায়ন গুরুকুল রাজকোৎ সন্সথান রাজকোত্তা ১৯৪৮দা গুরুদেব শাস্ত্রিজী মহারাজ শ্রী ধর্মজিবন্দাসজী স্বামীনা লিংখৎলম্বনি। সন্সথান অসি চাউথোরক্তুনা মালেম পুম্বদা মশা ৪০ হেন্না লৈদুনা, স্কুল, অন্দরগ্রেজুএৎ অমদি পোস্তগ্রেজুএৎকী মহৈ মশিং তম্বগী খুদোংচাবা মহৈরোয় ২৫,০০০ হেনবদা ফংহল্লি।
*****
(Release ID: 1886299)
Visitor Counter : 126
Read this release in:
Kannada
,
English
,
Urdu
,
Hindi
,
Marathi
,
Assamese
,
Bengali
,
Punjabi
,
Gujarati
,
Odia
,
Tamil
,
Telugu
,
Malayalam