নমস্কার!

অদোম পুম্নমকপু দিৱালী অমসুং অনৌবা চহিগী য়াইফ পাউজেল পীরি। অনৌবা চহিসিদা অদোম পুম্নমক্কা তেক্নোলোজীগী মতেংদগী উন্নবা ফংলি, অনৌবা চহিনা অদোমগী পুন্সিদা শান্তি অমসুং অমত্তা ওইবগী ৱাখল্লোন পুরকপা ওইসনু হায়না ঐহাক্কী গুজরাতকী নুংশিরবা ইচিল ইনাওশিংগীদমক্তা মপুগী মফমদা নিজরি।

অর্সেলর মিত্তল নিপ্পোন স্তীল ইন্দিয়াগী হজিরা প্লান্ত পাকথোক চাউথোক্লিবসিগীদমক্তা অদোম পুম্নমকপু থাগৎচরি।

স্তীল প্লান্ত অসিগী খুত্থাংদগী ইনভেস্তমেন্ত লাকপদা নত্তনা, তুংগী খুদোংচাবা কয়াগী থোঙ অমসু হাংলি। লুপা করোর লিশিং ৬০গী ইনভেস্তমেন্ত লাকপনা গুজরাত অমসুং লৈবাক্কী নহাশিংদা থবক্কী খুদোংচাবা কয়া পীগনি। প্লান্ত পাকথোক চাউথোক্লবা মতুংদা হজিরাগী প্লান্ত অসিগী ক্রুদ স্তীল পুথোকপগী চাংনা মিলিয়ন তোন ৯দগী হেনগত্তুনা মিলিয়ন তোন ১৫ ওইরগনি। ঐহাক্না লক্ষ্মি মিত্তলজী, ভাই অদিত্য অমসুং মহাক্কী তীম্বু থাগৎলি।

মরুপশিং,

অমৃত কালদা খোঙদারবা ঐখোয়গী লৈবাক্না ইং ২০৪৭ ফাওবদা চাউখৎপা ভারত অমা ওইহনবগী পান্দম ফংহন্নবা হৌজিক চঙশিল্লি। লৈবাক্কী চাউখৎ থৌরাংগী খোঙচৎ অসিদা লৈরিবা স্তীল ইন্দস্ত্রীগী থৌদাং কয়া হৌজিক মপাঙ্গল হাপকদৌরে। মসিগী মরমদি, লৈবাক অমদা স্তীল সেক্তরনা মপাঙ্গল লৈখৎলকপা মতমদা, ইনফ্রাস্ত্রকচর সেক্তরসু মপাঙ্গল লৈরক্কনি। স্তীল সেক্তরনা চাউখৎলকপা মতমদা, লম্বী-শোরোক, রেলৱে, এয়রপোর্ত অমসুং হিথাংফম হেন্না চাউখৎলক্কনি। স্তীল সেক্তরনা চাউখৎলকপা মতমদা, কনস্ত্রক্সন, ওতোমোতিব সেক্তরদা অনৌবা দাইমেন্সন কয়া লৈরক্কনি। অদুগা, স্তীল সেক্তরগী মতিক-মগুন হেনগৎলকপা মতমদা, দিফেন্স, কেপিতেল গুদ অমসুং ইঞ্জিনিয়রিং প্রদক্তশিং চাউখৎপদা অহেনবা পাঙ্গল হাপকৎলক্কনি। মসিদা নত্তনা, ঐখোয়না হৌজিক ফাওবদা আইরন ওর এক্সপোর্ত তৌদুনা পেন্থোক্লম্মি। অদুগা, শেন্মিৎলোনগী চাউখৎ থৌরাংগীদমক্তা ঐখোয়গী নাক্তা লৈরিবা লেন্দ এসেতশিংগী ভেলুএসন তৌবনা য়াম্না মরু ওইবা হীরম ওইরি। অদুনা, মসিগুম্বা স্তীল প্লান্ত পাকথোক চাউথোকপনা মরম ওইরগা, ঐখোয়গী লৈবাক্তা আইরন ওর নীংথিনা অমসুং চুম্না শিজিন্নবগী ফিভম লৈরক্কনি। লৈবাক্কী নহাশিংদা থবক পীগনি, মালেমগী কৈথেলদা ভারতকী স্তীলগী মফম কনবা ঙমগনি। স্তীল প্লান্ত অসি চাউথোকপা খক্তা নত্তনা অনৌবা তেক্নোলোজী কয়াসু মসিগা লোয়ননা লাক্কনি হায়না ঐহাক্কী ইফমদা পাউদম্লে। হায়রিবা তেক্নোলোজী অসিনা ইলেক্ত্রিক গারি, ওতোমোবাইল অমসুং মেন্যুফেকচরিংগী অতোপ্পা সেক্তর কয়াদা মতেং য়াম্না পাংগনি। অর্সেলর মিত্তল নিপ্পোন স্তীল ইন্দিয়াগী প্রোজেক্ত অসিনা মেক ইন ইন্দিয়াগী পান্দম ফংহনবদা মশক থোকপা তেংবাং ওইগনি হায়বগী ঐহাক্না থাজবা থম্লি। চাউখৎপা অমসুং মরোমদোম লেপচবা ঙম্বা ভারতকীদমক্তা ঐখোয়না হোৎনরিবা কয়াসিদা মসিনা লৈবাক্কী স্তীল সেক্তরদা পাঙ্গল হাপকনি। 

