প্রধানমন্ত্রীগী লোইশঙ
ভারতনা জি-২০গী প্রসিদেন্ত ওইগদৌরিবা অসিগী মতাংদা খন্ননবা প্রধান মন্ত্রীনা লুচিংদুনা রাজ্যপালশিং, চীফ মিনিস্তরশিং অমসুং এল.জিশিংগা ভিদিওগী খুৎথাংদা মীফম পাংথোকখ্রে
Posted On:
09 DEC 2022 8:48PM by PIB Imphal
ভারতনা জি-২০গী প্রসিদেন্ত ওইগদৌরিবা অসিগী মতাংদা খন্ননবা প্রধান মন্ত্রী শ্রী নরেন্দ্র মোদীনা লুচিংদুনা রাজ্যশিংগী রাজ্যপালশিং অমসুং চীফ মিনিস্তরশিং অমসুং য়ু.তিশিংগী এল.জিশিংগা লোয়ন্না ভিদিওগী খুৎথাংদা মীফম অমা ঙসি পাংথোকখ্রে।
মীফম অদুদা প্রধান মন্ত্রীনা হায়খি ভারতনা জি-২০গী প্রসিদেন্ত ওইগদৌরিবা অসি লৈবাক পুম্নমক্কীনি অমসুং লৈবাক অসিগী শক্তিশিং উৎথোক্নবা য়াম্না তাংনা ফংবা খুদোংচাবা অমনি। জি-২০গী তোঙান-তোঙানবা থৌরমশিং পাংথোক্নবা পুন্না থবক তৌমিন্নবা য়াম্না মরুওই অমসুং রাজ্যশিং/য়ু.তিশিংদগী মতেং নিজরি। জি-২০গী প্রসিদেন্ত ওইবা অসিনা অচৌবা মেত্রোশিং উৎপগী মথক্তা ভারতকী তোঙান-তোঙানবা মফমশিং উৎথোকপদা মতেং পাংগনি অমসুং মসিনা ঐখোয়গী লৈবাক্কী শরুক অমমমগী তোপ-তোপ্পা শক্তমশিং উৎথোকপা ঙমগনি।
ভারতনা জি-২০গী প্রসিদেন্ত ওইরিঙৈ মনুংদা ভারত্তা লাকদবা মশিং য়াম্লবা মীওইশিং অমসুং তোঙান-তোঙানবা থৌরমশিংদা মালেমগী মেদিয়ানা মীৎয়েং চঙগদবা অদুগী মতাংদা প্রধান মন্ত্রীনা হায়খি রাজ্যশিং অমসুং য়ু.তিশিংনা মখোয় মশামক ললোন-ইতিক, শেন থাদবা অমসুং তুরিজমগী মফমশিং ওইনা পুক্নিং চিংশিন্নবা নৌনা মশক তাক্না মসিগী খুদোংচাবা অসি শীজিন্নগদবনি। সরকার অমসুং খুন্নাইনা শরুক য়াদুনা জি-২০গী থৌরমশিংদা মীয়াম শরুক য়াহনবা মথৌ তাই।
মীফম মনুংদা রাজ্যপালশিং, চীফ মিনিস্তরশিং অমসুং এল.জিশিংনা মখোয়গী অনিংবা ৱাখল্লোনশিং ফোঙদোকখি অমসুং জি-২০গী মীফমশিং য়ুম্বু ওইনবা রাজ্যশিংনা থৌরাং তৌরিবশিংগী মতাংদা পাউদমখি।
মীফম অদুদা এক্সতর্নেল এফেয়ার্স মিনিস্তরশু ৱা ঙাংখি অমসুং ভারতকী জি-২০ সের্পাগী মতাংদা প্রসেন্তেসন অমা থমখি।
*****
(Release ID: 1882272)
Visitor Counter : 146
Read this release in:
English
,
Urdu
,
Hindi
,
Marathi
,
Bengali
,
Assamese
,
Punjabi
,
Gujarati
,
Odia
,
Tamil
,
Telugu
,
Kannada
,
Malayalam