তুরিজম মন্ত্রালয়

প্রধান মন্ত্রী শ্রী নরেন্দ্র মোদীনা মন কী বাতকী খ্বাইদগী নৌবা তাঙ্কক্তা ভারতকী ঈশৈ নোংমাইনা পুম্নমকপু অমত্তা ওইহনবদা মরু ওইবা থৌদাং লৌবদা মিৎয়েং চঙখি


ঐখোয়গী চৎনবী অমসুং নাৎকী লৌশিং কয়াবু ঙাক-শেন্দুনা হেন্না খুমাং চাউশিলহনবা অমসুং য়ারিবমখৈ চাউখৎহনবা হায়বসি ঐখোয়গী থৌদাংনিঃ শ্রী নরেন্দ্র মোদী

Posted On: 29 NOV 2022 1:39PM by PIB Imphal

প্রধান মন্ত্রী শ্রী নরেন্দ্র মোদীনা নবেম্বর ২৭, ২০২২দা শন্দোকখিবা ‘মন কী বাত’কী ৯৫শুবা তাঙ্কক্তা ৱা ঙাঙবদা ঐখোয়গী লৈবাক অসিদি মালেমগী খ্বাইদগী লিরবা চৎনবীশিংগী ময়ুম্নি হায়খি। মরম অদুনা, ঐখোয়গী চৎনবী অমসুং নাৎকী লৌশিং কয়াবু ঙাক-শেন্দুনা হেন্না খুমাং চাউশিলহনবা অমসুং য়ারিবমখৈ চাউখৎহনবা হায়বসি ঐখোয়গী থৌদাংনি। প্রধান মন্ত্রীনা ভারতকী ঈশৈ নোংমাইনা ঐখোয়গী লৈবাক মনুংদা খক নত্তনা মীরম লৈবাকশিংগী মীয়ামগা ঐখোয়না নক্নহল্লিবসিগী মতাংদা পাউদমখি। ঈশৈ নোংমাইনা ঐখোয়গী হকচাংবু পোত্থাহনবতা নত্তনা, ঐখোয়গী পুক্নিংবুসু লৈতাহল্লি। ঈশৈ নোংমাইনা ঐখোয়গী খুন্নাইবু অমত্তা ওইহন্নবা শম্নরি হায়না মহাক্না মখা তাখি। নাগা খুন্নাইনা মখোয়গী নিংথিরবা কলচরেল হেরিতেজ য়োকখৎনবা হোৎনরিবশিংগী খুদমসু প্রধান মন্ত্রীনা থমখি।

প্রধান মন্ত্রীনা মন কী বাত মনুংদা, মহাত্মা গান্ধীজীগী ১৫০শুবা মপোক কুমওন মনুংদা মহাক্কী খ্বাইদগী পামজবা ঈশৈ শকখিবা গ্রীসকী শৈশকপা কোন্সতান্তিনোস কলাইতজিসকী ৱাফমসু পাউদমখি। মহাক্না ভারতপু কয়াম্না পামজবগে হায়বদা মহাক্না মমাংগী চহি ৪২দগী ভারত্তা চহিদা অনিরক লাকই হায়না প্রধান মন্ত্রীনা মখা তাখি। মহাক্না ভারতকী ঈশৈ-নোংমাইগী হৌরকফম, তোঙান-তোঙানবা ভারতকী ম্যুজিকেল সীস্তেম, রাগা, তাল অমসুং রাসা মখল কয়াগা লোয়ননা ঘরানা কয়াসু কুপ্না নৈনরবনি। মহাক্না ভারতকী ঈশৈ নোংমাইগী মশক নাইবা মীওই কয়াগী মতাংদা নৈনরে, মহাক্না ভারতকী জগোইশিংগী তোঙানবা ৱাফম কয়াসু খঙলবনি। মহাক্না খঙলিবা লৌশিং অমসুং এক্সপেরিএন্স পুম্নমকপু হৌজক্তি মহাক্না লাইরিক অমদা য়াম্না ফজনা ইথোক্লে। ইন্দিয়ন ম্যুজিক হায়না মিংথোনবা লাইরিক অসিদা ফোতো ৭৬০ য়াওই। ফোতো অয়াম্বসি মহাক মশানা নম্বা ঙাক্তনি। অতোপ্পা লৈবাক্না ঐখোয়গী ভারতকী চৎনবীবু অসুক য়াম্না পামজবগী মতৌসি তসেংনা নুংঙাইবা মতৌনি।

