প্রধানমন্ত্রীগী লোইশঙ

প্রধান মন্ত্রীনা তেলঙ্গানাগী রামাগুন্দমদা লুপা করোর ৯৫০০ হেনবগী চাউখৎ-থৌরাংগী প্রোজেক্তশিংগী উরেপ উয়ুং তম্বগা লোয়ননা লৈবাক মীয়ামদা খুৎশিন্নখ্রে


রামাগুন্দমদা লৈবা ফর্তিলাইজর প্লান্ত মীয়ামদা খুৎশিন্নখ্রে

অখঙ-অহৈশিংনা ভারতকী শেন্মিৎলোন্না লেপ্তনা শাহৌ লৌরকপগী মতৌদা নুংঙাইবা ফাওনরি”

“অনৌবা ভারতনা মালেমদা মশাবু মশাদা থাজবা অমসুং চাউখৎপা পাম্বগী শক্তাক্কা লোয়ননা লান্থোক্লি”

“ফর্তিলাইজর সেক্তরনা কেন্দ্র সরকারনা পুকচেল চেংনা থবক তৌবগী খুদম অমা ওইরি”

“এস.সি.সি.এল.বু প্রাইভেতাইজ তৌবগী ৱাহৌদোক অমত্তা কেন্দ্র সরকারনা খন্ন-নৈনদ্রি”

“তেলঙ্গানা সরকারনা এস.সি.সি.এল.দা ৫১% স্তেক লৈ, কেন্দ্র সরকারনা ৪৯% লৈ। কেন্দ্র সরকারনা এস.সি.সি.এল. প্রাইভেতাইজেসন তৌবগা মরী লৈনবা ৱারেপ অমত্তা মশাগী থাক্তা লৌবা য়াদে”

Posted On: 12 NOV 2022 5:49PM by PIB Imphal

প্রধান মন্ত্রী, শ্রী নরেন্দ্র মোদীনা ঙসি তেলঙ্গানাগী রামাগুন্দমদা লুপা করোর ৯৫০০ হেনবগী চাউখৎ-থৌরাংগী প্রোজেক্ত কয়াগী উরেপ উয়ুং তম্বগা লোয়ননা লৈবাক মীয়ামদসু খুৎশিন্নখ্রে। প্রধান মন্ত্রীনা ঙসিগী অঙনবদা রামাগুন্দম ফর্তিলাইজর অমসুং কেমিকেল্স লিমিতেদ (আর.এফ.সি.এল.) প্লান্তসু চৎখি।

ঙসি তিনখিবা মীয়ামদা ৱা ঙাংবদা, প্রধান মন্ত্রীনা ঙসি শঙ্গাবা অমসুং উরেপ উয়ুং তম্লিবা প্রোজেক্তশিংনা লৌউ-শিংউ খুমাং চাউশিলহনবতা নত্তনা থৌওং অসিবু চাউখৎহনগনি হায়খি। মালেম্না নাকল অমদা কোরোনা লাইচৎকা লান্থেংনরি অমসুং লানগী থৌদোক কয়াগী চৈথেংসু ফংলি হায়না প্রধান মন্ত্রীনা হায়খি। প্রধান মন্ত্রীনা মখা তানা হায়খিবদা, “ময়াম অসিগী মরক্তা, ভারতনা মালেমগী শেন্মিৎলোনশিংগী মরক্তা খ্বাইদগী অহুমশুবা চাউবা ওইরগনি হায়না অখঙ-অহৈ কয়ানা হায়রি”। ইং ৯০গী মতমদা, চহি ৩০দা লৌখিবা শাহৌগা মান্নবা চাং অদু মথংগী চহি খরসিদা লৌবা শাহৌগা মান্নরগনি হায়না অখঙ-অহৈশিংনা ফোংদোক্লি হায়না প্রধান মন্ত্রীনা হায়খি। “মসিগুম্বা ৱাখল্লোন অসিগী মরমদি, লৈবাক অসিদা মমাংগী চহি ৮দা লাকখিবা অহোংবশিংনা ওইগনি। ভারতনা মমাংগী চহি ৮ অসিদা থবক তৌবগী থৌওং হোংদোকখ্রে। হায়রিবা মতমসিদা, ঐখোয়না লৈঙাকপগী থৌওংদসু অহোংবা পুরকখ্রে”, মহাক্না হায়খি। পুম্নমক অসি ঐখোয়গী ইনফ্রাস্ত্রকচর, লৈঙাকপগী থৌওং, কারবার তৌবদা হেন্না নুংঙাইহনবা অমসুং ভারতকী মিৎয়েং শানবা খুন্নাইশিংনা ইথিল পীদুনা পুরকপা অহোংবশিংদা উবা ফংই হায়না মহাক্না মখা তাখি।