মরুপশিং,

ঙসিদি, মালেম্না ভারত্তা থাজবা কয়াগা লোয়ননা য়েংলি। ভারতনা মালেমগী মেন্যুফেকচরিংগী খ্বাইদগী চাউবা হব ওইবগী মাইকৈদা খোঙজেল য়াঙনা চঙশিল্লি। সরকারনা সেক্তর অসি চাউখৎহন্নবগীদমক্তা তঙাই ফদবা পোলিসী ইনভাইরনমেন্ত শেমগৎনবা খোঙফম চেৎনা হোৎনরি। ভুপেন্দ্র ভাই পতেলগী লুচিং মখাদা পুরক্লিবা অনৌবা ইন্দস্ত্রীএল পোলিসী অসিগীদমক্তা ঐহাক্না গুজরাত সরকারবু থাগৎলি, গুজরাতপু মেন্যুফেকচরিং হব ওইহনবগী মাইকৈদা পোলিসী অসিনা মশক থোক্না মতেং পাংগনি।

মমাংগী চহি ৮দগী সরকারনা হোৎনরকখিবা কয়ানা মরম ওইরগা, ভারতকী স্তীল ইন্দস্ত্রীনা মালেমগী খ্বাইদগী অনিশুবা চাউনা স্তীল পুথোকপা ইন্দস্ত্রী ওইরে। ইন্দস্ত্রী অসিনা চাউখৎ থৌরাংদা তেংবাংবা ঙম্বগী মশিং থিঙমদ্রবা খুদোংচাবা লৈ। সরকারগী পি.এল.আই. স্কিমদগী মসিনা হেন্না চাউখৎপগী অনৌবা লম্বী কয়া হাংলে, আত্মানির্ভর ভারতকী খোঙজংদা অহেনবা মপাঙ্গল হাপ্লে। ঐখোয়না হাই গ্রেদ স্তীল পুথোকপা হেনগৎপা অমসুং ইম্পোর্তকী মখা পোনবা হন্থহনবগী পান্দমদা মসিনা তেংবাংলি। মসিগুম্বা হাই গ্রেদ স্তীলশিং অসিবু ক্রিতিকেল অমসুং স্ত্রেতজিক এপ্লিকেসনশিংদা শিজিন্নবগী চাংসু হেনগৎলে। আই.এন.এস. বিক্রান্তনা অদোমগী মাঙদা খুদম ওইনা লেপ্লি। এয়রক্রাফ কেরিয়র শাবদা চঙবা স্তীলবু ঐখোয়না মীরমদগী পুশিল্লকপা ইম্পোর্তকী মখা পোল্লম্মি। লৈবাক ঙাক শেনবগী থবক মপাঙ্গল লৈহন্নবা অতোপ্পা লৈবাক্কী অয়াবা লৌবগী মথৌ তারম্মি। মসি অফবা থৌওং নত্তে, মসি চুমথোক্নবগীদমক্তা ঐখোয়না আত্মানির্ভর ওইবগী মথৌ তাই। অদুগা, ভারতকী স্তীল ইন্দস্ত্রীনা অনৌবা শক্তিগা লোয়ননা শিংনবা অসিগা মাইয়োক্নখি। মদুগী মতুংদগী, দি.আর.দি.ও.গী সাইন্তিস্তশিংনা এয়রক্রাফ কেরিয়রদা শিজিন্নগদবা অখন্নবা মখলগী স্তীল পুথোকখি। ভারতকী কম্পেনীশিংনা স্তীল মেত্রিক তোন লিশিং কয়া পুথোকখি। মদুদগী, আই.এন.এস. বিক্রান্তনা লৈবাক্কী মপাঙ্গল অমসুং তেক্নিক শিজিন্নদুনা লমদমসিদা শাদুনা লোইশিনখি। মসিগুম্বা মতিক মগুন হেনগৎহন্নবগীদমক্তা, লৈবাক্না হৌজিক ক্রুদ স্তীল পুথোকপগী চাংবু শরুক অনি থোক্না হেনগৎহন্নবা পান্দম থম্লে। ঐখোয়না হৌজিক ক্রুদ স্তীল মেত্রিক তোন ১৫৪ পুথোক্লি। মথংগী চহি ৯-১০দা মসিদগী হেন্দুনা মেত্রিক তোন ৩০০ পুথোকপনা ঐখোয়গী পান্দম্নি।