মমাংগী চহি ৮ অসিদা, ভারতকী ম্যুজিকেল ইন্সত্রুমেন্ত এক্সপোর্ত তৌবগী চাংনা হান্নদগী শরুক অহুম মখায়গী চাংদা হেনগৎখিবগী নুংঙাইবা ৱাফম প্রধান মন্ত্রীনা ফোংদোকখি। ইলেক্ত্রিক ম্যুজিক ইক্বিপমেন্ত মতাংদা হায়রগদি, মখোয়না শরুক ৬০ হেনগৎখি। ভারতকী কলচর অমসুং ম্যুজিকপু মালেম পুম্বনা কয়া য়াম্না পাম্নরবগে হায়বা মসিনা তাক্লি। ভারতকী ম্যুজিকেল ইন্সত্রুমেন্তপু খ্বাইদগী য়াম্না লৈরিবা লৈবাকশিংদি য়ু.এস.এ., জর্মনী, ফ্রান্স, জাপান অমসুং য়ু.কে.গুম্বা চাউখৎপা লৈবাকশিংনি। ঐখোয়গী লৈবাক্না ম্যুজিক, দান্স অমসুং আর্তকী ইনাক খুল্লবা হেরিতেজ লৈবসি ঐখোয়গী লৈবাক্কী লাইবক ফবনি।

ঐখোয়না অথোইবা কবি মুনি ভারতীহরিবু মহাক্কী ‘নিতি শতক’কীদমক্তা নিংথিনা খঙনরি। মহাক্কী ভর্স অমদা মহাক্না মীওই অমনা আর্ত, ম্যুজিক অমসুং লিতরেচরদা থৱাই য়াওবগী মতৌনা মীওইবা খুন্নাইগী তসেংবা শক্তাক্নি হায়না ইরমখি হায়বা ঐখোয় খুদিংনা খঙলম্লগনি হায়না প্রধান মন্ত্রীনা হায়খি। তসেংবদি, ঐখোয়গী চৎনবীনা মসিবু মীওইবা খুন্নাইদগী হেন্না ৱাংনা শিবা নাইদবা থাক্তা পুখৎলিবনি। সামবেদবু বেদশিংগী মরক্তা ঐখোয়গী তোঙানবা ঈশৈ নোংমাইগী হৌরকফম্নি হায়রিবনি। ইমা সরস্বতীগী বীনা, ভগ্বান কৃষ্ণগী বাশি, নত্ত্রগা ভোলেনাথকী দমরু ওইরো, ঐখোয়গী লাইনিংথৌ অমসুং লাইরেম্বীশিংগা ঈশৈ নোংমাইগা মরী লৈনদুনা লাক্লি। ঐখোয় ভারত মচাশিংনা হীরম খুদিংদা ঈশৈ নোংমাই উবা ফংই। তুরেল ইচেলগী ৱা ৱা চেনবা মখোল ওইরো, নোংলিক মখোল, উচেকশিংনা খোংবা নত্ত্রগা নুংশিৎ শিৎপগী মখোল ওইরো, ঐখোয়গী সিভিলাইজেসনগী হীরম খুদিংদা ঈশৈ নোংমাই য়াওই। ঈশৈ নোংমাইনা ঐখোয়গী হকচাংবু পোত্থাহনবতা নত্তনা, ঐখোয়গী পুক্নিংবুসু লৈতাহল্লি। ঈশৈ নোংমাইনা ঐখোয়গী খুন্নাইবু অমত্তা ওইহন্নবা শম্নরি। ভঙ্গরা নত্ত্রগা লাবনীনা হরাও-নুংঙাইবগী মতৌ চেল্লি, রবিন্দ্র সঙ্গিৎনা ঐখোয়গী পুক্নিং শুমহৎলি। লৈবাক শিনবা থুংবগী ত্রাইবেলশিংগীসু মশাগী ঈশৈ নোংমাইগী তোঙানবা চৎনবী অদুমক লৈজৈ। মখোয়না ঐখোয় মশেল অমসুং মহৌশা ইমাগা নুংশি চাননা লৈমিন্নবগী ইথিল পী হায়না প্রধান মন্ত্রীনা মীয়ামদা নিংশিংহনখি।

ভারত্তগী মাইল লিশিং কয়া লাপ্না লৈবা খা-অমেরিকাগী লৈবাক, গুয়ানাগুম্বা লৈবাক্তা ভারতকী চৎনবী অমসুং নাৎকী ইথিল য়ৌবগী হীরমদা প্রধান মন্ত্রীনা পাউদমখি। ১৯ অমসুং ২০শুবা চহি-চাদা ঐখোয়গী লমদমগী মীওই মশিং য়াম্বনা গুয়ানাদা চৎখি। মখোয়না ভারতকী তোঙানবা চৎনবী কয়াসু মফমদুদা মখোয়গা লোয়ননা পুখি। খুদম ওইনা হায়রবদা, ঐখোয়না ভারত্তা হোলি পাংথোকপগুম্না, গুয়ানাদসু হোলি কুহ্মৈগী মচুশিংনা নুংঙাই য়াইফবগী ইথিল শন্দোকই। হোলিগী মচু লৈবা খুদিংদা, ফাগুৱাগী ঈশৈ নোংমাইসু অদুম লোয়নৈ। গুয়ানাগী ফাগ্বাদা ভগ্বান রাম অমসুং কৃষ্ণগা মরী লৈনবা লুহোং-খোংদোংবগী ঈশৈ শকপগী অখন্নবা চৎনবী লৈ। হায়রিবা ঈশৈশিং অসি চাউতাল কৌই। ঐখোয়না মফমসিদা শকপগুম্না, মখোয়সু মান্নবা ত্যুন মখল অমসুং অৱাংবা পিৎচতা শকই। মসিদা নত্তনা, গুয়ানাদা চাউতালগী চাংয়েংনবসু পাংথোকই। মান্নবা মতৌ ওইনা, ভারত মচা অয়াম্বনা, উত্তর প্রদেশ অমসুং বিহারগী মীওইশিংনা মরু ওইনা, ফিজিদসু চৎনৈ। মখোয়সু রামচরিতমানস্তগী লৌথোকপা কপ্লেতশিংনা মরু ওইনা, নাৎকী ভজন-কির্তন শকই। মখোয়না ফিজিদা ভজন-কির্তনগা মরী লৈনবা মন্দালী কয়া অমসু শেম্লি। রমায়ানা মন্দালিগী মিং লৌদুনাশেম্বা ভজন-কির্তন মন্দালি লিশিং অনি হেনবসু ফিজিদা ঙসিগী মতমসিদসু লৈরি অমসুং খুঙ্গং অমসুং লৈকায় খুদিংদা উবসু ফংগনি।