“অনৌবা ভারতনা মালেমদা মশাবু মশাদা থাজবা অমসুং চাউখৎপা পাম্বগী শক্তাক্কা লোয়ননা লান্থোক্লি”, মহাক্না হায়খি। চাউখৎ থৌরাং হায়রিবা থৌওং অসি লৈবাক অসিদা চহিদা নুমিৎ ৩৬৫নি পাংথোকপা লেপ্তবা মিসন অমনি হায়না প্রধান মন্ত্রীনা হায়খি। লৈবাক মীয়ামদা প্রোজেক্ত অমা হেক খুৎশিন্নখিবগা, অতোপ্পা প্রোজেক্ত অমা খুদক্তা হৌই হায়না মহাক্না মখা তাখি। উরেপ উয়ুং তমখ্রবা প্রোজেক্তশিং খোঙজেল য়াঙনা লোইশিনবদা অহেনবা মিৎয়েং চঙলি অমসুং রামাগুন্দম প্রোজেক্তনা মসিগী ময়েক শেংলবা খুদম অমনি হায়না প্রধান মন্ত্রীনা ফোংদোকখি। রামাগুন্দম প্রোজেক্তকী উরেপ উয়ুং অসিমক প্রধান মন্ত্রীনা ওগস্ত ৭, ২০১৬তা তমখিবনি।

২১শুবা চহি-চাগী ভারতনা অচৌবা প্রোজেক্তশিং লোইশিন্দুনা তুংলমচত্তা চঙশিনবা ঙমগনি হায়না প্রধান মন্ত্রীনা হায়খি। “করিগুম্বা পান্দম্না চাউরবা, ঐখোয়না অনৌবা মেথোদোলোজী পুথোকপা তাই অমসুং অনৌবা ফেসিলিতী কয়া শেম্বা তাই”, প্রধান মন্ত্রীনা হায়খি। ফর্তিলাইজর সেক্তরনা কেন্দ্র সরকারনা পুকচেল চেংনা থবক তৌবগী খুদম অমা ওইরি হায়না মহাক্না হায়খি। ফর্তিলাইজরগীদমক্তা মীরমদা মখা পোল্লিঙৈগী মতম নিংশিংলদুনা, প্রধান মন্ত্রীনা হায়খিবদা, রামাগুন্দম প্লান্ত য়াওনা অতোপ্পা প্লান্ত কয়া অমা শোত্থবা তেক্নোলোজী শিজিন্নবনা মরম ওইরগা হান্না লৈরম্বা প্লান্ত কয়া নমদুনা থিংজিনহনবা তাখিবনি। অভ্বাংবা মমলদা মীরমদগী পুশিল্লকপা য়ুরিয়াবু লৌমীশিংদা য়ৌহনবগী মহুত্তা অতোপ্পা মরমগীদমক্তা ব্লেক মার্কেত্তা থাদোকপগী চৎনবী লৈরম্মি হায়না মহাক্না মখা তাখি।

 

হার ফংবা হেনগৎহন্নবা পায়খৎপা থৌরাংশিং

  • য়ুরয়াবু ১০০%গী চাংদা নীম কোতিং তৌবা
  • থিংদুনা লৈরম্লবা অচৌবা প্লান্ত ৫ হাংদোকপা, মসিনা য়ুরিয়া তোন লাখ ৬০মুক পুথোক্কনি
  • নেনো য়ুরিয়া খুমাং চাউশিলহনবা
  • পেন-ইন্দিয়াগী অমত্তা ওইবা ‘ভারত-ব্রান্দ’
  • হার নিংথিজনা ফংহন্নবগীদমক্তা চহি ৮ অসিদা লুপা করোর লাখ ৯.৫ চাদিং তৌখ্রে
  • হন্দকী চহিমক্তদা লুপা করোর লাখ ২.৫দগী হেন্না চাদিং তৌখ্রে
  • য়ুরিয়া বেগ অমগী মালেমগী মমলনা লুপা ২০০০ ওইবদা লৌমীশিংনা শুপ্নগী লুপা ২৭০দা লৈরি
  • দি.এ.পি. ফর্তিলাইজর বোরা খুদিংদা লুপা ২৫০০গী সবসিদী ফংলি
  • ফর্তিলাইজরগী মতাংদা নিংথীনা ৱারেপ লৌবা ঙমহন্নবগীদমক্তা পীবা সোইল হেল্থ কার্দ
  • পি.এম. কিসান সম্মান নিধীগী মখাদা লুপা করোর লাখ ২.২৫ থাখ্রে