মরুপশিং,

মসিগুম্বা চাউখৎ থৌরাংগী পান্দমগা লোয়ননা ঐখোয়না তুংলমচত্তা চঙশিল্লিবসিদা শিংনবা খরগী মতাংদসু চেকশিন্দবা য়াদ্রি। স্তীল ইন্দস্ত্রীগী ওইনদি কার্বন ইমিসন হায়বসিনা য়াম্না চাউবা শিংনবা অমা ওইরি। অদুনা, নাকল অমদনা ঐখোয়না ক্রুদ স্তীল পুথোকপা হেনগৎহনগদবনি, অদুগা নাকল অমদনা ইনভাইরনমেন্তেল ফ্রেনলী ওইবা থৌওং শিজিন্নবদা অহেনবা মিৎয়েং চঙগদবনি। কার্বন ইমিসন থিংবগা লোয়ননা কার্ববু কেপচর তৌদুনা অমুক হন্না শিজিন্নবা য়াহনগদবা প্রদক্সন তেক্নোলোজী পুথোকপদা ভারতনা ঙসি অহেনবা মিৎয়েং চঙলি। লৈবাক অসিদা সর্ক্যুলর ইকোনোমীবুসু পুক্নিং থৌগৎলি। সরকার অমসুং প্রাইভেত সেক্তরনা মাইকৈ অসিদা অমত্তা ওইনা থবক তৌমিন্নরি। এ.এম./এন.এস. ইন্দিয়া গ্রুপকী হজিরা প্রোজেক্তনা গ্রীন তেক্নোলোজী শিজিন্নবদা অহেনবা পুক্নিং চঙলিবসিদা ঐহাক্না য়াম্না নুংঙাইবা ফাওই।

মরুপশিং,

পান্দম অমগীদমক্তা মীয়াম্না অমত্তা ওইদুনা মশাগী লৈজবা পাঙ্গল পুথোক্তুনা হোৎনমিন্নবা মতমদা, পান্দমদু ফংবদা য়াম্না লুবা ওইদে। স্তীল ইন্দস্ত্রীবু অনৌবা থাক্তা পুখৎনবা সরকারনা খোঙফম চেৎলি। প্রোজেক্ত অসিনা সেক্তর অপুনবা অমসুং স্তীল সেক্তর চাউখৎপগী খোঙজেল হেনগৎহনগনি হায়না ঐহাক্না থাজবা থম্লি। ঐহাক্না এ.এম./এন.এস. ইন্দিয়াগী তীম্বু অমুক হন্না থাগৎলি, য়াইফ পাউজেলসু পীজরি।

হন্না হন্না থাগৎচরি!

***