এক্সেলেন্সীশিং,

মরূপশিং,

ঐহাক্কী মরুপ, রাস্ত্রপতি জোকোৱিবু অমুক্কা হন্না থাগৎচনীংলি। মহাক্না হৌজিক্কী অরুবা মতমসিদা ফাওবা জি.২০বু নীংথিনা লুচিংবীখি। বালি দিক্লারেসনগী য়ানবা পুরকপগীদমক্তা ঐহাক্না জি.২০ খুন্নাইবুসু ঙসি থাগৎচরি। ইন্দোনেসিয়ানা মখোয়গী জি.২০ প্রসিদেন্সী মনুংদা পায়খৎখিবা মশক নাইবা থৌরমশিংবু ভারতনা মখা তানা চত্থহন্নবা শোইদনা হোৎনগনি। বালিগী শেংলবা ইথৎসিদা ঐখোয়না জি.২০ প্রসিদেন্সীগী থৌদাং লৌবসিসু য়াম্না য়াইফরবা তাঞ্জা অমনি। ভারত অমসুং বালিগী মরক্তা লিরবা মরী লৈনদুনা লাক্লি।

এক্সেলেন্সীশিং,
মালেম অসিনা জিওপোলিতেকল ওইবা উংখৎনবা, শেন্মিৎলোন তপথরকপা, চানবা অমসুং ইনর্জীগী মমল হেনগৎলকপা, অমসুং লাইচৎকী মতম শাংবা চৈথেং কয়াগা মতম অমত্তদা মাইয়োক্নরিবা মতমসিদা ভারতনা জি.২০গী থৌবু লৌরি। মসিগুম্বা মতমসিদা মালেম্না ভারত্তা থাজবা অমগা লোয়ননা য়েংলি। ভারতকী জি.২০ প্রসিদেন্সীনা ইনক্লুসিব, মিৎয়েং শানবা, ৱারেপ চেৎপা অমসুং থবক পাংথোকপদা মিৎয়েং চঙবা ওইগনি হায়না ঐহাক্না ঙসি থাজবা পীজরি।

এক্সেলেন্সীশিং,

মথংগী চহি অমসিদা জি.২০বু অনৌবা ৱাখল্লোন পুথোকপা অমসুং পুন্না পাংথোকমিন্নবা থবকশিংগী খোঙজেল য়াঙখৎহন্নবা মালেমগী শাফু ওইহন্নবা ঐখোয়না লেপ্তনা হোৎনগনি। মহৌশাগী পোত্থোকশিংগী মপু ওইনীংবগী ৱাখল্লোন লৈবনা শিংনবা কয়া ঙসি লৈহল্লি, অমসুং ইনভাইরনমেন্ততা অমাঙ অতা থোকহনবগী মরু ওইবা মরম অমসু মসিনা ওইরি। গ্রহ অসিগী তেক্ত কায়দবা তুংগী মতমগীদমক্তা ত্রস্তী ওইবগী ৱাখল্লোন চেনবনা ৱারোইশিন ওইগনি। এল.আই.এফ.ই., হায়বদি ‘লাইফস্তাইল ফোর ইনভাইরনমেন্ত’ কেম্পেন্না মসিদা য়াম্না চাউবা তেংবাংবা ঙমগনি। মসিগী পান্দমদি সস্তেনেবল লাইফস্তাইলবু মীয়ামগী ইহৌ ওইহনবনি।

এক্সেলেন্সীশিং,

চাউখৎপগী কান্নবশিংবু মীপুম খুদিংনা ফংবা অমসুং মসিদা মীপুম খুদিংনা শরুক য়াবা হায়বসিনা ঙসিগী মতমগী খ্বাইদগী তঙাই ফদবনি। চাউখৎপগী কান্নবা খুদিংবু মীওইবা খুদিংদা মীনুংশি অমসুং শৌগৎপগা লোয়ননা ঐখোয়না য়ৌহনগদবনি। নুপীশিংনা শরুক য়াদনা মালেম্না কৈদৌনুংদা চাউখৎলোই। ঐখোয়গী জি.২০গী এজেন্দা অসিদসু ঐখোয়না নুপীশিংনা লুচিংদুনা চাউখৎপা পুরকপগী হীরমদা অহেনবা মিৎয়েং থমগদবনি। শান্তি অমসুং সেক্যুরিতী লৈতনা, ঐখোয়গী তুংগী চারোন শুরোনশিংনা শেন্মিৎলোন্না চাউখৎলকপা অমসুং তেক্নোলোজীদা ইন্নোভেসন লৈরক্লিবশিংগী কান্নবা লৌবা ঙম্লোই। শান্তি লৈবা অমসুং নুংশি চান্ননা লৈবগী নাকন্দা লৈবা মপাঙ্গল লৈবা পাউজেল অমা জি.২০না পীগদবনি। হায়রিবা হীরমশিং পুম্নমক অসি ঐখোয়গী জি.২০ চেয়রমেন্সিপকী থীম, “পৃথিবী অমা, ইমুং-মনুং অমা, তুংগী মতম অমা” অসিদা য়াওরি।

এক্সেলেন্সীশিং,

জি.২০ প্রসিদেন্সীগী থৌদাং লৌবসি ভারত মচা খুদিংগী চাউথোকচনীংঙাইনি। ঐখোয়না ঐখোয়গী লৈবাক্কী তোঙান-তোঙানবা রাজ্য অমসুং শহরশিংদা জি.২০গী মীফম কয়া পাংথোক্কনি। ঐখোয়গী মীথুংলেনশিংনা ভারতকী তোঙানবা মতৌ চেনবা, ইনক্লুসিব ওইবা চৎনবী অমসুং ইনাক খুনবা নাৎকী মতৌগী নীংথিরবা শক্তম উবা ফংগনি।  ‘গনতন্ত্রগী মমা’ ওইরিবা ভারতকী তোপ-তোপ্পা থৌওং অসিদা অদোম খুদিংনা শরুক য়াবা হায়বসি ঐখোয়গী অপাম্বনি। ঐখোয় পুন্না হোৎনমিন্নদুনা, জি.২০বু মালেমদা অহোংবা পুরকপগী শাফু ওইহনগনি।

অদোম্বু ঐহাক্না হন্না হন্না থাগৎচরি।

দিসক্লেমর: মসিদি প্রধান মন্ত্রীগী ৱারোলগী চাউরাকপা পাউদম্নি। অশেংবা ৱারোলদি হিন্দিদা থমখিবনি।

***