 

ইং ২০১৪গী মতুংদা কেন্দ্র সরকারনা পায়খৎখিবা অহানবা খোঙথাংদি য়ুরিয়াবু ১০০% নীম কোতিং তৌবা অমসুং ব্লেক মার্কেত থিংখিবনি। সোইল হেল্থ কার্দনা লৌমীশিংগী মফমদা মখোয়গী লবুক্কী তঙাই ফদনা চঙগদবা হারগী চাং খঙহল্লি হায়না মহাক্না মখা তাখি। চহি কয়াদগী লোন্দুনা লাক্লবা অচৌবা প্লান্ত মঙা অমুক হন্না হাংদোক্লে। উত্তর প্রদেশকী গোরখপুর প্লান্তনা প্রদক্সন হৌখ্রে অমসুং রামাগুন্দম প্লান্ত অসিসু লৈবাক মীয়ামদা হৌজিক খুৎশিন্নরে। প্লান্ত মঙা অসিনা নিংথিনা মথৌ পাংথোক্লকপা মতমদা লৈবাক অসিনা য়ুরিয়া তোন লাখ ৬০ ফংগনি অমসুং মসিনা মরম ওইরগা লৈবাক্না ইম্পোর্ত্তা শেল য়াম্না তুংশিনবা ঙম্লগনি অমসুং য়ুরিয়াসু মরাং কায়না ফংলগনি। রামাগুন্দম ফর্তিলাইজর প্লান্তনা তেলঙ্গানা, আন্ধ্র প্রদেশ, কর্নাতকা, ছতিসগর অমসুং মহারাস্ত্রাগী লৌমীশিংদা য়াম্না তেংবাংগনি হায়না মহাক্না ফোংদোকখি। প্লান্ত অসিনা মনাক নকপদা লৈবা মফমশিংগী শেন্মিৎলোন চাউখৎহনবদা তেংবাংগনি অমসুং লমদমশিং অসিগী লোজিস্তিক্কা মরী লৈনবা কারবারশিংদা শাফু য়াম্না পীগনি। “কেন্দ্র সরকারনা থাদখিবা লুপা করোর ৬০০০না তেলঙ্গানাগী নহাশিংগী মফমদা লুপা লিশিং কয়া কয়াগী কান্নবা পীগনি”, মহাক্না হায়খি। প্রধান মন্ত্রীনা য়ুরিয়াগী হীরমদা তেক্নোলোজীগা মরী লৈননা পাংথোকখিবা থৌওং কয়াগী মতাংদা পনখি অমসুং নেনো য়ুরিয়ানা হীরমসিদা অচৌবা অহোংবা অমা পুরক্কনি হায়না ফোংদোকখি। প্রধান মন্ত্রীনা আত্মানির্ভরতাদা অহেনবা মিৎয়েং চঙলদুনা লাইচৎ অমসুং লান্না মরম ওইরগা ফর্তিলাইজরগী মালেমগী মমল ৱাংখৎলকপা অমসুং লৌমীশিংদা য়ৌহনবা ঙমদবগী ৱাফম পুথোকখি। লুপা ২০০০ পীবা য়ুরিয়া বোরা অমবু লৌমীশিংদা লুপা ২৭০দা ফংহল্লি। মালেমগী কৈথেলদা লুপা ৪০০০ পীবা দি.এ.পি. বোরা অমবু সবসিদী পীরবা মতুংদা লুপা ২৫০০দা ফংহল্লি।