ঐখোয়গী লৈবাক অসিদা মালেমগী খ্বাইদগী অরীবা চৎনবী লৈ হায়না ঐখোয়না চাউথোকচরি হায়না প্রধান মন্ত্রীনা হায়খি। অদুনা, হায়রিবা নাৎকী চৎনবী অমসুং লৌশিং কয়াসিবু ঙাক শেনবা, খুমাং চাউশিলহনবা অমসুং য়ারিবমখৈ চাউখৎহনবা হায়বসি ঐখোয়গী থৌদাং ওইরে। ঐখোয়গী অৱাং নোংপোক রাজ্য, নাগালেন্দগী মরুপ খরনা মান্নবা থৌওংসিমক পাংথোক্লি। নাগালেন্দগী নাগা খুন্নাইগী মীওইশিংনা মখোয়গী মসিগুম্বা চৎনবী কন্নবগীদমক্তা, অমসুং মহৈশিং অসিবু মখা তারকপা চারোন শুরোন্দা থংথনবগীদমক্তা লমদমসিগী মীয়াম্না লুপ অমা শেম্লে, লুপসিগী মমিংনা ‘লিদি-সিরো-উ’ কৌই। লুপ অসিনা নাগাগী মাঙখিগদৌরবা চৎনবগীগী ফজরবা শক্তাকশিংবু য়োকখৎনবা থৌদাং লৌরি। খুদম ওইনা হায়রবদা, নাগাগী খুনুং ঈশৈ অসিমক য়াম্না নিংথিরবা জোনর অমনি। লুপ অসিনা নাগা ম্যুজিক এল্বম লোঞ্চ তৌবগী থবক তৌবা হৌখ্রেমখোয়না হৌজিক ফাওবদা মসিগুম্বা এল্বম অহুম পুথোকখ্রে। মখোয়না খুনুং ঈশৈ অমসুং জগোইগা মরী লৈনবা ৱর্কশোপ কয়াসু শীন-লাঙলি। হীরম অসিগী মতাংদা মখোয়না নহাশিংদসু ত্রেনিং পীরি। মসিদা নত্তনা, নাগাগী চৎনবী মতুং ইন্না ফিরোল শেম-শাবা, তুবগী ত্রেনিংসু পীরি। অৱাং নোংপোক লমদমদা তোঙানবা পোত্থোক কয়া ৱাদগী শাবগী চৎনবী লৈ। হৌজিক্কানগী নহাশিংদা ৱাগী পোত্থোক শাবগী ত্রেনিংসু পীরি। পুম্নমক অসিনা নহাশিংগা মখোয়গী চৎনবীগা নক্ননা লৈহনবদা তেংবাংবতা নত্তনা, মখোয়গীদমক্তা থবক্কী অনৌবা খুদোংচাবা কয়াসু শেম্বীরি। লিদি-সিরো-উদা লৈরিবা মীওইশিংনা মীওই মশিং য়াম্বদা নাগাগী খুনুংগী চৎনবীগী মতাংদা খঙহন্নবা কন্না হোৎনরি।

ঐখোয় খুদিংনা মসিগুম্বা থবকশিং পাংথোক্তুনা ঐখোয়গী চৎনবী অমসুং নাৎ কন্নবা ইশা-ইশাগী লমদমশিংদা হোৎনসি হায়না প্রধান মন্ত্রীনা মীয়ামদা হায়খি।

প্রধান মন্ত্রী, শ্রী নরেন্দ্র মোদীনা মহাক্কী মন কী বাতকী তোঙানবা তাঙ্ককশিংদা এক ভারত শ্রেস্থ ভারতনা ঐখোয়গী লৈবাক্কী চাউথোকচীংঙাইনি হায়না কয়ারক হন্না ফোংদোকখিবসু লৈখ্রবনি।

*******



(Release ID: 1879787) Visitor Counter : 139