প্রধান মন্ত্রীনা মখা তানা পাউদমখিবদা, “মমাংগী চহি ৮দা, লৌমীশিংনা হারগী অৱাবা মাইয়োক্নদনবা হায়দুনা কেন্দ্র সরকারনা চাউরাকপা লুপা করোর লাখ ১০ থাদখি”। হন্দকী চহিমক্তদা, ভারতকী লৌমীশিংদা হার মরাং কায়না ফংহন্নবগীদমক্তা কেন্দ্র সরকারনা লুপা করোর লাখ ২.৫দগী হেন্না চাদিং তৌখ্রে হায়না মহাক্না মখা তাখি। কেন্দ্র সরকারনা পি.এম. কিসান সম্মান নিধীগী মখাদা লৈবাক্কী লৌমীশিংগী বেঙ্ক একাউন্ততা চাউরাকপা লুপা করোর লাখ ২.২৫ হাপখ্রে হায়না প্রধান মন্ত্রীনা পনখি। ফর্তিলাইজরগী তোঙনবা ব্রান্দ কয়া কৈথেলদা ফংবা অমসুং মসিনা লৌমীশিংদা চমম্নবা পোকহনবগী ৱাফম প্রধান মন্ত্রীনা থমখি। “ভারত্তা য়ুরিয়া অসি হৌজিক ব্রান্দ অমখক্তা ফংলগনি, ব্রান্দ অসিদি ভারত ব্রান্দ হায়না কৌগনি। মসিগী মগুন অমসুং মমল ঐখোয়না লেপ্লে”, মহাক্না হায়খি। সেক্তর অসিবু সরকারনা মতৌ করম্না শেমদোক্লিবগে, অপীকপা লৌমীশিংগীদমক্তা অখন্ননা, হায়বসি থৌওং অসিনা ময়েক শেংনা তাক্লি।

কন্নেক্তিবিতী ইনফ্রাস্ত্রকচরগী মতাংদা শিংনবা লৈবশিংগী ৱাফমসু প্রধান মন্ত্রীনা পনখি। রাজ্যশিংদা মোদর্ন হাইৱে, এয়রপোর্ত, ৱাতরৱে, রেলৱে অমসুং ইন্তর্নেত হাইৱে লৈহন্দুনা শিংনবশিং অসিগী ৱারোইশিন পুরকপদা সরকারনা তেংবাংলি। থৌওং অসিনা পি.এম. গতিশক্তি নেস্নেল মাস্তর প্লান্দগী পাঙ্গল ফংলি। নিংথীনা পাউ ফাওনদুনা অমসুং তেংবাংনদুনা থবক তৌমিন্নবগী থৌওংশিংনা প্রোজেক্তশিং লোইশিনবদা মতম শাংনা চঙহন্দ্রে হায়না মহাক্না হায়খি। ভদ্রদ্রী কোথাগুদেম জিলা অমসুং খম্মাম শম্নহনবা রেলৱে লাইন অসি শুপ্নগী চহি ৪দা শাখিবনি অমসুং মসিনা লোকেল মীয়ামদা মতেং য়াম্না পাংগনি হায়না মহাক্না হায়খি। মান্নবা থৌওং ওইনা, ঙসি হৌগদৌরিবা হাইৱে অহুম অসিনা ইন্দস্ত্রী, চু অমসুং য়াইঙং থাবশিংদা য়াম্না কান্নবা পীগনি।

লৈবাক অসিদা চাউখৎ থৌরাংগী থবকশিং মায় পাকপা হেক হৌরকপগা তোকঙা শন্দোকপগী থৌওং হৌবগী মতাংদা মিৎয়েং চঙলদুনা, প্রধান মন্ত্রীনা কাঙবু খরনা মশাগী ওইজবগীদমক্তা অয়েৎপা অদুম পীরকই হায়খি। ‘সিঙ্গারেনি কোল্লাইরিস কম্পেনী লিমিতেদ –এস.সি.সি.এল. অমসুং তোঙানবা কোল মাইন খরগী মতাংদা মান্নবা তোকঙা খরা হৌজিক তেলঙ্গানাদা শন্দোক্লি হায়না মহাক্না মখা তাখি। “তেলঙ্গানা সরকারনা এস.সি.সি.এল.দা ৫১% স্তেক লৈ, কেন্দ্র সরকারনা ৪৯% লৈ। কেন্দ্র সরকারনা এস.সি.সি.এল. প্রাইভেতাইজেসন তৌবগা মরী লৈনবা ৱারেপ অমত্তা মশাগী থাক্তা লৌবা য়াদে”, হায়না প্রধান মন্ত্রীনা শেংদোকখি অমসুং এস.সি.সি.এল.বু প্রাইভেতাইজ তৌবগী ৱাহৌদোক অমত্তা কেন্দ্র সরকারনা খন্ন-নৈনদ্রি হায়না মখা তাখি।

কোল মাইনগা মরী লৈননা লৈবাক অসিদা অয়েৎপা পীদুনা লাকখিবা লুপা করোর লিশিং কয়াগী ৱাথোক কয়া প্রধান মন্ত্রীনা নিংশিংখি। মসিনা মরম ওইরগা ৱর্কর, লাইরবা অমসুং মাইনশিং অসি লৈবা মফমশিংনা য়াম্না চাউয়া মাঙজবা ফংখি হায়না মহাক্না হায়খি। লৈবাক অসিদা কোয়লাগী তঙাই ফদবা হেনগৎলক্লিবা অসি য়েংলদুনা নুং-পান ফাওনা উহন্দুনা কোল মাইনশিংগী ওক্সন পাংথোক্লি হায়না মহাক্না হায়খি। “ঐখোয়গী সরকারনা মিনরেল লৌথোক্লিবা মফমশিংদা লৈবা মীয়ামদা কান্নবা পীনবগীদমক্তা দি.এম.এফ., হায়বদি, দিস্ত্রিক্ত মিনরেল ফন্দ শেমখ্রে। ফন্দ অসিগী মখাদা রাজ্যশিংদা লুপা করোর লিশিং কয়া পীথখ্রে”, মহাক্না মখা তাখি।

প্রধান মন্ত্রীনা মহাক্কী ৱারোল লোইশিনবা ওইনা হায়খি, “ঐখোয়না সবকা সাথ, সবকা বিকাস, সবকা বিশ্বাস অমসুং সবকা প্রয়াসকী মন্ত্রগা লোয়ননা তেলঙ্গানাবু তুংলমচত্তা পুবা পাম্মি”।

তেলঙ্গানাগী মুখ্য মন্ত্রী, শ্রী কে. চন্দ্রসেখর রাও, রাজ্যপাল, দাঃ তামিলিসাই সৌন্দরাজন, কেন্দ্র মন্ত্রী, জি. কিশন রেদ্দী, এম.পি. অমসুং এম.এল.এ. কয়ানা ঙসিগী থৌরমদা শরুক য়াখি। কন্সতিত্বেন্সী সিত ৭০গী লৌমীশিংগা ঙসিগী থৌরমগা মরী লৈনহনখি।

 

বেকগ্রাউন্দ

প্রধান মন্ত্রীনা রামাগুন্দমদা লুপা করোর ৯৫০০ হেন্বগী তোঙান তোঙানবা প্রোজেক্তশিং মীয়ামদা কত্থোক্কনি অমদি উরেপ উয়ুং তমগনি‍। মহাক্না রামাগুন্দমদা ফর্তিলাইজর প্লান্ত লৈবাক মীয়ামদা কত্থোক্কনি‍। রামাগুন্দম প্রোজেক্তকী উরেপ উয়ুংসু প্রধান মন্ত্রীনা ওগস্ত ৭, ২০১৬দা তমখিবনি‍। ফর্তিলাইজর প্লান্ত অসি অমুক হিংগৎহনবদা মথৌ হাপ্লিবা অসি য়ুরিয়া পুথোকপদা ইরোমদোম লেপচবা হায়বা প্রধান মন্ত্রীগী মীৎয়েঙ অদুননি‍। রামাগুন্দম প্লান্তনা লমদমসিগী ওইবা নীম কোতেদ য়ুরিয়া চহিদা এল.এম.তি. ১২.৭ পুথোকপগী মতিং লৈগনি‍।

প্রোজেক্ত অসি, নেস্নেল ফর্তিলাইজর্স লিমিতেদ (এন.এফ.এল.), ইঞ্জিনিয়র্স ইন্দিয়া লিমিতেদ (ই.আই.এল.) অমদি ফর্তিলাইজর কোর্পোরেসন ওফ ইন্দিয়া লিমিতেদ (এফ.সি.আই.এল.) অহুমগী জোইন্ত ভেঞ্চর অমা ওইরিবা রামাগুন্দম ফর্তিলাইজর এন্দ কেমিকেল্স লিমিতেদ (আর.এফ.সি.এল.)গী মখাদা পায়খৎপনি‍। আর.এফ.সি.এল.দা লুপা করোর ৬৩০০ হেন্না থাদদুনা নিউ এম্মোনিয়া-য়ুরিয়া প্লান্ত লিংখৎনবগী থৌদাং শিন্নরি‍। আর.এফ.সি.এল. প্লান্ত অসিদা পীগদৌরিবা গ্যাস জগদিসপুর – ফুলপুর – হল্দিয়া পাইপলাইনগী খুত্থাঙদা ফংহনগনি‍।

প্লান্ত অসিনা তেলঙ্গনা লোয়ননা অন্ধ্র প্রদেশ, কর্নাতকা, ছত্তিসগর অমদি মহারাস্ত্র স্তেতকী লৌমীশিংদা মরাং কায়না অমদি মতম চানা য়ুরিয়া হার ফংহনবা ঙম্লগনি‍। প্লান্ত অসিনা হার মরাং কায়না ফংহনবতা নত্তনা লম্বী থোং, রেলৱে, এংসিলরী ইন্দস্ত্রীনচিংবা চাওখৎহনবা য়াওনা লমদম অদুগী মপুং ওইবা শেন্মিৎলোন চাওখৎহনবদসু চাউনা কান্নহল্লগনি‍। মসিগী মথক্তা, লমদম অসিনা ফেক্তরীশিংগীদমক তোঙান তোঙানবা পোৎলমশিং ফংহন্নবগীদমক এম.এস.এম.ই. ভেন্দরশিং চাওখৎহনবদসু কান্নরগনি‍। আর.এফ.সি.এল.গী ‘ভারত য়ুরিয়া’না মপান্দগী হার পুশিল্লকপা হন্থহনবতা নত্তনা লমদমদুগী লৌমীশিংদা মতম চানা হার ফংহন্দুনা অমদি সর্ভিস ফংহন্দুনা থবক থৌরম হেনগৎহন্দুনা শেন্মিৎলোন্দা চাওনা কান্নহনগনি‍।

প্রধান মন্ত্রীনা লুপা করোর ১০০০রোম চঙনা শেমগৎপা ভদ্রচলম রোদ – সত্তুবল্লী রেল লাইনসু লৈবাক মীয়ামদা কত্থোক্কনি‍। লুপা করোর ২২০০ হেন্না চঙনা শেমগৎকদবা তোঙান তোঙানবা প্রোজেক্তশিং মমিং ওইনা পল্লবদা এন.ঐচ.-৭৬৫দি.জি.গী মেদক-সিদ্দিপেৎ-এল্কাতুর্থী সেক্সন; এন.ঐচ.-১৬১.বি.বি.গী বোধন-বসর-ভৈন্সা সেক্সন; এন.ঐচ.৩৫৩সি.গী সিরোঞ্চাদগী মহাদেবপুর সেক্সনগী উরেপ উয়ুংসু তমগনি‍।

Happy to be in Ramagundam. Addressing a programme at launch of various development works. https://t.co/f86T8uVT1Z

— Narendra Modi (@narendramodi) November 12, 2022

Experts around the world are upbeat about the growth trajectory of Indian economy. pic.twitter.com/Q3nZbR4L4C

— PMO India (@PMOIndia) November 12, 2022

आज विकसित होने की आकांक्षा लिए, आत्मविश्वास से भरा हुआ नया भारत दुनिया के सामने है। pic.twitter.com/k9mXNlTfGa

— PMO India (@PMOIndia) November 12, 2022

For us, development is an ongoing process. pic.twitter.com/cQvtAbrTYu

— PMO India (@PMOIndia) November 12, 2022

Neem coating of urea and Soil Health Cards are initiatives which have greatly benefitted our hardworking farmers. pic.twitter.com/1wONSVZKar

— PMO India (@PMOIndia) November 12, 2022

One Nation, One Fertilizer. pic.twitter.com/05ooWPqtSw

— PMO India (@PMOIndia) November 12, 2022

*****



(Release ID: 1875486) Visitor Counter : 167